Month: January 2024

January 21, 2024

Om Namaha Shivaya
Aaj Ka Suvichaar 🙏🏻🙏🏻

#2163

             Vann Bhi, Upvan Bhi

Param poojya Guruji,

Vann bhi, upvan bhi
Dono hain mann ke sansaar mein
Kismat achchi hai ki kalyuga mein
Surakshit hain hum Aapke dwaar mein.

Sabse badi tasalli hai
Ki Aap sachchaayee Hain jaante
Varna zamaane ke upvan mein toh
Phool chhoone se bhi aksar chubh jaate hain kaante.

Shukr hai ki Aap bhakt ke bin kahe hee jaate hain sab baat samajh
Varna kitnee aasaani se koi bhi jaata hai kisee bhi baat mein ulajh
Aap maya ke swami hokar bhi maya se parey Hain
Hum insaan Aap swami ke daas hokar maya se ghirey hain.

Jabb jabb dhoop ko karkash kar de maya
Tabb tabb miltee hai Aapki mamta kee chhaaya
Jabb jabb dil ko chot pahunchaaye koi apna ya paraaya
Tabb tabb saahil bann kar sambhaalta hai Aapka ruhaani saaya.

Sir par rehta hai Aapka haath
Aapka ashish sada rehta hai saath
Aagey dikhte rahein Aapke kadmon ke nishaan
Toh unpar chal kar safal hogi hamaari dastaan.

Aapki mehar se satyugi ho jaayein hamaare khayaal
Aapki kripa se satya ho hamaare har karma mein
Toh vann bhi khil kar bann jaayenge upvan
Chaa jaayega shuddhi ka spandan
Sabhi ke antas mein ho jaayega satyuga ka vaas
Toh awashya katt jaayega kalyuga roopi traas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Vann Bhi, Upvan Bhi (01/21/2024)

January 20, 2024

Om Namaha Shivaya
Aaj Ka Suvichaar 🙏🏻🙏🏻

#2162

Na Poochho Kisee Ka Naam

Na poochho kisee ka naam
Na hee mazhab ya zubaan
Guruji Hain Unke Bhagwaan
Yahee hai har sangat kee pehchaan.

Keede makode lagte Hain Guruji ko hum sabhi
Chaahe hum miley ya na miley hon Unhe kabhi
Kiska rishta kitna gehra hai Guruji ke saath
Ye toh jaante Hain kewal Ve Trilokinath.

Guruji kripa karein ki hum na banein bhautik bhaag daud ka hissa
Balki Unke sangg seedhi taar jodey huey jeeyein jeevan ka kissa
Arey, hum toh Guru charnon ke taley kee dhool se bhi tuchh hain
Phir na jaane kyun soch lete hain ki hum bahut kuchh hain.

Har pal atma ko dekh rahein Hain Guruji Paramatama
Bahut zaroori hai karna ahankar ka khatma
Sabr, shukr, aur kshama se karna zaroori hai rooh ka poshan
Tabhi toh Guruji ke noor se chehra bhi rahega roshan.

Rooh kee khoobsoorati se chehra hoga noorani
Safalta kee oar badhegi rooh ke safar kee kahaani
Param poojya Guruji se hai ye fariyaad
Ki hamein is safar mein rooh ko nikhaarna rahe yaad
Vo hee reh jaayegi tann ke khatm ho jaane ke baad
Uskee mukti ke liye anivaarya hai Guruji ka ashirwaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Na Poochho Kisee Ka Naam (01/20/2024)

January 19, 2024

Om Namaha Shivaya
Aaj Ka Suvichaar 🙏🏻🙏🏻

#2161

        Mauka Dete Rahiye, Guruji

Mauka dete rahiye, Guruji
Ki rahoon mai aisee khushnaseeb
Ki har din kisee na kisee bahaane se
Hoti rahoon Aapke aur bhi kareeb.

Kismat khil gayi jo Aapne bulaaya Apne dwaar
Dhanya hui hoon paakar Aapka pyaar
Yoon badhta jaaye Aap par mera aitbaar
Ki har fikr aur fikr ka zikr ho jaaye faraar.

Ichcha poorti keejiye ruhaani dhan kee
Bakhshish deejiye swasth mann tann kee
Shuddhi deejiye mujhe mann kee
Buddhi deejiye samarpan kee.

Aapko har pal karti rahoon prasann
Aise jee loon mai jeevan
Koi rishta na hai Aapke sangg rishte se zyada moolyavaan
Is satya ka mujhe sada rahe dhyan.

Aapke taras kee hoon mai mohtaaj
Meri guzaarish hai, mere sundar Satguru sartaj
Ki mere har vichaar aur nirnay par chale Aapka raaj
Aur hamesha Aapke hukm ke adheen ho mera har kaam kaaj.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mauka Dete Rahiye, Guruji (01/19/2024)

January 18, 2024

Om Namaha Shivaya
Aaj Ka Suvichaar 🙏🏻🙏🏻

#2160

Bhakti, Gyan, Aur Vairaagya

Kalyuga ka daur hai chal raha
Sansaar tezi se hai badal raha
Bhakti ko honei lagi hai udaasi
Mukti nahin rahi is yug mein uskee daasi.

Uske putr gyan aur vairaagya huey achet
Bhakti ko honei lagaa khed
Veh niraash honei lagi
Veh bahut ronei lagi.

Guruji ne diya bhakti ko dilaasa
Ek baar phir jaagi bhakti kee asha
Guruji ne bataaya usey ki Unhonei Apni saari sangat ko bakhsh diya hai simran
Aur Unke har darbar mein ho raha hai Gurbani ka shravan aur manan
Unkee sangat magn ho jaati hai Shiv mahima ke kirtan mein
Vandan ka rass buss jaata hai sangat ke antarmann mein.

Guruji ne dikhaaya bhakti ko
Ki Unke bhakt sewa hain kar rahe
Koi kinkar bannkar, koi daas bannkar aaya hai Unke paas
Jaagrit ho rahi hai har bhakt mein bhakti kee aas.

Bhakti neevan hokar muskuraayee
Phir usey apne putron kee yaad aayi
Guruji ne uskee ye soch jaani
Ve toh Hain Shiv avatari antaryami.

Guruji ne kaha bhakti se
‘Tu vishwaas rakh meri shakti pe
Simran ke dwaara mai sangat ko karaaoonga dhyan
Aur uss dhyan mein unhe honei lagegi gyan kee pehchaan.’

‘Gyan ko jaan kar vairaagya se sangat ho jaayegi parichit
Apnaayegi vo vairaagya jabb saaf honei lagega mann aur chitt
Tu mata, gyan aur vairaagya tere bachche
Atmasaat kar lenge bhakt sachche
Isliye tu chod de ghabraana
Aur abb tu sada rehti muskuraana.’

Guruji ke vachan kee sunehri kiran
Padi gyan aur vairaagya par
Guruji ke prataap ka
Aisa hua unpar asar
Ki ve sachet honei lagey
Aur niraasha kee neend se jagey.

Guruji kee kripa se saari sangat par chadhe bhakti ka ruhaani rangg
Guruji kee mehar se tarr jaaye sabki bhakti ka har angg
Bhakti ke putr swasth rahein Guruji ke sahaare
Bhakti, gyan, aur vairaagya praapt hon sabhi ko Guruji ke dwaare.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bhakti, Gyan, Aur Vairaagya (01/18/2024)

January 17, 2024

Om Namaha Shivaya
Aaj Ka Suvichaar 🙏🏻🙏🏻

#2159

 Guruji Kee Rehmaton Ka Khazaana

Guruji kee rehmaton ka khazaana hai aparampaar
Bhautik toh bahut maamuli baat hai, is khazaane mein hai ruhaaniyat ka bhandar
Guruji karein apni saari sangat se behad pyaar
Aur sabhi par Apni rehmatein barsaate Hain baarambaar.

Guruji maalik Hain saari srishti ke
Hum pyaase hain Unkee rehmat-e-drishti ke
Anginat rehmaton ka khazaana hai Guruji ke dar par
Isliye yahaan chod dein hum ‘kintu parantu’ aur ‘agar magar’
Kismat waalon ko milta hai bulaava yahaan aane ka
Isliye shukrana karein is bahumoolya khazaane ka.

Sach mein ye khazaana hai anmol
Isey bhautikvaad ke taraazu mein nahin sakta koi tol
Sewa, simran, sangat, satsang, dhyan
Jeevan safal karne wala gyan
Antas ka pavitrikaran
Dukh aur duvidha ka haran
Jeevan daan, achchi sehat, dhan daulat, naukari, vyaapaar
Ruhaani unnati, nakaaraatmakta ka sanhaar
Soch aur nazariye mein sudhaar
Sweekriti aur samarpan ka uphaar
Sanvarta nikharta hua ghar parivaar
Atma ka paawan poshan aur uddhaar
In sabse bhi anmol hai Unkee sharan aur Unka deedar.

Kumm padd jaaye hamaari oar se bade se bada shukrana
Aisa bemisaal hai Guruji kee rehmaton ka khazaana
Yoon hee toh nahin har bhakt hai Guruji ka deewaana
Jisne Guruji mein lagan lagaayi, usne ye satya hai jaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Rehmaton Ka Khazaana (01/17/2024)

January 16, 2024

Om Namaha Shivaya
Aaj Ka Suvichaar 🙏🏻🙏🏻

#2158

                 Tumhaara Ghaav

Guru naam ke marham se uttam
Kisee ghaav ke liye nahin koi ilaaj
Tum Guruji ke pyaare ho
Aur Guruji tumhaare sartaj
Unkee mehar se jald hee sanvar jaayenge Tumhaare sabhi bigde huey kaaj.

Karte chalo tum Guruji kee ibadat
Ve kar rahe Hain tum par inaayat
Tumhe khabar nahin iskee, vo alag baat hai
Aisa koi bhakt nahin, Guru nahin jiske saath hai.

Tumhaara ye ghaav abb na dukhta
Toh shaayad ho jaata aur bhi gehra
Dekhna, ye dekhte dekhte bhar jaayega
Kyunki tum par nirantar hai Guruji ka pehra.

Guruji ka naam japp dega tumhe taakat
Ghaav ke dard ko sehne kee
Tumhaara shraddha bhara bhaav paa lega izaazat
Guruji ke dil mein tumhaare rehne kee.

Shaayad tumhe andaaza nahin hai Guruji ke pyaar ka
Varna tum vyarth na ganvaate ek bhi pal ghaav bharne ke intazaar ka
Isey bhi banaa lo Guruji sangg pehle se bhi zyada judne ka sunehra avsar
Aur dard ke baavajood ho jaao bhakti ke maarg par agrasar.

Dhanya hoga har veh dard aur ghaav
Jo badhaayega Guru bhakti ka chaav
Tumhaara ghaav zaroor jaayega bhar
Aur tum awashya jaaoge tarr.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tumhaara Ghaav (01/16/2024)

January 15, 2024

Om Namaha Shivaya
Aaj Ka Suvichaar 🙏🏻🙏🏻

#2157

             Guruji Ke Gaaon Mein

Pehne paayal mai paaon mein
Baithe huey Guruji ke gaaon mein
Jhooloon Unke aanchal kee chhaaon mein
Jhoomteen hui magn hawaaon mein.

Hokar beparwaah
Lekar mann mein chaah
Guruji ko paane kee
Unke hee gunn gaane kee.

Guruji baithey aasan par
Itne sundar Unke komal kar
Sangat kee jholiyan rahe Ve bhar
Sabhi ko dein kalyaan ka var.

Jodey huey veh seedhi taar
Guruji se baatein karoon do chaar
Unse karoon apne pyaar ka izhaar
Ek baar nahin, buss, baar baar.

Karoon Unkee mai bandagi
Unke charnon mein beete ye zindagi
Kahe Unse mera tann mann har kshan
Ki har saans ho Unke charan mein arpan.

Yahee sochte aur dekhte toota swapn mera
Dekha baahar toh ho chuka thaa savera
Antas ke savere ke intazaar mein
Ek baar phir magn hui Guruji ke pyaar mein.

Dincharya aagey chalne lagi
Phir se dhoop dhalne lagi
Hota raha mann hee mann Guruji ka chintan
Ve hee jaanein kitne kashton ka hua khandan.

Shukrana kiya, maangi galatiyon ke liye kshama
Din khatm hua, aaya ratri ka samaa
Guruji se baatein karte huey aankhein moondi jis kshan
Tamanna hui ki Ve dete rahein mujhe swapn mein darshan.

Yoon hee shuru aur khatm hota hai har din
Guruji kee mehar rahe ki koi pal na ho Unke saanidhya bin
Guruji chaahein toh namumkin ko bhi kar sakte Hain mumkin
Koi chaahe toh bhi Unkee rehmatein kabhi nahin sakta gin.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ke Gaaon Mein (01/15/2024)

January 14, 2024

Om Namaha Shivaya
Aaj Ka Suvichaar 🙏🏻🙏🏻

#2156

   Paawan Parv Makar Sankraanti Ka

Aaya paawan parv Makar Sankraanti ka
Guruji kee kripa se antt ho duvidhaaon kee kranti ka
Sutharaayee aaye mann mein
Oorja aaye tann mein
Prakaashit ho bheetar prerna
Chaarul ho jaaye chetna.

Saari sangat hai Guruji kee santaan
Guruji sabhi ko soorya roopi tej karein pradaan
Sabhi ke bheetar ka timir ho jaaye nasht
Khatm ho jaayein sabhi ke jeevan ke kasht.

Gyan ke ujaale se jagmagaaye sabhi ka jeevan
Arogyata se khil jaaye sabhi ka dimaag, tann, aur mann
Aalasya aur disha-heenataa duur bhaagey
Kartavya paraayanataa ka utsaah jaagey.

Ye utsav hai prakriti mein parivartan ka
Sakaaraatmak badalaav ho sabhi ke jeevan ka
Guruji ke naam ke mahasarovar mein sangat kar le snaan
Sabhi karte rahein punya kaarya, paath, sewa, aur daan.

Sumat ke din hotey chalein lambe
Agyan kee raatein ho jaayein chhoti
Nakaaratmakta mein ho jaaye katauti
Sadbhaav mein hoti rahe badhauti.

Guruji, ardaas kar rahi hai Aapse Makar Sankraanti kee ye sehar
Ki saari sangat par sada barasti rahe Aapki mehar
Sabhi ko mubarak ho is mahatvapoorna tyohaar kee
Guruji kee kripa se unnati ho sabhi ke ghar parivaar kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Paawan Parv Makar Sankraanti Ka (01/14/2024)

January 13, 2024

Om Namaha Shivaya
Aaj Ka Suvichaar 🙏🏻🙏🏻

#2155

           Aye Mere Mann Naadaan

Aye mere mann naadaan
Apni kamzoriyan pehchaan
Unhe sudhaarne ka kar kaam
Lete huey Guruji ka naam.

Guruji bade dayalu Hain
Guruji bahut kripaalu Hain
Teri khaamiyan Ve jaante Hain
Teri ‘mai’ ko pehchaanate Hain.

Tu apni madad karne ke liye ho tayyaar
Guruji tujh par chadhi mayl ko denge utaar
Chamakne lagega tera darpan, aye mann
Apne bhale ke liye tu abb samajhdaar bann.

Tu dikhta nahin, ye sahi hai
Tu jaisa sochta hai, tann karta vahee hai
Guruji karna chaahte Hain tera uddhaar
Aye mann, tu apni soch ko sudhaar.

Na mehsoos kar swayam ko asahaay
Yaad rakh, Guruji sada sahaay
Unhonei bakhsha hai tujhe simran, aye mann
Unkee ye bakhshish hai anmol divya dhan.

Aye mann, tu vyarth na jaane dena is dhan ko
Unke naam simran se sajaa le apne bheetar ke upvan ko
Tere roam roam mein vaas karegi Guruji kee khushboo
Toh harsh se gadd gadd ho jaayegi meri rooh.

Mere is ruhaani safar mein
Bahut mahatvapoorna hai tera kirdaar
Is safar ko safalta kee oar le jaane ke liye Tujhe niyantrit karna hoga apna har vikaar.

Aye mere mann, tu nishtha bhaav se koshish kar
Vikarshan se na ho vyakul, chunautiyon se na darr
Guruji mein lagan lagaa, tu Unkee mehar se jaayega tarr
Tu buss apne aap ko Guruji ke charnon mein arpit kar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aye Mere Mann Naadaan (01/13/2024)

January 12, 2024

Om Namaha Shivaya
Aaj Ka Suvichaar 🙏🏻🙏🏻
# 2154

Tere Saath Hain Tere Parwardigaar

Guruji ke bin bulaaye koi pahunch nahin sakta Unke paas
Har bhakt ko samay ke saath saath ho jaata hai is satya ka ehsaas
Guruji zaroor sunte Hain bhakt ke dil kee ardaas
Unke har nirnay mein hota hai bhakt ke kalyaan ka vaas.

Tu khushkismati se pahunch paaya hai Guruji ke dar par
Abb tu Unke har faisle par aitbaar kar
Haunsla rakh, yoon jeete jee na marr
Guruji awashya safal karenge tera safar.

Aayengi mushkilein, dene padenge imtehaan
Kintu har pehlu mein sangg hongei Guru karunanidhaan
Jabb milne lagey safalta, tu na karna abhimaan
Varna badhte jaayenge tere jeevan mein imtehaan.

Tu raaste mein girne lagega toh Guruji tujhe Apni goad mein utha lenge
Tu sankat kee karkash dhoop mein jalne lagega toh Ve Apni mamta kee chhaaon denge
Aapatti kee aandhi aur timir ke tufaan mein Ve teri raksha karenge
Tu naummeed honei lagega toh Ve teri jholi ummeed aur utsaah se bharenge.

Arey, tera kalyaan karne ke liye liya hai Unhonei tujhe Apni sharan mein
Isliye Ve tera saath na chodenge kisee bhi janam mein
Tu bhi na chod karna Unpar aitbaar
Aitbaar hai is rishte ka aadhaar.

Apne bhaav ko tu nikhaar
Kar shraddha se bhaav ka shringar
Shukrana karte huey Guruji kee leela ko nihaar
Samarpan kar Unpar tu swayam ko de vaar.

Jis uddhaar ka teri atma ko hai sainkdon janmon se intazaar
Guruji awashya denge teri atma ko uss uddhaar ka uttam uphaar
Tu dheeraj rakh, aur himmat na haar
Tere saath Hain tere Parwardigaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tere Saath Hain Tere Parwardigaar (01/12/2024)