Chehre par ho meethi si muskaan Labon par ho Guruji ka naam Naynon mein ho neer pyaar ka Rasna par geet Unke kiye aseem upkaar ka.
Antas mein ho raha ho Guruji ka simran Kaanon mein samaa raha ho shabad ka shravan Vaani kar rahi ho Guruji ka vinamr vandan Zehen mein goonj raha ho Unka bhajan.
Seedhi taar se judi ho Guruji sangg atma kee doar Kadam chal rahe hon satsang kee oar Haath kar rahe hon sewa Unkee agya se Antas noorani ho Unkee dee pragya se Rooh par ho raha ho Unkee rehmat ka asar is kadar Ki Ve ojhal hon toh bhi maalum ho ki Unkee hai hum par nazar.
Guruji ke stavan ka chaav ho Unhe prasann karte rehne ka bhaav ho Maante rahein Unka hukm aur Unkee hidaayat Bin kiye koi shikva ya shikaayat.
Guruji ka shukrana karein chaahe jo bhi jaaye ho Ve sada angg sangg Hain, iska atoot vishwaas hamein ho Kyunki satya yahee hai aur yahee rahega Jo aaj nahi ye kehta vo kal toh yahee kahega.
Saari umr lagaa dee tann ko sanvaarne sajaane mein Saari umr beet gayi duniyadari ke rishte nibhaane mein Mann ko toh chaahat aur zaroorat ka arth na aaya samajh Hum bhi mann ke das bannkar gaye mann ke matvaalepan mein ulajh.
Guruji abhi bhi de rahe Hain mauka Ki abb na dein hum swayam ko dhokha Abb bhi samay hai isliye jaayein jaag Bahut ho chuki agyan kee neend mein vyarth kee daud-bhaag.
Aparipakvata se bahut liye jee Zindagi ka ek daur thaa veh bhi Abb toh jaayein sambhal Jald hee aayega aane wala kal.
Guruji kee kripa se badhaayein manobal Taaki chhote ya bade maamalon se na ho mann mein halchal Na sukh, na dukh asthir karey mann ko ek bhi pal Varna phansa lega hamein kalyuga ka dal-dal.
Jaise jaise waqt ke lamhe bahein Zaroorat hai ki hum saavdhaan rahein Beshak pehle kewal jaagte huey Lekin phir saath mein nidra kee sthiti mein Tabhi toh tayyaar hongei akhandata kee avastha ke liye Jeevan kee kaisi bhi paristhiti mein.
Bheetar ho jaayegi bhakti kee akhand umang Chetna bann jaayegi jheel nishtarang Mann ke paryavaran mein hogi sthirta aur shanti Tann, mann, aur atma par chhaa jaayegi Guruji kee kanti.
Guruji ka nirantar simran Guruji ka nirantar chintan Unkee kripa se karta rahega hamein tayyaar Guruji Hain Mahadev ke avatar Unkee sharan mein hai hamaara uddhaar Is kalyuga mein Unka naam hai is uddhaar ka aadhaar.
Keh rahi thi Guruji se vo mann hee mann ‘Aap mujhe pyaar dete Hain har kshan Phir bhi hoti nahin hai tripti Kaise paaoon mai santushti?’
‘Aap toh sada Hain sahaay Aapke paas awashya hoga upaay’ Aayi usey Guruji kee ruhaani khushboo Gadd gadd ho gayi uskee rooh Usey Guruji kee alaukik awaaz dee sunaayee Guruji ne usey vidhi bataayee.
Guruji ne kaha usey pyaar se ‘Tu dabi hai karmon ke bhaar se Mai bakhshta hoon tujhe simran Taaki saaf hota jaaye tera mann Tu kar apni oar se prayatan Ki tu reh mujh mein magan Mujhe mehsoos kar, mehsoos kar mera ehsaas ruhaani Mehsoos kar meri shakti jis se sanvar rahi hai teri zindagani.’
‘Apni har chinta mujhe de de Samarpit kar mujhe apna har karam Shukr mera sada karti raha kar Mujh par vishwaas kar aur sabar kar.’
‘Chaahe tujhe kasht padey sehna Tu atma-neereekshan karti rehna Jitna sochegi mere vishay mein Teri ruchi kumm hogi har bhautik vishay mein.’
‘Koi bhautik sukh tujhe santushti na dega Uss se milega toh kuch lamhon ka ullaas Lekin mere chintan se, mere simran se Bujhti rahegi teri atma kee veh pyaas Jiskee vajeh se teri atma hai itnee bekaraar Ki tript nahin hoti aur tu jholi phailaati hai baar baar.’
Shraddha se sunti rahi Guruji kee dasi Bhaav vibhor hui, phir mitne lagi uskee udaasi Samjhi veh kis liye veh rehti hai bechayyn aur pyaasi Samjhi ki Guruji banaana chaahte Hain uske antas ko hee Kashi.
Jaise aayi thi khushboo, vaise hee abb veh khushboo chali gayi Sehsa aayi vahaan ek titlee aur dasi ke mukh par muskaan khilee Maan kar usey Guruji ka divya sanket Dasi ne Guruji ke sammaan mein vahaan matha liya tek.
Guruji kee kripa se har bhakt ka antas Kashi bann jaaye Guruji kee vadiyaayee se har bhakt tarr jaaye Guruji kee mehar se sabhi ko praapt ho veh asal adhyaatmik dhan Jisey paakar dhanya ho jaaye Guruji ke har bhakt ka jeevan.
Sthir ho mann kee sthiti Chaahe dagmagaaye paristhiti Guru Govind ka manan ho har roz Nirantar rahe satya kee khoj.
Bhakti ka ho bhaav Guru chintan ka ho chaav Niyam ho neevenpann ka Sanskaar ho simran ka.
Dil mein aur labon par Guruji kee mahima ka gungaan ho Dinacharya mein har pal Unka dhyan ho Sukh ho ya dukh ho, rasna par Unka naam ho Unke dham takk antas ke vihangam kee udaan ho.
Guruji ke darshan kee lagti rahe paawan pyaas Ve bakhshte rahein, karein Unse yeh ardaas Prerit karta rahe Unke angg sangg honei ka ehsaas Koi rishta na laagey Guruji ke sangg rishte se zyaada khaas.
Gupt rahe sewa, paath, aur daan Apanayein hum atma-sammaan Tyaag dein hum abhimaan Dil mein ho Guru milan ka armaan.
Raasta roshan rahe ruhaaniyat ka Uddeshya nishchit rahe insaaniyat ka Chaurasi lakh yoniyon se bach paayein Guruji kee mehar se Guruji mulaakaat karaayein uss pareekshit sehar se Jabb vahaan bulaayein swayam Ve Paramatama Jahaan Unmein samaa hee jaaye atma.
Atma na jaane Paramatama se bichhdi hai kitne janam se Anekon baar duuri bhi badh gayi shaayad hamaare hee karam se Abb jo sweekriti milee hai Guruji Maharaj kee sharan mein Toh aise pichhle karmon ke liye maafi maang lein Unke kamal charan mein.
Atma ke safar mein girne lagey kitnee aasaani se Aur phir girte hee chale gaye badhti hui naadaani se Is satya ka tabb se honei lagaa aur bhi zyada bodh Jabb se Guruji ne khud se liya jod.
Abb jo bodh ho gaya hai toh aur girne se bachna hai bahut zaroori Varna badhti jaayegi atma kee Paramatama se duuri Paramatama ka hee swaroop Hain Guruji swayam Ve jald se jald karaana chaahein atma ka punarmilan.
Karam hamaare haath mein hain Aur Guruji hamaare saath mein Hain Unkee kripa toh baras rahi hai nirantar Kintu mann ka saaf bartan hee uss kripa se sakta hai bhar.
Bartan ko saaf karna zaroori hai Guruji ke bakhshe simran aur dhyan se Taaki antas anugrahit ho paaye Guruji ke dwaara diye gyan se Na pravachan, na koi prachaar Buss, seedhi taar judne se ho uddhaar.
Bhakt ko Apne charnon se jod kar Guruji parakh rahe Hain har kadam, har moad par Abb jo naseeb khila hai aakar Unke dar par Kyun na oonchaayee kee oar hon agrasar.
Adhyaatmik seedhi chadhne ke liye karna hoga parishram Guru kripa se nishchay hee is parishram ka achcha hoga parinaam Kyunki jabb atma pahunchegi Paramatama se punar milan ke liye Sachkhand ke dhaam Toh atma judaayee kee peeda se rahit hokar paayegi sukhad aaraam.
Guruji ne toh kabb se dena shuru kar diya Apni kripa ka daan Gurbani aur satsang dwaara Ve toh dete Hain hamein ruhaani gyan Unka naam swayam hai Paramatama kee paawan pehchaan Punar milan dwaara Unmein samaane se nishchit hai atma ka kalyaan.
Jabb jabb kinaara dhoondhegi tere jeevan kee naiya Guruji aayenge bann kar tere khivaiya Beshak tufaan aayenge baar baar Lekin Guruji awashya karaayenge teri naiya ko paar.
Tu bandagi ke taruvar ko seenchta chal shraddha ke jal se Guruji tere liye nipat lenge har tareh kee mushkil se Tujhe denge himmat aur taakat Tujhe denge sumat aur barkat.
Samarpan aur shuddh bhaav kee maati se kar taruvar ka poshan Teri atma ka noor Guruji kee daya se hota rahega roshan Bandagi ke taruvar ke taley karta chal Guruji ka simran aur chintan Sundar phool aur patte upajaayega tera kiya vandan Meethe hongei Guruji aur tere ruhaani rishte ke phal Guruji kee kripa se dhul jaayega tere bheetar ka mal.
Bandagi ka taruvar dega tujhe garmi kee kathor dhoop mein chhaaon Uske aaspaas parikrama karna aur tarr jaayenge tere paaon Yaad rakh, ye taruvar niraala hai bada Jahaan tu jaayega, ye vaheen hoga khada.
Ye taral taruvar hai bandagi ka Isey mila hai vardaan Guruji kee bakhshindagi ka Guruji ke sooryamayi tej se mil rahi hai is taruvar ko oorja Is taruvar kee pattiyon kee sarsaraahat se alankrit hoti rahegi teri pooja.
Is taruvar ko naman kar iske sameep jalaata chal tu prem ke deeye Guruji ko shukrana kar bandagi ke taruvar ke praanon ke liye Aur har uss daat ke liye jo Unhonei dee ya nahin Kyunki Guruji Apni anokhi leela se kar dete Hain sab sahi.
Yug sangam ka samaa hai chaaron oar Kar lein apne antas par gaur Vaheen par kar paayenge asal tayyaari Jabb padegi zaroorat uskee ati-bhaari.
Maanav ne prakriti ka kiya hai apmaan Prakriti ne saha hai itna nuksaan Phir bhi rakhti rahi sab praaniyon ka veh dhyan Lekin tabb bhi duur na hua maanav ka agyan.
Thakk gayi hai abb prakriti Nibhaate huey niswaarth preeti Nishchit hai khatma kalyuga ka Taaki aagaman ho satyuga ka.
Baahar jaana chod nahin sakte Lekin bheetar jaane se kisee ne nahin roka Jo bheetar na jaaye baar baar Usey swayam se hee ho jaayega dhokha.
Guruji ne hamein jod kar swayam se Kiya hai hum par aseem upkaar Sewa, simran, satsang, dinacharya mein Ve hamein bheetar jaana yaad dilaate Hain baarambaar.
Guruji ka diya yeh maargdarshan Hamaari raksha karega har kshan Besharte hum uss par amal karein Taaki pralay kaal mein jeete jee na marein.
Na bhoolein Guruji kee kahi baat Toh hum surakshit rahenge din raat Simran aur dhyan se mann ko milegi kshamta Aur hamein milegi suraksha kee sampoornata.
Pehchaanein Guruji kee prerna ka paigam Guruji hamaare mann kee shanti aur sthirta ka kar rahe Hain intazaam Khushnaseeb hain hum ki japp paate hain Guruji ka paawan naam Guruji ke sahaare adhyaatma ke akash mein hum bharein udaan.
Sab kuch honei par bhi apoornataa Na jaane kyun maya mein phanse hain praan Aye praani, dhoondhte ho tum nirvaan Parantu ho asal saar aur tattva se tum anjaan.
Apoornata se sampoornata ka ye safar Bin Guru ke maargdarshan ke na hai mumkin Jo satta hai parey is shareer se Uska gyan ho jaayega Guru dwaara bakhshi taqdeer se.
Guruji Maharaj Hain Shiv avatari Ve karaa rahe Hain tumhaari tayyaari Sookshmata mein hai sampoornata Tumhe mehsoos karaayegi Guruji kee divyata.
Zaroori hai Guruji ka simran aur chintan Apne aatmik swaroop ko mehsoos karne ke liye Isliye jitna ho sakey Unse seedhi taar jodne ka karte chalo prayatn Ye atma aur Paramatama ko jodne wali taar dwaara Uttar paayega tumhaara har ruhaani prashn.
Jitnee tadap hogi Guruji se judey rehne kee Utnee shakti denge Ve tumhe chunautiyon ko sehne kee Kyunki chunautiyan toh aayengi hee aayengi Mann kamzor hua toh ve bahut sataayengi.
Guruji ne bakhsha hai tumhe simran Simran dwaara shaktishali banaao mann Ekant aur maun mein karo Gurbani ka shravan Aur uske pashchaat karo shabad par manan.
Saadho, saadho Guruji ko, shraddha aur pyaar se Sansaar mein rehte huey anaasakt raho sansaar se Ye beshak aasaan na lagey pehle pehle, lekin ye namumkin nahin Arey, tum apni taraf se koshish kar ke dekho toh sahi.
Khaalipan aur agyan ke andhkaar se Mukt karaayega tumhe Guru dwaara diya atma bodh ka ujaala Guruji ke charnon mein chalega tumhaara safar Toh tumhe sampoornata bheetar aayegi nazar.
Kyunki bheetar ka hai yeh safar Hadd se paar jaana hai guzar Avidya aur maya kee hadd se paar Jahaan atma ka Paramatama se ho deedar.
Guruji ne jabb mujhe dekha Toh yakeenan Unhonei badal dee mere haath kee rekha Dobaara likhne lagey Ve meri kismat ka lekha Karte huey meri kayi galatiyon ko andekha.
Guruji ne daali mujh nacheez par Apni mehar-e-nazar Yoon chhoo gayi meri zindagi ko Unkee nirmal nadar Ki har anubhav par abb hota hai Unkee kripa ka asar Har pal Unhee ke naam ke aadhaar par hota hai abb jeevan basar.
Punj Hain Guruji prakash ka Sarovar Hain Ve sundar sakaash ka Guruji ke prataap ke samaksh alp hai vistaar akash ka Guruji ke ashirwaad mein koi kaam nahin avkaash ka.
Kyunki Guruji ka ashirwaad barasta hai nirantar Bahut dayalu hai Guruji ka divya dar Guruji kee bhakti banaa deti hai nidarr Guru kripa ka jeevan par hota hai shubh asar.
Guruji ne mujh nirmaani ko apnaa liya Jalaaya Unhonei mere antas mein deeya Mujhe har pal Apna ruhaani saanidhya hai diya Ye sab Guruji kee hee hai daya.
Guruji kee daya kee dariya mein doob jaaoon Unkee mamta kee goad mein jhool jaaoon Unke naam kee sarita mein kar paaoon nirantar snaan Apni aakhiri saans takk karti rahoon Unkee mahima ka gungaan.
Hon kaise bhi haalaat Ho jaaye jeevan mein kaisi bhi baat Guruji kee rehmat ka amrit Bhakt par barasta hai nit nit.
Ye amrit nahin hai kewal paani Is amrit ka asar hai ruhaani Yeh amrit taarte taarte deta hai buddhi Yeh amrit karta hai rooh kee shuddhi.
Is amrit kee khushboo anokhi hai itnee Mita deti hai ye antas mein hoti hai durgandh jitnee Is amrit ke ashish se murjhaayee hui asha khil jaati hai Is amrit ke prabhaav se khoi hui ummeed vaapis mil jaati hai.
Paawan se bhi paawan Ganga hai Guruji kee rehmat ka amrit Ismein veh shakti hai jo shant aur sheetal kar deti hai chit Rehmat ke is amrit mein anukampa hai aisee aparampaar Ki veh dukhi mann ko deti hai sahaara aur pyaar.
Guruji kee rehmat ke amrit kee har boond mein Basee hai Guruji kee mamta Ye mamta apni komalta aur nirmalta se Nipun karti hai bhakt kee kshamta Amrit ko peete rehne kee Jeevan ko jeete rehne kee.
Guruji kee rehmat ke amrit mein Aushadhi hai Guruji ke naam kee Guruji kee rehmat ke amrit mein Vibhooti hai bhakt ke kalyaan kee.
Aaj Ka Suvichaar 