Samaa Hee Jaaye Atma (02/26/2024)

February 26, 2024

Om Namaha Shivaya
Aaj Ka Suvichaar 🙏🏻🙏🏻

#2199

Samaa Hee Jaaye Atma

Sthir ho mann kee sthiti
Chaahe dagmagaaye paristhiti
Guru Govind ka manan ho har roz
Nirantar rahe satya kee khoj.

Bhakti ka ho bhaav
Guru chintan ka ho chaav
Niyam ho neevenpann ka
Sanskaar ho simran ka.

Dil mein aur labon par Guruji kee mahima ka gungaan ho
Dinacharya mein har pal Unka dhyan ho
Sukh ho ya dukh ho, rasna par Unka naam ho
Unke dham takk antas ke vihangam kee udaan ho.

Guruji ke darshan kee lagti rahe paawan pyaas
Ve bakhshte rahein, karein Unse yeh ardaas
Prerit karta rahe Unke angg sangg honei ka ehsaas
Koi rishta na laagey Guruji ke sangg rishte se zyaada khaas.

Gupt rahe sewa, paath, aur daan
Apanayein hum atma-sammaan
Tyaag dein hum abhimaan
Dil mein ho Guru milan ka armaan.

Raasta roshan rahe ruhaaniyat ka
Uddeshya nishchit rahe insaaniyat ka
Chaurasi lakh yoniyon se bach paayein Guruji kee mehar se
Guruji mulaakaat karaayein uss pareekshit sehar se
Jabb vahaan bulaayein swayam Ve Paramatama
Jahaan Unmein samaa hee jaaye atma.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Samaa Hee Jaaye Atma (02/26/2024)