Duur Taruvar Kee Chhaaon Mein (02/27/2024)

February 27, 2024

Om Namaha Shivaya
Aaj Ka Suvichaar 🙏🏻🙏🏻

#2200

    Duur Taruvar Kee Chhaaon Mein

Duur taruvar kee chhaaon mein
Paayal pehne apne paaon mein
Guruji kee dasi baithi thi Guruji kee yaad mein
Apni jholi phailaakar fariyaad mein.

Keh rahi thi Guruji se vo mann hee mann
‘Aap mujhe pyaar dete Hain har kshan
Phir bhi hoti nahin hai tripti
Kaise paaoon mai santushti?’

‘Aap toh sada Hain sahaay
Aapke paas awashya hoga upaay’
Aayi usey Guruji kee ruhaani khushboo
Gadd gadd ho gayi uskee rooh
Usey Guruji kee alaukik awaaz dee sunaayee
Guruji ne usey vidhi bataayee.

Guruji ne kaha usey pyaar se
‘Tu dabi hai karmon ke bhaar se
Mai bakhshta hoon tujhe simran
Taaki saaf hota jaaye tera mann
Tu kar apni oar se prayatan
Ki tu reh mujh mein magan
Mujhe mehsoos kar, mehsoos kar mera ehsaas ruhaani
Mehsoos kar meri shakti jis se sanvar rahi hai teri zindagani.’

‘Apni har chinta mujhe de de
Samarpit kar mujhe apna har karam
Shukr mera sada karti raha kar
Mujh par vishwaas kar aur sabar kar.’

‘Chaahe tujhe kasht padey sehna
Tu atma-neereekshan karti rehna
Jitna sochegi mere vishay mein
Teri ruchi kumm hogi har bhautik vishay mein.’

‘Koi bhautik sukh tujhe santushti na dega
Uss se milega toh kuch lamhon ka ullaas
Lekin mere chintan se, mere simran se
Bujhti rahegi teri atma kee veh pyaas
Jiskee vajeh se teri atma hai itnee bekaraar
Ki tript nahin hoti aur tu jholi phailaati hai baar baar.’

Shraddha se sunti rahi Guruji kee dasi
Bhaav vibhor hui, phir mitne lagi uskee udaasi
Samjhi veh kis liye veh rehti hai bechayyn aur pyaasi
Samjhi ki Guruji banaana chaahte Hain uske antas ko hee Kashi.

Jaise aayi thi khushboo, vaise hee abb veh khushboo chali gayi
Sehsa aayi vahaan ek titlee aur dasi ke mukh par muskaan khilee
Maan kar usey Guruji ka divya sanket
Dasi ne Guruji ke sammaan mein vahaan matha liya tek.

Khadi hokar aagey badhaaye usne kadam
Paayal ke ghungroo kee awaaz aayi chhan chhan
Guruji kee mehar se usee shubh kshan
Dasi kee manodasha mein hua sakaaraatmak parivartan.

Guruji kee kripa se har bhakt ka antas Kashi bann jaaye
Guruji kee vadiyaayee se har bhakt tarr jaaye
Guruji kee mehar se sabhi ko praapt ho veh asal adhyaatmik dhan
Jisey paakar dhanya ho jaaye Guruji ke har bhakt ka jeevan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Duur Taruvar Kee Chhaaon Mein (02/27/2024)