Month: April 2024

April 30, 2024

Om Namaha Shivaya
Aaj Ka Suvichaar 🙏🏻🙏🏻

#2263

Zehen Mein Na Bharne Do Zeher

Zehen mein na bharne do zeher
Varna aur bhi sataayega kalyuga ka kehar
Uday honei do sweekriti aur samarpan kee seher
Taaki tum takk pahunch paaye Guruji kee meher.

Guruji kee meher se jabb tum par sooraj kee kiran padegi
Toh veh Guruji kee prerna se tumhaari duvidha ko haregi
Aasmaan mein baadal hongei toh bhi ve na sakenge is kiran ko rok
Aisa prabal hai Guruji Maharaj ka ruhaani roab.

Guruji dete Hain tumhe chetna aur prerna
Tum inke dhaage mein apni swatantra ichcha pirona
Arzi lagaana Unse ki tumhaari swatantra ichcha chale tumhaare hitt mein
Har farz nibhaana rakhte huey Guruji ko chitt mein.

Karte raho apne karam rakhte huey shuddh antakaran
Guruji ko arpit kar do apna har karam
Kintu saath hee saath is yaatra mein
Sweekriti aur samarpan zaroori hain adhik maatra mein
Jabb ye ho jaayenge tumhaari oar se poore
Tabb samasyaaon ke samaadhaan na rahenge adhoore.

Sweekriti aur samarpan kee shakti se ho jaao tum avagat
Aur apne jeevan mein karo is seher ka sundar swaagat
Ye seher mita degi tumhaari har tamoguni aadat
Taaki veh na bann paaye tumhaare liye ek aafat.

Is janam mein tumhaara naseeb khila hai Guruji ke ruhaani saath se
Na jaane dena ye anokha avsar apne haath se
Varna nikal na paaoge asweekaran aur maansik virodh kee raat se
Aur vanchit reh jaaoge na jaane Guruji kee kaun kaunsi daat se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Zehen Mein Na Bharne Do Zeher (04/30/2024)

April 29, 2024

Om Namaha Shivaya
Aaj Ka Suvichaar 🙏🏻🙏🏻

#2262

Na Dena Tum Swayam Ko Dhokha

Kar lo apne mann ko saaf
Doojon ko aur swayam ko kar do maaf
Guruji ne bakhsha hai tumhe simran
Saaf karo tum simran ke dwaara mann.

Saaf hoga jo mann ka bartan
Toh hee vo pavitra rahega har kshan
Ye safai nirantar hoti rehni zaroori hai
Agar mitaani Guruji se duuri hai.

Mann jo hoga saaf toh achche se kar paaoge Guruji ko yaad
Swacch mann rahega aanandit hokar Unkee ruhaani maujoodagi se aabaad
Sewa ho paayegi achchi
Kyunki saaf mann kee neeyat hogi sachchi.

Mann halka rahega
Sthir hokar sab sahega
Niyantran nahin khoyega
Aisee neend nahin soyega
Ki aakraman kar paayein vikaar
Aur banaayein maansik santulan ko apna aahaar.

Guruji madad rahein Hain kar
Tum koshish karo jhuka kar sir
Mann se kar do samarpan
Nirmal bhaav se karo har karma ko arpan
Guruji ke kamal charan mein
Ve poorna sahaayak Hain kasht haran mein.

Simran aur dhyan se saaf hota jaayega mann
Aur adhik simran aur dhyan kar paayega saaf mann
Mann kee sthirta aur shant avastha adhik hoti jaayegi
Guruji kee divya kanti mann mein yoon samaayegi
Ki duur ho jaayega andhera agyan ka
Aur uday hoga sooraj tattva bodh ke gyan ka.

Shiv avatari Guruji de rahein Hain tumhe yeh avsar sunehra
Poori koshish karo ki mann par rakho tum pehra
Khushkismati hai tumhaari ki tumhe Guruji se mil raha hai ye mauka
Isey gavaa kar na dena tum swayam ko dhokha.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Na Dena Tum Swayam Ko Dhokha (04/29/2024)

April 28, 2024

Om Namaha Shivaya
Aaj Ka Suvichaar 🙏🏻🙏🏻

#2261

Aapka Shukrana Karti Rahoon

Param poojya Guruji,

Aap miley toh
Mujhe meri disha aur manzil mil gayi
Aapke aanchal mein sweekaare jaane se
Meri kismat kee toh kalee khil gayi.

Aapne jabb mujhe Apni sharan mein liya
Aur itna pyaara pyaar diya
Toh mere antas mein jal gaya bhaav ka deeya
Jisey Aapne Apni abha kee lau se ujjwal kiya.

Mai toh sapne mein bhi jaisa sochne ke kaabil na thi
Aapne aisee mamta aur karuna dee
Udaasi aur niraasha ke pal beshak aate hain abb bhi
Lekin abb pehle jaisi bechayyni aur bebasi nahin hoti.

Kyunki Aapki meher pradaan karti hai
Aapke angg sangg honei ka meetha ehsaas
Aapka protsaahan uttejit karta hai
Nirantar chalte rehne ka prayaas.

Aapki paawan prerna se hota hai
Aapke prati aakarshan itna khaas
Ki jo bhi Aapse duur le jaana chaahe
Mai hona na chaahoon aise kisee prabhaav ke bhi paas.

Shaayad pehle kabhi aisee chunautiyan bhi na aayin
Jaisi abb hain aati
Kintu Aapki sharan mein hoon
Toh ve Aapke samaksh jhuk hain jaati.

Aap swayam par adhiktar bhaar lete hain mere har karam ka
Aur mujh par itna kumm hota hai in karmon ka bojh
Aap hee har uljhan kee suljhan dete Hain
Mujhe nahin karni padti kisee hal kee khoj.

Meri rooh ke har janam roopi upvan mein
Aapki kripa se kismat kee kalee khiltee rahe
Mere har janam mein meri saanson ko
Aapki kripa se Aapke naam kee daat miltee rahe.

Kaabiliyat deejiyega aisee, Prabhu
Ki Aapki udaarataa ka gungaan karti na thakoon
Aapki sewa dil-o-jaan se karoon
Param poojya Guruji, mai sada tahe dil se Aapka shukrana karti rahoon.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapka Shukrana Karti Rahoon (04/28/2024)

April 27, 2024

Om Namaha Shivaya
Aaj Ka Suvichaar 🙏🏻🙏🏻

#2260

             Mandir Mere Mann Ka

Guruji ke prem mein doob kar
Jalmagn hua hai mandir mere mann ka
Is ruhaani saagar kee leheron kee hai jo meethi awaaz
Usmein basaa hai aisee aseem shanti ka raaz
Jo mil sakti hai kewal is saagar ke jal kee gehraayee mein
Aur jo mujhe Guruji se jodey rakhti hai meri tanhaayee mein
Kewal mere Guruji kee mahima kee badaulat
Dekar mujhe Unke ruhaani deedar kee daulat.

Yeh daulat Guruji ke ruhaani deedar kee
Yeh bakhshish hai Guru sarkar kee
Unkee kripa se ye pehchaan hai uss paar kee
Jahaan roshni hee roshni hai Parwardigaar kee.

Chal padi hoon is safar par
Poojya Guruji ke sahaare
Unhee ke ishaare aur hukm par
Malte huey Unke naam kee marham apne har zakhm par.

Zarra zarra mere antakaran ka
Unkee kripa se roshan hota rahe
Katra katra mere rakt ka
Unke naam se nirmal hota rahe
Mera astitva Guruji ke Shivatva mein yoon khota rahe
Jaise saagar mein sarita, jaise kitaab mein koi kavita.

Reh jaaye toh buss ekaatmaktaa
Guruji aur Unkee divyata sangg akhand ikaayi
Kyunki ek Guruji Maharaj hee apne Hain
Baaki saari duniya toh hai aur rahegi sada paraayi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mandir Mere Mann Ka (04/27/2024)

April 26, 2024

Om Namaha Shivaya
Aaj Ka Suvichaar 🙏🏻🙏🏻

#2259

Ek Yuvak Thaa Awaara

Ek yuvak thaa awaara
Dekha usne saagar ka kinaara
Aaya sawaal uske mann mein
Ki aakhir kya karna chahiye jeevan mein.

Thaa jaise vo dishaheen
Buddhi ho chuki thi ksheen
Apni soch mein hua vo leen
Swayam ko mehsoos karne lagaa veh deen.

Achaanak usey aayi ek khushboo ruhaani
Ek nutan anubhav karne lagi uskee zindagaani
Usey dikhee ek titlee aate huey apni oar
Na jaane kaisi shakti thi usmein ki vo ho gaya bhaav vibhor.

Usey lagaa ki uske liye ho rahi ho akash vaani
Usey hukm kee awaaz aayi ki veh sunei Gurbani
Sooraj abb thaa dhalne lagaa
Ghar kee oar veh chalne lagaa.

Apne vichitra anubhav ke soch vichaar mein
Na jaane kabb usey neend gayi aa
Nidra mein ik sapna dekha
Jismein ek sundar se purush rahe thei muskuraa.

Kaha Unhonei yuvak se ki Guruji hai Unka naam
Unhonei akashvaani dwaara diya thaa usey aadesh aur paigam
Unn Guruji ne sapne mein yuvak ko Gurbani sunn-ne ka raasta dikhaaya
Sapne mein uss se baatein kar usey simran aur dhyan karna sikhaaya.

Subah hui jabb akash mein toh aayi uske jeevan mein ek subah nayi
Uskee dishaheen avastha tabb se itihaas bann gayi
Sunn sunn kar Gurbani
Usne apne har farz kee mahatta jaani
Apna har farz veh nibhaane lagaa
Guruji kee khoj mein jaane lagaa.

Guruji aaye phir se swapn mein ek raat
Kee Unhonei yuvak se baat
Usey satsang ka raasta dikhaaya
Vahaan jaane ka samaa bataaya.

Guruji ne usey diya nirdesh
Ki usey kya karna hai vahaan pahunchkar
Yuvak ne nirdesh ka paalan kiya
Bin kisee sanshay vo pahuncha uss dar par.

Jabb dekha swaroop Guruji ka Unke darbar mein
Toh apne sapnon ko rakhte huey apne vichaar mein
Usne pehchaan liya ki Guruji hee Hain abb uske Guru
Aur Unkee kripa se uske jeevan mein naya pehlu hua hai shuru.

Guruji ne dhoondha yuvak ko aur jod liya apne se
Akashvaani se jo baat shuru hui veh aagey badhi sapne se
Guruji kee meher thi is poore silsiley ke har kadam par
Is ehsaas ka hua yuvak par gehra kalyaanmayi asar.

Khatm hui dishaheenta aur deenta kee nisha
Poojya Guruji Maharaj ne yuvak ko dikhaayee disha
Guruji ke kiye maargdarshan se usey safar ka agala kadam aata gaya samajh
Guruji kee meher aur leela se yuvak kee har uljhan gayi sulajh
Yuvak ka hua kalyaan
Uske safar ko mila sundar anjaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ek Yuvak Thaa Awaara (04/26/2024)

April 25, 2024

Om Namaha Shivaya
Aaj Ka Suvichaar 🙏🏻🙏🏻

#2258

          Param Poojaneeya Sarkar

Yahaan aana kisee kaam ka nahin
Agar galatiyon se seekh kar na karein karma sahi
Mann ko gulam banaa paayega vahee
Jo sunn-na chod dega asthir mann kee kahi.

Baat ghoom phir ke aa jaati hai vaheen
Ki zaroori hai mann na bhatak jaaye kaheen
Varna oopar aasmaan aur neeche zameen
Inke beech hee rooh na reh jaaye dabee.

Rooh ko vahaan pahunchaana hai zaroori
Jahaan mit jaaye Paramatama se uskee har duuri
Shareer ko karna hoga dhyan ke dauran sthir
Mann par kaam karna hoga phir.

Sarvapratham awashyak hai Guruji se vandan
Ki Ve bakhshein Apna dhyan aur simran
Vaisa hee jaisa Ve chaahte Hain
Kyunki Ve hee toh Hain jo bhakti sikhaate Hain.

Unhee kee karein bhakti Unhee kee meher se
Shivmayi layy mein leen ho jaayein is bhakti kee leher se
Guru kripa se andheri raat mein roshni aayegi sakaaraatmak seher se
Bhayy hona kumm hota jaayega kalyuga ke keher se.

Mann jaise jaise hoga sthir
Ooncha hoga bhakti ka starr
Galatiyon kee oar jaayegi mann kee nazar
Aur unhe phir na doharaane kee oar hum hongei agrasar.

Jeevan mein yakeenan aayega sudhaar
Agar prayaas jaari rahega baarambaar
Neeyat dekhte Hain Guruvar taaranhaar
Ve Hain nyaaya aur niyati ke param poojaneeya sarkar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Param Poojaneeya Sarkar (04/25/2024)

April 24, 2024

Om Namaha Shivaya
Aaj Ka Suvichaar 🙏🏻🙏🏻

#2257

           Baaki Har Bandhan Se

Tum ruk kar Guruji ke pyaar mein thoda bahut samay bitaao
Dekhna, Guruji tumhe vipattiyon ke bavajood rukne na denge
Tum Guruji ke charnon mein har pal antas ka sees jhukaao
Dekhna, Guruji tumhe haalaat ke saamne jhukne na denge.

Tum Guruji se judey rehne ka prayaas karte raho
Guruji tootne ne denge tumhaare manobal ko
Tum Guruji ke simran aur vandan ka abhyaas karte raho
Guruji swayam tumhaare samaksh laayenge har mushkil ke hal ko.

Tum das bann kar raho
Guruji tumse laad karenge
Tum Guruji se apne dil kee kaho
Guruji bhi tumse baat karenge.

Tum Guruji ka kaha maankar banda bann jaane kee koshish rakho jaari
Guruji tumhe tumhaari koshish mein safal awashya karenge
Tum beshak bhugat rahe ho kaisi bhi chunauti ya beemari
Guruji adhiktar bojh swayam par lekar tumhaara bhaar aaj ya kal awashya harenge.

Tum jeevan ka har pal apne farz nibhaate huey bitaa lo Guruji ke chintan mein
Guruji tumhaare antas ko Apni maujoodagi ke ehsaas se aabaad karte rahenge
Tum bandhe raho Guruji sangg bhakti ke bandhan mein
Guruji tumhe baaki har bandhan se azad karte rahenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Baaki Har Bandhan Se (04/24/2024)

April 23, 2024

Om Namaha Shivaya
Aaj Ka Suvichaar 🙏🏻🙏🏻

#2256

                Janam Kayi Hazaar

Guruji kee ek nigaah
Ujjwal kar deti hai andheri raah
Deti hai uspar chalne ka utsaah
Badha deti hai Unke kareeb aane kee chaah.

Guruji kee pyaar bhari inaayat
Bakhsh deti hai ghar mein barkat
Nikhaar deti hai bhakt dwara kee gayi ibadat
Mita deti hai har shikva, har shikayat.

Guruji kee ek nazar
Kar deti hai bhakt par aisee nadar
Ki anugrahit ho jaata hai uska safar
Vo janam janamaantar ke liye jaata hai tarr.

Guruji ka paawan pyaar
Bhakt ko bulaata hai Unke dwaar
Jahaan hota hai uska uddhaar
Paakar Guruji kee kripa aparampaar.

Guruji kee har rehmat
Sanvaarti hai bhakt kee kismat
Sulajhaati hai bhakt kee duvidha aur dikkat
Deti hai bhakt ko taakat aur himmat.

Guruji kee meethi meher bhari muskaan
Bhakt ke veerane ko banaati hai gulistaan
Dekar komal kalyaan ka divya daan
Bhakt ko dhanya kar dete Hain Guru karunanidhaan.

Guruji kee dee har bakhshish, har daat
Hai param aadarneeya saugat
Chod kar har shart aur sabhi sawaalaat
Guru charnon mein rehne ko jee chaahe din raat.

Guruji se judi hui seedhi taar
Karti hai bhakt ka beda paar
Beshak jeevan ke din hon do chaar
Kintu sanvar jaate hain janam kayi hazaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Janam Kayi Hazaar (04/23/2024)

April 22, 2024

Om Namaha Shivaya
Aaj Ka Suvichaar 🙏🏻🙏🏻

#2255

             Nihaal, Nihaal, Nihaal

Thaa ik raahi deewana
Jagg lagta thaa usey begaana
Dinacharya chal rahi thi seedhi saadi si
Utnee bhautik bhaag daud uske liye kaafi thi.

Darasal usey thi khoj
Vo khoj rehti thi har roz
Ki kya hai uska uddeshya asal
Jis se uska janam hoga safal.

Kayi teerath sthaanon ka kiya usne bhraman
Kahee bhi shanti na paata thaa uska mann
Lagg na paata thaa uss se dhyan
Veh pehchaan paa raha thaa apne bheetar ka agyan.

Uske antas mein thei kayi ruhaani sawaal
Jawaab dhoondhte dhoondhte hua bechayyn uska haal
Unn sawaalon ne kiya usey nidhaal
Kintu Guruji ne sapne mein aakar usey kaha
‘Nihaal nihaal nihaal.’

Utha veh, toh usey yaad aaya achaanak veh kshan
Jabb kayi saal pehle usey Guruji ke huey thei darshan
Vo gaya thaa Guruji ke mandir Unke ek bhakt ke saath
Usey yaad aayi veh shubh raat.

Hua usey ehsaas ki sapne mein thei Ve Guruji Maharaj
Usey achcha lagaa ki Unhonei usey yaad kiya aaj
Usne mann hee mann kee Guruji se ardaas
Ki Ve uskee madad karein aakar uske paas.

Arzi sunn lee Guruvar karunanidhaan ne
Baithaaya Unhonei raahi ko simran ke vimaan mein
Uskee lagan badhti gayi simran aur dhyan mein
Guru kripa se badhauti hui uske ruhaani gyan mein.

Guruji kee meher se vo apne sawaalon ke jawaab paane lagaa
Uske jeevan se bechayyni ka pehlu jaane lagaa
Dikhne lagi thi usey ruhaani raah
Laut aaya thaa uska utsaah
Vahee raahi jo hua thaa kabhi bilkul nidhaal
Aaj Guruji kee daya se veh hua nihaal, nihaal, nihaal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Nihaal, Nihaal, Nihaal (04/22/2024)

April 21, 2024

Om Namaha Shivaya
Aaj Ka Suvichaar 🙏🏻🙏🏻

#2254

 Anubhavon Ke Afasaanon Ka Aangan

Anubhavon ke afasaanon ke aangan mein
Satsang ke phool khilte hain sundar
Chaahe hamein lagey chhota ya bada
Guru kripa dikhtee hai har satsang ke bheetar.

Guruji ke har satsang ke anubhav mein
Guruji hotey Hain angg sangg mein
Uss ruhaani anubhav ke dauran
Chaahe kasht taley ya bachey jaan
Milta hai Guruji kee ruhaani maujoodagi ka pramaan
Ehsaas hota hai ki aisa anubhav bakhsh sakte Hain kewal Bhagwaan.

Jitna grahan sheel ho bhakt ka antakaran
Utna samaahit kar paayega veh Guruji ke ashirwaad ko
Aur antakaran jaise jaise karta jaayega Guru kripa ko grahan
Mehekne lagega aubhavon ke afasaanon ka aangan
Guruji ke divya ashish kee khushboo se
Aur ye khushboo rooh takk ko chhoo ke
Kar ke uska shringaar, degi usey taar
Aur Guruji kee mehar se hoga bhakt ka uddhaar.

Kyunki swayam Guruji Hain is aangan ke baghban
Aur har anubhav mein Ve karte Hain bhakt ka kalyaan
Andekhe anjaane sankat bhi jaayenge tal
Aisa hota aaya hai aur hoga aaj aur kal
Darasal aisa hota hai hamaare bin jaane bhi har pal
Aisa hai param poojya Guruji ka prataap aur bal.

Guruji se hai vinamr ardaas
Ki aisa aangan ho saari sangat ke paas
Har uss aangan mein khilte rahein sundar phool
Aur har shool kee chubhan mita de Shiv avatari Guruji ka trishul.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Anubhavon Ke Afasaanon Ka Aangan (04/21/2024)