Month: April 2024

April 20, 2024

Om Namaha Shivaya
Aaj Ka Suvichaar 🙏🏻🙏🏻

#2253

Jinhe Paane Ke Liye……

Jinhe paane ke liye khud ko khona kewal jaayaz hee nahin, balki hai zaroori
Jinke kareeb aane ke liye badhaani hogi har vishay, har vikaar, har duniyavi aasakti se duuri
Jinke ashirwaad ke bin purusharth kee yatra nahin hogi poori
Jinke hukm kee avahelna se reh jaayegi kalyaan kee aas adhoori
Unn sarv-vardaata Sadashiv Guruvar ko naman
Unke kamal charnon mein hai vinamr vandan
Ki Unke sangg bandhan mein bandhi rahoon har janam
Aur har janam ke har kshan mein laagi rahe Unse lagan.

Guruvar Maharaj ke vash mein hai mera aaj
Arzi hai Unse ki mere aane wale kal par bhi Ve karein raaj
Meri har soch ho Unkee dee hui sumat kee mohtaaj
Unke paas hee hai mere har marz ko mitaane ka ilaaj.

Guru sahib swayam Hain maalik mere muqaddar ke
Unhonei anumati dee hai ki mai maatha tek sakoon Unke dar pe
Unhonei mujh par rehmat kee hai na jaane mere kitne kasht har ke
Unkee kripa se mai jeeti hoon Unkee bakhshishon se apni jholi bhar ke.

Mai toh bakhshish ke bhi kaabil nahin
Khushnaseeb hoon kyunki Guruji kee itnee vaddi hai vadiyaayee
Jis jis ko bhi sweekaara hai Guruji Maharaj ne Apni sharan mein
Har uss shakhs ne Unkee daya aur mamta bhari inaayat hai paayi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jinhe Paane Ke Liye…… (04/20/2024)

April 19, 2024

Om Namaha Shivaya
Aaj Ka Suvichaar 🙏🏻🙏🏻

#2252

              Atoot Akshay Sahaara

Yahaan na koi lagey apna na begaana
Mann buss ho Guruji ka deewana
Ve hee apne thei, Hain, aur rahenge sada
Seekhni hai toh buss Unhe paane kee adaa.

Guruji kee praapti hai praapti Ishwar kee
Isliye bahut mahaanta hai Guruji ke dar kee
Yahaan kintu parantu se kuch milta nahin
Yahaan sanshay karna nahin hota sahi.

Jitne hotey jaaoge tum Guruji ke deewane
Jitna sunoge sunaaoge Unkee mahima ke afsaane
Jitne kumm banaaoge Unhe yaad na kar paane ke bahaane
Utna hee Guruji ke prati bhakti bhaav lagega tum mein samaane.

Uss bhakti bhaav mein ramm jaayega zarra zarra tumhaara
Tumhe beech majdhaar mein bhi dikhne lagega kinaara
Tufaan aur kohre mein bhi tumhe saaf nazar aayega raasta saara
Guruji ko arpit kar do har karma apna, Ve Hain tumhaara atoot akshay sahaara.

🌹🌹🌹🌹🌹🌹🌹

Jai Guruji🙏🏻🙏🏻
Dhirja

Atoot Akshay Sahaara (04/19/2024)

April 18, 2024

Om Namaha Shivaya
Aaj Ka Suvichaar 🙏🏻🙏🏻

#2251

Hamaari Har Minnat

Hamaari har minnat
Paati hai Guruji kee rehmat
Guruji toh har pal har minute
Yakeenan Hain hamaare nikat.

Bhakt ho ya na ho Unke faisle se sehmat
Unka toh har faisla hota hai nishkapat
Kyunki Guruji thakte nahin Hain karte huey bhakt ka kalyaan
Kintu aksar ye samajh nahin paate hum bhakt jann naadaan.

Guruji hum sabke baare mein sochte Hain har pal
Yoon hee thode hee na hamaare anginat kasht jaate hain tal
Vichaar keejiye ki Guruji ke charnon mein bulaaye jaane se pehle kaisa thaa jeevan
Toh swayam hee ek nutan nazariye ka bakhaan karega aapka antakaran
Zindagi ke har pehlu par ho rahi hai Guruji kee nadar
Abb takk na kee ho toh abb se kar lein is nadar kee kadar.

Bin hamaare iskee kadar kiye bhi Guruji toh karte rahenge paropkaar
Kintu hum ahankar ke vash mein rehkar kaheen reh na jaayein beemar
Hamaare Guruji Maharaj Hain Vaidyanath Shiv avatari
Jinhonei sansaadhit kee hai yeh srishti saari
Har bhakt ke har marz ke liye aushadhi hai Guruji ke paas
Unkee rehmaton par hee nirbhar hai Unka har bhakt, har das.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Hamaari Har Minnat (04/18/2024)

April 17, 2024

Om Namaha Shivaya
Aaj Ka Suvichaar 🙏🏻🙏🏻

#2250

Rangg Hain Kayi Sansaar Mein

Rangg hain kayi sansaar mein
Lekin ruhaani rangg ke jaisa rangg na hai koi aur
Aur jabb Guruji swayam chadhaayein veh rangg bhakt par
Toh atma aur antas dono hee jaate hain nikhar.

Bheetar ka nikhaar kar deta hai bhakt ka chehra noorani
Yahee nikhaar sanvaar deta hai bhakt kee zindagaani
Jitnee badhe bhakti, utna hee ye nikhaar ho jaaye gehra
Ruhaani rangg ka nikhaar na padta pheeka, Guruji ka sada rehta hai uspar pehra.

Guruji Apne har bhakt ko pehnaate Hain kavach kalyaan ka
Guruji Apne har bhakt mein samaate Hain bannkar swaroop Bhagwaan ka
Unke bhaav poorna simran aur chintan se bhakt ke hriday mein aasan sthaapit karte Hain karunanidhaan
Aur phir Guruji ho jaate Hain swayam uss aasan par viraajmaan.

Har bhakt par Guruji barsaate Hain Apna pyaar
Saari sangat par daya karte Hain Ve aparampaar
Uthaate Hain sabhi ke paapon ka bhaar
Kintu jataate nahin Hain ek bhi baar.

Unke chadhaaye ruhaani rangg mein roam roam ramm jaaye
Unke sikhaaye jeene ke dhangg mein jeevan vyateet ho jaaye
Unkee yaad mein jis bhakt ka har pal beet jaaye
Veh bhakt har pal Guruji ka salona saath paaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Rangg Hain Kayi Sansaar Mein (04/17/2024)

April 16, 2024

Om Namaha Shivaya
Aaj Ka Suvichaar 🙏🏻🙏🏻

#2249

                  Sanatan Thikaana 

Na samajh lena ghar ko
apna sanatan thikaana
Tum ho musaafir aur ghar hai kewal musaafir khana
Tumhaare liye behtar hoga ki maan le tumhaara dil
Ki yahaan par nahin hai tumhaari atma kee manzil
Kyunki jo hai Paramatama ka dar
Vaheen mukammal hoga atma ka safar.

Isliye chal raha ho jaisa bhi daur
Guruji ke kareeb pahunchne kee kaayam rakho daud
Vehem aur andhvishwaas ko tum do chod
Dhyan lagaao atma kee unnati kee oar
Kewal mukh ko nahin, mann ko bhi lo Guruji kee oar tum moad
Ve tumhe kamzor karne wali sabhi bediyan denge toad.

Guruji sangg rishte mein bandh kar
Tum ho jaaoge sahi mainey mein azad
Jaise jaise badhegi Guruji se tumhaari preeti
Sakaaraatmakta se sajj jaayegi tumhaari manovritti.

Guruji kee mahima ke mahasaagar kee gehraayee ka tum lagaa nahin sakte andaaza
Guruji kee kripa se kumm ho sakta hai karmon ka takaaza
Sochoge Guruji kee sharan mein beete jeevan ka toh jaanoge tum
Ki kitne aaye huey kasht toh tumhaare bin jaane hee ho gaye kaheen gumm.

Guruji kee kripa se tum safar mein aagey badh paaoge
Unke ashish se tum ruhaani oonchaayee par pahunch jaaoge
Apni neeyat, apna parishram rakho nek
Dekhna, safal hoga tumhaare safar ka pal pratyek.

Jaise jaise waqt kee dhaara bahegi
Tumhaari yatra khiltee rahegi
Karte raho har pal tum Guruji ka shukrana
Unkee mehar se tumhe milega Unhee mein sanatan thikaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sanatan Thikaana (04/16/2024)

April 15, 2024

Om Namaha Shivaya
Aaj Ka Suvichaar 🙏🏻🙏🏻

#2248

                  Guruji Kee Drishti

Badhaa lo prem Guruji ke sangg
Chadhaa lo swayam par Guru bhakti ka rangg
Tum khud hee reh jaaoge dangg
Ki kaise badal jaayega tumhaare jeene ka dhangg.

Ek nayi himmat, ek naya utsaah
Sajaa dega tumhaare jeevan kee raah
Sehenshakti badh jaane ka hoga ehsaas
Kathin samay mein ye ehsaas mehsoos hoga khaas.

Jin chunautiyon se pehle tum thei ghabraate
Abb Guruji ke sahaare rahoge tum unhe galey se lagaate
Sakaaraatmak hoti jaayegi tumhaari vichaardhaara
Beshak tumhaara waqt chal raha ho maada.

Mann karta rahega satsang mein jaane ka
Chaav hoga Guruji kee mahima sunn-ne sunaane ka
Dinacharya ke saath bhi Guru chintan aur simran mein vyast rahoge
Duniya ke rangg dekhte dekhte bhi Guruji mein tum mastt rahoge.

Buss, tumhaari oar se chahiye hoga atal prayaas
Aur Guruji par poorna aur atoot vishwaas
Ki Ve har haalaat mein angg sangg Hain tumhaare
Tum swayam jaan logey ki Unhonei kaise Hain tumhaare kaaj sanvaare.

Unkee yaad mein raho har pal
Taaki Unke prem mein beete tumhaara aaj aur kal
Duvidhaayein aayengi toh jaayengi tal
Guruji ke simran aur dhyan se badhega tumhaara manobal.

Ye sab mumkin hai Guruji ke ashirwaad se
Kitne paapi bhi tarr gaye Guru prasad se
Tum par bhi awashya hogi bhakti ke rangon kee vrishti
Tum bhole bhaav se bulaate raho, tumhe bhi awashya taaregi Guruji kee drishti.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Drishti (04/15/2024)

April 14, 2024

Om Namaha Shivaya
Aaj Ka Suvichaar 🙏🏻🙏🏻

#2247

             Shehenshah Mahaan

Muskuraaye mera mann
Chhoo kar Guruji ke charan
Paakar Unke naam ka dhan
Safal ho gaya mera ye janam.

Guruji kee daya par mai vaari jaaoon
Unkee divyata ke samaksh mai sees jhukaaoon
Unkee leela mai naadaan na samajh paaoon
Unke prem mein mai toh phooli na samaaoon.

Unkee sharan mein aane se pehle na jaane kaise jee rahi thi Unke bin
Phir sochoon ki Unkee toh tabb bhi mujh par nazar thi raat aur din
Mai hee thi anjaan
Ki mai hoon Unkee santaan.

Abb toh mainey yeh jaana hai
Ki Unhe Guru Govind jo maana hai
Toh Unhee mein dikhein mujhe pita aur mata
Aisa sundar hua hai Unse mera naata.

Ye Unkee hee karuna ka hai kamaal
Ki Unhonei kiya hai mujhe Apni meher se maalaamaal
Alfaaz hee nahin hain mere zehen mein Karne ke liye Unkee meharbaani ka bakhaan
Kaash mere dil kee ye awaaz sunn le ye saara jahaan
Ki mere Guruji Maharaj Hain har Brahmand ke shehenshah mahaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shehenshah Mahaan (04/14/2024)

April 13, 2024

Om Namaha Shivaya
Aaj Ka Suvichaar 🙏🏻🙏🏻

#2246

                  Sachet Ho Jaa

Sachet ho jaa aye praani
Beeti jaa rahi hai zindagaani
Buss bhi kar abb karni aur naadaani
Varna aagey chalkar tere liye nishchit hai pareshaani.

Agar tu chaahta hai ki teri aagey kee yatra ho suhaani
Toh rutba rakh ruhaani aur imaan rakh insaani
Aise karmon se susajjit kar apne jeevan kee kahaani
Ki aane wale janam na banein tufaani.

Jo beet gaya usey tu nahin sakta badal
Kintu tu awashya sanvaar sakta hai apna aane wala kal
Uske liye apne vartmaan par kar le parishram bhara kaam
Japta jaa Guruji Maharaj ka nirmal naam.

Beshak yahaan hai tu aur tera shareer
Parantu tera antas pahunch jaayega Unke dhaam
Guruji sanvaar denge teri taqdeer
Aur denge tere safar ko kalyaankaari anjaam.

Tu na kar sanshay ya koi tark vitark
Mastt reh kintu reh apne karmon kee oar satark
Tere angg sangg Hain srishti ke sartaj
Teri niyati hai Unkee meher kee mohtaaj.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sachet Ho Jaa (04/13/2024)

April 12, 2024

Om Namaha Shivaya
Aaj Ka Suvichaar 🙏🏻🙏🏻

#2245

Baisakhi Ka Paawan Tyohaar Hai Aaya

Baisakhi ka paawan tyohaar hai aaya
Dil mein sabke mangal ke liye vintee hai ye laaya
Guruji ne kitnon ko Apni sangat hai banaaya
Ye jaan kar mera roam roam hai harshaaya.

Hoti rahe Guruji kee meher kee sangat par barsaat
Sangat Guruji kee yaad mein magn rahe din raat
Guruji kee kripa se hamaare shubh karmon kee fasal kee hariyaali ho
Guruji ke ashish se sabke ghar parivaar mein khushhaali ho.

Sangat kee Guruji mein lagan matvaali ho
Gyan ke deep jalein aise ki har raat diwali ho
Guruji yoon bakhshein ki kisee kee jholi na khaali ho
Kisee kee bhi ghargrahasthi mein kabhi bhi na kangaali ho.

Har oar ho Guruji kee mahima ka gungaan
Koi bhi na rahe Guruji kee mahaanta se anjaan
Guruji ke dikhaaye raaste par chalein sangat ke paaon
Guruji ko rijhaane mein vyast rahe har sheher aur har gaaon.

Ye satya ki har saans hai Guruji ka diya hua uphaar
Ye yaad rakh kar har din ko jeeyein jaise ho khaas tyohaar
Guruji ke hukm maankar hum prakat karein Unke prati apna aabhaar
Guruji ka shukr manaayein ek baar nahin, balki anginat baar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Baisakhi Ka Paawan Tyohaar Hai Aaya (04/12/2024)

April 11, 2024

Om Namaha Shivaya
Aaj Ka Suvichaar 🙏🏻🙏🏻

#2244

       Guruji Ka Das

Ek gaaon mein thaa ek saadhaaran sa kisaan
Vyapaar karne laga toh uska mann bharne lagaa shaan se bhari udaan
Sheher thaa ek vaheen paas mein
Vahaan jaane lagaa veh aadami.

Lagne lagi usey bhautikvaad kee hawaa
Bann gayi veh uske kamzor mann ke liye davaa
Mann ko miltee thi vahaan ke vaataavaran se aisee raahat
Ki vahaan phir jaane ke liye badhti jaati thi uske mann kee chaahat.

Sheher jaakar vaapis aata thaa jabb har baar
Mann uss-se karvaata thaa tabb se intazaar
Ki phir vahaan kabb jaayega
Jahaan mann ko mazaa aayega.

Karte karte mann ko hee arzi
Yoon maan-ne lagaa mann kee marzi
Ki banta gaya veh mann ka das
Badhti gayi uskee vishayon kee aas.

Beet gaye kuch saal
Bechayyn hua uska haal
Vyaapaar se dhan toh bahut kamaaya
Kintu mann ka das bannkar sab ganvaaya.

Simran karna bhoolta gaya har din
Chalta raha Guruji ko yaad kiye bin
Guruji sangg na jod paaya seedhi taar
Pareshaan karne lagi usey zindagi kee raftaar.

Chal kar jaa raha thaa ek shaam
Maano usey bheja Guruji ne paigam
Usey gulab kee khushboo aayi
Usey shabad kee dhvani dee sunaayi.

Saamne wale ghar se aa rahi thi veh awaaz
Bheetar dekha usne toh veh samjha khushboo ka raaz
Vaheen se khushboo aa rahi thi usey
Usey peechhe se ek sajjan ne kaha ki veh bheetar ghusey.

Usne joote utaare aur gaya bheetar
Mudd kar dekha toh koi na thaa uske peechhe darwaaze par
Veh hua hairaan ki sajjan gaye kahaan
Phir dekha toh unhee kee tasveer thi vahaan.

Unkee aarti karne lagey vahaan sabhi jann
Kisee ne vyaapaari se kaha ki ho raha hai Guruji ka satsang
Vyaapaari aashcharyachakit hua
Is anubhav ne uskee rooh ko chhua.

Hui uspar Guruji kee meher
Ho gayi uskee chetna kee seher
Usey shabad simran ka ho gaya phir se chaav
Simran hotei hotei shuddh hota gaya uska bhaav.

Badhne lagaa uska manobal
Kamzoriyan jaane lagin tal
Mann honei lagaa shant aur sthir
Uskee bechayyni duur honei lagi phir.

Guruji kee kripa se milee usey sadh sangat
Satsang aur sewa dwaara milee ruhaani rangat
Har pal veh paane lagaa Guruji ko apne paas
Jo mann ka das thaa, veh bann gaya abb Guruji ka das.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ka Das (04/11/2024)