Month: May 2024

May 11, 2024

Om Namaha Shivaya
Aaj Ka Suvichaar 🙏🏻🙏🏻

#2274

      Manka Manohar

Mann mein manka manohar
Pyaare Guruji ke naam ka
Guruji ne bhakt ko simarvaaya jabb
Toh usey darshan hua Unke dhaam ka.

Guruji ke naam ka har manka
Guruji kee meher se bhakt ne piroya
Toh bhaav vibhor hokar bhakt ka mann
Guruji ke pyaar mein muskuraaya aur roya.

Is se pehle ki uske mann kee aankh aur roti
Guru kripa se har aansoo banaa ik moti
Jo simarte simarte na jaane kahaan hua ojhal
Jaise uska koi sankat gaya ho tal uss pal.

Guruji kee daya bin na mumkin thaa kisee bhi sankat ka haran
Mann ke bhaav poorna simran se hota gaya bhakt ka pavitrikaran
Badhne lagaa Guruji ke naam ke mankon ka dhan
Bhakt pehle se bhi zyada hua Guruji mein magan.

Kayi janmon se bann rahi thi
Bhakt ke bheetar in mankon kee mala
Kintu kaheen na kaheen uskee bhakti mein kamee reh jaati thi
Aur mala poori na ho paati thi.

Is janam mein dekh kar uska atoot prayaas
Uspar Guruji kee kripa hui khaas
Is bhanti hui uske bheetar divya jyoti prajwalit
Ki uske saare pichhle kukarmon ke sabhi daag gaye mitt.

Guruji kee meharbaani se hua bhakt ka kalyaan
Usne mankon ka mol liya pehchaan
Is janam mein usne bhari aisee oonchi udaan
Ki Guruji kee leela se usey naman karne lagaa aasmaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Manka Manohar (05/11/2024)

May 10, 2024

Om Namaha Shivaya
Aaj Ka Suvichaar 🙏🏻🙏🏻

#2273

     Udaas Sa Ik Das

Udaas sa ik das
Baitha thaa Guruji ke paas
Lekar dil mein ardaas
Ki kaayam rahe uska Guruji par vishwaas.

Kayi mushkilein aa rahin thi
Zindagi ke darwaaze ke bheetar
Nishtha thi uskee Guruji mein bahut
Kintu chaahe usey nahin thi unke baare mein khabar
Veh aksar apne sanchit karmon se jaata thaa darr
Aur mayoos soch mein uska waqt jaata thaa guzar.

Beet chuke thei varsh kayi
Aa na rahi thi koi bhi khushi nayi
Tasalli thi usey ki vo thaa Guruji kee sharan mein
Aksar shukrana karte huey ro bhi deta thaa Unke charan mein.

Phir maangta thaa kshama
Aur guzaarta thaa kaafi samaa
Guruji ko rijhaane mein
Swayam ko samjhaane mein.

Karta thaa vo simran, jitna uss se ho paata thaa
Guruji ke satsang bhi sunta sunaata thaa
Guruji ke pyaar mein kayi geet bhi gaata thaa
Poori koshish kar ke bheetar sakaaraatmakta jagaata thaa.

Kintu dil ke ek chhote se konei mein thaa kuch khalipan
Jiska kaaran na samajh paata thaa uska mann
Usne Guruji se kaha vandan ke dauran
Ki Ve karein is khalipan ka samaadhaan.

Guruji kee kripa se jabb veh ek din baitha dhyan simran mein
Guruji ne uske sangg baatein kee kuch kshan mein
Kaha Unhonei das se ki veh karta chale
Har mushkil ke baavajood Unka shukrana
Kyunki is vilamb mein jo Guruji kar rahe Hain uske liye
Uss se sanvar jaayega uske jeevan ka afsaana.

“Kalyaan kitta, “Guruji ne usey kaha muskuraate huey
Usne shukrana kiya Guruji ke charnon mein sir ko jhukaate huey
Maangi usne Guruji se Unhe sarvsamarpan kar paane kee buddhi
Guruji ne dee bakhshish aur kee uske antas kee bhi shuddhi.

Mushkilein toh khatm huin waqt ke saath saath
Kintu pehle se aasaan hua karna unka saamna din raat
Usey maalum thaa ki uske sir par hai Guruji ka haath
Isliye mushkilon ke baavajood ghabraane kee nahin hai baat.

Guruji kee kripa se udaas sa das tarta raha
Guruji kee meher se bhaav poorna bhakti veh karta raha
Guruji kee daya ke sahaare usne vishwaas se kathin samaa saha
Paawan prayaas kar usne Guruji ko shwaas shwaas se shukrana kaha.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Udaas Sa Ik Das (05/10/2024)

May 9, 2024

Om Namaha Shivaya
Aaj Ka Suvichaar 🙏🏻🙏🏻

#2272

Zindagi Toh Guzar Hee Jaayegi

Zindagi toh guzar hee jaayegi
Ismein koi shak nahin
Waqt ko apni marzi se koi rok paaye
Kisee insaan ko yeh hak nahin.

Lekin apni marzi se waqt ka sahi upayog
Phir vo ho chaahe bhog ya yog
Kaafi hadd takk aisa hai mumkin
Lekin ye mumkin nahin Guruji kee kripa ke bin.

Guruji kee kripa se hee miltee hai har bakhshish
Chaahe ho veh Unke simran aur chintan kee
Ya Unke dhyan aur gyan kee
Bakhshish asal cheez kee pehchaan kee.

In sabke bin bhi sooraj uday hoga aur dhalega
Kintu hamaara waqt Guruji kee yaad mein nahin chalega
Toh hamaara koi kasht poornata se nahin talega
Aur antas mein nirarthak sanshay palega.

Aisa na ho ki Guruji ke kareeb honei ke bajaay
Hum ho jaayein Unse duur
Phir toh Guru praapti ka sundar sapna
Ho sakta hai chuur chuur.

Guruji se karein ardaas
Ki har waqt hum Unhe karein yaad
Subah shaam jaagte sotey
Unhee se antas rahe aabaad
Waqt ka har lamha hum Guruji se wafa mein bitaayein
Taaki aviraam waqt ke saath saath hum Guruji ke aur bhi kareeb aa paayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Zindagi Toh Guzar Hee Jaayegi (05/09/2024)

May 8, 2024

Om Namaha Shivaya
Aaj Ka Suvichaar 🙏🏻🙏🏻

#2271

                    Shabdon Ke Paar

Shabdon ke paar
Unke arth ke bhi paar
Hain Guruji sarkar
Shiv Parameshwar Parwardigaar.

Mahasaagar kee gehraayee se bhi gehre
Akash ke uss paar bhi Hain jinke pehre
Jinkee kripa se sooraj pehen paata hai sundar sehre
Unn Guruji Maharaj kee leela ke rangg hain sunehre.

Jinhe pahunch jaati hai Unke bhakt ke dwaara kee kaisi bhi aradhana
Jo sweekarte Hain shuddh bhaav se kee hui har sadhna
Jinke hriday mein nitya niwaas karti hai samvedana
Hum mein se koi nahin de sakta aise Guruvar ka dena.

Hamaari buddhi, soch, indriyon se aagey kaheen
Jahaan ka spandan hai sabse haseen
Jahaan ek ho jaate hain aasmaan aur zameen
Guruji kee pahunch vahaan bhi khatm hoti nahin.

Jo hamein kalyaan ka raasta dikhaate Hain
Jo Apni kripa se uspar hamein chalaate Hain
Jo hamaare girne par hamein uthaate Hain
Ve deendayal Guruji har bhakt ko paar lagaate Hain.

Aaj nahin toh kal, aayegi hum sabki baari
Guruji kee meher se karein apni oar se hum tayyaari
Guruji Maharaj kee leela hai ati-nyaari
Unke kadmon mein jhuki hui hai srishti saari kee saari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shabdon Ke Paar (05/08/2024)

May 7, 2024

Om Namaha Shivaya
Aaj Ka Suvichaar 🙏🏻🙏🏻

#2270

                    Uttam Uphaar

Guruji karte rehte Hain hamaara maargdarshan
Jiske dwaara hamaara kalyaan hota hai har kshan
Unka har roop hai hum bhakton ke hitt ke liye
Apni prerna se Ve jalaate Hain hamaare chitt mein jaagriti ke deeye.

Guruji Hain samraat hamaare
Hum Unkee prajaa ke sadasya
Guruji Hain adhyaksh parivaar ke
Mool aur aadhaar hamaare ghar sansaar ke.

Guruji pita ke roop Hain
Unke sneh mein hai Apne har bachche ke hitt kee chaahat
Guruji mata kee moorat Hain
Unkee mamta se miltee hai Unkee har santaan ko peeda se raahat.

Guruji Hain bandhu pyaare
Jeene ka utsah milta hai Jinke sahaare
Guruji Hain maalik, bhakt hain das
Guruji swatantra, hum gulam Unke.

Guruji Hain meet wafaadaar
Unke saath kee ahamiyat hai aparampaar
Guruji Hain murshid shaandaar
Unke sanrakshan mein hai gyan ka bhandaar.

Gyan, adhyaatma kee gehraayee ka
Jo varnankaari hai Unkee vadiyaayee ka
Kyunki Ve Hain Paramatama swayam
Jinkee kripa se toot-te hain hamaare saansaarik bandhan.

Virat param anupam anoop
Hai Guruji ka Paramatama roop
Nitya, nirantar, nirmal
Jinkee kripa se dhul jaaye bhakt ka mal.

Shiv avatari Guru Paramatama mein
Har rishte ka vimal vihaar hai
Jis bhi roop mein poojein Unhe hum
Unkee bhakti kee agya milna ek uttam uphaar hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Uttam Uphaar (05/07/2024)

May 6, 2024

Om Namaha Shivaya
Aaj Ka Suvichaar 🙏🏻🙏🏻

#2269

           Kewal Ek

Chaahaton aur zarooraton ka mel
Inse sajaa hai jeevan
Beshak jeevan swayam mein hai khel
Yeh khel jaari rehta hai har kshan.

Ho sakta hai ki chaahne wale mil jaayein anek
Lekin agar samajhne wala mil jaaye kewal ek
Toh paakar Uska pakka saath
Bann jaaye jeevan bhar kee baat.

Kitne jann hain hamaare aas paas
Kuch anjaane, kuch jaan pehchaan ke, kuch unse bhi zyaada khaas
Kintu jaise Guruji rehte Hain angg sangg hamaare
Jaise Unke ruhaani saanidhya mein beet-te hain jeevan ke pal saare
Vaisa saath ho hee nahin sakta kisee aur ka
Guru roopi meet hai saathi jeevan ke har daur ka.

Kyunki Guruji chaahne ke saath saath hamein samajhte hain
Ve jaante Hain ki hum kaise aur kis kis uljhan mein ulajhte hain
Kewal Guruji ke paas hoti hai hamaari har uljhan kee suljhan
Hamein chaahne wale chaahein bhi toh hamesha suljha nahin sakte hamaari uljhan.

Chaahne wale chaahte huey bhi nahin saath ho sakte sada
Aur zaroori nahin ki sabko sahi lagey ek dooje kee raza
Kintu Guruji kee raza mein razi rehkar
Unkee panah mein matbhed aur mushkil sehkar
Nishchit hai samasya ka samadhan
Kyunki raza bayaan karne wale swayam Hain Bhagwaan.

Zaroori nahin ki chaahne wale hamaari galati ko karein nazaraandaz
Kintu Guruji toh hamaari galatiyon ko bhi rakhte Hain ik raaz
Is kalyuga ke adbhut se samay mein
Chaahne waalon kee chaah badal jaaye, ye hai mumkin
Kintu Guruji har bhakt ko praathamikta dete rahenge har din
Ek pal bhi guzaarna mushkil hai Unkee rehmaton ke bin.

Kewal Guruji de sakte Hain veh amrit vimal
Jiske paan se jeevan ho sakta hai safal
Unke pyaar ke mahasaagar ke aagey
Aur kisee bhi chaahne wale ka pyaar hai boond se bhi kumm
Ek Guruji hee poornata se hamaare bin boley boojh sakte Hain
Ki hamein sataa raha kaisa maajra ya kaunsa gumm.

Chaahne wale haath chod sakte hain
Kintu Guruji kabhi haath na chodenge
Chaahne wale aksar dil toad sakte hain
Kintu Guruji kabhi dil na todenge.

Poori duniya bhi chaah le hamein
Toh vo sukh na miley jo sukh hai Guruji ke saath mein
Beintehaa khushnaseebi hai hamaari
Ki Guruji ne hamaara haath liya hai Apne kripalu haath mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kewal Ek (05/06/2024)

May 5, 2024

Om Namaha Shivaya
Aaj Ka Suvichaar 🙏🏻🙏🏻

#2268

Ruhaani Oonchaayee Par Pahunch Paayega Vo

Padaarthon mein nahin
Ohade mein bhi nahin
Na hee baaki kee moh maya ya duniyadari mein
Na hee shaandaar ghar ya gaadi mein.

Nahin hai inmein se kisee mein bhi
Veh sukh jo ho sanatan aur sachcha
Jo yeh jaan nahin hai paaya
Veh ruhaani safar mein abhi hai bachcha.

Aisa bachcha, jo abhi hai naadaan
Jo abhi takk hai asal gyan se anjaan
Jiske liye shaayad poojaneeya hon Bhagwaan
Kintu usey nahin hai Unkee praapti ke sandarbh mein gyan.

Sanatan sukh ka sambandh hai atma se
Aur veh sanatan sukh milta hai Ishwar Paramatama se
Kyunki atma aur Paramatama kee seema nahin
Jabb ki har saansaarik sukh ka antt ho jaata hai kaheen na kaheen.

Guruji Maharaj Apni Shivmayi leela se
Bhakton ko sanatan sukh ka raasta Hain dikhaate
Duniyadari aur dinacharya nibhaate huey kaise chalna hai
Ve vo sabb bhi bhakton ko Hain sikhaate.

Unke tareeke Hain anokhe
Har bhakt ke liye vishesh
Ve Hain Guru ke roop mein Bhagwant
Unhee kee praapti mein hai sukh anant.

Jo Unse jude rehne kee koshish mein rahe nirantar
Uss shakhs ka Unhee ke chintan mein beet-ta hai safar
Har pal Guruji ko chet-ta hai jiska chitt
Nishchit hai aise bhakt ka hitt.

Ye hee hai dagar sanatan sukh ko paane kee
Guruji ke bhakt ko zaroorat nahin kaheen bhi aur jaane kee
Kyunki Guruji ka dar toh hai sabse ooncha dar
Ruhaani oonchaayee par pahunch paayega vo, jo is dar par sachche mann se jhuka lega apna sir.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ruhaani Oonchaayee Par Pahunch Paayega Vo (05/05/2024)

May 4, 2024

Om Namaha Shivaya
Aaj Ka Suvichaar 🙏🏻🙏🏻

#2267

Dekar Apna Paawan Pyaar

Dekar Apna paawan pyaar
Dekar ye pyaar har baar beshumaar
Param poojya Guruji sarkar
Dete Hain Apne bhakton ko taar.

Ye hai Guruji ka diya pyaar
Hai is pyaar kee mahima teri kalpana ke bhi paar
Is pyaar ke aasare tu chamkaa le apna kirdaar
Ye pyaar hai tere pooran uddhaar ka aadhaar.

Shaamil hain is pyaar mein imtehaan
Kyunki murshid bhi Hain Guruji mahaan
Shaamil hai is pyaar mein bhautik mushkil
Kyunki asal bhakt vo jo Guru ko de de apna dil.

Shaamil hai is pyaar mein maya Guruvar kee
Kyunki veh shakti hai Unkee aur Unke dar kee
Shaamil hai is pyaar mein aisa vishwaas
Jo kabhi bhi kisee bhi paristhiti mein na ho udaas.

Shaamil hai is pyaar mein aisee ruhaaniyat
Jo nikhaar degi teri insaaniyat
Shaamil hai is pyaar mein aisee inaayat
Ki kabhi vyarth ya asaar na jaayegi teri kee ibadat.

Jitna hoga tera mann saaf
Utna hee ye pyaar tujhe karega tere gunaahon ke liye maaf
Is pyaar kee pavitrata hai aparampaar
Saare teerath dham karein is pyaar ko namaskaar.

Is pyaar ko paane ke liye
Sainkdon jann karte hain minnatein kayi hazaar
Is pyaar ke sahaare tu sakega har janam guzaar
Is pyaar ko na bisaar, is pyaar ka kar tu aadar satkaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dekar Apna Paawan Pyaar (05/04/2024)

May 3, 2024

Om Namaha Shivaya
Aaj Ka Suvichaar 🙏🏻🙏🏻

#2266

    Hokar Chayyn Ke Liye Bechayyn

Param poojya Guruji Maharaj,

Hokar chayyn ke liye bechayyn
Bheeg rahe hain mere ye jo nayyn
Inmein Aapki meher se Aapki chhavi aise samaa jaaye
Ki nayynon ko kewal Aapke pyaar mein bheegna raas aaye.

Aap hee Hain murshid
Aap hee Hain meet
Aap hee toh Hain maula mere
Aapse har din badhti jaaye preet.

Sab kuch haar kar Aapke charnon mein
Mila hai Aapse simran ka haar
Is haar ke har manke mein
Mehsoos hota rahe mujhe Aapka pyaar.

Kyunki Aapke pyaar ke bin
Nirarthak hain ye raat aur din
Aap Hain Har, har pal Aap mere sankat rahe Hain har
Kripa kar har leejiye mera har sanshay aur darr
Aap par nirantar atoot vishwaas rahe mera, deejiye mujhe ye var
Varna toh tayy na ho paayega ye safar.

Shukriya ki Aapne mujhe thaama hai, Guru sarkar
Aapke charnon mein hota jaaye mera uddhaar
Aapne Apni karuna se kitnon ko diya hai taar
Arzi hai Aapse ki kar deejiye abb mera bhi beda paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Hokar Chayyn Ke Liye Bechayyn (05/03/2024)

May 2, 2024

Om Namaha Shivaya
Aaj Ka Suvichaar 🙏🏻🙏🏻

#2265

        Guruji Se Baatein Karte Raho

Guruji se baatein karte raho
Saarthak ho jaayega tumhaara har shwaas
Jawaab miley ya na miley
Tum kaayam rakho Unpar vishwaas.

Guruji ko do praathamikta
Khil jaayegi tumhaari aastikta
Unke simran aur chintan se badhega tumhaara manobal
Itne kasht toh aane se bhi pehle jaayenge tal.

Chalte raho Guruji ke naksh-e-kadam par
Tum jeevan ke raaste par hotey chaloge agrasar
Kyunki jabb Guruji raasta tayy karaayenge
Toh tumhaare kadam kabhi bhi na dagmagaayenge.

Guruji ne thaama hai tumhaara haath
Tum bhi sanjo lo Unka sundar saath
Akele mehsoos kabhi na karoge
Ekant se bilkul bhi na daroge.

Guruji rakh rahe Hain tum par nazar
Tum is satya kee karo kadar
Guruji kee hoti rahegi tum par nadar
Aur sanvarta rahega tumhaara safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Se Baatein Karte Raho (05/02/2024)