Month: June 2024

June 20, 2024

Om Namaha Shivaya
Aaj Ka Suvichaar 🙏🏻🙏🏻

#2314

        Kar Ke Guruji Ka Shukrana 

Behaal bhakt ho jaaye nihaal
Pehen kar Guruji ke naam kee dhaal
Nirbal ko mil jaaye bal
Peekar Guruji ka amrit roopi jal.

Naadaan insaan ko mil jaaye gyan
Kar ke Guruji ka shraddha poorna dhyan
Bechayyn jann ko mil jaaye chayyn
Jabb Guru daras se anugrahit hon uske nayyn.

Patjhad mein mehsoos ho saawan
Lekar Guruji ka naam paawan
Andhere ko vida kar de uttam ujaala
Jabb mann ho jaaye Guru prem mein matvaala.

Gumraah ko mil jaaye raah
Kar ke Guruji kee bhakti ka utsah
Beghar ko mil jaaye Guruji ka dar
Jabb pyaare Guruji karein nadar.

Sangat par barsey Guruji ka ashirwaad
Grahan kar ke Unka diya langar prasad
Dawaai kar paaye apna asar
Paakar Guruji kee mehar.

Apni asaliyat se ho jaaye milan
Jabb Guruji kee kripa se ho simran
Dukhiyaare ke dukh ho jaayein lupt
Kar ke daan, sewa, aur paath gupt.

Thaki hui atma ko mil jaaye raahat
Sunnkar Guruji ke aane kee aahat
Niraasha ko mita de asha ka rangg
Jabb suno sunaao Guruji ke satsang.

Dhanya ho jaaye zindagi
Paakar Guruji kee bakhshindagi
Tarr jaaye jeevan ka afsaana
Kar ke Guruji ka shukrana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kar Ke Guruji Ka Shukrana (06/20/2024)

June 19, 2024

Om Namaha Shivaya
Aaj Ka Suvichaar 🙏🏻🙏🏻

#2313

           Sabhi Ho Jaayein Sukhi

Badal kar mausam ka rukh
Dooji oar kar ke apna mukh
Hawaaon ne jaari rakha apna safar
Chhoote huey na jaane kaunse kaunse dar.

Chooma unhonei Guruji ke paaon ko
Sajda kiya Unke aanchal kee chhaaon ko
Kehne lagi ve Guruji Maharaj se
Brahmand ke sundar Sartaj se,
“Aapke hukm par hum badal deti hain rukh mausam ka
Kintu kewal Aap badal sakte hain rukh har sankat aur gumm ka
Jo bann gaya hai hissa jann jann ke jeevan ka
Jo chheen raha hai saundarya sabke mann ke aangan ka.”

Guruji ne hawaaon ko samjhaaya,
“Ye hai insaan ka kiya karaaya
Prakriti ka kiya nahin sammaan
Kalyugi insaan hain bilkul naadaan.”

“Kewal duniyavi hai Unka gyan
Duur hona hoga unka ruhaani agyan
Ve kehte sunte hain ki Mai hoon kann kann mein
Phir bhool bhi jaate hain ek hee kshan mein.”

“Ek toh ekatrit kiye hain unhonei karma sanchit
Ve Meri kripa se rahe hain mitt
Parantu ikattthaa karte jaate hain aur bhi bhaar
Aise mein kaise gumm rahit hoga sansaar?”

Guruji ne kaha, “Mainey liya bashar ka roop
Phailaane vivek aur kalyaan kee dhoop
Kayi jann baney mere bhakt aur chhaatr
Kaiyon ne khali kiya mann ka paatr.”

“Kintu ve bacha na paayein apne ko vikaar ke aakraman se
Isliye sankat aur gumm duur nahin hotey hain unke jeevan se
Mai kripa karta rahoonga Unhe jodey rakh Apne dhyan aur simran se
Kintu unhe sahi kaam karna hoga apni swatantra ichcha ke dhan se.”

“Tabhi toh rukh badalega gumm ka
Aansoo sookhega har aankh numm ka
Mai toh gumm ka rukh badalta hoon par nasamajh hain ye insaan
Mutthi bhar reh jaayenge jinhe hogi asal dhan kee sahi pehchaan.”

“Ve hongei taruvar ke unn patton ke samaan
Jo taruvar se judey rahenge beshak aaye patjhad ya tufaan
Mai toh karta chaloonga sabhi bhakton ka kalyaan
Aur saath hee leta chaloonga har bhakt ka imtehaan.”

Hawaaon ne Guruji ke charnon mein sees jhukaaya
Guruji ne unhe Apni ruhaani khushboo se mehkaaya
Hawaaon ne dua kee ki har manmukhi ho jaaye Gurumukhi
Taaki Guruji ke ashirwaad se sabhi ho jaayein sukhi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sabhi Ho Jaayein Sukhi (06/19/2024)

June 18, 2024

Om Namaha Shivaya
Aaj Ka Suvichaar 🙏🏻🙏🏻

#2312

     Guruji Kee Kripa Rangg Laayegi

Jabb bheetar aur baahar ho andhera
Jabb dikh hee na raha ho kaheen bhi savera
Guruji tabb bhi Hain bheetar aur baahar tere liye
Tayyaar kar rahe Hain ashirwaad ke deeye.

Tujhe Ve dikh nahin rahe hon beshak
Kintu mann mein na aane de tu shak
Kyunki chaahe Guruji kee maujoodagi hai teri shaareerik aankhon ke paar
Tere antas kee aankhon ko hota reh sakta hai Guruji ka deedar.

Guruji kee mamta bhari mehar
Yakeenan dikhaayegi apna asar
Tu koshish karte rehne kee koshish kiya kar
Guruji ne pehle bhi tera dukh har liya hai aksar.

Tujhe vaasta tere akhand vishwaas ka
Na chod daaman tu prayaas ka
Guruji ke samaksh badi se badi samasya chhoti hai
Unke hastakshep se samasya khatm hoti hai.

Unke naam amrit se seench apne har shwaas ko
Ve jaante Hain teri har kahi aur ankahi aas ko
Unse ardaas kar ki judi rahe teri surt Unkee surt ke saath
Unke ashirwaad ke deeye jald hee roshan karenge teri andheri raat.

Guruji kee kripa rangg laayegi
Subah zaroor aayegi
Tujhe aagey badhaayegi
Safalta takk pahunchaayegi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Kripa Rangg Laayegi (06/18/2024)

June 17, 2024

Om Namaha Shivaya
Aaj Ka Suvichaar 🙏🏻🙏🏻

#2311

Satchittanand Ke Sampoorna Aadhaar

Kaanon se ho shravan
Hriday mein ho havan
Mann mein ho simran
Pyaare Guruji ke naam ka
Apne bheetar anand aaye
Guru mein basey Shiv ke dhaam ka.

Unhee ke sangg har lamha aaraam ka
Unhee ke saath har lamha vishraam ka
Unhee mein deedar Ram aur Shyam ka
Unhee se aarambh aur antt har kaam ka.

Ye kalpana nahin, yahee ho hakeekat
Buss, apni oar se chaahiye dridh nishchay aur nek neeyat
Unhee se ishq bakhsh deti hai Unkee ibadat
Bhakt kee rooh ko shringaarit kar deti hai Unkee inaayat.

Ye rooh se rooh ka rishta na jaane kab hua thaa shuru
Parantu ye awashya jaante Hain hamaare pooran Guru
Unka diya asal sukh hai har sambhaavya sukh suvidha se paar
Guruji Maharaj swayam Hain Satchittanand ka sampoorna aadhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Satchittanand Ke Sampoorna Aadhaar (06/17/2024)

June 16, 2024

Om Namaha Shivaya
Aaj Ka Suvichaar 🙏🏻🙏🏻

#2310

                    Aapki Kripa Se

Param poojya Guruji Maharaj,

Aapki kripa se sunaaoon sundar sa anubhav aaj
Dekha ik manohar drishya
Dikha ek susheel shishya
Mastaana Aapke dar ka
Pyaasa Aapki meher-e-nazar ka
Deewaana Aap pyaare se Guruvar ka
Sewak Aap Mahadev Har ka.

Aap maalik ke charnon mein rakh kar veh apni matt
Koshish karta hai vo ki rakhe vikaaron se vrat
Aapko yaad kiye bina na soyey, na jaagey, na khaaye
Aapki agya bin ek kadam bhi aagey na badhaaye.

Rakh kar Aapka hukm sir aankhon par
Aapke simran aur chintan mein magn rehkar
Aapki mahima gaate huey jeeta hai vo zindagi
Usey santusht rakhti hai Aapki bandagi.

Aisa shishya bann paane ke liye
Jalaaye hongei usne awashya samarpan ke deeye
Mann ka paatr kiya hoga tayyaar
Taaki ekatrit kar paaye Aapki kripa aparampaar.

Adarneeya Guruji, mujh par bhi kar deejiye aisee meharbaani
Ki mai chod paaoon apni har naadaani
Aapki shishya kehlaane ke yogya bann paaoon
Aapko apne vichaar aur karma se sada prasann rakh paaoon.

Aapke charnon mein samarpit karoon apni akal
Aapke paas hee hai mere bheetar ke har agyan ka hal
Nishchay hee ho jaayega mera safar safal
Jabb Aapki kripa se praapt hoga mujhe gyan asal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Kripa Se (06/16/2024)

June 15, 2024

Om Namaha Shivaya
Aaj Ka Suvichaar 🙏🏻🙏🏻

#2309

Apni Meher Ka Noorani Nazaara

Bhakt kee palak se jabb aansoo chhalak jaaye
Karmon ka karz chukaate huey jabb rooh thakk jaaye
Toh Guruji ko hoti hogi sabse zyada pareshaani
Jabki humne kee hoti hai jaane anjaane mein naadaani.

Vo naadaani hui ho is janam mein ya pichhle kisee janam mein
Vahee banti hai kaaran abhi ke gumm mein
Kintu jo aushadhi hai Guruji ke naam ke marham mein
Vo raahat deti rahegi gumm ke har kshan mein.

Guruji ke naam ka marham
Zaroor bharta rahega hamaare zakhm
Kumm karta rahega hamaara gumm
Jaise jaise beetega hamaara jeevan.

Thaki hui rooh ko miltee rahegi raahat
Poori honei lagegi aagey badhne kee chaahat
Paramaarth ke raaste par
Guruji ke is dayalu dar par.

Guruji ka naam hee hai sahaara
Iske bin kisee bhakt ka nahin hai guzaara
Jisne bhi Guruji ko hai deen bhole bhaav se pukaara
Guruji ne dikhaaya hai usey Apni meher ka noorani nazaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Apni Meher Ka Noorani Nazaara (06/15/2024)

June 14, 2024

Om Namaha Shivaya
Aaj Ka Suvichaar 🙏🏻🙏🏻

#2308

               Keejiye Aisee Inaayat

Param poojya Guruvar,

Aap taral taruvar, Aap taaranhaar
Aap prakash ke punj, Aap hee paalanhaar
Aap komalta ke kunj, Aap kalyaankaari
Aap saralta ke sarovar, Aap Shiv avatari.

Jo shanti miltee hai Aapki sharan mein
Usmein der ho sakti hai par andher nahin
Jo chayyn milta hai Aapke charan mein
Vahaan uday hoti hai sada saver sahi.

Raahon mein kaantein ho toh bhi Aap rukne nahin dete
Zara sa dard kya hota hai bhakt ko, Aap toh usey Apni goad mein Hain le lete
Jabb dhoop hoti hai karkash, Aap Apne aanchal kee chhavi bhari chhaaon Hain dete
Aur jabb sheet se hoti hai kathinaayi, Aap Apni mamta ka narm sauhaard Hain dete.

Utsah bakhshiye taaki mai kabhi na ho jaaoon udaas
Prerna bakhshiye ki sada mehsoos kar paaoon Aapko mai Apne aaspaas
Deejiye gyan, dhyan, atma-sammaan aur vinamrata ka daan
Keejiye aisee inaayat ki mai bann paaoon changa insaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Keejiye Aisee Inaayat (06/14/2024)

June 13, 2024

Om Namaha Shivaya
Aaj Ka Suvichaar 🙏🏻🙏🏻

#2307

          Mumkin Hai 

Kaayinaat ke kore kaagaz ko
Pyaare Guruji, Aapne Apni kripa se kiya kritagya
Har brahmand, sooraj, chand aur taare
Aapke hukm mein hain ye saare.

Aapka vandan karey vanaspati
Pawan bhi Aapko maane Pashupati
Dharti, jal, agni, aur akash
Na lein ve bhi Aapki sewa se avakaash.

Aapki bakhshish hoti hai har sewa jo miltee hai
Aapki kripa barasti hai toh rooh khiltee hai
Saari kaayinaat ho ya phir ho ek bhakt kee zindagi
Aap lekhe mein likhein toh hee mumkin hoti hai kar paani Aapki bandagi.

Aapka naam lene ke liye bhi
Zaroori hai Aapki manzoori
Aap bhakt kee koshish par meher karein
Toh hee mit sakti hai uskee Aapse duuri
Aap toh dena chaahte Hain har bakhshish, har daat
Lekin hum kaabil toh banein ki sambhaal paayein Aapki dee saugat.

Is kaabiliyat kee bhi bakhshish deejiye, Guruvar
Varna har saugat paakar bhi hum khaali reh jaayenge
Aapka dar na chhoote kabhi, Prabhu
Kalyaan ka khazaana hum yakeenan yaheen paayenge.

Yeh kewal ummeed nahin, ye hai akhand vishwaas
Jiske sangg judi hai Aapko paane kee atoot aas
Ye hai toh chhota muh aur bahut badi baat
Kintu Aapke dayalu dar par mumkin hai paani har daat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mumkin Hai (06/13/2024)

June 12, 2024

Om Namaha Shivaya
Aaj Ka Suvichaar 🙏🏻🙏🏻

#2306

              Aapke Aur Bhi Kareeb

Param poojya Guruji Maharaj,

Shukrana har beete huey kal ka
Jo Aapke charnon mein bitaaya
Jisne tapaa kar meri ruhaani kaaya
Itna kuch dikhaaya aur sikhaaya.

Itnee bakhshishein, itne ashirwaad
Bhautik sukh ke sangg adhyaatmik prasad
Jodte rehte Hain mujhe Aap Apne se simran, sewa, satsang ke dwaara
Har sukh dukh kee ghadi mein Aap baney Hain mera sahaara.

Kaha thaa Aapne ki ye raasta nahin hai aasaan
Kaha thaa Aapne ki aayenge kayi imtehaan
Kintu Aapke aanchal kee chhaaon mein beet rahi hai jeevan kee dastaan
Jaanti hoon ki Aap mere angg sangg hotey Hain mai hoti hoon jahaan.

Apni ruhaani maujoodagi se Aap anugrahit karte Hain lamhe intazaar ke
Apni bakhshish se Aap sudhaarte Hain sanskaar mere har anuchit vichaar ke
Aapka shukrana ki Aap tufaan ke dauran bhi dete Hain anmol jhonke bahaar ke
Aapka shukrana ki Aap qubool kar lete Hain mere bol Aapke prati pyaar ke izhaar ke.

Aapki vadiyaayee kee gehraayee mein doobti jaa rahi hoon jabb se
Duniyadari mein doobne se bachaate rehte Hain Aap tabb se
Aapke khayaalon mein khoti jaati hoon jitna
Aap duniya ke mele mein khone se bachaate Hain utna.

Ye Aapki karuna bin nahin ho sakta mumkin
Shukrana karoon Aapka mai har din
Subah se lekar raat takk ke har pal ke liye
Aur phir aglee subah takk ke har pal ke liye.

Har peher ka shukrana karoon Aapko, mere Guruvar
Shukrana ki Aapne bulaaya Apne dar par
Shukrana ki Aap dete Hain shukrana karne ka avsar
Shukrana ki Aapka haath hai mere sir par.

Idhar udhar rulne se bachaane ka shukrana
Jal kee har boond aur ann ke har daane ka shukrana
Meri liv kee leher ko Apni oar le jaane ka shukrana
Aapki kripa se jo sanvar raha hai, mere uss afasaane ka shukrana

Shukrana aaj ka, shukrana Aap Maharaj ka
Shukrana uss kal ka jo aayega
Aapki bakhshi hui har sunehri daat vo laayega
Jis se mera bhavishya mujhe Aapke aur bhi kareeb laayega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapke Aur Bhi Kareeb (06/12/2024)

June 11, 2024

Om Namaha Shivaya
Aaj Ka Suvichaar 🙏🏻🙏🏻

#2305

Guruji Aur Unke Bhakt Ke Beech Kee Baat

Aksar haalaat shaamil hotey hain insaan ke haal mein
Koi dooja dekh paata hai, koi nahin
Aksar jawaab chhipe hotey hain sawaal mein
Koi dooja jaan paata hai, koi nahin.

Dunivayi paheliyan boojhte boojhte
Kabhi kabhi yoon beet jaati hai zindagi
Ki aakhir mein yaad aata hai
Ki karni hee reh gayi bandagi.

Kaash aisa honei se pehle hee hum sambhal jaayein
Kyun na aaj, ya phir abhi hee, swayam ko yaad dilaayein
Ki Guruji se jude rehne mein hee hai hamaari bhalaayee
Kalyuga mein hamaara ekmaatra sahaara hai Unkee guruyaayee.

Kyunki Guruji hee Hain vo sarvashreshth maargdarshak
Jo kalyuga ke kohare mein karaate rahenge hamein agrasar
Agar maargdarshak hee nipun na hoga
Toh aur bhi kathin hota jaayega ye safar.

Vaise kathinaiyan kya hain kumm
Jo unhe aur badhaava dein hum
Kyun na Guruji kee madad ko maanein
Bina banaaye anekon bahaane.

Guruji shubhchintak Hain hamaare
Is satya ko yaad rakhne mein milta rahega ek anokha anand
Kalyugi duniya ke mele mein Guruji se baantein haal
Chod dein ahem, vehem, aur paakhand.

In sabse azad hokar jo hum karenge bandagi
Toh badhti jaayegi Guruji kee bakhshindagi
Kyunki jabb shuddh bhaav se Guruji ko bhajega Unka chhaatr
Toh hee ashirwaad paane ke kaabil banega uske antas ka paatr.

Phir haalaat jaise bhi hongei, achcha hee hoga haal
Na pareshaan karega koi bhi sawaal
Mitenge vikaar ke dosh
Milega santosh
Is rishte mein kisee tareh ka koi roab nahin jataa sakti duniyadaari
Kyunki Guruji aur Unke bhakt ke beech kee baat hai ye saari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Aur Unke Bhakt Ke Beech Kee Baat (06/11/2024)