Month: June 2024

June 10, 2024

Om Namaha Shivaya
Aaj Ka Suvichaar 🙏🏻🙏🏻

#2304

 Guruji Mein Poori Tareh Se Ramm Kar

Kehne se nahin, karne se hota hai pyaar
Guruji se pyaar kar ke dekho toh ek baar
Tumhaare jee chaahega Unhe pyaar karne ka baar baar
Kyunki tum har pal Unke pyaar mein hee paaoge karaar.

Jitna pyaar dogey tum Guruji Maharaj ko
Utna apne kareeb mehsoos kar paaoge Unn sartaj ko
Kyunki tabb hee jud paati hai rooh se rooh ke beech seedhi taar
Jabb koi bhi kabhi bhi dakhal nahin de sakta ek bhi baar.

Kyunki Guruji ka har bhakt se hai anokha naata
Rooh se rooh ka ye naata jo bhakti ko gehra hai kar paata
Bhakt jitna Guruji se hai judta jaata
Utna hee veh sukhi hai ho paata.

Kyunki rooh se rooh ke is naate se
Bhakt banta jaata hai antarmukhi
Aur antarmukhi jann hee reh sakta hai sukhi
Varna baahari prabhaav toh aasaani se kar sakte hain dukhi.

Guruji kee bakhshish se hota rahe simran aur dhyan
Taaki milta rahe tumhe antarmukhi bann-ne ka gyan
Vahee raasta le jaayega Guru milan kee oar
Naadaani hogi jo tum usey dogey chod.

Bin kahe, bin jataaye
Guruji se pyaar jo karta jaaye
Na dikhaawa, na chadhaava
Buss, bheetar ruhaani bulaava.

Aise antarmukhi honei se praapt hogi jo shanti
Uspar aisa ruhaani rangg laayegi Guruji kee kanti
Ki kewal chehra nahin, balki tumhari rooh ho jaayegi Unke noor se noorani
Guruji mein poori tareh se ramm kar hee toh safal hogi tumhari zindagaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Mein Poori Tareh Se Ramm Kar (06/10/2024)

June 9, 2024

Om Namaha Shivaya
Aaj Ka Suvichaar 🙏🏻🙏🏻

#2303

Ve Toh Kirpadhaar Hain

Na sada saath rahengi tumhaari maa
Na sada saath rahenge bachche
Duniya ke mele mein, o matvaale
Tumhaara saath chod jaayenge achche achche.

Tum jin rishton ko maanoge pakke
Mumkin hai ki ve bhi sabit hon kachche
Tum yakeen karo ya nahin
Ye bol hain vaastavik aur sachche.

Haan, ek Hain, jo tumhaare angg sangg rahenge hamesha
Chaahe jabb bhi jaisi bhi ho tumhaari dasha
Ve hee dikhaayenge tumhe asal dhan kee disha
Utaar kar tum par chadha hua moh maya ka nasha.

Ve Hain Guruji param poojya pyaare
Ve sada saath rahenge tumhaare
Saump kar dekho toh sahi tum Unhe apne jeevan kee doar
Tumhe jaane kee zaroorat nahin padegi kaheen aur.

Har duniyavi rishte se zyada bharosemandd hai rishta Guruji ke sangg
Unka prem laayega tumhaare jeevan mein imaan ka rangg
Tumhaare sabse kathin lamhon mein bhi tumhe rukne na degi Unkee rehmat
Mushkil bhi ho agar vilamb sehna, toh bhi Unkee raza se rehna sehmat.

Har rishte ko nibhaao tum pyaar se
Kintu bandh na jaao moh ya dooje kisee vikaar se
Duniya mein rehne ke din do chaar hain
Aur duniya wale toh khud hee bebas aur laachaar hain.

Lekin, Guruji Parwardigaar Hain
Ve Shivji ke avatar Hain
Guruji tumhe doobne de hee nahin sakte
Kyunki Ve toh taaranhaar Hain
Guruji tumhe Apni anukampa se vanchit na rakhenge kabhi
Kyunki Ve toh kirpadhaar Hain.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ve Toh Kirpadhaar Hain (06/09/2024)

June 8, 2024

Om Namaha Shivaya
Aaj Ka Suvichaar 🙏🏻🙏🏻

#2302

      Aapki Dharohar

Mere param poojya MahaDev Har
Aapki kripa se chal raha hai mera safar
Aapki leela, Aapki karuna, Aapki mahima sunnkar aur dekh kar
Har pal badhti hai mere mann mein Aapki kadar.

Jabb se Aapne bulaaya Apni chaukhat par
Aapke pyaar ka hua hai aisa asar
Ki chhoot hee gaye baaki saare dar
Aur aankhein khuli hon ya hon bandd, buss, Aap hee Aap aate Hain nazar.

Jabb se hui hai Aapki nadar
Jeevan anokhe dhangg se raha hai guzar
Beshak hamesha aasaan nahin sweekriti kee dagar
Phir bhi koshish kar seekh rahi hoon chodna agar-magar.

Kyunki samarpan bin pahunch na paaoongi apne asli ghar
Jahaan ka raasta dikha rahe Hain Aap Guruvar
Aap kripa keejiye is bigdee hui bachchi par
Taaki Aapki ichcha ke mutaabik beete mera ye safar.

Jhuka kar Aapke charnon mein apna sir
Jodoon apne do kar bannkar Aapki naukar
Deejiye Aap par akhand vishwaas ka mujhe var
Meri har saans hai Aapki dharohar, usey doon mai Aapki sharan mein dhar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Dharohar (06/08/2024)

June 7, 2024

Om Namaha Shivaya
Aaj Ka Suvichaar 🙏🏻🙏🏻

#2301

Sab Kuch Aapke Haath Mein Hai

Param poojya Guruji,

Dete rahiye kalyaan ka uphaar
Karte rahiye mere naseeb ka shringaar
Jaisa Aap nikhaarein, mai usey kar loon sweekaar
Deejiye mujhe aisa samarpan daan, mere sarkar.

Na jaane kitne janmon se ekatrit kiye huey hongei mainey ye karam, mere Parwardigaar
Ye toh khushkismati hai meri ki Aapne bulaaya mujhe Apne dwaar
Koi nahin de sakta mujhe kabhi Aapke jitna dulaar
Mai swayam ko ye yaad dilaati rahoon baar baar
Badhta jaaye mere bheetar Aapke prati pyaar
Ye hai mere dil kee deen pukaar.

Aapki meher kee hoon mohtaaj, mere paalanhaar
Aapki bakhshish par nirbhar hoon, mere bakhshanhaar
Aapki rehmat hee mujhe sakti hai taar
Aur koi nahin hai ya hoga mera taaranhaar.

Thakk chuki hoon chal kar pathreele raaston par
Aap Apne aanchal mein samaa leejiye
Har dar par milee thokar
Aap Apne charnon mein panah deejiye.

Sookh chuke hain aansoo abb
Aap toh jaante Hain sabb
Yakeen hai aaj bhi is tathya par, jis par yakeen thaa tabb
Ki sab kuch Aapke haath mein hai, mere Rabb.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sab Kuch Aapke Haath Mein Hai (06/07/2024)

June 6, 2024

Om Namaha Shivaya
Aaj Ka Suvichaar 🙏🏻🙏🏻

#2300

                  Ruhaani Paigam

Paakar Guruji kee sharan
Tera janam gaya hai sanvar
Yakeen kar is satya par
Chod de har agar-magar.

Na baith shikaayaton ko pakad
Apna le shukrana kee dagar
Bahut adbhut hota hai iska asar
Dekh toh sahi chal kar uspar.

Kat jaayein is janam mein jitne karam tere
Utne kumm lene padenge tujhe yahaan phere
Atma ka safar toh Paramatama se mil kar hee hoga poora
Guruji ka kiya kalyaan kabhi nahin hota adhoora.

Guruji kee yaad mein rehkar tu jee
Guruji se dil kee kehkar tu jee
Intazaar hota nahin hai aasaan
Par yaad rakh ki tere angg sangg Hain Bhagwaan.

Guruji tujhe nahin Hain bhoole, arey pyaare
Is kathin daur mein Ve hee baney Hain tere ekmaatra sahaare
Rona aaye toh aansoo ponchh lena Unke aanchal ke komal malmal se
Guruji kee soch aur leela badi hai kisee bhi doosre hal se.

Apne aap ko sambhaal
Bahuton se behtar hai tera haal
Teri dhaal hai Guruji ka paawan naam
Isey pehne rakh tu subah shaam.

Na teri shikaayat se
Na teri ghabraahat se
Hoga kumm karmon ka bhaar
Lekin Guruji kee kripa mein vo shakti hai
Jis se hoga tera poorna uddhaar.

Sab kuch Unn par chod kar
Khud ko apne farz kee oar moad kar
Poshit kar apna har shwaas Guruji ke naam se
Juda reh bheetar se Guruji ke ruhaani paigaam se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ruhaani Paigam (06/06/2024)

June 5, 2024

Om Namaha Shivaya
Aaj Ka Suvichaar 🙏🏻🙏🏻

#2299

Har Boond Aapke Sneh Kee Barsaat Kee

Param poojya Guruvar,

Har boond Aapke sneh kee barsaat kee
Ruhaani jyot banti hai mere haalaaton kee raat kee
Har mani Aapki mamta kee
Banti hai prerna meri kshamta kee.

Varna abb takk kis haal mein hoti?
Varna abb takk kaise apne kiye paap dhoti?
Aagey bhi Aapki meher bin na jee paaoongi
Aap sambhaale rahiyega mujhe, varna mai gumm jaaoongi….
….maya ke is khel mein
Chhaaon dhoop ke mel mein.

Lobhi rehti hoon Aapke laad ke liye
Pyaasi rehti hoon Aapke pyaar ke liye
Aapne itna kuch kiya hai is beemaar ke liye
Shukrguzaar rehti hoon Aapke dulaar ke liye.

Aap Prabhu kee prena se hoti rahoon yoon pulakit
Ki adhyaatmik gehraaiyon ko nirantar chet-ta rahe mera chitt
Aapse adhik koi na jaane ki kismein hai mera hit
Aap mein meri har ichcha, har arzi, har soch rahe samaahit.

Apne sneh kee sheetal boondein barsaate rahiyega
Mamta kee manohar maniyan darshaate rahiyega
Kripa kar meri naadaaniyaan sweekaarte rahiyega
Mujhe Apni meher se taarte rahiyega.

Aap jaisa mahaan kisee brahmand mein koi nahin, mai khud ko yaad dilaati rahoon
Aapki beantt mahima ke geet mai sunti aur sunaati rahoon
Aap bulaate rahein aur mai Aapke dar par aati rahoon
Aapki chaukhat par apne sir ko mai jhukaati rahoon.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Har Boond Aapke Sneh Kee Barsaat Kee (06/05/2024)

June 4, 2024

Om Namaha Shivaya
Aaj Ka Suvichaar 🙏🏻🙏🏻

#2298

Mera Hriday Harshaaya

Anginat khaamiyan hain meri bhakti mein
Phir bhi Aapne sweekaar kiya
Param poojya Guruji Maharaj
Aapne mujh par bahut upkaar kiya.

Mujhe na aaye shukrana karna
Na hee aaye mujhe karni ardaas
Phir bhi Aap kripa karte Hain
Rehkar sada mere aas paas.

Mai bol bhi na paaoon jo
Aap sunn lete Hain vo
Kabhi mai padti hoon ro
Toh Aap Apne amrit se mere aansoo dete Hain dho.

Mayli hoon, maylaa hai mann mera
Phir bhi Aapne Apne kavach se mujhe hai ghera
Mujhe suraksha dene ke liye
Aapne kitne ashirwaad hain diye.

Simran nahin bhi ho paata mujhse baith kar ek sthaan par
Toh Aap kehte Hain ki buss tu mujhe kaheen bhi yaad kar
Jabb mera lagta nahin hai dhyan
Toh bhi Aap bura nahin lete maan.

Galatiyan karti rehti hoon aksar
Aap sudhaarne ka dete rehte Hain avsar
Mai beshak bhool jaaoon dikhaana Aapko apna pyaar
Aapko har pal yaad rehta hai mujh par barsaana pyaar aparampaar.

Khushkismati hai meri jo Aapne mujhe hai apnaaya
Varna kabhi kabhi toh saath chod deta hai apna hee saaya
Jab jab mainey Aapki oar ek ek kadam bhi hai badhaaya
Aapke anginat kadmon ke meri oar badhne kee aahat se mera toh hriday harshaaya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mera Hriday Harshaaya (06/04/2024)

June 3, 2024

Om Namaha Shivaya
Aaj Ka Suvichaar 🙏🏻🙏🏻

#2297

               Ye Yatra

Guruji ko samajh paane kee prakriya
Kathin hee nahin, balki kadaachit hai antaheen
Ye ek yatra hai swayam mein
Jisey poori karne mein tum abhi ho asamarth aur ksheen.

Yatra mein tum ho Guruji ke chaatr
Ya kisee bhi aur roop mein ho Unke kripa paatr
Ve badhaate chalenge tumhaari vikaaron se duuri
Taaki tumhaari ye yatra ho paaye poori.

Kyunki Ve Hain sharnaagat ke hitkaari
Ve karaayenge tumhaari shreshth tayyaari
Unkee madhur muskaan banti rahegi tumhaari vipattiyon ke liye baan
Unkee divya leela banaayegi tumhaare liye suraksha ka kila.

Ve Hain Shiv avatari bhakt vatsal
Unke paas hai tumhaari har duvidha ka hal
Maang lo Unse var Unkee bhakti ka
Usee mein samaaya hai saar aur vistaar har shakti ka.

Jitnee hogi tumhaare antas kee shuddhi
Utnee zyada tum grahan kar paaoge Unkee bakhshi hui buddhi
Unke prem mein mitne do apna astitva
Phir Unkee kripa se jaan paaoge Unka prabhutva.

Is yatra mein praapt hogi
Param anand kee khan
Mehnat aur neeyat parkhi jaayegi tumhaari
Kyunki yatra mein aayenge kayi imtehaan.

Isliye abb baaki sabb tajj lo
Guruji ka naam bhaj lo
Guruji ke tum ho jaao
Atmanand mein kho jaao.

Yoon jabb tum kho jaaoge
Toh tum awashya paaoge
Param anand kee veh khan
Jo denge swayam Guruji meharbaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ye Yatra (06/03/2024)

June 2, 2024

Om Namaha Shivaya
Aaj Ka Suvichaar 🙏🏻🙏🏻

#2296

             Mukammal Hoga Safar

Murjhaaya sa har jo phool hai
Guruji kee khushboo se veh dobara khil jaayega
Khoya hua jo raahi hai
Guruji ke noor se usey raasta mil jaayega.

Garbhit baadal jo bhaar uthaa rahe hain din raat
Guruji kee kripa se ve barsaayenge barsaat
Kalyuga ke mal se dooshit ho raha hai jo jal
Guruji ke aanchal se veh ho jaayega nirmal.

Jabb hadd paar karne lagega andhera
Guruji ke hukm se ho jaayega savera
Saanson ka jabb simran mein lagega na mann
Toh Guruji khud hee unhe Apne mein kar denge magan.

Jabb chhaane lagegi ghor udaasi
Aur raahat na milegi zara si
Guruji ke ruhaani kadmon kee aahat
Laayegi tumhaare chehre par muskuraahat.

Jaise jaise safar mein tum aagey badhoge
Jaise jaise adhyaatmik seedhiyan tum chadhoge
Kumm hoti chalegi atma kee gareebi
Badhti jaayegi atma kee Guruji se kareebi.

Guruji kee meher ka prabal prabhaav chhaayega
Har laukik sukh dukh ke paar tumhe le jaayega
Thaki hui tumhaari atma pahunchegi apne ghar
Guruji ke charnon mein mukammal hoga uska safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mukammal Hoga Safar (06/02/2024)

June 1, 2024

Om Namaha Shivaya
Aaj Ka Suvichaar 🙏🏻🙏🏻

#2295

     Awashya Praapt Hogi Sadgati

Shunya se shuru, shunya par khatm
Hai is safar kee niyati
SadaShiv roopi Guruvar kee meher se
Awashya praapt hogi sadgati.

Zaroori nahin hai karna marne ka intazaar
Chaahe seekhein gir kar baar baar
Neeyat aur koshish achchi rahegi toh sudharegi niyati
Guru kripa se awashya praapt hogi sadgati.

Shunya ko bhula dena nahin hai samajhdari
Shunya mein hee basee hai shanti hamaari
Shunya mein hee khiltee hai sumati
Guru kripa se awashya praapt hogi sadgati.

Shunya se hee rachna hui srishti kee
Shunya mein leela hoti hai Guruji kee drishti kee
Shunya Hain swayam Guruvar Pashupati
Guru kripa se awashya praapt hogi sadgati.

Shunya mein basta hai tattvagyan ka saar
Shunya mein paripakva hon vichaarheenta ke aasaar
Shunya mein har paristhiti mein sthir hoti hai mann kee sthiti
Guru kripa se awashya praapt hogi sadgati.

Shunya hee tathya hai, baaki sab hai maya
Maya bhi Shiv kee shakti, shunya bhi Shiv se hai aaya
Shunya se kareebi badhegi Guruji ke prati
Guru kripa se awashya praapt hogi sadgati.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Awashya Praapt Hogi Sadgati (06/01/2024)