Month: July 2024

July 31, 2024

Om Namaha Shivaya
Aaj Ka Suvichaar 🙏🏻🙏🏻

#2355

             Intazaar

Intazaar hai bahaar mein
Intazaar hai meri pukaar mein
Intazaar hai mere izhaar mein
Intazaar hai mere ikraar mein.

Intazaar, Guruji kee mauj mein aane ka
Intazaar, Guruji dwaara mere bakhshe jaane ka
Intazaar, mere tarr jaane ka
Intazaar, mera banda bann paane ka.

Intazaar, uss pal ka
Intazaar, uss kal ka
Jabb mukammal hoga mera intazaar
Jaan paane ka jeevan aur mrityu ka saar.

Guruji dete rahein Apna dulaar
Guruji se badhta rahe mera pyaar
Toh meetha lagta rahega ye intazaar
Varna toh jeena ho jaayega dushvaar.

Jaanti hoon ki yahee hai dwaar
Jahaan par safal hoga mera intazaar
Guruji kee hoon mai shukraguzaar
Ki is nacheez ko Unhonei kiya sweekar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Intazaar (07/31/2024)

July 30, 2024

Om Namaha Shivaya
Aaj Ka Suvichaar 🙏🏻🙏🏻

#2354

   Razi Rahoon Guruji Kee Raza Mein

Razi rahoon Guruji kee raza mein
Ajab sa maza hai is ada aur saza mein
Ummeed hai ki har anubhav le jaa raha hai Guruji ke aur bhi kareeb
Kyunki agar aisa hai phir toh har anubhav hai khushnaseeb.

Jo khushnaseebi kaheen dhoondhne se bhi na miley
Vo Guruji dete Hain behisaab
Yoon hee toh nahin kehti mai
Ki mere Guruji kee leela hai lajawaab.

Kalyuga kee kashmakash mein
Unhonei satyugi spandan hai bakhsha
Jaane anjaane kashton se
Unhonei sada kee hai meri raksha.

Saboori bhi itnee, aur itna pyaar
Guruji dete Hain baarambaar
Ki badh jaati hai sehenshakti
Aur banti hai kathin samay mein haunsle kee yukti.

Guruji kee sharan mein safar ke kaanton kee chubhan
Guruji ke prataap se kumm hoti jaati hai har kshan
Kuch kaante toh Guruji raaste se dete Hain hataa
Baaki kaanton sangg karma dete Hain kataa.

Unkee raza mein razi rehne se
Unkee goad mein rehkar kasht sehne se
Paap dhulta jaata hai
Raasta khulta jaata hai
Unka ashish milta jaata hai
Bhagya khilta jaata hai.

Kewal haathon kee lakeerein hee nahin
Balki kismat ka lekha bhi hai Unke haath mein
Aur koi rahe ya na rahe saath mere
Guruji sada Hain mere saath mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Razi Rahoon Guruji Kee Raza Mein (07/30/2024)

July 29, 2024

Om Namaha Shivaya
Aaj Ka Suvichaar 🙏🏻🙏🏻

#2353

Guruji Kee Panaah Mein

Shaam ka aasmaan
Uda le jaa tu har gumm
Jo tu le jaa nahin sakta
Toh kumm se kumm unhe kar de tu kumm.

Sooraj ne bhi vaada kiya thaa kal
Ki uske aane se mere gumm jaayenge tal
Kintu vo raha kuch hee pal
Aur mausam gaya badal.

Chhaa gaye baadal ghaney
Bade dhokhebaaz baney
Badhaa gaye gumm ko
Phir kaise na aankh num ho.

Shaam ka aasmaan
Tu kar aansoo ponchne ka kaam
Guruji ko pahuncha mera vintee se bhara paigaam
Ki abb laut aaye muskaan.

Shaam ke aasmaan ne shunya mein ghoora
Kaha usne, “Guruji kehte Hain sooraj ho raha hai boodha
Kewal Guruji hee vaapis laa sakte Hain savera
Unkee kripa duur kar sakti hai har andhera.”

Shaam ke aasmaan ne kiya kuch vichaar
Guruji sangg seedha naata judey rehne ka yaad dilaaya upchaar
Shaam se mainey apne bhullakkarpann ka kiya izhaar
Aur Guruji se arzi kee mainey jod kar Unse seedhi taar.

Chintan ke dauran Guruji ne kee mujhse jo baat
Uss baat ne yoon chhoo liye mere jazbaat
Ki mai Unke charnon mein gayi kho
Jaagi, toh jaana ki mai gayi thi so.

Guruji ne deeye thei swapn darshan
Harshit ho gaya mera mann
Swapn mein shaam ka andhera hua duur
Jaagi, toh chharon oar phaylaa thaa Guruji ka noor.

Shaamein toh aati jaati rahengi jeevan mein
Guruji kee kripa se sthirta aur shanti rahe sabke mann mein
Saari sangat ke liye nikalti hai dil se yeh praarthana
Ki Guruji kee panaah mein sabhi ke gumm ho jaayein fanaa.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Panaah Mein (07/29/2024)

July 28, 2024

Om Namaha Shivaya
Aaj Ka Suvichaar 🙏🏻🙏🏻

#2352

                   Satya Aur Susangat

Satya aur susangat
Ruhaani rangat
Guruji ke darbar kee
Shringaar hai bhakt ke sansaar kee.

Nikhaarte Huey bhakt kee insaaniyat
Guruji suspasht karte Hain ruhaaniyat
Besharte bhakt maane Unka hukm aur Unkee hidaayat
Ye sab mumkin nahin hai bina Unkee inaayat.

Ye kewal lafzon ka her-pher nahin
Ismein hai adhyatmik vikas ka raaz
Guruji pooran Guru Hain
Lajavaab hai Unke naam ka jahaaz.

Is jahaaz par savaar hokar
Guru kripa se paap dhokar
Bhakt kee atma hoti hai agrasar
Guruji unnat karaate Hain safar.

Jitna doob paayein gehraayee mein
Jitna khoyein khud ko Khudaayee mein
Utna pahunchte jaayenge uss mukaam kee oonchaayee mein
Jahaan baaki sab chhota hokar lupt ho jaayega Guruji kee vadiyaayee mein.

Buss, aur kuch nahin reh jaayega
Jabb Guruji se milan ho jaayega
Yaheen rehte rehte ho sakta hai ye sabb
Kyunki hamaare bheetar hee toh basey Hain Rabb.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Satya Aur Susangat (07/28/2024)

July 27, 2024

Om Namaha Shivaya
Aaj Ka Suvichaar 🙏🏻🙏🏻
# 2351

Aapki Dharohar Hai

Param poojya Guruji,

Meri bhakti mein hee hogi kamee
Aapki bakhshish toh sada hee hoti hai aparampaar
Shaayad nirdosh nahin meri aankhon kee namee
Varna Aap toh lauta dete Hain khoyi hui muskuraahatein hazaar.

Ghera hai yoon karmon aur vikaaron ke santaap ne
Ki mushkil hota hai lagaana dhyan Aap mein
Ye toh vadiyaayee hai Aapki, Guruvar
Ki Aap phir bhi aane dete Hain mujh nacheez ko Apne dar.

Raasta bhi Aapse, Aapse hee manzil
Himmat deejiye taaki na bann jaaoon buzdil
Jaanti hoon ki Aapki izaazat bina ek patta bhi nahin sakta hil
Lekin kya karoon, sambhaalne se bhi sambhalta nahin is ablaa ka dil.

Aapki chaukhat ke alaawa mujhe aur kaheen nahin hai jaana
Ek Aapke dar ka darwaza hee mainey hai khatkhataana
Beshak dar dar bhatakta rahe saara zamaana
Mujhe toh Aapke hee dwaar par milna hai khaas khazaana.

Isey apni hasrat kahoon ya apna yakeen
Dono ke jazbaat mujhe lagte hain bahut hee haseen
Bhakti karna sikha deejiye
Chetna ka deeya dikha deejiye.

Aapki prerna kee hoon mai pyaasi
Aap Hain maalik, mai hoon daasi
Aap jaante Hain meri har zaroorat aur har chaahat
Aapki dharohar hai meri aankhon kee namee aur meri har muskuraahat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Dharohar Hai (07/27/2024)

July 26, 2024

Om Namaha Shivaya
Aaj Ka Suvichaar 🙏🏻🙏🏻

#2350

Nirmal Nyaayaadheesh

Toone Guruji ka diya raksha kavach pehna hai
Guruji ka naam teri rooh aur tere antas ka sabse anmol gehna hai
Bahut mahatvapoorna hai ye baat
Ki Unhonei thaama hai tera haath
Tujhe milee hai Unkee daya kee daat
Aur mila hai Unka sanatan saath.

Guruji kabhi na chodenge tujhe beech majdhaar mein
Kabhi tera uphaas na karenge teri kisee bhi haar mein
Badi nazaakat se nawaazi hai Unhonei tujhe ye zindagi
Tu bhi thodi si toh nazaakat se kar le Unkee bandagi.

Na karmakaand karna hai, na koi vehem
Chod dene hain tark vitark aur ahem
Jodni hai Unse apni rooh kee seedhi taar
Buss, phir dekh toh ki Ve kaise karte Hain tera beda paar.

Is safar mein jitnee hogi teri oar se shraddha bhaav kee gehraayee
Guruji bakhshenge tujhe utnee hee ruhaani oonchaayee
Yaad rakh, ye safar atma ka hai, na ki tere shareer ka
Isliye is safar mein faisla hona hai teri atma kee taqdeer ka.

Guruji Hain sabse nirmal nyaayaadheesh
De rahe Hain Ve tujhe asheesh
Unhee se miltee hai tujhe har daat, har bakhshish
Ve aaye bashar roop mein, jo swayam hee Hain Ish.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Nirmal Nyaayaadheesh (07/26/2024)

July 25, 2024

Om Namaha Shivaya
Aaj Ka Suvichaar 🙏🏻🙏🏻

#2349

     Shivalay Mere Mann Ka

Shivalay mere mann ka
Banaa rahe sthaan shaahi aasan ka
Jis par sada rahein viraajmaan
Mere Guruji pyaare sarvshaktimaan.

Layy ho Guruji ke ashirwaad kee
Dhvani chal rahi ho naad kee
Khilein hon Guruji kee pasand ke phool
Thaama hua ho Guruji ne trishul.

Pehne huey Ve chola sundar
Muskuraa rahe hon Shivalay ke bheetar
Sunaayi de rahi ho divya Gurbani
Poora vaataavaran ho saumya aur ruhaani.

Shivalay mein ho Guruji ke amrit prasad ka sarovar
Jo nirantar rahe behta, sheetal aur manohar
Shivalay ka gumbad chhoo raha ho aasmaan ko
Bataa raha ho maano vo saare jahaan ko
Ki Guruji Hain sarvopari daivik shakti
Jo bhakton ka bhog karaakar dete Hain unhe mukti.

Kaash Guruji dein mujhe izaazat
Ki Unke charnon ko chhoo kar kar paaoon ibadat
Bakhshish miltee rahe sewa aur simran kee
Shuddhi hoti rahe Shivaalay se susajjit mann kee.

Ho Guruji sangg meri rooh ka seedha naata
Mai rahoon bachchi Unkee, Ve mere nath aur daata
Shivalay mein jalti rahe jyot Guruji ke naam kee
Guruji se preet bann jaaye prerna din ke har kaam kee
Na zaroorat rahe neend kee, na aaraam kee
Guruji mein lagan laagey aisee, ki sudh budh na rahe subah ya shaam kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shivalay Mere Mann Ka (07/25/2024)

July 24, 2024

Om Namaha Shivaya
Aaj Ka Suvichaar 🙏🏻🙏🏻

#2348

     Deh Kee Dastaan

Aye roag meri deh ke
Meri rooh ko na lena chhoo
Roag ne kaha tere angg sangg Hain tere Guru
Unhonei mujhe teri rooh se duur karna kar diya hai shuru.

Roag ne bataaya mujhe ki vo chaah kar bhi meri rooh ko na chhoo paayega
Veh Guruji kee oorja se lupt hotey hotey alop ho jaayega
Jaanti hoon mai ki meri rooh Guruji sanvaarte rahenge
Roag kee chhaaya se Ve meri rooh ko bachaate rahenge.

Isliye kyun deh ka karna apmaan
Aur kyun karna deh par abhimaan
Rooh ko Guruji se jodey rehne ke prayaas mein karein har kaam
Roag ko bhugat-te huey Guruji ka shukrana karein aur lete rahein Unka naam.

Waqt ne pal pal behte behte hai behna
Deh ka roag aur deh, dono ne hee nahin rehna
Haan, deh ko roag awashya padega sehna
Lekin Guruji kee nadar kabb ho jaaye, iska kya kehna.

Prakriti se deh ho utpann
Deh se utpann ho karma
Karma se phir se deh naya
Aise hee janmon ka silsila hai chalta gaya.

Guruji koi saadhaaran Guru nahin, Ve toh swayam Hain Ishwar
Guruji bhaar sambhaalte Hain Apne bhakton ke karmon ka adhiktar
Guruji ke naam se swasth rahe mann aur atma
Guruji ke naam se awashya ho sakta hai tann ke roag ka bhi khatma.

Mera deh toh vaise bhi yahaan hai mehmaan
Usne paanch tattvon mein samaa jaana hai yahaan
Rahega na deh ke astitva ka naam-o-nishaan
Buss, itnee se toh hoti hai deh kee dastaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Deh Kee Dastaan (07/24/2024)

July 23, 2024

Om Namaha Shivaya
Aaj Ka Suvichaar 🙏🏻🙏🏻

#2347

     Din Kee Shuruaat

Din kee shuruaat
Guruji ke naam ke saath
Din kee har baat
Guruji ke saath
Unkee meher se aaye raat
Guzare din ke liye shukrana ka jazbaat
Phir naye din kee saugat
Guruji kee daya kee daat
Shukrana mein beet jaayein
Saptaah ke din aur raat saat.

Vaaron se saptaah, saptaah se paksh
Paksh se maheene, maheenon se saal
Shukrana mein Guruji se judi rahe jo tumhaari rooh kee taal
Toh himmat bani rahegi beshak jaisi bhi ho paristhitiyon kee chaal.

Guruji kee kripa se yoon hee chalti rahe zindagi
Guruji ke khayaalon se khilee rahe bandagi
Unke charnon mein arpit ho har shukrana, aur har sharmindagi
Miltee rahe har pal Guruji kee bakhshindagi.

Na bhoolna karte rehna shukrana
Shukrana mein beete jeevan ka afsaana
Aasaan hoga jhelna dukh sukh ka aana jaana
Aakhir mein vaise bhi yahaan se hai jaana.

Vaise toh bahaane kee zaroorat nahin agar Guruji se pyaar hai badhaana
Phir bhi apni tasalli ke liye samajh lo
shukrana ko ek bahaana
Ye jaan kar bhi kar lo shukrana toh bhi badh jaayega tumhaari kismat ka khazaana
Isliye, aye pyaare, tum Guruji ka shukrana karne se ek pal bhi na katraana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Din Kee Shuruaat (07/23/2024)

July 22, 2024

Om Namaha Shivaya
Aaj Ka Suvichaar 🙏🏻🙏🏻

#2346

Koi Bhi Nahin, Kaheen Bhi Nahin, Kabhi Bhi Nahin

Koshishein tamaam
Hoti rahin nakaam
Liya jo Guruji ka naam
Koshishon ko milne lagaa anjaam.

Aisa hua na thaa pehle kabhi is tareh se
Ki koi bin mere kahey hee sabb jaan le
Shuru hua itna anokha aur adbhut safar
Guruji kee dua aur shakti ka hota jaa raha hai asar.

Badhne lagaa hai Guruji se pyaar jitna
Koshishon ka utsaah badhta jaa raha hai utna
Sweekriti mein mann ne shuru kiya hai jutna
Shukrana mein sir ne yoon shuru kiya hai jhukna
Ki abb toh shukrana ka ibadati itr har dukh ko bhi mehkaata hai
Guruji angg sangg Hain, is hakeekat kee yaad dilaata hai.

Jabb hakeekat hee itnee sundar ho
Toh kalpana kee kya zaroorat?
Jabb saath hee sabse haseen ho
Toh chahiye nahin koi aur shubh mahoorat.

Guruji kee yaad mein rehne se zyada anmol
Guruji ke hukm mein rehne se zyada zaroori
Guruji se jude rehne se zyada khushnaseebi
Koi bhi nahin, kaheen bhi nahin, kabhi bhi nahin.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Koi Bhi Nahin, Kaheen Bhi Nahin, Kabhi Bhi Nahin (07/22/2024)