Month: July 2024

July 21, 2024

Om Namaha Shivaya
Aaj Ka Suvichaar 🙏🏻🙏🏻

#2345

Jannat Bhi Taras Jaaye

Aaj hai Guru Poornima ka paawan tyohaar
Guru duur karein Apne shishyon ke jeevan ka andhkaar
Aur jabb Guru swayam hon MahaDev ke avatar
Toh nishchit hai shishya ka uddhaar aparampaar.

Karne sangat ka pooran kalyaan
Dharti par aaye swayam Shiv Bhagwaan
Lekar Guruji Maharaj ka sundar roop
Jinkee leela sada se hai anokhi aur anoop.

Har pal karte Hain sangat ka maargdarshan
Karte Hain Apne shishyon kee raahein roshan
Uthaate Hain Guruji hamaare karmon ka bhaar
Na bhoolna vyakt karna Unka aabhaar.

Aaj kee poornima kee khaas hai pratishtha
Kyunki Guru shishya ka sabse pavitra hai rishta
Is rishte ko nibhaane mein jitnee badhti jaaye nishtha
Shishya banta jaata hai Guru kripa se farishta.

Guruji se hee gyan
Guruji ka karein sammaan
Guruji se hee sadgati
Guruji swayam Pashupati.

Guruji kee karuna de shishya ka jeevan sanvaar
Guruji kee daya de shishya ko taar
Guruji ka badappan kara de shishya ka beda paar
Guruji kee vadiyaayee ko maano, Ve toh swayam Hain Parwardigaar.

Guruji kee toh ek nazar se mil jaaye anginat gunaahon kee maafi
Guruji kee nadar hai shishya ko mukti dilaane ke liye kaafi
Shishya ka naseeb Guru meher se nikhar jaaye is kadar
Ki jannat bhi taras jaaye paane ko Guruji ke sachkhand ka dar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jannat Bhi Taras Jaaye (07/21/2024)

July 20, 2024

Om Namaha Shivaya
Aaj Ka Suvichaar 🙏🏻🙏🏻

#2344

Sukh Dukh Mein Guruji Hain Saath

Sukh dukh mein Guruji Hain saath
Ye hai sabse badi baat
Yahee hai sabse sundar saugat
Isliye shukrana mein jude rahein ye haath.

Kyunki din raat ka chakr toh chalta hai vaaron saat
Sukh mein din aur dukh mein raat
Kabhi arthi toh kabhi baaraat
Har saans hai Guruji kee dee khairaat.

Apne hee pichhle karma dete hain sukoon ya aaghaat
Unhee se bante hain sukh aur dukh ke haalaat
Guruji toh phir phi dete Hain bakhshish kee daat
Lekin badi na shukr hai insaan kee jaat.

Guruji kee sharan mein sukh dukh se kyun lein maat
Kyun jodein sukh aur dukh se apne jazbaat
Is se pehle ki Guruji se karein sawaalaat
Kyun na swayam hee rakhein ehtiyaat?

Is se pehle ki pahunchein hum maut ke ghaat
Vintee karein Guruji se ki Ve karma dein kaat
Na sochein hum kabhi ki hum hain anath
Guruji hee Hain hamaari mata, Guruji hee Hain hamaare nath.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sukh Dukh Mein Guruji Hain Saath (07/20/2024)

July 19, 2024

Om Namaha Shivaya
Aaj Ka Suvichaar 🙏🏻🙏🏻

#2343

Unhe Toh Rabb Mil Gaya

Hawaaon ne poochha chand taaron se
Poochha ped paudhon nazaaron se
Kaun hai sabka mai baap
Lekin mila nahin jawaab
Tabhi kehne lagaa aftaab
Guruji Hain shehenshah-e-nawaab
Sansaar ke sartaj
Karein sabhi brahmaandon par Ve raaj.

Kehne lagaa aftaab
Guruji kee leela hai lajawaab
Sabhi ko dete Hain Ve shakti
Nikhaarte Hain Ve sabhi kee bhakti.

Hawaayein karne lagi Guruji se arzi
Ki Ve unhe galey lagaayein jabb ho Unkee marzi
Guruji ne Apni ruhaani mehek se hawaaon ko mehkaaya
Hawaaon ko is anugraha se nirmal anand aaya
Ve toh khud hee kho gayin uss khushboo mein
Ek adbhut se sukoon ka ehsaas hui unkee rooh mein
Vaheen par khadin khadin
Ve bhi bol padin
Guruji kee khushboo aayi hai
Unkee maujoodagi kee gavaahi hai.

Hawaayein usee pal ruk gayin
Ve sajde mein jhuk gayin
Unka naseeb toh khil gaya
Unhe toh Rabb mil gaya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unhe Toh Rabb Mil Gaya (07/19/2024)

July 18, 2024

Om Namaha Shivaya
Aaj Ka Suvichaar 🙏🏻🙏🏻

#2342

     Bin Sawaaalaat

Bin sawaalaat
Guruji sanvaarenge tere haalaat
Rakh vishwaas
Na haar tu apni aas.

Jin samaadhaanon ka tu swapn mein nahin lagaa sakta andaaza
Guruji ko toh pehle se hee hai Unka bhi gyan
Tujhe toh aane wali samasya kee bhi na thi jabb khabar
Guruji ko uss se pehle hee maalum thi samasya aur uska asar.

Guruji ke paas samadhaan hai
Nishtha rakhna tera kaam hai
Anaasakti ka neeraj
Saath mein dheeraj
Aise bhaav se kar Guruji ko prasann
Ek Ve hee sudhaar sakte Hain tera jeevan.

Jo tera sir Guruji ke charnon mein rahega jhuka
Toh har vo kalyaankaari kaam bann jaayega jo hai ruka
Tujhe gyan nahin ki tujhse kaheen zyada fikr hai Guruji ko teri
Tujhe Unke aansoo kahaan dikhte hain jabb teri zindagi hoti hai andheri.

Tu hai Guruji kee shaktishali sharan mein
Neevan rehkar paaon rakh zameen par
Jitna jhukega Unke charnon mein tera sir
Utnee oopar uthaayenge Ve teri abhilaasha kee nazar
Aur utne oonche ruhaani manzar par tujhe pahunchaayega tera safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bin Sawaaalaat (07/18/2024)

July 17, 2024

Om Namaha Shivaya
Aaj Ka Suvichaar 🙏🏻🙏🏻

#2341

   Guruji Kee Mahima Ke Gungaan Mein

Guruji kee mahima ke gungaan mein
Gungaan mein kiye Unkee kripa ke bakhaan mein
Param poojya Guruji gareeb nawaz
Bakhshte Hain soch, shabd, sur, aur saaz
Bakhshte Hain Ve andaaz aur awaaz.

Saaz se gehra hai veh ehsaas
Ki Guruji mein ramaa hai har shwaas
Awaaz se gehra hai veh ruhaani raaz
Ki Guruji ka kann kann mein hai nivaas.

Bina aise saaz aur aise ehsaas ke
Bina aisee awaaz aur aise raaz ke
Guruji ka gungaan hai bilkul adhoora
Kyunki Guruji mein samaa jaane se hee hoga safar poora.

Guruji ke gungaan mein hai Unka stavan
Unke stavan mein hai Unka vandan
Unke vandan se saaf hoga tera mann
Tera mann hota chalega Unmein magan.

Shiv hee Pranav, Pranav hee Shiv leela dhari
Aur Guruji toh swayam hee Hain Shiv avatari
Toh Guruji hee Pranav, Jinse hai srishti saari
Jinhonei sangat kee zindagi hai sanvaari.

Guruji se hee hai sab kuch, yakeen kar, tu yakeen kar
Khushnaseeb hai tu ki Guruji kee sharan mein hai tera ye safar
Jiska jeevan ho Guruji ke charnon mein basar
Vo Unkee kripa se nishchay hee hoga agrasar.

Guruji kee daya se har bhakt karey Unka gungaan
Guruji jitna mahaan koi nahin, jaan le ye saara jahaan
Sewa, simran, satsang bakhshte rahein Guruji karunanidhaan
Unke dar par aane wale har praani ka hota hai kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Mahima Ke Gungaan Mein (07/17/2024)

July 16, 2024

Om Namaha Shivaya
Aaj Ka Suvichaar 🙏🏻🙏🏻

#2340

Sabb Jaante Hain Pyaare Guru Sarkar

Jabb jabb mann ne fikr hai kiya
Rooh ne shukrana ka zikr hai kiya
Vo sapna jo toot gaya
Vo manzar jo chhoot gaya…
Na soch ki muqaddar rooth gaya
Ye vish nahin jiska toone ghoont piya
Ye amrit hai kalyaan ka
Ehsaan tere Guru karunanidhaan ka
Jo aaya bannkar ek mushkil
Jis se pareshaan hua tera dil.

Darasal ye thaa tere pichhle karmon ka bhaar
Aur Guruji ne de diya tujhe bhaar utaar paane ka uphaar
Is akalpaneeya mushkil ke ajab roop mein
Isliye tujhe andhera dikh raha hai dhoop mein.

Sooraj abb bhi raha hai chamak akash mein
Na soch ki tera bhagya soya hai avakaash mein
Guruji kee meher kee baarish se tu bheeg jaayega is tareh
Ki bin bheege na rahegi tere bheetar aur tere jeevan mein koi jageh.

Jo toone socha thaa vo nahin hua
Tere dil ko is hakeekat ne ghaav bann kar ke chhua
Leki tujhe is kadar ghere huey hai Guruji kee shakti aur dua
Ki tu saaf dekh paayega beshak ho tere saamne duvidhaaon ka dhuan.

Itna toh tu jaanta hai
Ye toh tu bhali bhanti maanta hai
Ki Guruji kee soch kee vadiyaayee aur gehraayee ka koi mukaabala nahin
Aur koi nahin soch sakta hai Unse adhik ki tere liye kya hai sahi.

Jabb Ve shareerik roop mein thei viraajmaan
Toh bhi aksar badal dete thei bhakt ka raasta aur mukaam
Aaj bhi Ve Hain maujood lekar ruhaani roop mahaan
Aur Ve teri kalpana se kaheen zyada kalyaanmayi banaayenge teri dastaan.

Ve jaante Hain ki tu gaya hai thakk
Ve jaante Hain ki tu gaya hai ruk
Kal bhi Unke charnon mein jhuka thaa, aaj bhi tu raha hai vahaan jhuk
Toh ho hee nahin sakta ki Guruji tujhse kabhi bhi moadenge mukh.

Tu shagird hai, Ve murshid Hain tere
Abhi toh toone dekhne hain anginat ujle savere
Tu himmat na haar
Guruji awashya karenge tera beda paar
Tu karta hai Unse behad pyaar
Sabb jaante Hain pyaare Guru sarkar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sabb Jaante Hain Pyaare Guru Sarkar (07/16/2024)

July 15, 2024

Om Namaha Shivaya
Aaj Ka Suvichaar 🙏🏻🙏🏻

#2339

                      Karma Bandhan

Karma bandhan
Karma hee vandan
Karma bandagi
Karma zindagi.

Karma kee yukti
Karma aur mukti
Yukti yathaarth
Jis se safal ho purusharth.

Isliye, Guruji ke pyaare paarth
Poori shraddha se joad kar apne haath
Shukr manaa ki Guruji Hain tere saath
Bin karta baney tu apne karma kar
Anaasakt hokar har karma Guruji ko arpit kar.

Karma bandhan se rahega phir tu azad
Tujhe har paash se swatantra karenge Pashupati nath
Bannkar aaya hai tu insaan
Bhagwaan se apni ekta ko pehchaan
Yahaan par tu hai mehmaan
Sab kuch chhoot jaana hai yahaan.

Saath jaayega karmon ka bhaar
Isliye apne chaal chalan ko sanvaar
Guruji kee sharan milee hai is baar
Is mauke ko na jaane de tu bekaar.

Nibha apne farz
Adaa kar apna karz
Seekh Guruji ke hukm mein rehna
Chaahe jo bhi pade sehna.

Tu anjaan
Ve jaan-e-jahaan
Tu insaan
Ve Bhagwaan.

Sudhaar kar tera haal
Bin poochhe tujhse sawaal
Bannkar teri raksha kee dhaal
Guruji awashya kar denge tujhe nihaal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Karma Bandhan (07/15/2024)

July 14, 2024

Om Namaha Shivaya
Aaj Ka Suvichaar 🙏🏻🙏🏻

#2338

Guruji Maharaj Hain Tere Rahnuma

Shukr hai ki aata nahin dobaara
Vo samaa jo jaata hai guzar
Varna kaise aagey badhey safar
Kaise manzil aaye nazar?

Uss waqt bhi Guruji ne thaa sambhaala
Aaj aur aane wale waqt ka bhi Guru hai rakhwala
Unkee ibadat karte huey
Unkee inaayat se jholi bharte huey
Unke simran se susajjit rahe safar
Toh mushkil samaa bhi thodi aasaani se jaayega guzar.

Guruji ke simran mein jo shakti hai
Vo hee purusharth kee yukti hai
Jabb takk bheetar Guru bhakti hai
Tabb takk himmat nahin thakti hai.

Guruji kee bhakti mein hai vandan
Guruji kee bhakti se hai vishwaas
Guruji kee bhakti se hai unnati
Guruji kee bhakti mein hai ullaas.

Samay ke saath saath
Tu kadam badhaata chal
Tere param poojya Guru nath
Bakhshte rahenge tujhe bal.

Jaise jaise beete samaa
Guruji ke naam ka dhan tu kamaa
Bakhshishon kee poonji kar tu jamaa
Guruji Maharaj Hain tere rahnuma.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 13, 2024

Om Namaha Shivaya
Aaj Ka Suvichaar 🙏🏻🙏🏻

#2337

            Patjhad Bann Gaya Saawan

Thaa ek duraachaari insaan
Jis se darte thei uskee patni aur santaan
Jhooth, chori, aur nasha
Inse bigadti rahi uskee dasha.

Kaheen se chori kar ek shaam ko veh raha thaa bhaag
Uskee kismat khuli ki uskee chetna gayi jaag
Guzaraa veh Guruji ke Mandir ke paas se
Usey anubhav huey kuch khaas se.

Usey koi kheench kar le gaya mandir ke bheetar
Vahaan usey dilaaya chai prasad aur khilaaya langar
Uss shakhs ne chor ko Guruji ke aasan ke paas baithaaya
Aur Guruji kee kripa se chor ko bahut rona aaya.

Yaad aaye usey apne kiye anginat paap
Jiske kaaran uska parivaar bhugat-ta raha dukh santaap
Uss shakhs ne chor ke haath mein diya Guruji ka swaroop sundar
Aur parivartan aane lagaa chor ke bheetar.

Abb se chori nahin karega, kar liya usne ye nishchay
Nasha aur jhooth chodne ka bhi le liya usne nirnay
Guruji kee mahima se usmein aane lagaa sudhaar
Itihaas bann gaya uska har duraachaar.

Guruji ne usey leen kar diya apni bhakti mein
Naukari kar rozi roti lagaa kamaane
Sukhi honei lagaa uska ghar parivaar
Sabhi sadasya Guruji ke mandir lagey aane.

Ye Guruji ke bulaave bin na thaa mumkin
Abb toh veh Guruji kee yaad mein rehta thaa raat din
Bin rukey subah ya shaam
Veh japta rehta thaa Guruji ka naam
Guru kripa se uske kiye paap jalte gaye
Guru meher se uske kasht talte gaye.

Uskee surt Guru Paramatama se jud gayi yoon
Ki uske bheetar buss gaya ruhaani sukoon
Guruji kee daya se paapi banaa paawan
Uske ghar sansaar ka patjhad bann gaya saawan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Patjhad Bann Gaya Saawan (07/13/2024)

July 12, 2024

Om Namaha Shivaya
Aaj Ka Suvichaar 🙏🏻🙏🏻

#2336

             Ghode Par Savaar Ik Raja

Ghode par savaar ik raja
Vann mein se raha thaa guzar
Sainik bhi thei saath mein uske
Padi raja kee ek fakir par nazar.

Baitha thaa fakir lagaaye dhyan
Maano jagg se ho bilkul anjaan
Raja aakarshit hua fakir kee oar
Jaise chand kee oar hota hai chakor.

Raja baith gaya fakir ke paas
Taruvar ke neeche
Sainik aakar khade ho gaye
Raja ke bilkul peechhe.

Usne sainikon ko diya aadesh
Ki veh fakir ke saath ekant mein chaahta hai rehna
Sainik toh raja ke das thei
Maan gaye ve raja ka kehna.

Raja fakir ko raha nihaarta
Mann mein raha Ishwar ko pukaarta
Usey fakir mein dikh rahi thi chhavi Shivji ke roop kee
Veh mann hee mann saraahana karne lagaa uss roop anoop kee.

Raja bhi leen ho gaya dhyan mein
Aur jaise hee dekha usne apne gireban mein
Usey dikha vahaan fakir
Uske naynon mein bhar aaya neer.

Fakir ne aankhein kholi uss pal
Aur raja ke kandhe par rakha haath
Raja ne dekha fakir ko
Aur karne lagaa uss se baat.

Kaha raja ne fakir se
Ki usey usmein Shiv kee chhavi nazar aayi
Toh fakir kuch kuch muskuraaya
Aur uskee muskuraahat phir sharmaayi.

Usne kaha raja se ki veh prem ka sandesh phailaata hai
Aur idhar udhar ghoomte ghoomte veh Shiv kee mahima gaata hai
“Kya tumhe Shivji se prem hai?” Raja se fakir ne poochha
Raja ne kaha fakir se ki uska Aaraadhya Dev hai na koi dooja.

Fakir ne raja ke sangg Shiv bhakti kee baatein kee bahut saari
Raja ne bhi vyakt kar dee Shivji mein apni shraddha nyaari
Fakir Shiv prem kee baatein raha karta ghanton takk
Phir bhi veh bilkul nahin raha thaa thakk.

Sunnkar fakir ke prem kee gaatha
Raja ka fakir ke charnon mein jhuk gaya maatha
Tabhi fakir ne rakha raja ke sir par apna haath
Awaaz sunn raja ko lagaa ki Shivji kar rahe thei uss-se baat.

Raja ne sir uthaaya
Veh aashcharyachakit ho muskuraaya
Veh apne samaksh fakir na dekh paaya
Balki usey Guruji ka saakshaat roop nazar aaya.

Guruji ne usey diya kalyaan ka vardaan
Raja ne vann mein paa liya jannat ka jahaan
Guruji ne ‘Guruji’ bataaya Apna naam
Aur raja ko Unke mastak par dikha trishul aur Om ka nishaan.

Na raha Raja kee khushi ka thikaana
Fakir ke roop mein Guruji aaye usne jaana
Aur Guruji Hain Shiv ka roop, usey aane lagaa samajh
Itne sundar divya darshan se uske sabhi vichaar gaye sulajh.

Guruji Huey antardhaan
Lekin kuch der takk aati rahi Unkee khushboo
Raja ne Unhe apna Guru liya maan
Aur gadd gadd ho gayi raja kee rooh.

Shuru hui Guru charnon mein raja kee kahaani
Guruji kee meher barsi aur tarr gayi raja kee zindagani
Bhog bhoga usne kintu na banaa bhog vilaas ka shikaar
Jabb usne choda shareer toh uskee rooh pahunchi Sachkhand ke dwaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ghode Par Savaar Ik Raja (07/12/2024)