Month: August 2024

August 31, 2024

Om Namaha Shivaya
Aaj Ka Suvichaar 🙏🏻🙏🏻

#2386

Sugandh Ka Nazraana

Phoolon ne bheja apni sugandh ka nazraana
Guruji ke kamal charan mein
Toh phoolon kee sugandh pheeki padd gayi
Guruji kee saumya sharan mein.

Kyunki Guruji kee khushboo ruhaani
Uss se phoolon kee sudh budh hui deewani
Unkee sugandh ka astitva hee na raha
Aur phoolon ne jhuk kar Guruji se kaha,

“Guruji, Guruji, pyaare Guruji Maharaj
Aap Hain sartaajon ke sartaj
Aapki khushboo ko anubhav kiya aaj
Maan gaye hum ki Aap Hain viraajon ke viraaj.

Humne upvan dekhe kitne saare
Lekin abb jo aaye hain hum Aapke dwaare
Hamein hui hai naseeb jo khushboo
Uss se gadd gadd ho gayi hai hamaari rooh.

Aapki khushboo se hum tarr gaye
Aapki khushboo se hum sanvar gaye
Aapki khushboo mein Aapka pyaar hai samaaya
Jisey paakar hamaara roam roam hai harshaaya.

Na hua aaj se pehle kabhi aisa madhur ehsaas
Aapki karuna se Aapki khushboo se mehek utha hai hamaara har shwaas
Abb toh hum murjhaa bhi jaayein toh na hongei udaas
Kyunki Aapki khushboo sada rahegi hamaare paas. “

Guruji ne suni baatein phoolon kee
Unhonei phoolon ko Apni sehmati dee
Phoolon ne Guruji ke charnon mein jhuk kar kiya pranaam
Guruji ne meharbaani kee aur diya Unhe Apna naam daan.

Khil gayi phoolon kee kismat
Guruji ne karne dee unhe Apni khidamat
Guruji kee rehmat laayi rangg
Unkee khushboo rehne lagi sada ke liye phoolon ke sangg.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sugandh Ka Nazraana (08/31/2024)

August 30, 2024

Om Namaha Shivaya
Aaj Ka Suvichaar 🙏🏻🙏🏻

#2385

Raat Ke Aanchal Mein

Raat ke aanchal mein sonei kee khwaahish
Honei lagi thi shaam kee
Sooraj ko bhi zaroorat padd rahi thi
Thode se aaraam kee.

Panchhi laut rahe thei ghar
Dhoondhte huey apne apne taruvar
Intazaar karte huey agali bhor ka
Swaagat kar rahe thei ve andhere ghor ka.

Agla savera aayega
Unhe thaa poorna vishwaas
Andhere mein ujaale kee intazaar karte
Kaayam thaa unka ullaas.

Japte huey Guruji ka naam
Nisha mein ojhal ho gayi shaam
Bandd hui panchhiyon kee chehek
Kintu aati rahi Guruji kee meethi mehek.

Shant hua panchhiyon ka chitt
Guruji kee upasthiti mein ve thei surakshit
Ve jaante thei ki unke sotey huey bhi hota rahega unka hitt
Isee bharose ke sangg ve jaagte sotey thei nit.

Nirmal nisha ke upvan mein
Guruji kee khushboo ka raha basera
Panchhiyon ko milee Guruji kee suraksha
Jald hee hua savera.

Sooraj ne lee angdaayee
Pehli kiran jo nazar aayi
Toh panchhi ho gaye tayyaar
Safar jaari rakhne ko phir ek baar.

Guruji kee kripa se saari sangat ko
Hota rahe har pal suraksha ka ehsaas
Guruji ke saanidhya mein sampann rahe har das
Guruji kee ruhaani maujoodagi banaaye har das ke har lamhe ko khaas.

Guruji Maharaj kee divya sharan mein
Sada mehfooz rahe Unkee sangat saari
Saari sangat ka karte rahein kalyaan
Guruji Maharaj Shiv avatari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Raat Ke Aanchal Mein (08/30/2024)

August 29, 2024

Om Namaha Shivaya
Aaj Ka Suvichaar 🙏🏻🙏🏻

#2384

                   Aye Dil, Tu Na Dol

Aye dil, tu na dol
Buss, tu ‘Jai Guruji’ bol
Apne har bol mein tu shraddha ka ras ghol
Kyunki ye shabd hain sabse anmol.

Guruji kee jaijaikaar mein utsah aur ullaas hai
Guruji kee jaijaikaar mein aastha aur meethi aas hai
Guruji kee jaijaikaar mein vinamrata aur vishwaas hai
Guruji kee jaijaikaar mein Unke paraakram ka ehsaas hai.

Guruji kee jaijaikaar se hoga jo kalyaan
Uss kalyaan ko tu sarvopari maan aur jaan
Beshak uss kalyaan ke liye tujhe dene padein kitne bhi imtehaan
Phir bhi har uss kalyaan kee maanyata hai sabse mahaan.

Kyunki veh kalyaan hoga Param poojya Shiv avatari Guruji dwaara
Jo khiwaiya bannkar praapt karvaate Hain har bhakt ko kinaara
Jo har imtehaan lete huey dete Hain bhakt ko har tareh ka sahaara
Jinke bin chal nahin sakta ek kadam par bhi bhakt ka guzaara.

‘Jai Guruji’ kehte rehne se
Guruji ke aasare kasht sehne se
Unke prati prem bhaav ke behne se
Badhti rahegi sehenshakti
Badhti rahegi himmat aur bhakti
Guruji dikhaate rahenge yukti
Aagey badh paane kee
Vahaan chadh paane kee
Jahaan tera swaagat karega asha ka aftaab
Aur poora hoga Guruji ke charnon mein samarpit har veh khwaab
Jismein hoga tera kalyaan
Guruji Hain itne dayalu aur mahaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aye Dil, Tu Na Dol (08/29/2024)

August 28, 2024

Om Namaha Shivaya
Aaj Ka Suvichaar 🙏🏻🙏🏻

#2383

             Mera Sahaara Ekmaatra

Param poojya Guruvar mere,

Aap Hain mera sahaara ekmaatra
Mai Aapki daya kee nimaani paatr
Haalaat khade hain Aap mein vishwaas todne ko
Kintu mai raazi nahin Aapka dar chodne ko
Kyunki Aap hee, buss Aap hee basey Hain antas mein is tareh
Ki kisee aur shakti ke liye sthaan nahin hai uss jageh.

Jabb sabhi Hain Aap mein, Aap mein Hain sabb
Toh Aap hee Hain Ve divya ruhaani Rabb
Jo thei tabb, Jo Hain abb
Jinkee leela hai nyaari aur ajab.

Kyunki chaahe jo kuch bhi ho jaaye
Mujhe yakeen hai ki Aapki leela se kalyaan ho paaye
Aap saaf karvaayein mann ka paatr
Aap hee Hain mera sahaara ekmaatra.

Arzi hai meri ki mera Aap par vishwaas rahe akhandit
Arzi hai ki Aapko hee sada chete mera chitt
Usee mein basaa hai mera hitt
Usee se paap jaayenge mitt.

Neevanpann bakhshiye aisa
Ki Aapke charnon mein sada jhuka rahe sir mera
Haunsala bakhshiye aisa
Ki mujhe yaatna kee raat mein bhi dikhe sukh ka savera.

Sada banee rahoon Aapki chhaatr
O mera sahaara ekmaatra
Aapki chhavi ko hriday mein sanjote huey
Apne antas ko Aapke naam ke amrit mein bhigote huey
Aapki kalyaankari kripa se apne paap dhote huey
Mai jabb takk loon janam, janmoon buss Aapki hotey huey.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mera Sahaara Ekmaatra (08/28/2024)

August 27, 2024

Om Namaha Shivaya
Aaj Ka Suvichaar 🙏🏻🙏🏻

#2382

                   Nirmal Si Ik Nadi

Guruji ke pyaar ko shraddha se liye
Kinaaron par jalaa kar deeye
Nirmal si ik nadi bahe
Har subah se leke agli subah takk
Behti rahe athak
Pal pal ghadi ghadi
Peher peher rahe bhari.

Nadi ye pyaar kee hai bahut hee sundar
Kehne ko nadi hai ye par hai jaise samundar
Guruji ke pyaar se santript hai har boond
Chaahe aankhein kholo ya lo moond
In boondon kee chamak dikh jaayegi
Aur tumhaare hriday mein samaayegi.

Kyunki ye boondein hain ati paawan aur anmol
In boondon ke pyaar mein basey hain Guruji ke bol
Chetna aur prerna ke
Niswaarth samvedana ke.

Bhole bhole bhaav se
Bade hee adbhut chaav se
Nadi hai behti jaaye
Bhakton se kehti jaaye
Ki Guruji mein khote khote
Ve lagaa lein ismein gotey
Yoon ki bheetar takk bheeg jaaye unka antas aur har angg
Aur Guruji ke pyaare pyaar ka chadh jaaye unpar rangg.

Nadi kee neeyat nek hai
Uska uddeshya ek hai
Bhakt ko Guruji ke sangg jodne ka
Aur phir bhakt ko kinaare par chodne ka.

Jahaan bhakt aur bhi deeye ujjwal kar paaye
Aur Guruji kee mahima gungunaaye
Jis se prerit hokar aur bhi sangat aaye
Aur is nirmal nadi mein bheeg paaye.

Jabb se Guruji se laagi hai lagan
Nadi toh isee sewa mein rehti hai magan
Guruji se vo yoon hai jud gayi ruhaaniyat kee taar se
Ki behti hai Unka pyaar leke din raat itne pyaar se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Nirmal Si Ik Nadi (08/27/2024)

August 26, 2024

Om Namaha Shivaya
Aaj Ka Suvichaar 🙏🏻🙏🏻

#2381

Shukr Hai Ki Sweekaara Hai Unhonei

Guruji kee kalyaanmayi kanti
Phaylaa de bhakt ke maarg mein shanti
Unke bakhshe huey simran aur dhyan dwaara
Paakar Guruji ka atoot akhand sahaara.

Guruji ka niswaarth pyaar
Karta hai tayyaar bhakton ka uddhaar
Laata hai unke vichaar mein sudhaar
Jo phir banta hai unke karmon ka aadhaar.

Chhoti nahin hai ye baat
Aur sabse bada hai Guruji ka saath
Ye sundar saath hai ek sanatan daat
Jo rehti hai sada har bhakt ke saath.

Guruji karein bhakt ka maarg roshan
Guruji karein bhakt kee atma ka poshan
Dekar bhakt ko har kadam par maargdarshan
Guruji protsaahit karein bhakt ka atma-nireekshan.

Bhakt ka antas bheetar se saaf kar
Bhakt ko uskee galatiyon ke liye maaf kar
Guruji bhakt ko ruhaani unnati ke liye karein tayyaar
Kyunki ye maarg bhakt ho pahunchaaye bhavsaagar ke paar.

Doobna aasaan hai, mushkil hai doob kar tarna
Kintu jabb Guruji angg sangg Hain, phir kaisa darna?
Pooran Guru Hain Ve, Unkee sharan mein jeena aur marna
Shukr hai ki sweekaara hai Unhonei, hum toh anaath hee reh jaate varna.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shukr Hai Ki Sweekaara Hai Unhonei (08/26/2024)

August 25, 2024

Om Namaha Shivaya
Aaj Ka Suvichaar 🙏🏻🙏🏻

#2380

                  Ye Dolti Hawaayein

Ye dolti hawaayein
Guruji ko ye bulaayein.

Itraayein itne pyaar se
Guruji pe aitbaar se
Ki Guruji jaldi aayein
Ye bolti hawaayein
Ye dolti hawaayein
Guruji ko ye bulaayein.

Guru ko jo dastoor hai
Vo inhe manzoor hai
Na shikva na gilaayein
Shukrana ye kehti jaayein
Ye dolti hawaayein
Guruji ko ye rijhaayein.

Guruji ka pyaar paaya hai
Hawaaon ne geet gaaya hai
Geet Guruji ka
Preet Guruji kee
Ye dolti hawaayein
Guruji ko ye sunaayein.

Guruji ka sparsh hai inhe
Bahut hee harsh hai inhe
Guruji mein hain ye magan
Laagi inhe Unkee lagan
Ye dolti hawaayein
Guruji mein ye kho jaayein.

Akash ko ye choomti
Idhar udhar ye jhoomti
Aankh inkee numm nahin
Inhe toh koi gumm nahin
Ye dolti hawaayein
Guruji ke liye muskuraayein.

Ye dolti hawaayein
Guruji ko ye bulaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ye Dolti Hawaayein (08/25/2024)

August 24, 2024

Om Namaha Shivaya
Aaj Ka Suvichaar 🙏🏻🙏🏻

#2379

     Tumhaare Bhaagya Ke Dwaar

Shraddha kee seedhiyan chadhte chadhte
Girne se bachaana apne aap ko
Vishwaas kee vel ko thaame rehna
Taaki jhel paao dukh santaap ko.

Unnati kee oonchaayee se darna matt
Ruhaani gehraayee se na hona bhaybheet
Guruji se maangte rehna sumat
Nibhaate rehna Unse tum preet.

Guruji ke naam ko rehna japte
Unke tapp mein rehna tapte
Taaki kasht kee agni seh sako
Taaki uske prabhaav se na thako.

Guruji se karte rehna pyaar
Beshak tumhe pyaar na karey sansaar
Farz nibhaate rehna baarambaar
Jodey huey Guruji se seedhi taar.

Guruji kee yaad mein guzaarte rehna safar
Har moad har kadam par karte huey Guruji kee kadar
Tumhe na bhi nazar aaye Unkee hoti hui nadar
Toh bhi jaan lena ki Unkee nadar ka ho raha hai asar.

Varna tumhaare haalaat hotey is se bhi zyada maade
Abhi phir bhi bachey huey ho kyunki pahunche ho Guruji ke dwaare
Isliye shukrana karo nirantar tum
Varna shikaayat mein ho jaaoge gum
Ulajh jaaoge achetan se chakravyuh mein
Toh kaise aayegi shanti rooh mein.

Samarpit karna mann
Prayaas karna har kshan
Guruji ko khush karne ka
Apni khaamiyon se ladne ka.

Ye rooh ka safar hai pyaare
Tayy kar lo isey Guruji ke sahaare
Unhonei bulaaya hai tumhe Apne dwaare
Khul gaye hain tumhaare bhaagya ke dwaar saare.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tumhaare Bhaagya Ke Dwaar (08/24/2024)

August 23, 2024

Om Namaha Shivaya
Aaj Ka Suvichaar 🙏🏻🙏🏻

#2378

               Der Aaye Durust Aaye

Guruji ke ashirwaad se
Jholi bhare jeevan daan se
Kisee ko miley naukari ya makaan
Kisee ko miley kisee na kisee hunar ka vardaan.

Kisee kee beemaari duur ho jaaye
Koi bichhde huey apnon se mil paaye
Chhoot jaaye kisee kee buri aadaton ka nasha
Sudhar jaaye kisee ke ghar parivaar kee dasha.

Nikhaarein Ve ruhaaniyat
Prerit karein insaaniyat
Jisey ho asal dhan kee tamanna
Vo Unka asal shishya banaa.

Jaisa bhi chaley safar
Hota hai har koi agrasar
Aakar Guruji ke dar par
Kyunki sangg khud Hain Har.

Safar mein hongei imtehaan
Mushkil bhi ho sakti hai dastaan
Guruji se karna tum bayaan
Koi aur na aaye darmiyan.

Unse maangna sumat
Arpit karna Unhe apni matt
Nashwar ho tum ye rakhna yaad
Neevenpann kee karna fariyaad.

Kisee ko lagta hai samay
Kisee ka hota hai sabb pal bhar mein
Beshak karo agar magar
Hai ye karmon ke aadhaar par
Pichhle karmon kee baat hai
Aur Guruji ka poora saath hai.

Ve aayein Apni mauj mein
Kisey kya prasad dein
Ye faisla Unka hai sada
Ye leela hai Unkee ada.

Dekhein Ve bhaav bhakt ka
Samarpan mann sashakt ka
Jo jitna Unka shukr karey
Vo Unko utna khush karey
Unse kuch maangne se bhalaa
Hai Unkee agya maan-ne kee kala.

Apne kiye ko bhugatna
Aagey ke liye sambhalna
Seedhi taar Unse jodna
Kamzoriyon ko todna.

Na vyarth karna tum samaa
Maangte rehna Unse kshamaa
Ye hai zaroori abhi se
Vaise toh karna thaa tabhi se.

‘Der aaye durust aaye!’ maan lo
Guruji ko Prabhu jaan lo
Ve Hain sach, Ve Hain sabb
Hum Unke, Ve hamaare Rabb.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Der Aaye Durust Aaye (08/23/2024)

August 22, 2024

Om Namaha Shivaya
Aaj Ka Suvichaar 🙏🏻🙏🏻

#2377

                 Bahuroopi Ghataa

Bahuroopi si ghataa thi chhaayi
Andhepan ka ho raha thaa ehsaas
Suna thaa musaafir ne ki poornima kee hai raat
Lekin ghanghor ghataa ne chhipaa lee thi chaandni kee baaraat.

Maya aur vikaar thei chhaaye
Ghata ne ajab se rangg thei dikhaaye
Rangg ho raha thaa aur bhi gehra agyan se
Vo poori koshish kar raha thaa lekar sahaara Guruji ke naam ke baan se.

Musaafir thaa asamanjas mein
Bahut jatan kiye usne
Ki chand ko dekh paaye
Ki usey chandni nazar aaye.

Vo na sakta thaa abhi jaan
Ki ye thaa uska imtehaan
Taaki usey ho paaye pehchaan
Ki chandni hai ghata se mahaan.

Varna vo ghataa se prabhaavit rehta umr bhar
Na hoti usey kabhi asal gyan kee chaahat aur kadar
Jabb takk ghataa na hoti duur
Na dikh sakta thaa usey chandni ka ruhaani noor.

Chandni, jo prateek thi uss sheetalta aur saralta kee
Jo darasal Guruji ne usey bakhshi thi
Magar usey ho na rahi thi iskee khabar
Usey apne bheetar aa na raha thaa nazar.

Guruji ka veh shishya thaa
Guruji ko toh gyan thaa is drishya ka
Ve kabhi nahin chodte kisee bhakt ka haath
Sada rehte Hain har bhakt ke saath.

Guruji Hain kripa dhaari
Guruji Hain leela dhari
Musaafir ne kiya Unhe yaad
Musaafir ne kee Unse fariyaad
Ki usey kuch na aa raha hai samajh
Uskee duvidha nahin rahi hai sulajh
Guruji se arzi kee usne ki Ve karein usey har gunah ke liye maaf
Usey jaagriti dein taaki usey chandni nazar aaye saaf.

Itna pavitra bhaav thaa uskee yachna mein
Itna pashchaataap thaa uskee aradhana mein
Ki Guruji ko aaya uspar taras
Unkee nadar gayi uspar baras.

Ek kshan mein hee haalaat gaye badal
Har tareh kee ghataa honei lagi ojhal
Ghataa se nikla chand
Musaafir ko saaf dikhne lagaa sabb
Guruji kee kripa se
Guruji mein mil gaye usey Rabb.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bahuroopi Ghataa (08/22/2024)