Month: September 2024

Jabb Labon Par (09/30/2024)

dhirjabhatLeave a comment

September 30, 2024

Om Namaha Shivaya
Aaj Ka Suvichaar 🙏🏻🙏🏻

#2416
                  Jabb Labon Par

Jabb labon par bojh lagne lagey apni hee muskaan
Kisee pichhle karma ka parinaam aa jaaye tumhaare aur tumhaare sukoon ke darmiyaan
Jabb tumhaara saath na de paaye koi bhi aur insaan
Yaad rakhna, tumhaare saath tabb bhi Hain Bhagwaan.

Ve kisee bhi roop mein ho sakte Hain tumhaare angg sangg
Kyunki adbhut leela dhaari Hain Ve aur Unke dhangg
Aise hee toh MahaShiv dharti par aaye swayam
Ve Guruji ke roop mein aaye dene kitnon ko Apni sharan.

Guruji ke roop mein swayam Bhagwaan
Sab kuch Hain Ve jo tum lo maan
Kuch bhi nahin jo na maano tum
Kitne jann Unhe bin maane bhi huey andhere mein gum.

Guruji ne tumhe Apne se joda hai
Toh ye yakeenan hai tumhaari khushnaseebi
Is rishte se mit jaayegi
Tumhaari har tareh kee gareebi.

Ye baat nahin kewal bhautik padaarthon ya duniyavi dhan kee
Ye baat ho rahi hai rooh aur antakaran kee
Deh aur duniyavi sukh se kaheen zyada mahatvapoorna hai inka uddhaar
Kyunki antas aur rooh ke poshan bin toh janam hee ho jaaye bekaar.

Yoon hee thode hee na Guruji Hain gareeb nawaaz
Unn takk pahunchti hai Unke har bhakt kee awaaz
Adbhut aur sthaayi hain Unke kalyaan karne ke raaz
Aur bhakton kee anekon galatiyan bhi Ve karte Hain nazar andaaz.

Lete raho tum Guruji ka naam
Unkee yaad mein raho subah shaam
Yaad karte raho tumhaare gyan mein Unke kiye kalyaan
Kitnon se achcha hai tumhaara haal ye toh tum le chuke ho maan.

In sab ahemiyat wali baaton ka karte raho dhyan aur sammaan
Sehejta se sajne lagegi phir labon par muskaan
Pichhle karmon ka bhaar kumm hoga toh aagey ka raasta hoga aasaan
Guruji ke charnon mein safar ka nishchay hee hoga kalyaanmayi parinaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jabb Labon Par (09/30/2024)

Guruji Ka Ye Dar (09/29/2024)

dhirjabhatLeave a comment

September 29, 2024

Om Namaha Shivaya
Aaj Ka Suvichaar 🙏🏻🙏🏻

#2415
                 Guruji Ka Ye Dar

Guruji ka ye dar hai bahut sundar
Yahaan shuru hota hai adbhut sa safar
Jo le jaata hai yaatri ko apne bheetar
Kyunki Shiv toh Hain sabke andar.

Shaayad jitnee gehri hogi tumhaari chot
Utnee zyada mit jaayegi Guruji kee kripa se tumhaare bheetar kee khot
Utna zyada jud paaoge tum Guruji ke sangg
Isliye fikr na karo agar ghaav ka gehra hai rangg.

Guruji tumhaara dil na tootne denge
Guruji tumhaara ye dar chhootne na denge
Tum beshak Unko chod do
Ve sada rahenge tumhaare saath
Unhonei tumhaari poori zindagi ke liye
Thaama hai tumhaara haath.

Isliye rehte huey Guruji kee sharan mein
Bhugat lo pichhle karmon ka hisaab
Guruji ke charnon mein jageh milee hai
Unhe kalyaan karne do behisaab.

Is janam mein jo kumm ho gaya karmon ka bhaar
Toh rooh ka raasta aagey ke liye ho jaayega aasaan
Guruji toh karna chaahte Hain sabhi ka kalyaan
Isliye kasht bhi ho toh jaano ki Ve Hain meharbaan.

Tum kaayam rakho Guru bhakti ka nasha
Sanvarti jaayegi tumhaari dasha
Aisee hai is pavitra rishte kee khushboo
Ki raahat paati chalegi tumhaari rooh.

Rooh ka hee hai safar asal
Kyun dete ho uskee unnati mein dakhal
Guruji ko saump kar jeevan kee doar
Apne bheetar ujaagar kar lo bhor.

Aur koi upaay nahin hai sukh ka
Baaki har upaay banega kaaran dukh ka
Apni sankeernta ko vida karo khol kar usey kaid karne wala jharokha
Is Shivmayi dar par tumhe kabhi na milega dhokha
Balki yahaan mil raha hai tumhe jeevan sudhaarne ka mauka
Kyunki Guruji ka ye dar hai anupam, dayavaan, aur anokha.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ka Ye Dar (09/29/2024)

Shikhar Sunehra (09/28/2024)

dhirjabhatLeave a comment

September 28, 2024

Om Namaha Shivaya
Aaj Ka Suvichaar 🙏🏻🙏🏻

#2414
                 Shikhar Sunehra

Ye Guruji ka darbar hai
Yahaan bakhshishon kee bahaar hai
Chaahe aaj ho ya ho kal
Yahaan milega har samasya ka hal.

Jabb kuch bhi na samajh paao
Aur dhyan bhi na lagaa paao
Buss, Guruji kee yaad mein baith jaao
Chaahe muskuraao ya aansoo bahaao.

Jabb kabhi mayoos ho jaao
Guruji ke satsang suno sunaao
Phir se utsaahit ho jaayega vishwaas
Phir se ummeed se sajegi aas.

Sunn lo shabad Gurbani
Inka mahatva hai ruhaani
Koi buri baat nahin jo ye na aayein samajh
Inke toh spandan se hee uljhanein jaati hain sulajh.

Guruji kee yaad mein kar lo paath
Guruji se jabb chaaho kar lo baat
Unke sangg rishta kisee vehem ka nahin mohtaaj
Is rishte mein andhvishwaas ka nahin koi kaam kaaj.

Isliye aur kuch nahin toh buss lete chalo Guruji ka naam
Shukr karo ki Ve kitne andekhe kashton se bachaane ka karte rehte Hain intazaam
Tumhaare gireban kee gehraayee mein hai Unpar vishwaas
Varna tum kahaan baithe hotey abhi Unke paas.

Koshish karne se na hatna peechhe
Farz nibhaana na bhool jaana
Sheelta mein na girna neeche
Anukampa aur pyaar ko badhaana.

Mastt rehne kee koshish na chodo
Swasth rehne kee koshish na chodo
Guruji kee yaad se muh na modo
Dil naazuk hai, isko na todo.

Is se bhi niraash ho sakte thei haalaat
Isliye Guruji kee rehmat mein raho shukraguzaar aur sehmat
Guruji sunte Hain sabki arzi
Tumhaare bhale ke liye hee chalti hai Unkee marzi
Aksar sahi waqt ka intazaar karna hota nahin hai aasaan
Har saans lena bhi lagta hai jaise ummeed ka ho balidaan.

Beeta kal nahin raha, aise hee beet jaayega aaj
Tumhaare sir par hai Guruji ke ashish ka taaj
Aasaan nahin hai paani ruhaani oonchaayee
Chadhte samay safar mein aati hai kathinaayi
Par tumhaare safar par hai Guruji ka pehra
Shraddha aur saboori se awashya milega shikhar sunehra.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shikhar Sunehra (09/28/2024)

Bholenath Bhagwant (09/27/2024)

dhirjabhatLeave a comment

September 27, 2024

Om Namaha Shivaya
Aaj Ka Suvichaar 🙏🏻🙏🏻

#2413
 Bholenath Bhagwant

Waqt badalta hai
Badal jaate hain haalaat
Lekin Guruji nahin chodte saath
Ye hai bilkul pakki baat.

Unhonei thaami hai jeevan kee doar
Tum beshak chaah kar apni oar se do toad
Kintu Guruji ne jo tumhe liya Apne se joad
Toh Ve kaheen nahin jaate tumse muh moad.

Jabb tum karoge gaur
To beshak na bhi dekh paao veh doar
Tumhe ho paayega is doar ka ehsaas
Kyunki veh jazbaat hai bahut hee khaas.

Guruji ka ansh hai rooh tumhaari
Unke vireh mein jee rahi hai
Phir bhi Unkee meher toh dekho
Ki rooh Unke naam ka amrit pee rahi hai.

Peete peete is amrit ko
Tumhaari rooh ka hitt ho
Iske liye tum karo atoot prayaas
Taaki bujh paaye rooh kee pyaas.

Pyaas, Guruji ke kareeb aate jaane kee
Pyaas, ek din Guruji ko paane kee
Pyaas, Unmein ramm jaane kee
Pyaas, Unke noor mein samaa jaane kee.

Guruji bakhshein tumhe chadhdi kala
Sada hota rahe tumhaara bhalaa
Guruji kee kripa anant hai
Ve toh Bholenath Bhagwant Hain.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bholenath Bhagwant (09/27/2024)

Sampoorna Sukh Bhavsaagar Ke Paar Ka (09/26/2024)

dhirjabhatLeave a comment

September 26, 2024

Om Namaha Shivaya
Aaj Ka Suvichaar 🙏🏻🙏🏻

#2412

Sampoorna Sukh Bhavsaagar Ke Paar Ka

Mere Satguru
Bin Aapke sadgati nahin
Aap sangg Hain
Toh sabb hai sahi.

Aapke naam kee nadee
Antas mein hai bahi
Aapki vadiyaayee hai sabse badi
Jo sunti hai meri baat ankahi.

Aapke bin ek pal bhi nahin gavaara
Kyunki mere liye toh Aap hee Hain sahaara
Mujhe dekhna hee nahin kaheen aur
Aapki meher se Aap takk hai meri daud.

Kripa karna ki beech raaste mein na kho jaaoon
Daya rakhna ki Aap takk pahunch paaoon
Kyunki Aapke sangg jo hoga raasta tayy
Toh ye nimaani nacheez rahegi nirbhay.

Jiska Aaradhya ho sarvashaktimaan
Jisey praapt ho Unse abhay daan
Uss bhakt kee chamak jaati hai taqdeer
Kyunki mann mein basaakar apne Guru kee tasveer
Vo makhmali ghaas ya pathreeli raahon par se jaata hai guzar
Kyunki uske Guru hotey Hain uske hum safar.

Mai na jaanoon ki mere ye alfaaz
Nyaay de paa rahe hain ya nahin meri bhaavanaaon ko
Kyunki bhaavanaayein tezi se chalein ya bhaagein
Aur mere alfaazon mein itnee taakat nahin ki ve daudein aagey.

Alfaazon kee ladiyan peechhe reh jaati hain
Jo bayaan nahin hoti, ve bhaavanaayein dil ke uss koney mein beh jaati hain
Jahaan se ve chuppi se bin lafzon ke keh jaati hain apni baat
Kyunki Aap toh mere bheetar sada hotey Hain mere saath.

Ek din khatm ho jaayenge alfaaz
Ruk jaayega saanson ka saaz
Bhaavanaayein shaayad dabb jaayengi karmon ke bhaar ke taley
Lekin rooh rahegi aabaad kyunki rooh mein Aapke deedar-e-intazaar ka deep jaley…..

Jabb takk hota nahin meri rooh ka Aapse milan
Jabb takk ye deedar-e-intazaar nahin hota pooran
Aapki uss divya jyot mein leen hota jaaye deep deedar-e-intazaar ka
Aur ismein praapt ho jaaye sampoorna sukh bhavsaagar ke paar ka.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sampoorna Sukh Bhavsaagar Ke Paar Ka (09/26/2024)

Uss Raaste Ko Salaam (09/25/2024)

dhirjabhatLeave a comment

September 25, 2024

Om Namaha Shivaya
Aaj Ka Suvichaar 🙏🏻🙏🏻

#2411
           Uss Raaste Ko Salaam

Uss raaste ko salaam
Jo mujhe le jaata hai mere Guruji kee oar
Poojya Guruji, aisee meher karte rahiyega
Ki mai kabhi na doon uss raaste ko chod.

Aap hee jaanein is raaste ke moad
Aapne hee le jaana hai manzil kee oar
Kahaan hai jharna raahat ka
Kahaan hai chandova chaahat ka
Kahaan hain patthar, kahaan raahein aasaan
Ye sabb jaante Hain Aap karunanidhaan.

Aapne samjhaaya ki raasta hai ruhaani
Beshak mujhe kabhi ritu lagey suhaani, kabhi tufaani
Lekin darasal vo hai mera bhram aur naadaani
Kyunki aakhir mai theheri naadaan aur nimaani.

Ritu ke rukh, jeevan ke sukh aur dukh
Sabb hain pichhle paap punya ka hisaab
Aap toh Hain sarvagyani
Aapke paas hai har bhakt ke karmon kee kitaab.

Ye toh hai Aapka ehsaan
Ki is raaste par chalaa rahe Hain
Sach kaha jaaye toh
Aap sahi raaste par laa rahe hain.

Kyunki pahunch kar sukh dukh ke bhi paar
Hai parmaarth ka veh pavitra sansaar
Jahaan hoga Aapka sthaayi sanatan deedar
Jiske liye chodne kee zaroorat nahin ye sansaar.

Buss, Aapke sangg apni rooh ko jodey rehna hai mujhe
Param poojya Guruji, shakti deejiye ki seh loon uske liye jo bhi ho sehna mujhe
Pyaasi nadiya hoon, buss Aapki bandagi mein behna hai mujhe
Mujhe apanaane ke liye Aapse shukrana kehna hai mujhe.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Uss Raaste Ko Salaam (09/25/2024)

Mahasaagar (09/24/2024)

dhirjabhatLeave a comment

September 24, 2024

Om Namaha Shivaya
Aaj Ka Suvichaar 🙏🏻🙏🏻

#2410
         Mahasaagar

Mahasaagar Guruji kee meher bhari mamta ka
Mohtaaj nahin hai kisee aur kee kshamta ka
Ismein samaaya hai jitna prataap aur pyaar
Usey naap ya tol nahin sakta sansaar.

Is mahasaagar mein sanshay kee dhool takk ghul jaati hai
Is mahasaagar kee ik boond se hee malintaa dhul jaati hai
Har paap kee
Har santaap kee.

Is mahasaagar kee sheetalta mein hai adbhut shakti
Jis se chandni kee bhanti roshan hoti hai bhakti
Pratibimbit hota hai noor ruhaani
Bhakti kee har ghadi hoti hai suhaani.

Is mahasaagar ka tej hai sooraj ke tej se kaheen zyaada adhik
Jiskee oorja ka saubhaagya paata hai har pathik
Taaki sankat ke andhere mein bhi veh dekh paaye aagey
Aur bhaybheet hokar raasta chod kar na bhaagey.

Mahasaagar kee boondein dheeraj barsaati hain
Shraddha aur saboori kaayam rakhna sikhaati hain
Guruji kee kripa se miley ek boond, ya phir mahasaagar poora
Kisee bhi tareh se bhakt ka kalyaan nahin rehta adhoora.

Mahasaagar kee shanti mein chhipa ho sakta hai tufaan roopi imtehaan
Jiske aane kee khabar se bhakt reh sakta hai anjaan
Isliye karna is mahasaagar ka aadar
Kyunki ye hai sarvashaktishali dar.

Yahaan kee ek boond bakhsh sakti hai zindagi
Yahaan kee ek boond kaabil hai mitaane mein bheetar jamee hui gandagi
Chaahe vo ho karmon ya vikaar kee
Ya phir soch vichaar kee.

Guruji kee mamta ka mahasaagar dekh raha hai hamein har pal
Isee kee goad mein hum leheron ke sangg beh rahe hain
Guruji sunn rahe Hain sabb, chaahe hum chup hain ya keh rahe hain
Guruji hum bhakton ke liye na jaane kitna kuch seh rahe hain.

Guruji aur is divya mahasaagar ka shukriya
Jinhonei sada hamaara uddhar hai kiya
Is mahasaagar mein samaayi hai Guruji kee aisee meher
Jo nishchay hee har bhakt ko dikhaayegi shubhta kee seher.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mahasaagar (09/24/2024)

Suno Ik Maanav Kee Kahaani (09/23/2024)

dhirjabhatLeave a comment

September 23, 2024

Om Namaha Shivaya
Aaj Ka Suvichaar 🙏🏻🙏🏻

#2409
       Suno Ik Maanav Kee Kahaani

Suno ik maanav kee kahaani
Kuch kuch aisee thi uskee zindagaani
Vyavsaay se thaa veh ik chor
Dekhta na thaa ki ratri hai ya bhor
Karta rehta thaa veh chori
Usne dhan sampatti bahut si jodi
Par sab paani kee tareh beh gayi
Aur uskee tijori khali reh gayi.

Usey samajh na aaya ki kya hua
Haalaat ke thappad ne usey yoon chhua
Ki sadma pahuncha usey zabardast
Abb veh na raha pehle jaisa mastt.

Uska utsah honei lagaa khatam
Usey vyarth lagne lagaa apna janam
Yaad aaya usey jabb hua veh adheer
Ki usne ik baar dekhi thi ik tasveer
‘Blessings always’ jis par thaa likha
Vahee noorani swaroop usey mann kee aankhon mein dikha.

Usey maalum na chala kyun uskee aankhein bhar aayeen
Darasal ye thi swaroop wale Guruji kee vadiyaayee
Waqt aa gaya thaa uska Guruji kee sharan mein aane ka
Guruji ne taras kiya usey Apne charnon mein bulaane ka.

Yoon hui Guruji kee mauj
Ki chor ne shuru kee apne bheetar satya kee khoj
Guruji kee bhakti mein behne lagaa uska bhaav
Guruji se apni har baat kehne ka badhne lagaa uska chaav.

Chor ke paas na thaa Guruji ka swaroop koi
Uskee bhavna uske mann mein basey swaroop mein khoyi
Guruji kee meher se veh jaan gaya ki Guruji Hain ekmaatra sahaara
Deen bhaav se pachhtaate huey chor ne Guruji ko pukaara.

Haath par haath dhar
Hokar Guruji par nirbhar
Veh sunaata gaya haal apne mann ka
Jismein satya thaa uske beete huey jeevan ka.

Kab beet gaya samaa chor ko na chala pataa
Maan kee usne apni har khataa
Guruji se usne kshama maangi pavitra bhavna se
Guruji ka vandan kiya sudharne kee kaamna se.

Chor Guruji ke charnon mein haara
Guruji ne meharbaan hokar usey taara
Guruji ne kiya uska kalyaan
Dekar usey sadasheelta ka vardaan.

Hum sab ke bheetar hai jo paapi ya chor
Guruji se arzi hai ki Ve nazar daalein uskee oar
Guruji dein aisee bakhshish ki hum saari sangat sanvar jaaye
Jo disha Ve dikhaayein, Unka har bhakt udhar jaaye.

Phir nishchit hai hamaara kalyaan
Jo karenge swayam Guruji karunanidhaan
Atmabodh dwaara hum satya takk pahunch paayenge
Aur durdasha se yakeenan hum bach jaayenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Suno Ik Maanav Kee Kahaani (09/23/2024)

Guruji Ke Charnon Mein (09/22/2024)

dhirjabhatLeave a comment

September 22, 2024

Om Namaha Shivaya
Aaj Ka Suvichaar 🙏🏻🙏🏻

#2408
           Guruji Ke Charnon Mein

Guruji ke charnon mein maatha jo teka
Toh antas ke darpan mein dekha
Ki har devi devta ko kar liya naman
Jo chhoo liye Guruji ke charan.

Haath se choone se bhi zyada zaroori hai
Samarpan ke bhaav se charnon ka sparsh karna
Kyunki sampoorna rishta toh rooh se rooh ka hai
Baaki sab adhoora hai varna.

Guruji ke charnon mein aansoo jo bahenge tumhaare
Toh Guruji ke charan banenge tumhaare atoot sahaare
Jo bhavsaagar paar karaayenge
Tumhe kinaare par pahunchaayenge.

Guruji ke charnon mein bhool na jaana muskuraana
Yaad rakhna karte rehna Unke charnon mein shukrana
Jo bhakt hua Guruji ke kamal charan ka deewaana
Uske liye unn charnon mein hee shuru aur safal ho har afsaana.

Guruji ke charan dekhte aaye hain na jaane tumhaare kitne janam
Inhee divya charan mein arpan kar do apne saare karam
Dukh haran hain Guruji ke kamal charan
Jo bhakt maan le Guruji ke vachan
Vo toh bin chhuey bhi paa le Guru charan mein sharan
Aur Guruji sambhaalein uska jeevan aur maran.

Guruji ke charnon mein arpit karo shraddha ke suman
Guruji ke charnon mein samarpit karo apna mann
Guruji ke charnon ke taley kee dhool roopi vibhooti ko kar ke mastak par kendrit
Guruji ko cheto, din raat Unhee mein lagaao chitt.

Neend bhi khuley toh bheetar chal raha ho Guruji ka naam
Jaagte huey bhi rahe Guruji ke vachan aur charan ka maan
Guruji ke charnon mein hee praapt ho jaaye har teerath dham
Guruji ke charnon ke siwa abb aur kaheen na miley is rooh ko aaraam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ke Charnon Mein (09/22/2024)

Sarvavyaapi Sarvatra (09/21/2024)

dhirjabhatLeave a comment

September 21, 2024

Om Namaha Shivaya
Aaj Ka Suvichaar 🙏🏻🙏🏻

2407

                 Sarvavyaapi Sarvatra

Param poojya Guruji Maharaj,

Sarvavyaapi sarvatra Hain Aap
Adbhut chhavi ka chhatr Hain Aap
Chhavi Aapki mamta kee chhaaon kee
Pavitrata Aapke kamal roopi paaon kee
Kin lafzon mein karoon Aapke divya saundarya ka bakhaan
Aap hee bataayiye, mere Guruvar mahaan.

Aapka anupam abha mandal noorani
Aapki ruhaani khushboo suhaani
Raat ke andhere mein prakash phailaata Aapka swaroop
Din mein bhi tej aisa ki pheeki laage dhoop.

Jitna prem hai Aapki mamta mein
Jitna prataap hai Aapki kshamta mein
Namumkin hai utna aur kaheen
Gavaah hain aasmaan aur zameen.

Karti rahoon mai Aapki Ji huzoori
Har din kumm hoti chale Aapse mujh nacheez kee duuri
Yahee toh hai meri rooh ke liye zaroori
Taaki uskee yatra safalta se ho poori.

Chhipa nahin hai Aapse kuch
Aap jaanein ki mai hoon praani tuchh
Apne kamal charnon mein karte rahiye mera uddhar
Apni meher-e-nazar se deejiye mujhe taar.

Jaise din kee dhoop shaam ke aanchal mein hai dhalti
Mai Aapke charnon ka anusaran karti hui rahoon chalti
Samarpan ho mere mann mein
Santosh ho jeevan mein
Aapse hee saanson mein bhakti
Aapse hee bhakti mein shakti.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sarvavyaapi Sarvatra (09/21/2024)