Aayi hoon Aapke dwaar Kar rahi hoon intazaar De deejiye Apna deedar Pukaaroon mai baar baar.
Din se raat hoti hai Raat se hota hai din Meri toh par gati nahin Aapke bin Abb takk intazaar ke lamhe rahi thi gin gin.
Abb aur gina na jaaye Khud jeena na aaye Jabb takk rooh Aap mein na samaaye Tabb takk ye rooh kaise sukoon paaye.
Badhti jaa rahi hai pyaas Uttejit hoti jaa rahi hai aas Vireh mein honei lagi hoon udaas Duniya nahin aati raas.
Shukrana Aapka ki neend khul rahi hai Shukrana ki zameer kee zameen dhul rahi hai Shukrana Aapka ki Aap laaye Hain yahaan takk Varna mai toh chalte chalte kabb kee gayi thi thakk.
Aise anmol aur aseem hain mujh par Aapke ehsaan Ki mera beantt shukrana bhi kumm hai, mere maalik meharbaan Mera naman sweekar keejiye Mujhe Apne kaabil banaa deejiye.
Subah shaam ke khel se Koi nahin bach paaya hai Kintu har veh jann khushkismat hai Jis par Guruji kee chhatra chhaaya hai.
Kabb aa jaaye jeevan kee shaam Kisee ko nahin hai khabar Isliye kyun na jeevan kee subah kee har kiran ka Anand lekar karein jeevan basar.
Shaam ke baad swaabhaavik hai subah ka aana Lekin aksar mushkil ho jaata hai shaam ke saath raat ko bitaana Guruji ke charnon mein ho jiska ashiyaana Uske liye vaheen guzarta hai subah shaam ka afsaana.
Pehne huey Guruji ke naam ka raksha kavach Bhakt kitne anginat kashton se jaata hai bach Shaam kee mayoosi aur chunautiyan uska santulan nahin sakti hain toad Kyunki Guruji uss se muh moad kar kabhi nahin dete usey chod.
Jiska ekmaatra sahaara ho Guruji ka naam Uske liye Guruji ke charnon mein hai sukh ka dhaam Ek vahee toh sthaan hai jahaan Subah jaisi hee sunehri ho sakti hai jeevan kee shaam.
Kyunki Guruji ke charnon mein behti hai mamta kee dhaara Kyunki Guruji ke charnon mein hai ruhaaniyat ka ujiyaara Tabhi toh Unke charnon mein jhuk kar miltee hai ruhaani oonchaayee Guruji ke charnon mein hai gyan kee gehraayee.
Guruji ke charnon mein hoti hai sabki sunvaayee Unke charnon mein subah shaam kee niyati kee ho sakti hai dobaara likhwaayee Guruji ke charnon ka amrit hai kalyaanmayi aur jeevan daayi Unke prataapi charnon kee hai aisee vaddi vadiyaayee.
Ye Guruji ka dar hai Ye Bholenath ka ghar hai Yahaan nirantar behta hai pyaar ka amrit Har pal hota hai yahaan bhakton ka hit.
Guruji ka sparsh sheetal ruhaani Paati hai saari sangat deewaani Guruji ka hai aisa spandan Ki bhaav vibhor ho jaata hai mann.
Is dar par bhoole bhatke aakar Paa lete hain sahi disha Is dar par Guruji ke darshan paakar Beet jaati hai niraasha kee nisha.
Guruji khud hee yahaan bulaate Hain Koi yoon hee nahin aa sakta yahaan Janmon ke paap dhul sakte hain Mit sakte hain atma par se paapon ke nishaan.
Guruji ke dar par mumkin hai Bhakt ka sampoorna kalyaan Unke liye sab ek se hain Sabhi bhakt hain Unkee santaan.
Kalyuga ke is samay mein jo bhi Pahunch paaya hai Guruji ke dar par Usey zaroorat nahin jeene kee museebaton se darr kar Kyunki uske angg sangg Hain mahaan Shiv avatari Guruvar.
Guruji ke dar par hotei aayein hain Anginat bhakton ke imtehaan Kaun, kabb, aur kaise utteerna hoga Iska kewal Guruji ko hai gyan.
Roag ho tann ka Bartan ho mann ka Ya abhaav ho dhan ka Guruji har kamee karein poori Guruji ke dar par aa jaane se Uddhaar kee khwaahish na rahe adhoori.
Guruji kee sharan mein har lok ka sukh hai Unke dar kee oar hee pyaasi hawaaon ka rukh hai Unke dar kee divyata ke aagey jhukta har dukh hai Ve jaanein kaun Gurumukh aur kaun mannmukh hai.
Apna aanchal ashish se bhar kar Guruji viraajmaan rehte Hain dar par Unke dar par bhakt ka har janam jaaye guzar Koi vardaan ho hee nahin sakta is se badhkar.
Jabb raaste par ho makhmali ghaas Aasaan hota hai chalna Lagta hai ki bin ghadi dekhe hee Palak jhapakne se pehle hee beet jaati hai har ghadi Aur jabb raasta ho pathreela Mushkil hota hai chalna Aisa lagta hai ki ghadi kee ghadiyan beet jaane par bhi Apni gati ruk kar vaheen kee vaheen hai khadi.
Har ghadi mein hotey hain ek jitne hee pal Par mushkil paristhiti mein lagta hai aisa Ki aane mein bahut der kar raha hai aane wala kal Aur aise mein bahut zaroori hai manobal.
Isliye jo aa rahe hon raaste mein pathar Toh awashya pichhle karmon ke phal de rahe hain takkar Lekin Guruji tere angg sangg Hain har ghadi Ye sachchaayee hai sabse badi.
Aur jo aa rahi hai paaon ke neeche makhmali ghaas Toh yaad rakhna zaroori hai ye baat khaas Ki kabhi bhi ubhar sakta hai koi pathar raahon mein Jo rukaavat bann sakta hai tere chalte paaon mein.
Isliye jaise bhi tu har ghadi raha ho guzaar Chaahe jaisi bhi mehsoos ho rahi ho waqt kee raftaar Chaahe makhmali ghaas ho ya mil rahe hon pathar baar baar Tu Guruji ka shukrana karta chal baarambaar.
Saath hee Unse bakhshish maang har kadam par Tu Guruji par yakeen kar Ye hai kalyaan ka dar Jaisa bhi hoga tera safar Is satya mein santosh kar Ki Guruji kee meher sada rahegi tujh par.
Beet jaayengi safar kee saari ghadiyan Banti jaayengi ve satsang kee ruhaani ladiyan Aisee hai Guruji Maharaj kee vadiyaayee Ki tanhaayee mein bhi goonj uthti hai shehnaayee.
Muskuraa lo, Guruji Hain tumhaare angg-sangg Varna na hotei tumhaari zindagi mein aise anokhe rangg Kyun mushkilon se darr rahe ho Arey, tum inke dwaara tarr rahe ho.
Jo masti bhi tum kar rahe ho Jin bhaavnaonmein bhi tum bahe ho Ye sabb hai Guruji kee rehmat Unkee raza se raho sehmat.
Bin jaane Guruji kee leela ke raaz Muskuraahat ko banaa lo apna andaaz Kyunki raaz toh raha aane se samajh Balki tark vitark se aur bhi jaaoge tum ulajh Tumhaare khush rehne se Guruji honge prasann Is baat par karo manan aur karo Guruji ka anusaran.
Guruji se tum karte raho pyaar Tumhaare liye Unka pyaar toh hai aparampaar Unhe prasann rakhna tumhaara bahut zaroori farz hai Ve tumhaare karmon ka bhaar sambhaal rahe Hain, jinka tum par bahut karz hai.
Aur koi nahin is karz ko utarvaa sakte Aur Guruji ye sab karte nahin thakte Maanjo, maanjo, apne mann ka bartan Muskuraate huey sajaao jeevan ka upvan.
Jabb takk shareer nahin bann jaata hai shav Hotey rahenge tumhe anekon anubhav Yaad rakho ki rooh ka safar toh rahega jaari Jabb takk aati nahin Param pita mein samaa jaane kee baari.
Isliye har din rooh ko karo tayyaar Kar ke rooh ka poshan Aur Guruji Parwardigaar Karte rahenge safar ko roshan.
Is baat mein kitnee raahat hai Kyunki yahee toh rooh kee chaahat hai Isliye muskuraa lo, Guruji kar rahe Hain tumhaara kalyaan Muskuraate huey kalyaan ke is vardaan ka karo tum sammaan.
Phooldaan mein sajaakar Ichchaaon ke guldaste ko Phooldaan mein ahankar ka jal bhar kar Maanav chal pada duniya ke baazaar mein.
Bheed bahut thi, bharaa thaa baazaar Aawazein bhi aa rahin thi kayi hazaar Kuch jann chal rahe thei, kuch kisee savaari par thei savaar Kuch bheekh maang rahe thei, kuch lagg rahe thei raees zameendaar.
Har koi apni hee dhun mein raha thaa baazaar se guzar Sabhi ko jaldi thi ki mukammal ho jaaye safar Sooraj dhalne lagg raha thaa Jinhonei din bhar dhoop ko saha thaa Ve huey vyaakul aur idhar udhar bhaagne lagey Jaise lambi neend se hon jaagne lagey Kisee konei mein shuru ho gayi ladaayi Toh dooje moad par kisee ko rulaane lagi mann kee tanhaayee Kaheen duur bajne lagi ghantiyan mandir kee Kisee kisee ko yaad aane lagi apne ghar kee.
Jaise jaise sooraj dhalta raha Maanav guldasta thaame huey chalta raha Veh thakaa nahin, bhatka nahin, uska hua usey abhimaan Ek khambhe se takraaya aur gir gaya uske haath se phooldaan.
Toot gaya veh phooldaan Ichchaaon ke phool gaye bikhar Lekin maanav mein ik lau jalee Uskee jaagriti gayi nikhar.
Usey sab kuch nirarthak sa honei lagaa prateet Usey ehsaas hua ki kitnee khokhli hai har duniyavi ichcha aur preet Unn phoolon ke guldaste ke phooldaan kee bhanti Aur uske mann mein hui bahut ashanti.
Tabhi kisee ne thaama uska haath Aur kaha uss se ki veh chale uske saath Maanav ne dekha ki vo thaa ek farishte ke jaisa Usne maanav ko achanak ek raasta dikhaaya aisa Jahaan bahut saari sangat thi Sabb par ruhaani si rangat thi Maanav ko lagaa ki veh ek pal mein hee pahunch gaya ho kisee doosre sansaar mein Ek kashish ne usey kheench liya uss sundar se darbar mein.
Vahaan goonj rahi thi Gurbani Sabb chupchaap rahe thei sunn Maanav ko bahut raas aane lagi Veh sakaaratmak si dhun.
Baithe huey vahaan Dekha usne jahaan jahaan Usey farishte ka swaroop nazar aaya Aur jabb dhoondha usne farishte ko Toh farishte ko maanav ne gaayab paaya.
Gurbani ke baad hua jaap aur Shivji kee Aarti Maanav kee rooh toh rahi farishte ko pukaarti Usey mehsoos hua farishta apne saath hee Tabhi Aarti ke baad ek sangat ne baat kee- Veh baat thi anubhav uss sangat ka Guruji ke sangg Aur swaroop ko dekhte dekhte maanav par chadhne lagaa Guruji ka rangg Usey samajh aaya ki Guruji aaye thei farishte ke roop mein swayam Maanav ko lagaa ki usey mil gaya ho uss shaam ek naya janam.
Abb Guruji kee kripa se veh Guruji se jo juda Toh vaapis kaheen aur na muda Satsang simran sewa bann gaye uskee dincharya ka hissa Guruji kee sharan mein sudharne lagaa uske jeevan ka kissa.
Vinamrata ka jal bhara usne phooldaan mein Bakhshishon kee ichchaaon ke phool usmein sajaaye Usne Guruji ke prati shukrana ke geet gaaye Aur Guruji ke charnon mein apne jeevan ke pal bitaaye.
Bagiya mein khiley thei phool Aayi unhe bahut anokhi khushboo Ye soch kar ki khushboo unse hee hai aayi Phool toh kya, har kalee bhi itaraayi.
Bagiya ne unhe samjhaaya Ki itraane mein na karein ve waqt zaaya Bagiya ne unhe bataaya Ki Guruvar baghban ke roop mein hai aaya.
Bagiya ne ishaara kiya jahaan Kaliyon aur phoolon ne dekha vahaan Dikha unhe ik sundar sa purush noorani Jiske abha mandal kee shakti thi bahut ruhaani.
Rutaba thaa Unka alishaan Jaise maanav roop mein hon Bhagwaan Bagiya ne prem se kiya ailaan Ki Ve Hain Guruji, bagiya ke baghban.
Ye sunte hee kaliyon aur phoolon ne sees jhukaaya Guruji ka ashish sab par khushboo bann kar chhaaya Guruji ne sabhi par Apni rehmat ka amrit barsaaya Kuch phool khushi se phoole nahin samaaye, kuch ko prem bhaav mein rona bhi aaya.
Guruji ne bagiya mein kee sayyr Jahaan jahaan padey Unke payyr Hari bhari ho gayi vahaan kee ghaas Guruji ke sparsh se hua parivartan khaas.
Guruji kee ruhaani maujoodagi sada ke liye Karne lagi bagiya mein vaas Ve shaareerik taur par bagiya se chale gaye Par bagiya bann kar rahi Guruji ka das.
Guruji kee meher se hum sabke jeevan kee bagiya Khilee rahe Unn baghban ke pyaar se Hamaare antas aur rooh ka poshan hota rahe Guruji Maharaj ke ashish bhare dulaar se.
Baghban Hain Guruji Maharaj Bhagwaan Hain Ve sundar sartaj Nishchay hee sanvarte rahenge hamaare kaaj Buss, Guruji karte rahein hum par raaj.
O Guruji ke pyaare Tujhe raasta karey ishaare Manzil tujhe pukaare Uth, chal tu Guruji ke sahaare.
Na baith haath par haath dhar ke Tu charnon mein hai Ishwar ke Zaroorat nahin jeene kee darr darr ke Zaroorat nahin bhatakne kee dar dar pe.
Unhonei hee sambhaala thaa tujhe kal Jabb tu maayoos rehta thaa har pal Ve sambhaal rahe Hain tujhe aaj Kal bhi tujhe sambhaalenge Ve Guru sartaj.
Guruji dekh rahe Hain teri asthaa Ve seench rahe Hain tera raasta Anugraha ke amrit se har kadam par Rehem karte Huey tere har praarabdh karam par.
Ye nahin ho raha itefaaq se Balki tu mukt ho karmon ke hisaab se Isliye Guruji karaa rahe Hain ye raasta tayy Ve angg sangg Hain, tu reh nirbhay.
Na vilamb kar Unke hukm ke amal mein Buss, samarpit kar khud ko Unke charan kamal mein Tujhe khonei na denge Guru sarkar Ve awashya pahunchaayenge tujhe uss paar.
Ramne lagi mai Aapke rangg mein Aap chalne lagey mere sangg mein Ye Aapki rehmat hai Guruvar Ki mai bhatakti nahin idhar udhar Aapka shukriya baarambaar Ki Aap Hain mere jeevan ka aadhaar.
Khol deejiye gaanthein mere chitt kee Buddhi dete rahiye mujhe mere hitt kee Aapki sharan mein hoon toh bachi hui hoon na jaane kitne aur santaapon se Aap hee mukti dilaayiye mujhe mere mann, karma, vachanon se jude paapon se.
Kyunki mujhe toh kuch gyat nahin Mai karna chaahti hoon vahee Jo Aap chaahein ki mai karoon Jabb takk mai aakhiri saans loon.
Aakhiri saans ke pehle aur baad Meri rooh ko milta rahe Aapka ashirwaad Namumkin hoga Aapke ashish ke bin rooh ka safar safal Kyunki Aap hee Hain jo karmon ke parinaam takk sakte Hain badal.
Aapke ek ishaare se rukh badal leti hain hawaayein Aapke hukm ka amal kar bhakt jann apna kalyaan karva jaayein Har veh shakhs itna bhaagyashaali hai jisey Aap Apne paas bulaayein Aapki sharan mein sabhi bhakt anupam ashish aur adviteeya anand paayein.
Anivaarya hai karna Guruji par poora bharosa Na ki buss thoda sa Kyunki gati nahin bharose bin Beshak koshish kar lo raat aur din.
Guruji se judey rehne ke liye Bharosa karna hai anivaarya Jitna bharosa, utna samarpan Utne naam rass se garbhit hoga har kaarya.
Bharosa bhar deta hai Naam kee pyaas mein mithaas Bharosa hai ik stambh Jiske sahaare naam rass aata hai raas.
Bharose se bhaavna ko poshit kar lo Bharose kee baarish se mann ko bhar lo Maang lo Guruji se aisa bharpoor bharosa daan Ki bheege mann mein rahe hee na sanshay ka koi sthaan.
Guruji Hain Guru ke roop mein Shiv avatari Ish Bholenath se paa lo bharose kee bakhshish Guru kripa se bhatki rooh ko prerna mil paayegi Guruji kee meher se bikhree hui zindagi nikhar jaayegi.
Aaj Ka Suvichaar 