Nimaani Si Gaagar (11/09/2024)

November 9, 2024

Om Namaha Shivaya
Aaj Ka Suvichaar 🙏🏻🙏🏻

#2456

                 Nimaani Si Gaagar

Mere param poojya Guruvar,

Aap Hain Sarveshwar
Shiv avatari maha daani
Aap swayam Hain Parameshwar
Tattva darshi param gyani.

Aap Hain Deenanath
Sada rehte Hain saath
Aap preet ke mahasaagar
Mera antas nimaani si gaagar.

Is gaagar mein hain vikaar roopi pradooshak anginat
Aap hee dein gaagar ko saaf karne kee sumat
Taaki sudharta jaaye mera charitra
Aur antas kee gaagar ho jaaye pavitra.

Mere jeevan ka raasta aur disha
Meri har pal kee dasha
Aapki marzi kee mohtaaj rahe
Mere har shwaas par Aapka raaj rahe.

Mere antas kee gaagar karti rahe atmasaat
Boondein Aapki preet ke mahasaagar kee har pal
Har boond hai mere liye amrit kee daat
Jis se mere sainkdon kasht jaayenge tal.

Jeevan hai, isliye sukh dukh toh aata jaata rahega
Aapki kripa se jo gaagar mein amrit samaata rahega
Toh nishchit hai avirat kalyaan
Kyunki Aap swayam Hain amrit kee khan.

Aapki karuna se chamkega gaagar ka naseeb
Mere antas kee gaagar na rahegi gareeb
Mahasaagar kee amrit roopi boondon se bhar kar
Ruhaani khazaane se gaagar jaayegi bhar.

Amrit gaagar ke bheetar
Amrit gaagar ke aas paas
Aapki daya se ye nimaani si gaagar
Bann jaayegi khoobsoorat aur khaas.

Ruhaani hogi ye khoobsoorati
Ye khaasiyat bhi hogi ruhaani
Mahasaagar mein doobte aur dolte huey
Tarr jaayegi ye gaagar nimaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Nimaani Si Gaagar (11/09/2024)