Ye Bhavsaagar (11/24/2024)

November 24, 2024

Om Namaha Shivaya
Aaj Ka Suvichaar 🙏🏻🙏🏻

#2471

                    Ye Bhavsaagar

Ye bhavsaagar bada hee gehra hai
Ye toh shukr hai, Guruji, ki Aapka is par pehra hai
Karte karte ismein safar
Bhogte huey pichhle karmon ka asar
Anekon sawaal mann mein aate hain
Kuch sawaal toh bahut sataate hain
Kuch aakar chale jaate hain
Aur kuch aur sawaal sangg phir se aate hain.

Yahaan sach jhooth ka nahin chalta pataa
Kaunsi karni thi Aapki raza aur kaunsi thi meri kee khataa
Amuk anubhav ka kaaran thi Aapki marzi ya meri swatantra ichcha
Ye sab kuch hai baahar meri samajh ke
Arzi hai ki reh na jaaoon mai is sab mein ulajh ke
Dikhaayiye mujhe uss gyan kee jyot
Mere sanshay mitt jaayein kar ke jiska bodh
Guruji, Aapke siwa mera koi nahin
Jo bataa sakey mujhe ki kya hai sahi.

Thakk gayi hoon
Bujh si gayi hoon
Prajvalit keejiye mere bheetar veh utsaah
Jis se mai dekh kar chal paaoon veh raah
Jo Aapne mere liye kee hai nirdhaarit
Jis par chal kar mere sanshay jaayenge mitt.

Bhavsaagar ke safar mein mujhe baandhe huey hain hai anekon paash
Aap par vishwaas hai, isliye Aapki meher se abb takk hai shwaas
Shukrana Aapka ki Aapse dil kee keh paati hoon
Maafi ki Aapko na jaane kya kuch sunaa jaati hoon.

Aap hee toh Hain, buss Aap hee Aap
Mere Guru, Ish, maa, aur baap
Beshak anjaane hon duniya ke loag sabhi
Aapke hotey huey nahin ho sakti akeli kabhi
Is sachchaayee se aabaad rehti hai meri ruchi
Isliye har gumm mein bhi Aapka soch kar miltee rehti hai mujhe khushi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ye Bhavsaagar (11/24/2024)