Ulajhaa hua tera safar Lambi si lagg rahi dagar Par dil ko tu chhota na kar Tu Guruji par vishwaas kar.
Guruji toh din raat Hain Din raat tere saath Hain Tere karma zyada, waqt hai kumm Par Guruji Hain toh kya hai gumm?
Ek Ve hee Hain Jo saath thei Ek Ve hee Hain Jo saath Hain Ve hee saath rahenge sada Bin huey kabhi bhi tujhse juda.
Tu khushkismati par ho prasann Ki Ve bakhsh rahe Hain simran Tera hriday hai bada bhaagyawaan Vahaan Guruji Hain viraajmaan.
Tu chod de har fikr ko Thaam le tu Unke zikr ko Unkee mahima ko tu gaata chal Shukrguzaar raha kar har pal.
Unka aanchal bahut bada Tabhi toh tu yoon hai khada Tu Unko namaskaar kar Ve hee Vishnu Ve hee Har Beshak lambi si hai dagar Ve safal karaayenge safar.
Chintan kar ke Guruji ka Chinta kar le duur Chhaate chhaate chhaa jaayega Teri rooh par Unkee chhavi ka noor.
Sotey jaagte Guruji ka chintan Uthte baithte mann mein vandan Hanste rotey Guruji se kar baat Ek Ve hee sada hotey Hain saath.
Kuch bhi toh nahin hai Guruji sangg tere rishte se zyada anmol Is rishte ko kisee bhi bhautik taraazu se Tu kabhi nahin sakta toal.
Ye rishta aur iskee ahamiyat hai sansaar ke paar Gagan se kaheen adhik hai iska vistaar Ye rishta hai har mahasaagar se kaheen zyada gehra Is rishte kee akhandata par hai Guruji Maharaj ka pehra.
Ve dekh rahe Hain teri har adaa Unhe dikh rahi hai teri wafa Na karna hera-pheri Matt kar abb aur deri Tere vash mein ho jaayega tera mann chanchal Tu chaav se Guruji ka chintan karta chal.
Bhautik sukh nahin hai tumhaara swaami Na hee tum ho bhautik dukh ke das Kewal Guruji Hain swaami tumhaare Tum ho Unke hee das, isliye na hona tum udaas.
Aise sukh kee khushaamad kar ke khushi mil bhi gayi agar Toh veh hogi kshanbhangur si dagar Aur jo dukhi hotey chaley bhautik dukhon se Toh zyada honei lagegi mann mein agar-magar.
Agar magar aur kintu parantu wale vichaar Inse nahin honei wala hai tumhaara koi uddhaar Poorna shraddha se karna hoga Guruji pe aitbaar Agar chaahte ho ki ho tumhaara beda paar.
Dukhon ko bhogna padd sakta hai asal sukh paane ke liye Bhautik sukh toh aate rehte hain kabhi na kabhi jaane ke liye Asal sukh mein hota hai sanatan anand ka vaas Asal sukh paane wala phir kabhi nahi hota udaas.
Lekin haan, asal sukh ka rukh dekhne ke liye Mann ka mukh modna hoga aasakti se parey Varna bhautik sukh ke bhog mein khadey khadey Asal sukh kee ichcha ke nanhe paudhe na hongei harey bharey.
Moad le jo mann ka mukh Guruji kee oar Usey dikh paayegi yahaan ke sukh dukh se aagey kee bhor Vo bhor dikhaayegi raasta asal sukh ka Jis se noorani ho jaayega saundarya jeevan ke rukh ka.
Bhautik sukh dukh bhogte huey Rehte huey yaheen par Guruji ke dar par Guruji se judey reh kar Mil sakta hai asal sukh ka var Kyunki sukh kee khan Hain Guruvar.
Dukh bhi zaroor hoga duur Asal sukh bhi milega zaroor Ho sakta hai lamba lagey ye safar Lekin Guruji ka kiya kalyaan awashya laayega asar.
Leherein khushi aur gumm kee Bhavsaagar mein aati jaati rahengi Aate jaate huey apni bhaasha mein ye Aksar apni kahaani bhi kahengi Lekin kehne kehne se machta rahega shor Vyarth hee chala jaayega ye daur.
Kisee aur ko sunaane se achcha hai Guruji se sab kuch kehna Duniya ke loag aur naate aate jaate rahenge Par Guruji ne sada hai rehna.
Aisee hai Guruji kee ruhaani maujoodagi aaj bhi Aisee hai Unkee mahima niraali Ki Unke sangg bhakt baat kar paata hai Aur lehron ka bahaav shor bhi nahin machaata hai.
Dil hee dil mein, mann hee mann mein Guruji ke sangg hon baatein Toh umadti leherein shant hon jaayein Sehejta se beetein din aur raatein.
Bhavsaagar ke paar jaane kee hoti rahe tayyaari Guruji kee liv mein leen hokar shant rahein lehrein saari Roam roam mein samaati rahe Guruji kee khushboo Unse milan ke poorvaabhaas mein gadd gadd hoti rahe rooh.
Socho phir kaisa hoga nazaara Jabb dikhne lagega kalyaan ka kinaara Bhavsaagar mein shanti hogi Mann mein Guruji kee kanti hogi Jeevan ke din hain do chaar Guruji kee kripa se ho jaayega beda paar.
Aap toh jaan-e-jahaan Hain Zaroorat hee nahin Aapse kuch bhi kehne kee Aap chaahein toh seekhti rahoon kala chup rehne kee Mann hee mann Aapse baatein kehne kee.
Aap hee hunar sikhaayenge Baahar hai ye meri kaabiliyat se Ye hee nahin, baaki har soojh boojh bhi Ho paati hai Aapki hee inaayat se.
Deewaanepann mein na jaane Kya kya mai keh jaati hoon Vidhi vidhaan kuch aata nahin Har pal Aapko nihaarna chaahti hoon.
Sotey huey, jaagte huey Aapke khayaalon mein khoti jaaoon Nit nit pal pal Aapke kareeb hoti jaaoon.
Isee kareebi se duur hogi gareebi Isee kareebi mein hai khushnaseebi Aisee khushnaseebi bakhsh deejiye, mere karunanidhaan Ki Aap mein samaa jaaye meri jindari, o jaan-e-jahaan.
Khushkismati maani jaati hai Agar doobte ko mil jaaye tinke ka sahaara Hum Guruji kee sangat ko mauka mil raha hai Ki Unke raajya ke jahaaz mein savaar hokar paayein kinaara Bhogon ke samundar ka Paakar ashish Guruvar ka.
Naapa ya tola nahin jaa sakta hai Is mubarak mauke ka mol Guruji ne ye mauka daan mein dekar Hamaari kismat ka har bandd darwaaza diya hai khol.
Har darwaaze kee har dehleez par mil raha hai aur milta rahega kalyaan ka uphaar Guruji raajya ke samrat Hain, aur hamaare paalanhaar Hum Unkee praja, Unkee santaan, Unka parivaar Hamein doobne se bachaayein Ve taral taaranhaar.
Bhogon ke is bhavsaagar kee gehraayee Guruji kee vadiyaayee ke mukaabale mein kuch bhi nahin Guruji kee mahima toh hai aisee aparampaar Ki Unke saamne na ke baraabar hai bhogon ke is samundar ka vistaar.
Isliye kyun ghabraayein hum is samundar kee gehraayee se Kyun vichalit hon hum iske vistaar se Kyun na ismein tayrne kee koshish ke dauran Guruji sangg judey rehne ka prayaas karein seedhi taar se.
Paramatama se khud kee rooh ke rishte kee baat hai aakhirkaar Ve sumat bakhshein ki Unkee har ichcha ho hamein sweekaar Raazi rahein agar usmein jo ho Unkee raza Toh bhavsaagar ke safar ka aa jaayega anokha mazaa.
Kuch nahin chhipta Guruji se Sab lete Hain Ve dekh Kuch nahin namumkin Unke liye Ve dobaara likh sakte Hain sabke saare lekh.
Guruji maalik Hain srishti ke Kisee ke hukm ke nahin Ve mohtaaj Phir bhi sabke lekh ka alag hota hai ilaaj Aksar aasaan nahin hota kisee kisee bhakt ka aaj.
Aaj, yaani ki aaj ka samaa Jo kashton mein hota hai ramaa Jismein Guruji nishchay hee dete Hain panaah Par lagta hai kasht hotey jaa rahe hain jamaa.
Darasal Guruji ko hee hai gyat Hamaare pichhle karmon kee har baat Ve shubhchintak Hain hamaare Chaahein ki karmon ka bhugtaan ho jaaye isee janam mein Unke sahaare.
Is satya ko maan lena nahin hai aasaan Ki Guruji kee kripa se ho raha hai abb bhi kalyaan Par yahee toh hotey hain imtehaan Jinke dwaara Unke dwaara parkhe jaate hain hum insaan.
Guruji hee bakhsh sakte Hain veh vishwaas Jo mushkil samay mein na tootne dega aas Ve hee bakhsh sakte Hain hamaare gunah Dete huey hamein Apni paawan panaah.
Jinhonei sainkdon ko taara hai Anginat bhakton ka janam sanvaara hai Unhee Shivroopi Guruji ne hamein jo apnaaya hai Toh hamaara uddhaar nishchay hee Unhonei shuru karaaya hai.
Unmein hee hai sampoorna paraakram Aur kisee mein nahin Isliye Ve jo bhi karenge hamaare liye Nishchit hai ki veh hoga sahi.
Hamaari har arzi se kaheen zyada mainey rakhti hai Guruji kee marzi Isliye jo aur jaisa bhi hai kalyaan karne ka Unka andaaz Buss, Ve kabhi bhi na hon humse naaraaz Humse prasann rahein Ve gareeb nawaaz.
Aise karunanidhaan kalyaankaari param pita ko shat shat naman Unn pyaare Deenanath Guruvar ke kamal charnon mein hai vandan Ki kabhi na honei dein Unpar hamaare vishwaas ka khandan Aur hamaari arzi anusaar nahin, balki Apni marzi anusaar Ve sanvaare hamaara janam maran.
Naam ke roop mein sada meri rasna par basna Aap Gyan ke roop mein viraajmaan rahiye mere girebaan mein Noor ke roop mein mere antas mein jaayiye yoon bass Ki ruhaaniyat ke roop mein mere shwaas shwaas mein ho Aapka vaas.
Aapki khushboo se mehekti rahe meri rooh Aapke ruhaani sparsh se milta rahe haardik harsh Aapki prerna jagaaye rakhe meri chetna Aapki mamta badhaati rahe meri kshamta.
Aapki chhavi ke karzdaar hain chaand aur ravi Har roop se prataapi aur sundar Aapka har swaroop anoop Aap itne dayalu ki aur koi nahin Aap jaisa kripalu Aap sarvshaktimaan, Aap sabse mahaan, Aap hee Pradhaan.
Aapki sharan mein hota rahe jabb takk hona hai janam maran Rakh kar mujhe Apne hee dar par rakhe rahiyega Apna haath mere sir par Aapke diye har daan aur vardaan mein hee hai mera kalyaan Mai agyani anjaan, Aap swayam Bhagwaan.
Guruji, Aapki yaad mein beeta har pal hota hai safal Arzi hai ki mere jeevan ka koi bhi pal na ho vifal Yaani ki har pal ko karey aabaad Aapki madhur yaad Pyaare Guruji, sada meri fariyaad sunn-ne ke liye Aapka dhanyawaad.
🌹🌹🌹🌹🌹🌹🌹
Jai Guruji 🙏🏻🙏🏻 Dhirja
Naam Ke Roop Mein Sada Meri Rasna Par Basna (11/13/2024)
Maalik mere, meher Aapki Marham hai mere har santaap kee Aapki daya, Aapka dulaar Dete hain mujhe prerna baarambaar Chunautiyon ke baavajood chalte rehne kee Pratikool paristhitiyan sehne kee.
Maalik mere, Aapki sharan milee jabb se Mere naseeb kee ghadi kee sui yoon hilee tabb se Ki meri zindagi ka har pal hua Aapke hukm ka mohtaaj Har pal par, har ghadi par, har peher par hota hai Aapka raaj.
Iska ehsaas ek baar nahin, balki hota aaya hai anginat baar Isliye waqt achcha lagey ya nahin, seekh rahi hoon usey karna sweekaar Maan kar isey Aapki ichcha Kyunki Aapki ichcha ka parinaam hee sabse achcha.
Aapki sharan mein mujhe lagta rahe har vela suhela Aisa bodh ho mujhe, mere daata Mujhe kabhi bhi na mehsoos ho akela Itna gehen ho Aapse mujh nacheez ka naata.
Maalik mere, paakar Aapki meharbaani Sanvar gayi hai meri zindagaani Bante bante Aapki deewaani Dhanya hui hoon mai nimaani.
Guruji ko agar hai paana Toh apni hasti ko hoga mitaana Kar ke Unhe itna prasann Ki tu tu hee na rahe kisee bhi kshan.
Jaise jaise mit-ti jaayegi teri hasti Badhti jaayegi tere bheetar bhakti kee maadak masti Yoon lagg jaayegi teri Guruji mein lagan Ki tu Unhee mein ho jaayega mastt magan Bhool jaayega tu dharti, gagan Bhool jaayega jal, vayu, aur agan.
Jabb teri kewal Unn Paramatama se reh jaayegi preet Swayam kee indriyon par ho paayegi teri jeet Tabb tujhe hoga gyat Azaadi ka arth, o pyaare Aur Guruji kee kripa se Hongei tere vaare nyaare.
Unhee mein ramaa rahega chitt Unhee ko tera har karma tu karega arpit Tu yahaan rahega Par Unke bhaav mein yoon bahega Jaise tu nadiya, Ve samundar Behte behte tu samaa jaayega Unke bheetar Nadiya ka astitva na rahega uske baad Tu bhi tu na rahega uske baad Yahee toh hai sabse bada ashirwaad Jiske liye kitne aakar chale gaye karte huey fariyaad.
Abb der na kar Abb bilkul na darr Manzil tere kareeb hai Tu khushnaseeb hai Leta chal Guruji ka naam Abb duur nahin hai tere safar ka mukaam.
Aaj Ka Suvichaar 