Month: December 2024

December 31, 2024

Om Namaha Shivaya
Aaj Ka Suvichaar 🙏🏻🙏🏻

#2508

               Ruhaani Azaadi Kee Oar

Prem, shraddha, vishwaas
Ye shabd hain itne sundar
Lekin uss se kaheen zyada sundar hai
Bhaav in shabdon ke bheetar.

Bhaav bina shabd ka arth gumm jaata hai
Bhaav ho toh hee inmein arth aata hai
Bhaav ho bhola aur bhalaa
Yahee hai bhakti kee kala.

Aisa bhaav Guruji Maharaj ko karey prasann
Is bhaav mein behne ka prayaas karey jabb mann
Toh mann bhakti rass mein ramta jaata hai
Aur anokha sukoon paata hai.

Aise bhaav mann mein bahein
Guruji Maharaj prasann rahein
Toh chahiye kuch aur nahin
Soch sada rehne lagey sahi.

Soch sahi, toh sahi hongei karam
Jis se sudharenge ye aur agley janam
Jitne bhakti bhaav se hoga Guru chintan
Aasaani hogi karne mein Unhe sarvsamarpan.

Jo samarpan mein kar le karmon ko bhi shaamil
Toh nirlepta bhi honei lagegi haasil
Duur hotey rahenge vikaar aur unse judey gumm
Ruhaani azaadi kee oar badhte jaayenge kadam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ruhaani Azaadi Kee Oar (12/31/2024)

December 30, 2024

Om Namaha Shivaya
Aaj Ka Suvichaar 🙏🏻🙏🏻

#2507

    Divya Jyot Akhand

Guruji kee kasauti par utarnaa nahin aasaan
Sabse badi baadhaa bann jaati hai apna hee abhimaan
Insaaniyat sikhaate sikhaate Guruji lete rehte Hain imtehaan
Kyunki hamein unnatt karna chaahte Hain Ve karunanidhaan.

Guruji kewal koi sadhu ya santt nahin Hain
Ve Hain Bhagwaan Shiv avatari
Pooran Guru Hain Guruji Maharaj
Hain Ve leela dhaari.

Maya Unn Maheshwar roopi kee shakti hai
Unke paas anekon prakaar kee yukti hai
Kalyaan karne kee sabhi bhakt jann ka
Ve jaante Hain haal sabke mann ka.

Koi jaan nahin sakta ki Guruji ek hee pal mein
Kis kis par daal lete Hain Apni nazar
Beshak lagey Ve yoon hee dekh rahe Hain
Unkee nazar ka ho raha hota hai asar.

Kis pal kis par Ve mauj mein aa jaayein
Kab aur kaise Ve kalyaan kar jaayein
Ye toh kewal Guruji hee jaanein
Ve har bhakt kee asaliyat pehchaanein.

Na jhooth, na paakhand
Na kaam aye koi vehem
Guruji ke aagey
Nahin chal paata kisee ka ahem.

Neevenpann kee Ve moorat Hain
Neevanpann karte Hain Ve pasand
Na maano toh kuch bhi nahin Hain
Jo maano toh Ve Hain divya jyot akhand.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Divya Jyot Akhand (12/30/2024)

December 29, 2024

Om Namaha Shivaya
Aaj Ka Suvichaar 🙏🏻🙏🏻

#2506

                       Kripa Beantt

Param poojya Guru Sahib,

Na keejiyega kabhi bhi mujhe Apne se juda
Mere Guruvar, mere nath, mere Khuda
Meri matt leejiyega, deejiyega Apni matt
Taaki meri har duvidha, har uljhan jaaye hatt.

Na rahe Aapke prati sanshay ka mere mann mein koi sthaan
Kisee bhi prakaar ka bhayy mujhe na karey pareshaan
Zamaane ke ajab se anubhav na karein mujhe hairaan
Aapke khayaalon aur Aapki baaton mein magn rahe mera mann, mere labh aur meri zubaan.

Kuch aur zyada meetha na laagey Aapki meher kee mithaas se
Koi aur pyaas itnee teevra nahin Aapke simran kee pyaas se
Kisee aur ehsaas se itnee preet na ho jitnee ho Aapke ehsaas se
Arzoo hai ki Aapka hee naam japti rahoon Apne har shwaas se.

Varna shwaas chale jaayenge vyarth
Jeevan ka na hoga koi arth
Saarthak kar deejiye mere jeevan ko
Shuddh kar deejiye mere mann ko
Sehna mushkil lagta hai kisee bhi vikaar ka bhaar
Phir bhi galatiyan ho hee jaati hain baar baar
Mann vikaaron ke aakraman se honei lagta hai paraajit
Maafi maangti hoon jabb jabb Aapko chet-ta hai ye chitt.

Aapki rehmat se mann paaye vikaaron par vijay
Mann mein goonje sada Aapki hee Jai
Aapke prataap se paap aur santaap ka ho antt
Aye maalik, kar deejiye mujh par aisee kripa beantt.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kripa Beantt (12/29/2024)

December 28, 2024

Om Namaha Shivaya
Aaj Ka Suvichaar 🙏🏻🙏🏻

#2505

                         Ji Huzoori

Prem bhaav ke bin bhakti kee shakti hai adhoori
Shraddha bhaav ke bin bhi bhakti na hogi poori
Bholapann na hua bhakti mein toh Guruji se na mit paayegi duuri
Samarpan ke bhaav se karni hogi Guruji kee ‘ji huzoori.’

Kyunki ye satya hai ki Ve Hain huzoor
Ve Hain divya jyoti ke aise nirmal noor
Jinke spandan se bhakt jaata hai tarr
Prabal tapp se hee milta hai Jinke sparsh ka var.

Mohit hotei Hain Guruji bhaav kee mithaas se
Prasann hotei Hain Guruji bhakt ke paawan prayaas se
Adheen hotey Hain Ve bhaktvatsal Bholenath Apne das ke
Ichchuk rehte Hain Ve har bhakt kee sampannata aur ullaas ke.

Karne se Guruji kee ‘Ji huzoori’
Kumm hoti jaati hai Unse duuri
Har kadam par milti rahe Unkee manzoori
Ye safar kee unnati ke liye hai bahut zaroori.

Isliye Guruji ke charnon mein jhuk kar
Har kaaraj mein Unkee agya ke liye ruk kar
Unkee manzoori dwaara badhne mein kalyaan hai nishchit
Har karma Unhe arpit karne mein hai hitt.

Ye hitt nahin juda hai kewal is janam se hee
Balki iska rishta hai pichhle janmon ke karam se bhi
Aur jabb takk jaari rahega rooh ka safar
Karni hogi Guruji kee agya aur Unke hukm kee kadar.

Shuruaat ho chuki hai aur rakhni hai yatra barkaraar
Jiske liye anivaarya hai bhakti mein prem bhaav
Anivaarya hai Guruji ko prasann rakhne ka chaav
Jabb nirantar hoga is chaav aur bhaav ka Guruji kee oar bahaav
Toh Guruji ke kareeb aate aate mitt jaayegi rooh kee Unse har duuri
Safar hoga mukammal, safal ho jaayegi ‘ji huzoori.’

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ji Huzoori (12/28/2024)

December 26, 2024

Om Namaha Shivaya
Aaj Ka Suvichaar 🙏🏻🙏🏻

#2503

                    Vinamr Anurodh

Mere param poojya Guruvar,

Hai Aapse vinamr anurodh
Aapki goad mein ho atmabodh
Mere mann par rahe sada Aapka shaasan
Mere hriday mein sada ho Aapka aasan
Jis par Aap rahein viraajmaan
Mere param poojya Guruji karunanidhaan.

Mere naynon ko hotey rahein Aapke darshan
Mere haath Aapki sewa mein rahein vyast aur magan
Chitt kee Aapko chetne mein laagi rahe lagan
Kaan karein sada Aapki mahima ka shravan.

Labon par har kshan ho Aapka naam
Paaon pahunchna chaahein buss Aapke dhaam
Rooh seedhi taar se Aapse jud kar paaye Aapke paigaam
Astitva Aap mein kho kar ho jaaye gumnaam.

Yoon Aapki aas mein bahoon
Ki mai mai na rahoon
Aur kahoon toh kya kahoon?
Kaise is vireh mein rahoon?

Aapki meher kee hoon mohtaaj
Bakhsh deejiye aisa milan, mere sartaaj
Ki ye nacheez kabhi na bichhde Aapse
Kyunki meri rooh toh nikhre buss Aapse.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Vinamr Anurodh (12/26/2024)

December 25, 2024

Om Namaha Shivaya
Aaj Ka Suvichaar 🙏🏻🙏🏻

#2502

                     Phir Se Ik Baar

Aao dekhein phir se ik baar
Deewaanon ke sheher ka dwaar
Guruji kee izaazat se karein is sheher mein pravesh
Jahaan sir aankhon par hota hai Guruji ka aadesh.

Guruji ke har hukum par hota hai amal
Poojey jaate hain Guruji ke charan kamal
Guruji kee meharbaani se sabhi ka aisa hai manobal
Ki sabhi ka mann rehta hai sthir, shaant, aur prabal.

Vahee khushboo ruhaani yahaan
Guruji ke adheen sabki zindagaani yahaan
Guruji kee meher se Unhee mein vyast hai har praani yahaan
Unke simran, dhyan, aur satsang mein mastt hai sabki kahaani yahaan.

Jo bhi rehne lagta hai is sheher mein
Vo yoon doob kar tarta hai Guruji kee meher mein
Ki usey Guruji ke naam ke alaawa kuch aur nahin soojhta
Uska jeevan paheli ho toh bhi vo usey nahin boojhta.

Kyunki yahaan kaayda hai samarpan ka
Aur yahaan reet hai shukrana mein rehne kee
Yahaan par hai Guruji ke prati prem bhaav ka nirantar chaav
Sabhi kee arzoo rehti hai iss prem bhaav mein behne kee.

Yahaan har din hai Baisakhi
Yahaan har raat Diwali hai
Yahaan ruhaani rangg se kheli jaati hai holi
Yahaan kee har Shivratri niraali hai.

Baahar beshak ho kalyug
Is sheher mein rehta hai satyug
Har ghar kee dehleez par jalte hain deep subuddhi ke
Vanaspati pashu pakshi bhi phailaate hain paigaam shuddhi ke.

Ye sheher sach mein hai sachkhand
Yahaan basta hai nirmal anand
Har praani ka vishwaas hai akhand
Yahaan sabke bheetar hai Satchittanand.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Phir Se Ik Baar (12/25/2024)

December 24, 2024

Om Namaha Shivaya
Aaj Ka Suvichaar 🙏🏻🙏🏻

#2501

            Deewaanon Ka Sheher

Ye hai deewaanon ka sheher
Yahaan deewaanapan chhaaya rehta hai aathon peher
Sabb Guruji ke deewaane hain
Unkee dhun mein sabb mastaane hain.

Koi sunta hai satsang, koi satsang hai sunaata
Koi kavita hai likhta, koi Guruji ke geet hai gaata
Koi sewa mein din raat hai bitaata
Koi Guruji kee baatein hain bataata.

Kisee ka samaa guzar jaata hai simran mein
Koi Guruji kee chhavi dekhta rehta hai mann mein
Is sheher mein rehne waala koi praani magn ho jaata hai dhyan mein
Yahaan Guruji kee meher se badhauti hoti hai hunar mein aur gyan mein.

Is sheher mein spandan hai ruhaaniyat ka
Is sheher mein spandan hai insaaniyat ka
Yahaan goonjta hai mantra Guruji ke naam ka
Yahaan anand hai har teerath dham ka.

Is sheher mein sabb hain Guruji ke shukrguzaar
Is sheher mein hai bakhshishon kee bahaar
Yahaan Guruji parakhte Hain bhakton kee neeyat
Yahaan Guruji aksar dobaara se likh dete Hain kismat.

Is sheher ke vayumandal mein hai Guruji kee khushboo
Is khushboo se gadd gadd rehti hai har nivaasi kee rooh
Yahaan har raat hai deewaali kee raat
Is sheher kee kuch alagg si hai baat.

Guruji kee agya se hota hai is sheher mein aana jaana
Ek baar jo aa jaaye vo ho jaata hai Guruji ka deewaana
Jo imtehaan dekar bhi rehta hai naam kee shamaa ke liye parwaana
Safal ho jaata hai uska Guruji ke sheher mein aana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Deewaanon Ka Sheher (12/24/2024)

December 23, 2024

Om Namaha Shivaya
Aaj Ka Suvichaar 🙏🏻🙏🏻

#2500

              Guruji Kee Phulavaari

Guruji ke pyaare pyaar mein
Ramti jaati hai sangat saari
Guruji ke poshit phool hain hum sabb
Guruji kee hai ye phulavaari.

Apni ruhaani khushboo se
Guruji mehekaate Hain phulavaari ko
Har phool ko dein Ve Apni mamta komal
Jiska maadhurya khilaata hai phulavaari saari ko.

Phulavaari mein titaliyaan mandaraati hain
Guruji kee khushboo se khush ho jaati hain
Khushboo se mehek kar dolti hain hawaayein
Akash mein tehelte baadal yahaan naman mein jhuk jaayein.

Yahaan har tareh ke phool khiley hain
Phulavaari mein ik dooje se miley hain
Lekin har phool kee Guruji se judi hai seedhi taar
Aur har phool ko Guruji rahe Hain taar.

Har phool kee zaroor aati hai baari
Guru kripa se khilee rehti hai phulavaari
Phoolon ke rangg beshak hon bhinn bhinn
Parantu Guruji ke liye sabhi hain abhinn
Guruji har phool ko dete Hain ek sa dulaar
Poori phulavaari ka Ve karte Hain uddhaar.

Guruji kee phulavaari mein har phool ka jeevan ho vyateet
Guruji ko prasann karne mein hee har phool kee zindagi jaaye beet
Har phool kee har pankhudi pulakit rahe Guruji ke ashirwaad se
Saari phulavaari tarti rahe paawan Guru prasad se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Phulavaari (12/23/2024)

December 22, 2024

Om Namaha Shivaya
Aaj Ka Suvichaar 🙏🏻🙏🏻

#2499

               Chhip Gaya Chaand 

Chhip gaya chaand
Chhip gaye taare saare ke saare
Baadalon ke peechhe
Sabhi praani so gaye
Aasmaan ke neeche.

Par Guruji na chhipe, na soye ek bhi pal
Unkee dee suraksha hai sanaatan aur atal
Bhakt chayyn kee neend soyein
Bhakt raaste par chalte huey na khoyein
Isliye bhakton par sada Guruji ka pehra rehta hai
Bhakton par Guruji ka ashish sada amrit ke roop mein behta hai.

Ye chand, ye baadal, aur taare
Guruji ke niyantran mein hain saare
Ye toh sajde mein khud jhukte hain
Guruji ke hukm se chalte aur rukte hain.

Beshak hon chand ya taare
Ya phir aasmaan ya baadal banein sahaare
Chalte huey musaafir ke liye
Ye sabb bhi apni doar Guruji ko deeye
Baney huey hain sewadaar
Aakar pyaare Guruji ke dwaar.

Koi sewa nahin badi ya chhoti
Sewa Guru kripa se hai hoti
Simran kee jugalbandi sewak ke paapon ko dhoti
Sewak kee sudh-budh Guruji mein khoti.

Sewa Guruji kee dee bakhshish hai
Jismein bhakt ke liye ashish hai
Guruji kee kripa bin sewa milnee nahin mumkin
Arzi hai ki Guruji sewa bakhshein raat aur din.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Chhip Gaya Chaand (12/22/2024)