Abb Bhi Nahin Sunega….. (12/04/2024)

December 4, 2024

Om Namaha Shivaya
Aaj Ka Suvichaar 🙏🏻🙏🏻

#2481

               Abb Bhi Nahin Sunega…..

Abb bhi nahin sunega antaratma kee awaaz
Toh kab sunega, pyaare
Sunn-ne kee koshish toh kar
Guruji kar denge tere vaare nyaare.

Guruji ko teri koshish par hoga naaz
Guruji ko teri neeyat par hoga naaz
Tujhe jagaayegi teri antaratma kee awaaz
Chod dega tu rehna pareshaan aur udaas.

Kyunki vo awaaz jo bheetar se aayegi
Vo tujhe Guruji kee divyata ka bodh karaayegi
Vo tujhe yathaarth bataayegi
Vo tujhe raasta dikhaayegi.

Kyunki vo awaaz hogi swayam Guruji kee
Jo hogi aisee ruhaani
Ki sanvar jaayegi tere har janam kee zindagaani
Sunn kar Guruji kee veh baani.

Guruji kee awaaz, Guruji kee baani
Teri rooh ko legi chhoo
Guruji kee khushboo
Atmasaat kar legi teri rooh.

Teri rooh bheeg jaayegi Guruji ke noor mein is kadar
Ki ek hee akhand jyot bheetar aayegi nazar
Nishchit hai Guruji kee meher ka asar
Tu apni oar se koshish toh kar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Abb Bhi Nahin Sunega….. (12/04/2024)