Month: February 2025

February 28, 2025

Om Namaha Shivaya
Aaj Ka Suvichaar 🙏🏻🙏🏻

#2567

               Bheetar Ka Ujiyaara

Jabb bheetar chhaaya ho andhiyaara
Jabb jeevan kee naiya ko na dikhey kinaara
Toh Guruji par bharosa banta hai ekmaatra sahaara
Kyunki yahee naam dikhaata hai bheetar ka ujiyaara.

Baahar ka ujiyaara hai maya
Bheetar ka ujiyaara hai gyan
Vo gyan, jo Guruji ke kareeb laata hai
Vo gyan, jo baahar dhoondhne se nahin aata hai.

Baahar ka ujiyaara hai asthaayi aur seemit bhi
Kintu sthaayi aur anant hai ujiyaara bheetar ka
Phir bhi baahari ujiyaara yoon kheenchta hai apni oar
Ki hum bhool jaate hain karna apne bheetar gaur.

Hamein sachet rakhta hai Guruji ka chintan
Taaki asal ujiyaare kee oar dhyan de antakaran
Aur bheetar rahe yoon roshan
Ki ujiyaara hee ujiyaara ho har kshan
Phir baahar andhiyaara bhi ho toh bhakt rahe beparwaah
Bheetar ka ujiyaara roshan karey uskee raah.

Isee se miley asal gyan
Isee ke dwaara ho kalyaan
Guruji kee meher se
Guruji kee nadar se.

Varna toh kitne aaye aur chale gaye
Baahari ujiyaare se mohit hokar
Usee mein apna vivek khokar
Anek aur janam lene ka beej bokar.

Bharose ke bin sab vyarth hai
Bharose se hee is safar ka arth hai
Guruji par bharosa rakhne waalon ko Awashya dikhta hai bheetar ujiyaara
Der beshak ho dikhne mein
Parantu dikhta hai ujiyaara bahut hee nyaara.

Isliye bharosa rakhte chalo
Koshish tum karte chalo
Guruji ne sambhaalna hai baaki sabb
Tum ye jaan aur maan lo abb
Ujiyaara nahin hai tumse kaheen duur
Tumhe dikh bhi jaayega zaroor
Guruji par tum dhyan dharo
Dekho, abb aur vilamb tum na karo
Bahut hua maya main phansna
Bahut hua daldal mein dhansna
Abb aur nahin, abb mann ke nayn kholo
Pashchaataap ke aansuon se unhe dho lo
Duur honei lagega agyan saara
Dikhne lagega tumhe bheetar ka ujiyaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bheetar Ka Ujiyaara (02/28/2025)

February 27, 2025

Om Namaha Shivaya
Aaj Ka Suvichaar 🙏🏻🙏🏻

#2566

   Aapse Itnee Meethi Mamta Milee

Param poojya Guruji Maharaj,
Aap sartaajon ke sartaaj,

Aapse itnee meethi mamta milee
Ki mann kee murjhaayee kali khilee
Mila Aapse itna dulaar
Ki sambhal gaya mera ghar parivaar
Kyunki jisey Aap mata pita ke roop mein mil jaayein
Sulajh jaati hain Uske ghar parivaar kee saari duvidhaayein.

Kahaan se karoon shuru
Kahaan par karoon khatam
Karna Aapka shukrana, mere pita param
Mere Guruvar, murshid mere
Beshak lene padein janmon ke phere
Rakhna har janam mein mujhe Apni sharan mein
Taaki Aapki kripa miltee rahe har janam mein
Jitnee baar bhi aana jaana lagaa rahe janam aur maran mein
Jageh dete rahiyega Apne kamal charan mein.

Bakhshte rahiyega satsang kee ghadiyan
Ve hoti hai Shivmayi layy kee ladiyan
Jinse judti hain kadiyan
Ruhaani safar kee.

Bakhshte rahiyega sewa aur simran
Jinse sanvarta hai mere jeevan ka har kshan
Aap Bhagwaan, mujhe banaa deejiye aisa insaan
Ki mai sansaar ko behtar banaane mein de paaoon apna yogdaan.

Aapki rehmat hai toh sab kuch hai
Varna sab hotey huey bhi hoon gareeb
Changa rahega mera naseeb
Jo Aap rakhenge mujhe Apne kareeb.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapse Itnee Meethi Mamta Milee (02/27/2025)

February 26, 2025

Om Namaha Shivaya
Aaj Ka Suvichaar 🙏🏻🙏🏻

#2565

Aayi MahaDev Kee Raat

Aayi MahaDev kee raat
Kar lo MahaDev se baat
Ye raat hai Unkee dee saugat
Kar lo Unkee yaad ka paath.

Guruji MahaDev ka roop Hain pyaara
Guruji Hain sangat ka sahaara
Jisne Unkee yaad mein is raat ko guzaara
Vo haalaat se kyun kabhi haara?

Kaheen satsang Guruji ka raha hai ho
Sangat Unke prem ras mein rahi hai kho
Kaheen paath ho raha hai Shiv Puran ka
Kaheen suna jaa raha bakhaan Guruji ke gungaan ka.

Koi juda hua hai Guruji se Gurbani ke dwaara
Koi Shivji ke anekon naam mein dhoondhe sahaara
Ati paawan ye tyohaar hai
Shiv mahima se goonj raha sansaar hai.

Koi bhakt gaaye Shiv aur Guruji ke geet aur bhajan
Sabhi apne bhaav anusaar karein Guruji ka vandan
Guruji ke pyaar mein hon rahe hain nritya
Guruji hee Shiv Hain, Guruji hee Hain satya.

Andhere kee badli bhaag rahi hai
Bheetar kee chetna jaag rahi hai
Asha kee jyot ho rahi hai ujjwal
Nishchay hee behtar hoga aane wala kal.

Guruji kee kripa banee rahe sabhi par
Unkee agya se sangat aati rahe Unke dar par
Sabhi ko jaagriti aati rahe aur sabhi ka janam maran jaaye sudhar
Mahashivratri kee sabhi ko shubhkaamnaayein, sabhi par banee rahe Guruji kee nadar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 25, 2025

Om Namaha Shivaya
Aaj Ka Suvichaar 🙏🏻🙏🏻

2564

      Unke Naam Ke Jahaaz Mein

Guruji thei Guruji Hain
Guruji sada hee rahenge
Apne bhakton se unke bhale kee baat kahenge
Apni sangat ke liye Ve kasht sahenge.

Ye ruhaani naata hai
Yahaan bhakt sab kuch paata hai
Apne ko khokar
Paapon ko dhokar
Sarvsamarpan mein
Guruji kee sharan mein.

Guruji ke charnon mein vo amrit hai
Jismein dhul jaate hain saare vish
Guruji ke satsang mein veh shakti hai
Jo badhaati hai Unke kareeb aane kee kashish.

Guruji mahaprataapi Hain
Hain Ve saari sangat par meharbaan
Sangat ko taarne ke liye
Aksar lete Hain Ve imtehaan
Raasta bhi Ve khud hee banaate Hain
Sangat ko disha dikhaate Hain
Shubhchintak Hain Ve hamaare
Guruji Maharaj pyaare.

Guruji ko paane kee ho jo abhilaasha
Toh seekhni hogi prem bhaav kee bhaasha
Jis se oorjit hogi asha
Unhe paa paane kee
Unkee bhakti mein ramm jaane kee.

Ye hai aisa safar
Jo agar Unkee sharan mein jaayega guzar
Toh hota rahega Guruji ke ashirwaad ka asar
Guruji taarne mein na chodein koi kasar
Baaki bhakt par karey nirbhar.

Sangat khushnaseeb hai paakar Guruji ka pyaar
Jisey abhi takk mauka nahin mila, Ve usey bhi bulaayein Apne dwaar
Unkee kripa se tarr jaaye, sudhar jaaye saara sansaar
Unke naam ke jahaaz mein sab kar lein bhavsaagar ko paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unke Naam Ke Jahaaz Mein (02/25/2025)

February 24, 2025

Om Namaha Shivaya
Aaj Ka Suvichaar 🙏🏻🙏🏻

#2563

        Guruji Kee Yaad Mein Raho

Guruji kee yaad mein raho
Guruji kee baatein suno aur kaho
Na bhoolo ki Ve Hain angg sangg
Toh jeevan kee gati mein hoga aisa anokhapann
Ki shukrana mein aane lagega mann
Chaahe hon sukh ke ya dukh ke kshan.

Aur jitna shukrana karte rahoge
Guruji ke prem mein jitna bahoge
Shant aur sthir hota jaayega mann
Chaahe mushkilein bhi jhel raha ho jeevan.

Guruji kee baatein, Guruji ke geet
Guruji ka shukrana, Guruji se preet
Inse khilee rahegi raah
Toh laut aayega agar kho bhi gaya thaa utsaah
Jald ya dheere dheere ye ho
Guruji hee jaanein vo
Bhakti ka beej jisne diya bo
Toh vo beej yoon hee nahin jaayega kho
Vo upjega awashya
Aur sudhaarega bhavishya.

Guruji se prem hee bhakti hai
Bhakti mein bharpoor shakti hai
Jo dete Hain Guruji swayam
Aur Ve sudhaarte Hain karam.

Jaise jaise sudharte jaayenge karam
Behtar hota jaayega jeevan
Saubhagya se milee hai Guruji kee sharan
Sanvar jaayega janam maran.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Yaad Mein Raho (02/24/2025)

February 23, 2025

Om Namaha Shivaya
Aaj Ka Suvichaar 🙏🏻🙏🏻

#2562

    Nahin Bann-na Hai Kuch Khaas

Param poojya pita mere,
Mere pyaare Guruji Maharaj,

Nahin bann-na hai kuch khaas
Buss, bann kar rehna hai Aapka das
Aapke charnon ke taley mil jaaye chhoti si jageh
Vaheen ho mera ashiyaana, vaheen ho mera thikaana.

Mujh mein na hai aisee kaabiliyat
Buss, hai ye meri tamanna aur meri neeyat
Aap toh mere bheetar aur baahar kee jaante Hain
Aap jaanein meri raahon mein kahaan phool kahaan kaante hain.

Jaanti hoon mujhe apni taraf se chalna hai hokar sachet
Ye bhi jaanti hoon ki Aapki mujh par nazar hai
Isliye befikr bhi hoon, beparwaah si bhi
Kshama kar dena, Prabhu, galati ho jaaye jabb kabhi.

Mai beshak hoon gustaakhiyon ka bhandaar
Lekin Aap Hain dayaavaan kirpadhaar
Apni chaukhat par Aapne bulaaya hai
Aapki agya se mainey sir ko jhukaaya hai
Mujhe Apne charnon mein diya hai Aapne sthaan
Aapki karuna anant hai, mere maalik meharbaan.

Yahaan par aakar jo mila hai mujhe
Mai shabdon mein bayaan nahin kar sakti
Aapki prashansa, Aapki mahima ka gungaan
Mai din raat karte nahin thakti.

Arzi hai Aapse ki saari sangat ka karte rahein Aap kalyaan
Nayi bhor laaye naya ujaala sabke mann mein aur jeevan mein
Aap sarvavyaapi Hain, bheetar bhi, jal thal mein bhi, aur gagan mein
Mera sir sada Aapke charnon mein jhuka rahe vinamr vandan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Nahin Bann-na Hai Kuch Khaas (02/23/2025)

February 22, 2025

Om Namaha Shivaya
Aaj Ka Suvichaar 🙏🏻🙏🏻

#2561

Aapki Meher Se Mai Kabhi Na Bhooloon

Kaun nindak, kaun shubhchintak
Kya apmaan, kya sammaan
Jabb angg sangg hon Guruji meharbaan
Toh phir kyun aisee baaton se hona pareshaan?

Kya khushi, kya gumm
Kyun kabhi ho aankh numm
Jabb Guruji angg sangg hon har kshan
Phir kyun asthir ho mann?

Guruji se judkar bhi
Kyun hota hai aisa
Guruji jaisa chaahein
Shaayad bhakt kar nahin paata vaisa?

Guruji kee inaayat mein kamee ho nahin sakti
Ve toh param pita Paramatama Hain sansaar ke
Kamee bhakt aur bhakti mein hoti hai yakeenan
Isliye prayaas karte rehne hongei khud mein hee sudhaar ke.

Guruji, doojon ko toh mai kya kahoon
Mai toh apna hee keh sakti hoon
Galatiyon kee ik putli hoon mai
Jo Aapke bina nahin reh sakti hoon.

Maanti hoon ki meri bhakti mein hain khaamiyan anginat
Jaanti hoon ki Aap sada hee bakhshte Hain sumat
Par ye moh maya mein matvala mann rehta hai sataata
Lakh koshishein karti hoon par ye khali nahin ho paata.

Yakeenan meri bhakti mein nahin hai paryaapt kashish
Ya phir vishwaas mein hai kamee
Shaayad shraddha kumm padd jaati hai
Beshak hoti ho aankhon mein namee?

Beshak jeevan mein mushkilein aayi hain baar baar
Phir bhi badhta gaya hai har din Aapke liye pyaar
Ye hai Aapki daya aur Aapki vadiyaayee
Ye hai Aapke ashirwaad kee gehraayee
Varna mai toh gayi hoti himmat haar
Aur shukrana na kar paati aakar Aapke dwaar.

Lekin Aapne sada aisee mamta barsaayee hai
Hamesha aisee karuna dikhaayee hai
Har pal aisee nayi seekh sikhaayee hai
Ki ye nacheez Aapka shukr karti aayi hai.

Buss, karti rahoon Aapka shukrana
Aapke shukrane mein rahe mera har shwaas deewaana
Mujhe Aapka dar chodkar kaheen aur nahin hai jaana
Guruvar mere, Aapki meher se mai kabhi na bhooloon Aapse wafa nibhaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Meher Se Mai Kabhi Na Bhooloon (02/22/2025)

February 21, 2025

Om Namaha Shivaya
Aaj Ka Suvichaar 🙏🏻🙏🏻

#2560

         Nav-Nirmaan 

Parivartan toh hota aaya kabb se
Hukm paakar uss Rabb se
Jo Guruji ke roop mein aaye lekar Shivji ke avatar ka sthaan
Karne sangat ko tayyaar jabb pratyaksh ho nav-nirmaan.

Aa raha hai vela nav-nirmaan ka
Dhyan na chodna Bhagwaan ka
Bhakti mein apaar shakti hai
Yahee maansik santulan kee yukti hai.

Bhakti mein ooncha prem bhaav ka sthaan
Jis se prasann hon Guruji meharbaan
Unkee rehmat se mitey agyan
Jiske dwaara sehej ho paaye nav-nirmaan.

Jabb hona ho nav-nirmaan
Puraani imaarat ka khandan aksar zaroori ho jaata hai
Pooran Guru ke ashish se pade jabb neev nirmal gyan kee
Toh nishchay hee nayi imaarat ka wajood shuru ho jaata hai.

Guruji ka ashish barasta rahega
Toh imaarat ka wajood tufaan ko bhi sahega
Aur jabb thamm jaayega tufaan
Aur khatm ho jaayenge imtehaan
Toh naya mukaam laayega ye nav-nirmaan
Saamanjasya se paripoorna hoga bheetar aur baahar ka jahaan.

Zara sochiye, kitnee sakaaratmakta hogi bheetar aur aas-paas
Sabb chaynn se le paayenge gehra shwaas
Nav-nirmaan ka vela abb duur nahin, balki aata jaa raha hai paas
Kyun na uske aagaman ke liye badhaayein insaaniyat nibhaane ka prayaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Nav-Nirmaan (02/21/2025)

February 20, 2025

Om Namaha Shivaya
Aaj Ka Suvichaar 🙏🏻🙏🏻

#2559

                        Meri Pakad

Meri pakad kamzor Guruji
Meri pakad badi kamzor
Aap thaam leejiye mujhe yoon
Ki mera dhyan na jaaye kaheen aur.

Aapki pakad pakki badi
Mai Aapke sahaare hoon khadi
Baavajood har tufaan ke
Sabb sadke Aapke daya daan ke.

Aapki pakad mein rahoongi surakshit
Aapki pakad mein hai mera hitt
Aapki pakad mein Aapko yoon chete mera chitt
Ki Aapki pakad mein meri ‘mai’ jaaye mitt.

Aapki pakad mein aisee panaah paaoon
Ki Aapki pakad mein samaa jaaoon
Jaise saagar mein boond samaaye
Aur uska astitva hee khatm ho jaaye
Bannkar saagar ka hissa
Chale uss boond ke jeevan ka kissa
Saagar ke aanchal mein vo rehti rahe
Saagar kee leheron ke sangg vo behti rahe
Saagar ko Apna daata vo kehti rahe
Saagar kee suraksha mein tufaan ko bhi sehti rahe.

Saagar hee saagar ho har oar
Toh tufaan agar boond ko le bhi jaaye kaheen aur
Toh saagar ka atoot hissa vo banee rahegi
Beparvaah, khud ko kho kar
Apni mayl saagar mein dho kar.

Vaise bhi meri khud kee nahin hai koi aukat
Mera toh har shwaas hai Aapki dee hui saugat
Dete rahiyega mujhe sada ke liye
Apni prataapi pakad kee panaah
Mai apni ‘mai’ ko khokar
Aap mein samaaoon hokar beparvaah.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Meri Pakad (02/20/2025)

February 19, 2025

Om Namaha Shivaya
Aaj Ka Suvichaar 🙏🏻🙏🏻

#2558

        Guruji Ka Vaas

Tere bheetar hai Guruji ka vaas
Isliye tu bilkul bhi na ho udaas
Ve Hain tere itne paas
Ki jo tu ekaagr hokar karega prayaas
Toh Unhe mehsoos kar paayega tera har shwaas
Aur phir tu na rahega udaas.

Isliye karna hoga prayatn ekaagr rehne ka
Sab kuch aas paas hotey huey bhi Guruji ke bhaav mein behne ka
Guruji ne dee hai simran aur sewa kee bakhshish
Usey saadharan matt samajh lena
Sewa ke dauran bhi karna Guruji ka manan
Ve utne hee paas lagenge jitna hoga tere dwaara Unka chintan.

Rehna Guruji kee yaad mein tu har pal
Toh Unke saanidhya mein beetega tera aaj aur kal
Aur jaise jaise jhaankega tu apne girebaan mein
Vaise vaise jaanega apne dosh
Kayi se tu hai itna anjaan
Ki unhe jaan kar udd jaayenge tere hosh!
P
Lekin Guruji kee meher laayegi rangg
Kyunki Ve toh sada Hain angg sangg
Kshamaasheel Hain Ve, karenge tujhe maaf
Tera antas Unkee kripa aur teri koshish se hota jaayega saaf
Aur bhi anandmayi hota jaayega Guruji kee maujoodagi ka ehsaas
Tujhe bodh hoga ki Guruji sada hotey Hain tere bheetar aur aas paas.

Isliye tu bilkul udaas na ho
Buss, tu Guruji mein jaa kho
Jiske angg sangg hon Guruji swayam
Nishchay hee sanvarta hai uska jeevan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ka Vaas (02/19/2025)