Month: February 2025

February 18, 2025

Om Namaha Shivaya
Aaj Ka Suvichaar 🙏🏻🙏🏻

#2557

         Dho Le Mann Kee Aankhein

Dho le mann kee aankhein
Guruji kee kripa ke amrit se
Varna aankhon mein padi ahankar kee dhool
Tujhe duur rakhegi tere hitt se.

Ahankar kee dhool hai badi maheen
Lekin dekhne kee shakti ko kar deti hai ksheen
Na baahar kee asaliyat saaf dikhti hai na hee bheetar kee
Raahein lambi lagne lagti hain Guruji Maharaj ke dar kee.

Jabb takk aankhon mein padi hai ye dhool
Tabb takk aur bhi aasaan hai honi koi bhool
Kyunki yaad hee nahin rehta hai yathaarth ka mool
Praathamikta paane lagte hain mann mein vichaar fizool.

Jahaan ahankar ho, vahaan neevanpann nahin
Aur neevanpann nahin, toh ruhaani chadhaayi na hogi sahi
Ruhaani oonchaayee par pahunchne ke liye khud jhukna hai anivaarya
Jo ho nahin sakta agar ahankar se kiya jaayega kaarya.

Sewa, simran, satsang kee daat
Dete Hain Guruvar nath
Inke sarovar ka amrit hai Guruji kee kripa se paripoorna
Yatna kar le, honei de pavitrikaran, kalyaan honei de sampoorna.

Dhool hatt jaayegi toh sab saaf aayega nazar
Ahankar ka aakraman ruk jaayega toh pavitrikaran ka hoga behtar asar
Guruji toh aaye Hain karne kalyaan
Mann kee aankhon se keh de, na banein ve aur naadaan.

Pukaar raha hai tujhe swachh aasmaan
Ahankar kee dhool ko lene de vidaayi kee udaan
Guruji Maharaj Hain deendayal karunanidhaan
Tu koshish toh kar, Ve teri koshish ko denge safal anjaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dho Le Mann Kee Aankhein (02/18/2025)

February 17, 2025

Om Namaha Shivaya
Aaj Ka Suvichaar 🙏🏻🙏🏻

#2556

                       O Hakeekat

O hakeekat, tujhe kaun sakaa hai samajh
Kitne jann paheliyon mein jaate hain ulajh
Aur pehchaan nahin paate mithya se duur ka veh noor
Jismein basaa hai yathaarth aur gyan goodh.

Mithya ko satya lena maan
Aisee pravritti paal leta hai insaan
Aur asliyat ko nahin sakta jaan
Phir vo hota hai pareshaan.

Kaisi ajab hai ye vidambanaa
Ki paraaye ko vo leta hai apna banaa
Aur apne ko jaata hai bhool
Phir usey chubhta hai dhokhe ka shool.

Koi koi toh phir jaag jaata hai
Mithya kee gehri neend se
Koi sota reh jaata hai
Bheetar kee aankhein moond ke.

Guruji se judaav hai bada laabhkaari
Is se hoti rehti hai saath saath tayyaari
Asaliyat ko pehchaan paane kee
Bhog bhogte huey aagey badhte jaane kee.

Na koi vehem, na karmakand, na andhvishwaas
Guruji kee sharan mein Unke liye bhaav kee pyaas
Zaroorat nahin jaane kee idhar udhar kaheen aur
Buss, Guruji sangg apne seedhe rishte par dena hai zor
Swayam sudhaar par karna hai gaur
Badhte huey Guruji kee oar.

Bhakt ke ek kadam Unkee oar badhne par
Guruji bhakt kee oar badhaayein kadam anek
Bhakt apna bhoot bhavishya na jaane
Parantu Guruji sabb lete Hain dekh.

O hakeekat, ye tathya tera
Ki mere angg sangg hai Guru mera
Ye tathya karta hai mujhe aashwast har kshan
Aur Unkee suraksha mein beet jaata hai jeevan.

Tu jo bhi paheliyan laaye saamne
Guruji sada aate Hain mera haath thaamne
Teri galiyon mein se guzarte huey, o hakeekat
Mujh par barasti rehti hai Guruji kee inaayat
Ve prerna strot Hain mere har prayaas ka
Ve hee Hain sampoorna sahaara mere har shwaas ka.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

O Hakeekat (02/17/2025)

February 16, 2025

Om Namaha Shivaya
Aaj Ka Suvichaar 🙏🏻🙏🏻

#2555

    Sukh Dukh Ka Hai Kaisa Sapna 

Sukh dukh ka hai kaisa sapna
Na sukh, na hee dukh shaayad rahega apna
Pichhle punya aur paap ke hain ye parinaam
Guruji kripa karein ki inhe jhelna ho jaaye aasaan.

Kabhi ye hansaate kabhi ye rulaate
Ye toh rahenge yoon hee aate jaate
Jeevan ajab sa rangg manch hai
Yahaan maya ka prataapi prapanch hai.

Sthaayi nahin ye sabb
Sthaayi hai toh kewal Rabb
Guruji ke roop mein aaye Ve
Sangat ko itne bhaaye Ve
Ki sangat hui Unkee deewaani
Paakar Unkee meharbaani.

Bhautikvaad se kaheen zyada
Guruji kee meharbaani hai ruhaani
Kyunki bhautik padaarthon ke aadhaar par beet toh jaati hai zindagaani
Par uddhaar mumkin nahin hota hai bin ruhaani meharbaani.

Guruji maya pati hotey huey bhi maya se Hain alag
Leela hai ye Unkee ki maya se chalta hai ye jagg
Yahee insaan ka imtehaan hai
Ki veh kis hadd takk maya ka gulam hai.

Guruji kee kripa se he mil paaye safalta imtehaan mein
Varna toh bhakt raasta bhatak hee jaaye duniyavi tufaan mein
Is tufaan mein beshak mitt jaaye sabb
Kintu hamesha sthaayi rahenge Rabb.

Aur Guruji Hain Rabb swayam
Unhee ko arpit kar har karam
Beet jaaye jo ye janam
Toh kalyaan kee oar badhte rahenge kadam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sukh Dukh Ka Hai Kaisa Sapna (02/16/2025)

February 15, 2025

Om Namaha Shivaya
Aaj Ka Suvichaar 🙏🏻🙏🏻

#2554

         Mann Ka Koi Aakaar Nahin

Mann ka koi aakaar nahin
Na roka jaaye usey toh usey apni marzi lagti hai sahi
Manmaani mein hokar leen
Insaan hota jaata hai ksheen.

Mann hee meet, mann hee dushman
Mann se nark ya swarg baney jeevan
Mann mein vann hai, mann mein hee upvan
Mann mein upjein kaante, mann mein hee khilein suman.

Saari baat hai mann kee
Maansik avastha aur vandan kee
Gehraayee Guruji sangg bandhan kee
Bholi bhavna hai ya nahin mann kee.

Mann mein vikaar na karein vihaar
Mann mein shuddh vichaar aur sanskaar
Mann par anushaasan baarambaar
Toh mann ka sudharta rahe vyavhaar.

Jabb mann par Guruji kee chhavi chhaaye
Jabb mann poori tareh se Guruji mein leen ho jaaye
Mann nirantar gaaye ‘Om Namaha Shivaay’
Mann Guruji ke kareeb hota jaaye.

Na koi dikhaawa, na hee koi shor
Buss, har pal khichhaav Guruji kee oar
Mann mein aathon peher prem bhaav kee bhor
Chaahe chal raha ho jaisa bhi duniyaavi daur.

Guruji kee meher se mann mein nirantar simran
Guruji kee kripa se mann ne tyaag diya ho har bhram
Mann mein goonjte rahein Guruji ke vachan
Mann se hota rahe Guruji ka stavan.

Mann ka jo sudhar jaaye vyavhaar
Toh sanvar jaaye bheetar ka sansaar
Guruji ka ashirwaad sakta hai taar
Apni oar se koshish rahe har pal, har vaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mann Ka Koi Aakaar Nahin (02/15/2025)

February 14, 2025

Om Namaha Shivaya
Aaj Ka Suvichaar 🙏🏻🙏🏻

#2553

                     Aapka Pyaar

Param pita Paramatama, Guruji Maharaj,

Khushnaseebon se bhi zyada khushnaseeb hoon mai
Paakar Aapka pyaar
Bahut mushkil thi ghadiyan intazaar kee
Shukr Aapka ki milee bakhshish Aapke aseem pyaar kee.

Aapke pyaar ke mahasaagar mein doobkar tarti jaaoon
Aapke pyaar roopi ashirwaad ke amrit se antas ko bharti hoon
Aapke pyaar ko paane mein apne aap ko kho doon
Aapke pyaar mein hee muskuraaoon, Aapke pyaar mein hee ro doon.

Aapka pyaar milta rahega
Toh bhakti ka phool khilta rahega
Aapke pyaar mein beetega jo har pal
Toh is pyaar se paawan rahega mera aaj aur kal.

Aapki inaayat se Aapse pyaar hua thaa pehli nazar mein
Aisa poshan thaa Aapke pyaar ke asar mein
Ki meri rooh par hua vo prataapi prabhaav
Jis se nikharta gaya prem bhaav.

Karna chaahti hoon Aapse har pal aur bhi zyaada pyaar
Kintu reh jaati hai koi na koi kamee
Tarasti hoon ki hota rahe Aapka deedar
Nahin hota toh aksar aati hai aankhon mein namee.

Phir jhaankti hoon apne girebaan mein
Toh dikhti hain kamzoriyan kayi hazaar
Aane lagta hai samajh phir mujhe
Ki abhi bharpoor se bahut duur hai mera pyaar.

Aapki daya mere pyaar kee koshish ko bakhshti rahe vo kashish
Ki nirantar badhe mera prayaas
Jo bhi vikarshan hon aas paas
Mujhe unmein se koi bhi na aaye raas.

Arzi hai ye Aapse, mere Guruvar pyaare
Ki beshak mai aur mera pyaar hon tuchh
Aapki mahaanta inhe sweekaare
Aur Aapka pyaar inhe nikhaare
Aapke pyaar ke sahaare Aap mein apni manzil paaye meri rooh
Abb toh iske siwa na rahe mujh daasi kee koi bhi aur arzoo.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapka Pyaar (02/14/2025)

February 13, 2025

Om Namaha Shivaya
Aaj Ka Suvichaar 🙏🏻🙏🏻

#2552

                 Aap Hain Rakshak

Param poojya Guruvar mere,

Mai buddhiheen
Agyani aur deen
Aap deendayal
Sada rakhte Hain khayaal
Chhoti se chhoti baat ka
Har bakhshish, har daat ka.

Aapse kuch nahin hai chhipa
Nirantar hoti hai Aapki kripa
Mai jaan na paaoon toh dosh mera hai
Mal, karma, aur maya ke paash ne mere mann ko ghera hai.

Aap hee Hain mayapati
Aap hee Hain pashupati
Aap hee de sakte Hain sadgati
Meri toh chalti nahin mati.

Aapke charnodak se mann kee mayl dhul jaaye
Aapki vadiyaayee ke vajr se har paash khul jaaye
Toh asal maainey mein honei lagoongi swachh
Bhavishya mein kasht-klesh se jaaoongi bach.

Aapke saath ke sangg utaar chadhaav sahoon
Har kadam par Aapka shukrana ada karti rahoon
Karoon mai jo bhi kaarya
Aapki bakhshish sada hai anivaarya
Aap Hain daata, meri jholi ko daat ke kaabil banaa deejiye
Aap Hain rakshak, Apne aanchal mein mujhe panaah deejiye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aap Hain Rakshak (02/13/2025)

February 10, 2025

Om Namaha Shivaya
Aaj Ka Suvichaar 🙏🏻🙏🏻

#2549

         Pareshaan Na Ho, Aye Dil

Pareshaan na ho, aye dil
Beshak sachchi na lagey hai ye mehfil
Yaad rakh sabse mahatvapoorna tathya
Ki tere bheetar aur angg sangg hai satya
Roop mein Guruji Maharaj kee divyata ke
Roop mein Unkee akhandata ke.

Spasht hai iska matlab
Ki asthaayi hai baaki sabb
Phir vo beshak ho koi rishta jo lagey sabse kareebi
Ya phir vo ho pasand-napasand ya ameeri-gareebi.

Apne ahankar ko na rokne de
Tujhe is sachchaayee ko sweekaarne se
Ahankar ko shanti kee sheetal shaiya par sonei de
Is sachchaayee ke samaksh haar maan ke.

Is haar mein basee hogi jeet
Kyunki ismein atmasaat hogi Guruji sangg preet
Ahankar hoga duur
Toh chhaayega neevenpann ka noor
Aye dil, Guruji se mitne lagegi har duuri
Teri har ruhaani chaahat aur zaroorat hoti chalegi poori.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Pareshaan Na Ho, Aye Dil (02/10/2025)

February 9, 2025

Om Namaha Shivaya
Aaj Ka Suvichaar 🙏🏻🙏🏻

#2548

  Jaayega Tu Jahaan Jahaan

Jaayega tu jahaan jahaan
Guruji angg sangg hongei vahaan
Na ye zameen na ye aasmaan
Aa sakta hai darmiyaan
Guruji aur tere beech kabhi bhi
Is satya ke sangg tu jee.

Ye toh seedha jod hai
Bina kisee dalaal
Tere mann mein rahega jitna Guruji ka khayaal
Utna hee sukoon paane lagenge tere sawaal.

Ye beshak na ho usee samay
Par hoga zaroor, ismein nahin hai sanshay
Jawaab na bhi paaye tera koi sawaal
Toh bhi Guruji kee yaad banegi teri dhaal
Jo bachaayegi tujhe honei se behaal
Aur tere kitne kasht degi ye taal.

Zindagi kee bhaag daud aur chhaaon dhoop mein
Guruji prerna aur chetna ke roop mein
Tera saath nibhaayenge
Tujhe chod kar Ve kaheen nahin jaayenge
Guruji ka hriday hai bahut vishaal
Tu Unkee suraksha mein rahega khush-haal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jaayega Tu Jahaan Jahaan (02/09/2025)