Month: March 2025

March 30, 2025

Om Namaha Shivaya
Aaj Ka Suvichaar 🙏🏻🙏🏻

#2597

            Guruji Ke Hee Sahaare

Sangat toh Guruji ke hee sahaare
Pahunch paayi Unke dwaare
Jinke bhaagya thei bade bichaare
Khil kar ho gaye ve abb nyaare.

Guruji Hain Bholenath Bhagwaan
Unhonei banaaya sangat ko Apni santaan
Ye hai itnee aseem daya ka daan
Jiska namumkin sa hai karna bakhaan.

Guruji kee har sangat hai anugrahit
Ve karein har bhakt ka hit
Chete Unko jiska bhi chitt
Uske avgunn jaate hain mitt.

Kyunki Guruji kee prerna se jaagti hai chetna
Guruji kee kripa mein hai anukampa aur samvedana
Adbhut hain Unke tareeke kalyaan karne ke
Anokhe hain Unke dhangg jholiyan bharne ke.

Guruji kee mauj mein aane kee hai der
Maaf ho jaata hai karmon ka hayr-pher
Koi bhakt nahin rehta Guruji kee rehmat se vanchit
Isliye kisee bhi vajeh se na honei dena apne vishwaas ko khandit.

Kyunki jiska hai Guruji ke kamal charnon mein basera
Uske jeevan mein awashya hota hai savera
Guruji aur Unka naam hai har bhakt kee suraksha ka dhaal
Ve Hain kaal ke bhookhe baagh ko paraajit karne wale Mahakaal.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ke Hee Sahaare (03/30/2025)

March 29, 2025

Om Namaha Shivaya
Aaj Ka Suvichaar 🙏🏻🙏🏻

#2596

                 Doobte Doobte

Duniya ke dariya mein doob na jaana
Doob jaa Guruji kee mahima ke mahasaagar mein
Ismein doob kar tere bhaagya ke dwaar khulenge
Tere kayi janmon ke paap dhulenge.

Guruji kee mahima ka mahasaagar hai anupam
Ismein doob kar tarr jaate hain bhakt jann
Guruji ke ashirwaad se
Duur hokar duniyavi vaad-vivaad se.

Kyunki vaad-vivaad tark-vitark se
Mumkin nahin hai Ishwar ko paana
Tabhi toh Guruji ne jooton ke jodon ke saath
Nirdhaarit kiya hai ahem aur tark ka thikaana.

Guruji kee mahima sunn-ne aur karne ke liye
Ahem aur tark-vitark ko tyaagna aawashyak hai
Duniyavi starr takk seemit reh jaayenge hum varna
Jab ki inse bahut oopar hamaara rakshak hai.

Rakshak hamaare, Guruji Maharaj
Jo bashar ka roop lekar hamein taarne aaye
Hamaari khaamiyon ko maarne aaye
Hamaara jeevan sanvaarne aaye.

Unkee mahima ke mahasaagar mein
Hain sewa, simran, satsang ke moti anmol
Jo suney ya boley Guruji kee mahima ke bol
Uska hota hai kalyaan
Aisa hai Guruji ka vidhaan
Ve Hain maalik meharbaan.

Guruji kee mahima ke mahasaagar mein doobne se na daro
Is mahasaagar ke anmol motiyon se apna khaalipan bharo
Guruji kee anokhi leela se anugrahit hokar taro
Doobte doobte Guruji ke dikhaaye raaste par aagey badho.

🌹🌹🌹🌹🌹🌹🌹

Jai Guruji 🙏🙏
Dhirja

Doobte Doobte (03/29/2025)

March 28, 2025

Om Namaha Shivaya
Aaj Ka Suvichaar 🙏🏻🙏🏻

#2595

             Baadal Tehel Rahe Thei

Baadal tehel rahe thei aasmaan mein
Magn hokar Shiv Bhagwaan mein
Baadalon ke dil mein bahut ichcha thi
Ki Bhagwaan dikh jaayein dharti par basey jahaan mein.

Tehelte tehelte aasmaan mein
Baadalon kee neeche kee oar thi nazar
Ishwar kee kripa ka hua asar
Ishwar ne darshan dekar kee nadar.

Ishwar Guruji ke roop mein nazar aaye
Guruji baadalon ko dekhkar muskuraaye
Aisa divya saundarya thaa Unkee muskuraahat mein
Aisee ruhaaniyat thi Unke kadmon kee aahat mein
Ki baadal sajde mein jhuk gaye
Kuch pal ke liye ve tehelna ruk gaye.

Baadal Guruji kee oar huey aakarshit
Gungunaane lagaa Unka chit
Guruji ke sangg judi baadalon kee taar
Unhe hua Guruji se paawan pyaar
Ve Guruji ke prati huey itne bhaav vibhor
Ki Unke aansoo behkar chhalke Guruji kee oar.

Guruji toh thehre sarvgyani
Unhonei baadalon kee bhavna pehchaani
Unhonei baadalaon ke aansuon ko diya ohda barsaat ka
Baadalon ne jhuk kar Guruji ko dhanyawaad kiya is saugat ka.

Barsaat kee har boond hui sakshi Guruji ke ashirwaad kee
Barsaat kee har boond mein mehek bhari Guruji kee ruhaani yaad kee
Baadalon kee jo judi Guruji sangg seedhi taar
Toh Guruji ne unhe darshan dekar kar diya Unka uttam uddhaar.

🌹🌹🌹🌹🌹🌹🌹

Jai Guruji 🙏🙏
Dhirja

Baadal Tehel Rahe Thei (03/28/2025)

March 27, 2025

Om Namaha Shivaya
Aaj Ka Suvichaar 🙏🏻🙏🏻

#2594

Guruji Kee Sharan Miley Bina

Guruji kee sharan miley bina
Kitna neeras thaa jeena
Samajh aata hai Unkee sharan mein aane ke baad
Jabb se Unse jude hain dil ke jazbaat.

Abb jo hai sir par Guruji ka haath
Toh jeena namumkin hai bin Unke saath
Shukr hai samajh aayi ye zaroori baat
Varna din bhi ho jaata jaise raat.

Abb Guruji ke saanidhya mein
Din hee hai raat ke bhi madhya mein
Kyunki dil mein saji hai Guruji kee yaad
Aur din raat mil raha hai Unka ashirwaad.

Din aur raat, jeevan ke
Din aur raat, is mann ke
Kyunki yaheen hain din aur raat
Yaheen hain swarg aur nark
Sab apne hee bheetar hai
Ismein na hai koi tark-vitark.

Guruji bheetar se pehle saaf karein
Bheetar ruhaani ujaala bharein
Ve hee bhakt ko karein tayyaar
Ki ho paaye uska Unke dwaara uddhaar.

Guruji ka dikhaaya raasta
Hai ye prem aur shraddha bhaav ka panth
Jo vishwaas se is raaste par chale
Usey mehsoos ho Guruji kee divya sugandh
Beshak nasika aur vayu mein nahin
Par ruhaani starr par zaroor
Aise bhakt ko zyada der nahin rehna padta
Guruji Maharaj se duur.

Anandmayi hai raasta aise jeevan ka
Kalyaan hota hai atma, shareer, aur mann ka
Jiske simran kee mala mein ho Guruji ke naam ka manka
Usey vichaar hee nahin sataata bhautikvaadi dhan ka
Kyunki Guruji ka naam swayam hai khazaana
Aur Guruji swayam Hain amrit kee khan
Vo bhavsaagar mein sukhi hua
Jisne is satya ko liya jaan aur maan.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Kee Sharan Miley Bina (03/27/2025)

March 26, 2025

Om Namaha Shivaya
Aaj Ka Suvichaar 🙏🏻🙏🏻

#2593

    Mere Pita Pyaare

Guruji Hain mere pita pyaare
Guruji Hain mere sampoorna sahaare
Guruji Hain mere paalanhaare
Unhee ko mera dil pukaare
Har khushi har gumm mein
Raat din ke har kshan mein
Unhee ka vaas rahe mann mein
Toh sab sambhalta jaayega jeevan mein.

Bahut bahut shukriya Guruji ka
Ki Unhonei mujhe hai sweekaara
Bayaan nahin kar sakti kitna ehsaan hai Unka
Ki Unhonei diya hai mujhe sahaara
Unke ashish bin ik kadam na le paaoon mai
Nahin hai mera Unke saath ke bin guzaara
Unkee sharan mein na hoti toh kaisa hota mera jeevan
Rooh kaamp jaati hai jabb Ve dikhaate Hain vaisa koi nazaara.

Mera raasta chaahe jaisa bhi ho
Uspar rehta hai Guruji ka paawan pehra
Meri manosthiti chaahe jaisi bhi ho
Usey shubh prerna deta hai Unka chaarul chehra.

Unke bin meri gati nahin
Unke bin sumati nahin
Din-ba-din hota jaata hai aur bhi yakeen
Ki jo mere liye hai achcha Ve karte Hain vahee.

Abb toh Guruji kee yaad mein hee anand hai har pal ka
Abb toh Guruji ka simran aur manan hai aadhaar mere manobal ka
Guruji ke charnon mein saari sangat ka hota rahe bhalaa
Guruji kee kripa se sabhi paayein chadhdi kala.

🌹🌹🌹🌹🌹🌹🌹

Jai Guruji 🙏🙏
Dhirja

Mere Pita Pyaare (03/26/2025)

March 25, 2025

Om Namaha Shivaya
Aaj Ka Suvichaar 🙏🏻🙏🏻

#2592

Guruji Hain Tum Mein

Guruji Hain tum mein
Guruji Hain mujh mein
Guruji sarv-vyapi Hain
Sampoorna sach hai ismein.

Tum bhi Unhee ka roop ho pyaare
Mai bhi roop Unka
Tumhaara aur mera antas hai
Vaas Unke naam kee dhun ka.

Is satya ko jitna maanenge
Is dhun ko jitna pehchaanenge
Mehsoos hoga Unke utna hee kareeb
Ye hai vair bhaav mitaane kee bhi tarkeeb.

Guruji swayam Hain nirvair Paramatama
Unhee ka ansh hai har atma
Nirvair hona hoga awashya
Taaki har atma paaye apna lakshya.

Lakshya, safar mein aagey badhte jaane ka
Lakshya, Paramatama mein samaane ka
Varna tumhe aur mujhe na jaane janam lena hoga aur kitnee baar
Aur utartaa chadhta rahega karmon ka bhaar.

Saaf hona hee hoga ye khaata tumhaara aur mera
Taaki na gherta rahe janam maran ka ghera
Guruji ka dar hai aisa dhanya dera
Jahaan is safar ko mil sakta hai savera.

Usee savere ke liye vyakul hai tumhaari aur meri atma
Kyunki usee savere ke ujaale mein hoga sangharsh ka khatma
Tumhe aur mujhe Guruji ne dee hai Apni sharan
Dhanya ho jaayein hum Unkee sharan mein kaat kar apna janam maran.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Hain Tum Mein (03/25/2025)

March 24, 2025

Om Namaha Shivaya
Aaj Ka Suvichaar 🙏🏻🙏🏻

#2591

                Jagat Kee Mithya

Jagat kee mithya meethi laagey
Karva laagey satya
Kitna manddbuddhi hai praani
Is bhram mein hee bitaa de zindagaani.

Mithya kee mithaas ko chod
Bhram ke bajaaye chalkar Parabahm kee oar
Aalingan karegi satya kee bhor
Duur hoga har andhera ghor.

Guruji ke charnon mein hai veh sthaan
Jahaan miley is satya ka daan
Mithya kee vyarthataa ka miley pramaan
Kyunki Guruji kee sharan mein hai Sachkhand mahaan.

Guruji hee karte Hain bhakt ko tayyaar
Le jaane ke liye uss paar
Raaste mein bhi rehte Hain angg-sangg
Dikhaate huey jagat ke rangg.

Chalte huey is raaste par
Bhakt Unkee maanta chale agar
Toh nishchay hee bhakt ne hai tarte jaana
Aur satya ne kareeb hai aana.

Satya ka ruhaani swad aur Guruji kee divya khushboo
Jabb inse anugrahit hoti hai rooh
Toh anand aata hai mithya kee mithaas ke bhi paar ka
Guruji ashirwaad dete Hain umda uddhaar ka.

Guruji kee meher ka hota hai asar
Bhakt bhram se oopar uthkar
Badhta hai asal gyan kee disha mein
Tyaag kar jadta ko beeti hui nisha mein.

🌹🌹🌹🌹🌹🌹🌹

Jai Guruji 🙏🙏
Dhirja

Jagat Kee Mithya (03/24/2025)

March 23, 2025

Om Namaha Shivaya
Aaj Ka Suvichaar 🙏🏻🙏🏻

#2590

         Aapki Kirti…

Param poojya Guruvar,

Aapki kirti jagmagaati rahe
Sangat Aapke dar par aati rahe
Aapki kanti srishti par chhaati rahe
Sangat Aapka ashirwaad paati rahe.

Jee loon mai seedha saadha jeevan
Aap mein ramaa rahe sada mann
Har karma karoon Aapko arpan
Aapki yaad mein rahoon har kshan.

Aapki bhakti se na ho jaaoon vimukh
Arzi hai ki mai bann jaaoon Gurumukh
Aapki oar hee rahe mera ruhaani rukh
Kabhi kisee ko na doon mai dukh.

Ye saansein thamm jaayein na jaane kabb
Kaal ka bulaava bhi aaye jabb
Aap hee lene aayiyega tabb
Kyunki Aap hee Hain Guru, aur Aap hee Rabb.

Aapse pyaar badhta jaa raha hai
Aapke naam ka nasha chadhta jaa raha hai
Ye inaayat hai Aapki, varna meri ibadat mein nahin hai vo baat
Meri toh Aapke charnon ke taley kee dhool kee si bhi nahin hai aukat.

Jabb takk ye rooh aati rahe shareer mein
Aap hon meri taqdeer mein
Na jeena chaahoon, na marna chaahoon Aapke bin
Aapke saanidhya mein hee beete mera har din.

🌹🌹🌹🌹🌹🌹🌹

Jai Guruji 🙏🙏
Dhirja

Aapki Kirti… (03/23/2025)

March 22, 2025

Om Namaha Shivaya
Aaj Ka Suvichaar 🙏🏻🙏🏻

#2589

        O Mann Mere

O mann mere,
Tu behta jaa
Pyaare Guruji ke pyaar mein
Doob jaa Unke aitbaar mein
Unke deedar kee intazaar mein
SadaShiv ke sansaar mein.

Bhagwaanon ke Bhagwaan Hain Guruji
Itne paraakrami aur mahaan Hain Guruji
O mann, tujh mein virajmaan Hain Guruji
Tere karmadaata sarvshaktimaan Hain Guruji.

Unhee se ho teri soch shuru
Unhee kee yaad mein rehta chal
Ve Hain Rabb ke roop mein Guru
Unhee se apni har baat kehta chal.

Aur kisee se kuch kehne ka koi faayda nahin
Kyunki kewal Guruji kar sakte Hain sab sahi
Aur agar tujhe lagey ki abhi takk sahi hua nahin
Toh bhi na chale jaana tu aur kaheen.

Guruji se kuch chhipaane kee koshish na karna
Unke liye bhaav mein behte huey na darna
Tera bhola bhaav karega Unhe prasann
Ve vahee chaahein tujh se, o mann.

Tu Guruji kee oar jitna badhega
Tu Unkee yaad mein jitna bahega
Tu hota chalega sthir aur shant
Tujhe raas aata jaayega ekant.

Guruji ko mehsoos kar paayegi tere bheetar kee gehraayee
Guruji ka saanidhya honei se duur hogi teri tanhaayee
Tujhe aur koi sud-budh na rahegi, o mann
Guruji ke naam se goonj uthega tera kann kann.

🌹🌹🌹🌹🌹🌹🌹

Jai Guruji 🙏🙏
Dhirja

O Mann Mere (03/22/2025)