Month: April 2025

April 30, 2025

Om Namaha Shivaya
Aaj Ka Suvichaar 🙏🏻🙏🏻

#2628

Sangharsh Nahin Aasaan

Sangharsh nahin aasaan
Par vishwaas rakho aye insaan
Ki beshak aaye kaisa bhi tufaan
Kaheen na kaheen toh thaame huey Hain tumhe Bhagwaan
Guruji Maharaj ke roop mein
Jeevan kee chhaaon dhoop mein.

Varna tum yahaan takk bhi na pahunch paate
Aur na jaane kitne aur dhakke khaate
Ye toh Guruji ne hai sambhaala hua
Jabb jabb bhi kasht ne tumhe hai chhua.

Sangharsh toh hissa hai insaani jeevan ka
Tum banaaye rakho santulan apne mann ka
Jodkar Guruji se seedhi ruhaani taar
Aur Unke prati raho wafadaar.

Dar dar bhatakne mein faayda nahin, balki hai nuksaan
Yahaan se kaheen aur jaane kee zaroorat hee nahin, aye insaan
Anant koti Brahmand ke maalik Hain MahaShiv roopi Guruji Maharaj
Shraddha aur saboori rakho, sanvar jaayenge tumhaare kaaj.

Safalta nishchit hai sangharsh ke baad
Kyunki tumhaare sangg hai Guruji ka ashirwaad
Sangharsh ke dauran bhi Guruji ko prem se karo yaad
Ve tumhe har bhayy aur har sanshay se kar denge azad.

🌹🌹🌹🌹🌹🌹🌹

Jai Guruji 🙏🙏
Dhirja

Sangharsh Nahin Aasaan (04/30/2025)

April 29, 2025

Om Namaha Shivaya
Aaj Ka Suvichaar 🙏🏻🙏🏻

#2627

Prem Se Sunte Kehte Jaao

Prem se sunte kehte jaao
Prem ke bhaav mein behte jaao
Guruji Maharaj ke liye
Apne sartaj ke liye.

Is prem kee khushboo ruhaani ho
Is prem mein bhavna deewaani ho
Is prem ke nashe mein jaao yoon kho
Ki is prem mein tum khud ko kho do.

Guruji ke paawan prem mein kho kar
Tum uss dhan ko paaoge
Jis se tum janam janam ke liye
Dhanya ho jaaoge.

Har duniyavi prem se oopar hai prem Guruji ke sangg
Saarthak hai ye, aur ruhaani hai iska rangg
Guruji kee yaad se karte chalo antas ko roshan
Taaki is anokhe prem ka hota chale poshan
Is prem mein hain Guruji ke ruhaani darshan
Jinse anugrahit hota rahega jeevan.

Koi prem nahin is prem ke jaisa
Jiska jaisa bhaav, usey prem mehsoos ho vaisa
Is prem mein hai santosh aur sukh
Ye prem tumhe banaayega Gurumukh.

🌹🌹🌹🌹🌹🌹🌹

Jai Guruji 🙏🙏
Dhirja

Prem Se Sunte Kehte Jaao (04/29/2025)

April 28, 2025

Om Namaha Shivaya
Aaj Ka Suvichaar 🙏🏻🙏🏻

#2626

                Zaroor Hoga Deedar

Ye hai Guruji ka dikhaaya raasta
Yahaan Guruji se rakho vaasta
Yahee raasta pahunchaayega Guruji takk
Is raaste par agar gaye thakk
Toh Guruji madad karenge athak
Tum buss himmat na haarna
Mann mein kar lo ye dhaarna.

Is raaste par phool se zyada kaante milein
Toh aashcharychakit na hona
Ruhaani oonchaayee par pahunchna hai
Toh zaroori hai har paap ko dhona.

Kabhi hawaa hogi suhaani
Kabhi raasta hoga tufaani
Raasta badalne kee na karna naadaani
Varna pachhtaaoge saari zindagaani.

Tumhe dikhein ya nahin
Guruji hongei bilkul vaheen
Jahaan hogey tum
Hosh mein ya gumsum.

Tum beshak so jaao
Guruji bilkul na soyenge ek pal
Ve margdarshan karte rahenge
Taaki tum paao chal.

Ruhaani roshni jo chaahoge
Toh raasta ho sakta hai lamba aur kathin
Shraddha aur vishwaas se judey rahoge
Toh unnati nishchit hogi din-b-din.

Aayenge imtehaan kayi
Aayengi chunautiyan nayi
Guruji kee yaad mein rehna
Laukik aasakti mein na behna.

Karte chalna tum parishram
Ve bakhshte rahenge sewa simran
Nibhaana apna kartavya
Bin bhooley apna gantavya.

Har karma karna hoga Guruji ko arpan
Raaste mein karna hoga Unhe sarvsamarpan
Sachche mann se karte chaloge ardaas
Toh awashya aate chaloge Guruji ke paas.

Har mushkil, har chunauti tal jaayegi
Kaanton ko paar kar raaste mein bagiya aayegi
Hariyali par padti hui sooraj kee kiran kar rahi hai tumhaara intazaar
Guruji ko paane kee dhun mein raaste par chalo, zaroor hoga deedar.

🌹🌹🌹🌹🌹🌹🌹

Jai Guruji 🙏🙏
Dhirja

Zaroor Hoga Deedar (04/28/2025)

April 27, 2025

Om Namaha Shivaya
Aaj Ka Suvichaar 🙏🏻🙏🏻

#2625

Har Din Hai Khoobsoorat

Har din hai khoobsoorat
Har pal hai prerna kee moorat
Guruji kee sharan mein
Guruji se judey jeevan mein.

Beshak vo khoobsoorati dikhti nahin har baar
Kyunki vo drishti nahin hai hamaare paas
Isliye hee toh pratikool ghadiyon mein
Hum aksar ho jaate hain udaas.

Anukool lamhon mein khoobsoorati dekhna
Ye nahin hai mushkil kaam
Prerna ka strot bhi dhoondhna hota hai aise mein aasaan
Aur tabb mehsoos hota hai ki saath mein Hain Bhagwaan.

Pratikool pal kee khoobsoorati dekhne kee drishti
Bakhshte rahenge Guruji Maharaj
Besharte hum Unhe karne dein
Apne vivek par poora raaj.

Akl aur rafl ka koi kaam nahin vahaan
Guruji kee leela kee baat aati hai jahaan
Unkee har leela mein uddeshya hai hamaara kalyaan
Hamein khoobsoorat lagey ya nahin, har din hai daya se bharaa daan.

Guruji se judey huey jo beetega safar
Toh aaj ya kal khoobsoorati aane lagegi nazar
Aur har pal ka hoga prernadaayak asar
Buss, Guruji sangg rishta mazboot rakhne mein na chodein hum koi kasar.

Koshish zaroori hai apni oar se
Baaki Unkee kripa toh hai anivaarya
Unkee kripa se khoobsoorat aur prernadaayak ho jaayega
Har pal, har din, har kaarya.

🌹🌹🌹🌹🌹🌹🌹

Jai Guruji 🙏🙏
Dhirja

Har Din Hai Khoobsoorat (04/27/2025)

April 26, 2025

Om Namaha Shivaya
Aaj Ka Suvichaar 🙏🏻🙏🏻

#2624

             Kadam Badhaate Chalo

Kadam badhaate chalo
Surt uthaate chalo
Jodte huey ruhaani taar Guruji ke sangg
Taaki gehra hota jaaye bhakti ka rangg.

Ye rangg pheeka na honei paaye
Is rangg mein vo dhan hai samaaye
Jo kaheen aur na mil paaye
Jo Guru kripa se badh jaaye.

Bano sahi mainey mein dhanwaan
Tum ho bhakt, Guruji Hain tumhaare Bhagwaan
Ho tum pooran Guru ke paas
Rakho poorna shraddha aur vishwaas.

Shraddha aur vishwaas ke badhte badhte
Ye rangg hota jaayega gehra
Bhaagya hota jaayega sunehra
Kyunki praarabdh karma katt jaayega
Paap ka baadal chhatt jaayega
Vivek apne sangg sumat laayega.

Jaise jaise pakka hota chalega rangg bhakti ka
Tumhe andaaza ho jaayega uskee shakti ka
Jo praapt na ho paaye bin Guru Govind ke ashirwaad ke
Jismein samaaye hongei lamhe Guruji kee yaad ke.

Guruji kee yaad mein bitaaya har pal
Badhaata chalega bhakti kee shakti
Guruji kabb mauj mein aakar lekha denge badal
Kabb de dein tumhe kalyaan kee yukti
Ye toh hogi Unkee ichcha
Ye nishchit hai ki sab hoga achcha.

Isliye kadam badhaao
Guruji ke kareeb aao
Is ruhaani safar ko sanvaarte chalo
Bhakti ka rangg nikhaarte chalo.

🌹🌹🌹🌹🌹🌹🌹

Jai Guruji 🙏🙏
Dhirja

Kadam Badhaate Chalo (04/26/2025)

April 24, 2025

Om Namaha Shivaya
Aaj Ka Suvichaar 🙏🏻🙏🏻

#2622

 Dhoop Chhaaon, Chhaaon Dhoop

Dhoop chhaaon, chhaaon dhoop
Kuch aisa hee hai jeevan ka roop
Dhoop chhaaon ka khel toh rahega barkaraar
Tu is beech himmat na haar
Guruji tujhe rahe Hain taar
Isliye dhoop chhaaon dono ko kar le sweekaar.

Saraaye hai ye jahaan
Kuch samay bitaana hai yahaan
Dhoop chhaaon dono hee hissa hain yahaan kee kahaani ka
Inke bin adhoora hai kissa zindagaani ka.

Aur jis ghar mein padein Guruji ke paawan paaon
Vahaan par dhanya hain dono dhoop aur chhaaon
Har lamha hai kalyaan ka
Paakar ashish Guruvar karunanidhaan ka.

Kuch bhi aur sthir nahin
Parabrahm ke siwa
Parabrahm ke paas hee hai
Kalyaan kee dawaa
Guruji swayam Hain Parabrahm
Ismein nahin hai koi bhram
Dhoop chhaaon ke khel mein bhool na jaana is sachchaayee ko
Dhoop ho ya ho chhaaon, naman karte rehna Guruji kee vadiyaayee ko.

🌹🌹🌹🌹🌹🌹🌹

Jai Guruji 🙏🙏
Dhirja

Dhoop Chhaaon, Chhaaon Dhoop (04/24/2025)

April 23, 2025

Om Namaha Shivaya
Aaj Ka Suvichaar 🙏🏻🙏🏻

#2621

  Aseem Aur Anokha Hai Unka Pyaar

Aksar samaa aata hai haunslae kee azmaaish ka
Khaaskar jabb adhoora reh jaata hai khwaab kisee khwaahish ka
Lekin jahaan pehle aata thaa bahut rona
Abb yaad aata hai karna Shukrana
Pyaare Guruji Maharaj ko
Jo na jaane dete Hain kaun kaunse paap dho
Na jaane kaun kaunse kasht kumm karte jaate Hain
Aur uddhaar kar ke bhi nahin jataate Hain.

Haunsale ko tootne na dena
Vishwaas ko roothne na dena
Kyunki patjhad hamesha rehta nahin
Guruji kee kripa se sabb ho jaata hai sahi.

Guruji kee marzi ke aagey har khwaab har khwaahish chhote hain
Unkee mahima ke samaksh hum insaan bade khotey hain
Phir bhi Ve meherbaan maalik hamaare paap dhotey Hain
Unhee kee kripa se hum chayyn kee neend sotey hain.

Unkee yaad mein rehkar haunsala rakho barkaraar
Sahi waqt par Ve har bhakt ko dete Hain taar
Anginat hain Unke kiye upkaar
Aseem aur anokha hai Unka pyaar.

🌹🌹🌹🌹🌹🌹🌹

Jai Guruji 🙏🙏
Dhirja

Aseem Aur Anokha Hai Unka Pyaar (04/23/2025)

April 22, 2025

Om Namaha Shivaya
Aaj Ka Suvichaar 🙏🏻🙏🏻

#2620

      Aapki Maujoodagi Ka Ehsaas

Param poojya Guruji Maharaj,

Aapki maujoodagi ka ehsaas
Ye bhi na ho paaye Aapki meher ke bin
Aisee meherabani karte rahiyega Prabhu
Ki Aapki maujoodagi mehsoos ho raat aur din
Aur beech ke har peher, har kshan mein
Buss, phir koi soonapan na hoga jeevan mein.

Kehne ko kitne jann hotey hain aaspaas
Parantu vaisa vaataavaran aata hee nahin abb raas
Abb toh antas ho gaya hai adbhut sa udaas
Aur bujhti nahin hai simran kee pyaas.

Duur rehna duniya kee bheed se
Ye bhi na ho sakey bin Aapki tadbeer ke
Aapki koi bhi yojanaa nirarthak hoti nahin
Aapka har faisla hota hai sahi
Yahee vishwaas aagey badhte rehne kee hai prerna
Jaanti hoon, mujhe mil rahi hai har pal Aapki samvedana
Jiske liye mera mann tarasta hai
Aapka veh ashirwaad mujh par barasta hai
Beshak agyan vash mai unn barasti boondon ko mehsoos na kar paaoon
Par jabb jabb Aapki ruhaani maujoodagi ko galey se lagaaon
Toh jaan jaati hoon ki mai akeli nahin
Aapki maujoodagi se zyada wafadaar toh koi saheli nahin.

Balihaari jaaoon Aapke, mere Guruvar
Bulaate rahiyega mujhe Apne dar
Soonepann mein mushkil thaa guzaarna ye safar
Shukr hai, Aap bann gaye huzoor aur hamsafar.

🌹🌹🌹🌹🌹🌹🌹

Jai Guruji 🙏🙏
Dhirja

Aapki Maujoodagi Ka Ehsaas(04/22/2025)

April 21, 2025

Om Namaha Shivaya
Aaj Ka Suvichaar 🙏🏻🙏🏻

#2619

        Guruji Ka Dikhaaya Raasta

Guruji ka dikhaaya raasta
Badhaata chalta hai aastha
Besharte lagan ho sachchi
Aur neeyat ho achchi.

Beshak kisee ka kapat paakhand na pehchaan paaye sansaar
Bakhoobi pehchaan lete Hain Guru sarkar
Ve toh har pal sahi raasta dikhaate Hain
Ve toh jeene ka saleeqa sikhaate Hain.

Isliye tum kapat paakhand dekhkar dukhi na hona
Na hee uskee oorja tum apne par lena
Varna tum mein aur unmein koi fark na rahega
Kyunki tumhaara mann pratikool bhaav mein bahega.

Isliye zaroori hai anukool sthiti mein rakhna mann ko
Na chodna kabhi bhi Guruji ke bakhshe simran ko
Guruji se judey rehna uss ruhaani taar se
Jiske dwaara ye rishta bilkul bhinn hai sansaar se.

Ghanghor lagte hain mushkilon ke tufaan
Ve aksar kar dete hain hairaan pareshaan
Aksar jabb jokhim mein hotey hain jaan ya armaan
Uss samay bhi angg sangg hotey Hain Guruji karunanidhaan.

Tum apna kaam karte chalo
Paristhiti jaisi bhi hai, chalte chalo
Guruji jaante Hain tumhe kya dena hai aur kabb
Jo tumhaare liye achcha hai, Ve denge Unhe sahi lagega jabb.

Dukh kaat rahe Hain Ve tumhaare
Katva lo tum bhi unhe Guruji ke sahaare
Phir jo sukh milega, vo hoga sunehra
Kyunki uspar hoga Guruji kee marzi ka sehra.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ka Dikhaaya Raasta (04/21/2025)