Month: April 2025

April 10, 2025

Om Namaha Shivaya
Aaj Ka Suvichaar 🙏🏻🙏🏻

#2608

        Guruji Sangg Har Mulaakaat

Guruji sangg har mulaakaat
Hoti hai Unn meharbaan maalik kee dee saugat
Varna meri kya aukat
Ki mai kar paaoon Unse baat.

Koi aur nahin de sakta Unn jaisa pyaar
Kyunki Unke sangg rishta hai har duniyavi rishte ke paar
Isliye toh jabb bandh gayi Unse doar
Toh antas badhne lagaa Unkee oar
Unhee kee hai ye bhi meharbaani
Varna kitne jhamelon mein phans sakti thi zindagaani.

Kendrit rahe chitt Guruji ko chetne mein sada
Unkee kripa se hee nipun hogi meri yeh ada
Ve hee jaanein mai hoon kabb kis hunar ke yogya
Buss, Ve hee rahein mere har prayaas ka uddeshya.

Vaise bhi abb nirarthak laagey baaki sabb
Jabb se jaana aur maana ki Guruji Hain swayam Rabb
Rabb mil jaayein toh sabb mil jaaye
Phir kyun ye nacheez kaheen bhi aur jaaye.

Apna pyaar barsaate rahein Guruji Maharaj
Raasta dikhaate rahein Guruvar sartaj
Jo maan liya abb Guruji ko hee Khuda
Toh phir na hona chaahoon ek pal ke liye bhi Unse juda.

Guruji se hee zindagi
Unhee se hee bandagi
Unhee mein apna astitva doon kho
Unhee ke aanchal mein jaaoon so
Uss antim vele mein
Uss pal suhele mein
Jabb aaye jaane kee baari yahaan se
Jabb rooh ravaana ho is jahaan se.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Sangg Har Mulaakaat (04/10/2025)

April 9, 2025

Om Namaha Shivaya
Aaj Ka Suvichaar 🙏🏻🙏🏻

#2607

                 Ye Zaroori Nahin…

Ye zaroori nahin ki hum jaan bhi paayein
Ki jo ho raha hai vo kyun ho raha hai…..
Par haan, koi kaaran toh hoga zaroor…..
Jo jaante Hain Guruvar huzoor.

Guruji kee raza mein razi rehne mein hee hai bhalaayee
Kyunki hamaari soch se kaheen zyada oonchi hai Unkee vadiyaayee
Ve dekhein hamaara vishwaas aur pyaar
Kyunki bhakt ko parakhte Hain Guru sarkar.

Guruji ko toh sab gyat hai
Ye bhi sukoon wali baat hai
Unhonei hee sambhaalna hai aane wala kal
Isliye chodni hogi apni akal.

Guruji kee sharan mein hona hai jo ho
Aur kaheen abb na jaayein kho
Guruji ke charnon mein hain saare teerath sthaan
Guruji Maharaj Hain itne mahaan.

Guruji ke ghar mein der ho sakti hai andher nahin
Unkee kripa se sab ho jaata hai sahi
Unhee mein leen rahe antakaran
Kyunki Guruji Mahashiv ka roop Hain swayam.

Guruji kee meher se hai chehre kee muskaan
Guruji kee marzi se hai mushkil imtehaan
Guruji ke bin na chal paaye jaan aur jahaan
Kyunki Guruji Hain maalik meharbaan.

🌹🌹🌹🌹🌹🌹🌹

Jai Guruji 🙏🙏
Dhirja

April 8, 2025

Om Namaha Shivaya
Aaj Ka Suvichaar 🙏🏻🙏🏻

#2606

                   Guruji Ko Maan

Guruji ko maan
Guruji kee maan
Kar Guruji ka maan
Kar Guruji ka dhyan.

Isee se milegi shanti
Isee se hoga atma-sudhaar
Isee se hoga uddhaar
Isee se badhega Guruji se pyaar.

Jaise anginat taare hain aasmaan mein
Vaise hee vikarshan toh anekon hain jahaan mein
Dhruv taare kee jageh koi nahin le sakta
Vaise hee Guruji ke samaksh koi vikarshan nahin rukta
Buss, dridh rakh apna vishwaas
Pakki rakh Guruji ko paane kee aas
Karta chal iskee oar prayaas
Tujhe hota chalega Unse kareebi ka ehsaas.

Jaise jaise tera mann Guruji mein hee jaayega lagg
Jaise jaise tu hoga duniyavi vikarshanon se maansik taur par alag
Ruhaani oonchaayee pehle se bhi zyada tujhe pukaaregi
Guruji mein teri lagan tere safar ko sanvaaregi.

Chodna nahin aas
Hona matt niraash
Guruji Hain aur rahenge tere aaspaas
Unkee kripa se tu bann kar rehna Unka das.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ko Maan (04/08/2025)

April 7, 2025

Om Namaha Shivaya
Aaj Ka Suvichaar 🙏🏻🙏🏻

#2605

     Bhaagya Ka Sooraj Hua Uday

Bhaagya ka sooraj hua uday
Ekatrit huey anekon janmon ke koi punya
Tabb milee Guruji kee sharan, Guruji ka aashray
Mitne lagaa har bhayy, har sanshay.

Saubhagya hai ye bahut bada
Ki pooran Guru angg sangg Hai khada
Aandhi ho ya ho tufaan
Beshak ro kar ho jaaoon pareshaan
Mukh par aa hee jaati hai muskaan
Yaad kar ke saath Hain swayam Bhagwaan
Varna is se zyada mushkil thi nishchit
Aur is se zyada hee vyathit hotei mann aur chitt.

Guruji toh sindhu Hain daya aur pyaar ke
Ve toh raasta banaate Hain dulaar se
Madad karte Hain har pal
Taaki kasht jaayein tal.

Shukr hai praarabdh kat raha hai Guruji kee sharan mein
Shukr hai ahankar mit raha hai Guruji ke kamal charan mein
Shukr hai har aansoo aur har muskuraahat ka
Shukr hai ki Guruji ko pataa hai meri har zaroorat aur chaahat ka.

Unhee ko pataa kya hai mere liye achcha
Ve Hain nath, mai Unka bachcha
Isliye zidd toh karti hee nahin
Kyunki mai kya jaanoon kya hai mere liye sahi?

Saare dukhon se bhi zyada bada hai Unkee sharan milne ka sukh
Is satya kee oar sada shukraguzaar rahe mera mann aur mera mukh
Guruji kee sharan mein har paash se azaadi mil jaaye
Guruji kee sharan mein Unkee kripa se bheetar ka ruhaani kamal khil jaaye
Jabb takk janmon ke aane jaane ka jaari rahe safar
Tabb takk Guruji kee sharan mein hee janam maran jaaye guzar
Tabhi mukammal hoga bekaraar rooh ka intazaar
Jabb vo Guruji mein samaayegi, Guruji Hain Parwardigaar.

🌹🌹🌹🌹🌹🌹🌹

Jai Guruji 🙏🙏
Dhirja

Bhaagya Ka Sooraj Hua Uday (04/07/2025)

April 6, 2025

Om Namaha Shivaya
Aaj Ka Suvichaar 🙏🏻🙏🏻

2604

    Guruji Kee Kripa Milee Hai Praani

Guruji kee kripa milee hai praani
Is se sanvaar le tu zindagaani
Chod de karna aana-kaani
Tarr gaya vo jisne Guru kee maani.

Anekon hain jo Guruji ko maanein
Par virle hain jo Guruji kee maanein
Toone jo Guruji kee maani
Toh tera kalyaan nishchit hai, praani.

Guruji ke chintan mein hee
Har peeda ka upchaar hai
Usey kisee aur ke pyaar kee zaroorat nahin
Jiska Guruji se pyaar hai.

Tere vash mein nahin hai tera uddhaar
Kewal Guruji lagaa sakte Hain tera beda paar
Din raat ke kuch pal toh Unkee soch mein guzaar
Tere bheetar aur baahar honei lagega sudhaar.

Tu aur tera ye safar hai ruhaani
Guruji kee sharan mein nikhar jaayegi teri kahaani
Isliye abb chod kar naadaani
Atmasaat kar le gurbani
Kalyaan karaa le tu praani
Kyunki baani Guru, Guru hai baani.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Kee Kripa Milee Hai Praani (04/06/2025)

April 5, 2025

Om Namaha Shivaya
Aaj Ka Suvichaar 🙏🏻🙏🏻

#2603

Guruji Ke Kiye Kalyaan Se Paripoorna

Maana ye daur hai mushkil
Par ghabraa matt mere dil
Tujhe sambhaal raha hai Guruji ka aanchal
Unkee kripa se ye daur bhi jaayega tal.

Pichhla waqt bhi nahin raha
Ye waqt bhi nahin rahega
Waqt ke har lamhe par
Guruji ka ashish roopi amrit bahega.

Is amrit se waqt kee chunautiyan dhul jaayengi
Shubh maukon kee bandd raahein khul jaayengi
Bahega amrit unn raahon par
Banega marham teri dard bhari aahon par
Tujhe milegi raahat, dekh lena
Shraddha se Guru charnon mein maatha tek lena
Shukrana kehte jaana
Na banaana koi bahaana.

Is daur par Guruji farmaa rahein Hain gaur
Tu apna chintan rakh Guruji kee oar
Mahashiv ne thaami hai tere jeevan kee doar
Jo lagg rahi hai tujhe raat, usee mein chhipi hai bhor.

Guruji kee kripa se ye bhor apna sunehra roop dikhaayegi
Chinta na kar, Guruji kee meher se ye bhor zaroor aayegi
Har shwaas ke sangg Guruji ko yaad kar
Samay ke saath saath mushkil daur jaayega guzar
Haseen lamhe teri intazaar mein khade hain moad par
Guruji par bharosa kar, ye lamhe tujhe aayenge nazar
Ye bann jaayenge tere aane wale jeevan ka hissa
Guruji ke kiye kalyaan se paripoorna rahega tere jeevan kee kahaani ka kissa.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ke Kiye Kalyaan Se Paripoorna (04/05/2025)

April 4, 2025

Om Namaha Shivaya
Aaj Ka Suvichaar 🙏🏻🙏🏻

#2602

  Itne Dayalu Hain Mere Guru Sarkar

Anekon rang dikhaata hai baahar aur bheetar ka sansaar
In rangon mein shaamil hain pyaar aur vikaar
Kuch rangg laate hain udaasi, kuch lagte hain maano tyohaar
Shukr hai ki har pal mujhe sambhaalte Hain Guru Parwardigaar
Itne dayalu Hain mere Guru sarkar
Ki har baar sunte Hain meri pukaar.

Guruji kee yaad mein rehne se zindagi sanvarne lagi
Guruji ke saanidhya mein soch sudharne lagi
Unkee kripa bin na mumkin thaa ye sudhaar
Guruji hee karenge mera uddhaar
Itne dayalu Hain mere Guru sarkar
Ki har baar sunte Hain meri pukaar.

Kabhi toh kar paati hoon baatein Guruji se
Kabhi baatein nahin ho paati
Tabb bechayyni badh si jaati hai
Koi tarkeeb shanti nahin de paati
Aise mein bhi mere girebaan se zaroor jaati hai pukaar
Ki Guruji karein bechayyni ka upchaar
Itne dayalu Hain mere Guru sarkaar
Ki har baar sunte Hain meri pukaar.

Vaise toh mujhe zaroorat nahin Unhe kehne kee
Par abhi poori tareh se seekhi nahin hoon kala chup rehne kee
Isliye pukaarti hoon Unhe kayi baar
Jabb bhi jaati hoon himmat haar
Itne dayalu Hain mere Guru sarkar
Ki har baar sunte Hain meri pukaar.

Abb toh Guruji hee Hain meri rooh ka sahaara
Jeene marne mein nahin hai mera Unke bina guzaara
Na khatkhataana chaahoon kisee aur ka dar ya dwaar
Mujhe toh pyaara laagey mere Guru sahib ka darbar
Guruji kee meher se hai mera ghar parivaar
Ve hee Hain mere har shwaas ka aadhaar
Itne dayalu Hain mere Guru sarkar
Ki har baar sunte Hain meri pukaar.

🌹🌹🌹🌹🌹🌹🌹

Jai Guruji 🙏🙏
Dhirja

Itne Dayalu Hain Mere Guru Sarkar (04/04/2025)

April 3, 2025

Om Namaha Shivaya
Aaj Ka Suvichaar 🙏🏻🙏🏻

#2601

                  Unka Shukriya

Jeevan ke har pal mein Guruji dete Hain sahaara
Unke sahaare ke bin na ho paaye guzaara
Guruji ne hee ye jeevan diya
Tahe dil se Unka shukriya.

Bhatakne lagi jab bhi raahon mein
Gumraah honei lagi jab kabhi gunaahon mein
Guruji ne raasta dikhaaya aur bakhsh diya
Tahe dil se Unka shukriya.

Bhaagya ne na kiya jab shubh avsar pradaan
Niraasha kee nisha ne jab kiya pareshaan
Guruji ne utsah diya
Tahe dil se Unka shukriya.

Jabb jabb naseeb roothne lagaa
Jabb jabb sabr ka baandh tootne lagaa
Guruji ne dheeraj ka daan diya
Tahe dil se Unka shukriya.

Jabb bhi kee Guruji se fariyaad
Jabb bhi kiya Guruji ko yaad
Guruji ne angg-sangg honei ka ehsaas diya
Tahe dil se Unka shukriya.

Jabb kabhi agar kisee saathi ne choda saath
Jabb kabhi kisee ne kee dil todne wali baat
Guruji ne tabb bhi hai saath diya
Tahe dil se Unka shukriya.

Abb toh Guruji ke charnon mein manzil meri
Phir mere jeevan kee koi bhi raat nahin andheri
Guruji ne hai prerit kiya
Tahe dil se Unka shukriya.

🌹🌹🌹🌹🌹🌹🌹

Jai Guruji 🙏🙏
Dhirja

Unka Shukriya (04/03/2025)

April 2, 2025

Om Namaha Shivaya
Aaj Ka Suvichaar 🙏🏻🙏🏻

#2600

             Guruji Kee Yaad Se…

Guruji kee yaad se kar dil ko aabaad
Yoon poshit kar tu ye jazbaat
Ki tere karma hon Guruji ko arpit
Aur Guruji ko hee chete tera chitt.

Guruji par luta de apna pyaar
Unhee ke charnon mein hai sukh ka sansaar
Duniyavi hisaab kabhi na hongei khatm
Jabb takk chalega ye jeevan
Guruji ke charnon mein milta rahega aashvaasan
Guruji kee sharan mein zaroori hoga anushaasan
Dono zaroori hain teri unnati ke liye
Isliye Guru hona anivaarya hai gati ke liye.

Jhuka kar sir ko Guruji ke dar par
Guruji se tu pyaar kar
Satsang roopi ho jaayega tera safar
Tujhe naya nazariya aayega nazar.

Guruji tere shubhchintak Hain aur rahenge
Ek Ve hee tere liye tere kasht sahenge
Unkee leela ka kar shravan aur manan
Ve sanvaarte chalenge tera janam aur maran.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Kee Yaad Se… (04/02/2025)

April 1, 2025

Om Namaha Shivaya
Aaj Ka Suvichaar 🙏🏻🙏🏻

#2599

               Aapke Naman Mein

Devon ke bhi dev
Mere poojya Gurudev
Sartaajon ke sartaaj
Pyaare Guruji Maharaj
Na hoti mai yahaan aaj
Agar Aapne na sanvaare hotey kaaj
Aaj bhi bharosa hai Aap par
Aur Aap hee tayy karaayenge kal ka bhi safar
Ismein nahin hai mujhe sanshay
Isliye nahin lagta hai mujhe bhayy.

Ghar parivaar par rehta chale Aapka prabhaav
Taaki sadbuddhi aur shuddhi ka kabhi na ho abhaav
Kripa keejiye ki Aapke prati badhta rahe mera prem bhaav
Aur har din zyada hota jaaye mujhe bhakti ka chaav.

Aapse hee protsaahan milta hai mere khoye utsaah ko
Aapki upaasana ke deeye ujjwal rakhte hain meri raah ho
Varna neeras aur andheri hoti meri zindagi
Aapki inaayat se hee milee hai paawan bandagi.

Kewal bandagi hee nahin, balki har daat
Hai vo Aapki inaayat se hee milee hui saugat
Sabse badi hai ye baat
Ki mila hai Aapka ruhaani saath
Jisey bhi mila ho itna pyaara ashirwaad
Vo kaise na karey Aapka shukriya din aur raat.

Aapka shukriya karne mein guzar jaaye har pal
Aapka shukriya karne mein guzar jaaye aaj aur kal
Toh bhi kumm hoga, mere param poojya sarkar
Par jaanti hoon, Aap har bhaav pehchaante Hain, mere pyaare Parwardigaar.

Kabhi mera haath chod kar na jaana
Daata, har janam mein saath nibhaana
Aapki mahima sunoon aur sunaaoon mai har janam mein
Mera sir sada jhuka rahe Aapke naman mein.

🌹🌹🌹🌹🌹🌹🌹

Jai Guruji 🙏🙏
Dhirja

Aapke Naman Mein (04/01/2025)