Month: June 2025

June 30, 2025

Om Namaha Shivaya
Aaj Ka Suvichaar 🙏🏻🙏🏻

#2689

                Guruji Ke Naman Mein

Guruji ke naman mein jhukein sooraj aur gagan
Guruji ke geet gaata chale chaman
Guruji ka naam leti rahe meri har dhadkan
Sabse pyaara hai Guruji ke sangg bandhaa ye bandhan.

Jabb se Guruji mein leen rehne lagaa hai mann
Itna anand deta hai Guruji ka bakhsha hua simran
Guruji sewa dwaara karaate Hain kashton ka haran
Satsang aur Gurbani dwaara yaad dilaate Hain Ve Apne vachan.

Guruji kee bhakti sabse uttam
Guruji Hain mahatma mahattam
Sab kuch Guruji ke kamal charnon mein ho arpan
Ho jaaye bhakt ka Guruji ko sarvsamarpan
Pavitrikaran dwaara shuddh hota jaaye mann ka darpan
Satchittanand se paripoorna ho jaaye har kshan
Yoon hee Guruji kee sharan mein beete jeevan
Guruji ko hee samarpit ho janam aur maran
Parat parat kar ke utartaa jaaye har aavaran
Antt mein ho jaaye atma ka Unn Paramatama se milan.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ke Naman Mein (06/30/2025)

June 29, 2025

Om Namaha Shivaya
Aaj Ka Suvichaar 🙏🏻🙏🏻

#2688

   Beetne De Ye Safar

Tujhe jeena mushkil raha hai lagg
Aur kuch tere buss mein nahin
Lekin Guruji angg sangg Hain tere
Jaisi Unkee marzi, ho raha hai vahee.

Jitnee chot lagni thi tujhe, lagi hai uss se kaheen kumm
Kumm kar ke miley hain tujhe tere hissey mein thei jo gumm
Guruji kee kripa bin aisa na ho paata
Abb takk toh na jaane kya kya ho jaata.

Guruji tere angg sangg Hain har pal
Mushkilon ne jaana hai tal
Ateet nahin raha, vartmaan bhi guzar jaayega
Karmon ke kat-te kat-te aane wala kal aayega.

Maan-na hoga samay ka dastoor
Aur karma bhi bhugatne hongei zaroor
Guruji ka shukr ki Unhonei liya hai Apne charan mein
Taaki jo ho raha hai vo ho raha hai Unkee sharan mein.

MahaShiv Guruji param pita ka raksha kavach odh kar
Maangta chal shraddha aur saboori ka var
Har pal itihaas bann raha hai jaise jaise raha hai guzar
Pooran Guru ke aanchal mein shukrana karte huey beetne de ye safar.

🌹🌹🌹🌹🌹🌹🌹

Jai Guruji 🙏🙏
Dhirja

Beetne De Ye Safar (06/29/2025)

June 28, 2025

Om Namaha Shivaya
Aaj Ka Suvichaar 🙏🏻🙏🏻

#2687

                      Prem Bhaav

Zaroori hai bhakti ka chaav
Zaroori hai bhakti mein prem bhaav
Bin prem bhaav ke bhakti adhoori
Prem bhaav se bhakti ho poori.

Prem bhi vo jo ho niswaarth
Iska prayaas toh kar ke dekho tum, paarth
Suna hai iska anand hota hai anokha
Aur Guruji sangg rishte ka sunehra hota hai ye mauka.

Guruji toh karte Hain saari sangat ka uddhaar
Kintu jo bhakt bhakti mein Guruji ko de niswaarth pyaar
Uss se kitne prasann hotey Hain parvardigaar
Nirmal anand mein rehne wala vo bhakt hee jaane iska saar.

Prem bhaav se hansna hansaana
Prem bhaav se khaana khilaana
Prem bhaav se baatein karna
Prem bhaav se aankhon ka bharna…

Prem bhaav se naachna gaana
Prem bhaav se vaadya bajaana
Prem bhaav se likhna Unke liye
Prem bhaav se jalaane deeye…

Prem bhaav se prerit ho pooja upchaar
Prem bhaav mein aadar satkaar
Prem bhaav se shukrana kehna
Prem bhaav se ek saath rehna.

Prem bhaav ka chadhaava
Bin koi dikhaawa
Is rishte ko itna gehra banaaye
Ki vo hadd ke paar guzar jaaye.

Phir toh jo safar hua thaa shuru
Usmein hon kewal bhakt aur uska Guru
Na kabhi koi vikarshan
Na sanshay kisee bhi kshan.

Guruji aur bhakt ka prem badhta rahe
Dono mein se koi beshak kuch na kahe
Baatein ho ruhaani taar dwaara
Anjaan rahe sansaar saara.

Naata rahega nijee jitna
Anand bhi badhega utna
Niswaarth prem ho bhakti ka niyam
Guruji sada rahein bhakt se prasann.

🌹🌹🌹🌹🌹🌹🌹

Jai Guruji 🙏🙏
Dhirja

Prem Bhaav (06/28/2025)

June 27, 2025

Om Namaha Shivaya
Aaj Ka Suvichaar 🙏🏻🙏🏻

#2686

            Itnee Saari Khwaahishein

Itnee saari khwaahishein
Itnee saari numaaishein
Kisliye?
Kyun?

Sochne wali baat hai
Ko jo ye din aur raat hai
Inke khatm honei se pehle hum hongei khatam
Aisa hai hum praaniyon ka janam aur maran.

Bhautikvaad mein aasakti
Apne hee karmon mein aasakti
Phir kaise na badhey bojh
Kaise na dooshit ho soch
Kaise na ksheen ho shakti
Kaise na vichalit ho bhakti.

Milee hai sarvashreshth sharan
Jo miley Hain Guruji ke kamal charan
Unhee se jud kar rehne mein asal kalyaan hai
Kyunki Guruji swayam Guru ke roop mein Bhagwaan Hain.

Yahee hai sukh aur santosh kee yukti
Yahaan miltee hai rooh ko tripti
Sanvar jaati hai zindagi
Nikhar jaati hai bandagi.

🌹🌹🌹🌹🌹🌹🌹

Jai Guruji 🙏🙏
Dhirja

Itnee Saari Khwaahishein (06/27/2025)

June 26, 2025

Om Namaha Shivaya
Aaj Ka Suvichaar 🙏🏻🙏🏻

#2685

  Jabb Se Mila Hai Guruji Ka Sahaara

Jabb se mila hai Guruji ka sahaara
Jaan gayi ki jeevan kee naiya ko milega kinaara
Mujh nacheez ko Guruji ne sweekaara
Dikhaaya Unhonei Apna divya dwaara
Jahaan ka nazaara hai noorani nyaara
Diya Unhonei niswaarth pyaar itna saara
Ki chhoti padd gayi meri jholi
Aur mai Guruji kee ho li.

Baadalon se aachhaadit hee sahi
Sooraj uday hota hai har din
Jeevan chalega toh kaise
Is sooraj ke bin?

Na bhi dikhe Guruji ka daihik roop
Toh bhi Unkee maujoodagi hai anoop
Har ek kann mein
Har ek kshan mein.

Har pal, har din aur bhi gehra ho raha hai is satya ka ehsaas
Guruji kee hee meharbaani se
Guruji ke saanidhya mein rehte Huey
Rishta badal raha hai zindagaani ze.

Shukrana ka pal-da ho raha hai bhaari
Asal dhan praapti kee karna chaahoon tayyaari
Param poojya Guruji Maharaj karte rahein meher
Ki har shikayat bhool kar shukrana karoon har peher.

Khushi ho ya gumm
Shukrana na ho kumm
Balki zyada hota jaaye
Jaise jaise aaj ateet mein khota jaaye.

Aane wala kal shukrana se bhara ho
Karmon ka khet changey karmon se hara ho
Guruji ke charnon mein jageh milee rahe
Unke ashish se bandagi khilee rahe.

🌹🌹🌹🌹🌹🌹🌹

Jai Guruji 🙏🙏
Dhirja

Jabb Se Mila Hai Guruji Ka Sahaara (06/26/2025)

June 25, 2025

Om Namaha Shivaya
Aaj Ka Suvichaar 🙏🏻🙏🏻

#2684

            Mann Kee Mayli Chaadar

Guruji ne bakhshe Hain ye pal
Guruji ne bakhsha kal, aaj aur kal
Unkee bakhshish se kasht rahe hain tal
Unke charnon mein jeevan ko honei dein hum safal.

Guruji toh bakhshne aaye
Aaye karne sangat ka kalyaan
Aaj bhi de rahe Hain Ve Apni kripa ka daan
Bade dayalu Hain Guru sahib karunanidhaan.

Guruji ke har swaroop kee moorat
Hai anokhi aur khoobsoorat
Ve Hain divya prakash ujjwal
Ve badhaate Hain bhakton ka manobal.

Guruji kee ye jyot bheetar hai hum sab ke
Guruji swayam roop Hain Rabb ke
Jinkee nigraani mein hum rahe hain pal
Jinkee nadar se hamaare bhaagya rahe hain badal.

Kisee achche karma ka hai ye phal
Ki mila hai pooran Guru ka aanchal
Is khushnaseebi ko galey se lagaayein
Guruji kee mamta ke aangan mein khil jaayein.

Mehekta rahe jeevan Guruji kee khushboo se
Guruji sangg rishta ho sada rooh ka rooh se
Is ruhaani rishte ke prati sada rahe mann mein aadar
Isee kee badaulat saaf hogi mann kee mayli chaadar.

🌹🌹🌹🌹🌹🌹🌹

Jai Guruji 🙏🙏
Dhirja

Mann Kee Mayli Chaadar (06/25/2025)

June 24, 2025

Om Namaha Shivaya
Aaj Ka Suvichaar 🙏🏻🙏🏻

#2683

   Srishti Ke Swami, Guruji Antaryami

Srishti ke swami, Guruji antaryami
Jaanein teri har naadaani
Chhipaane kee koshish na kar
Bakhshish ke liye phayla de apne kar.

Srishti ke swami, Guruji antaryami
Tere daata Hain, o praani
Kritagyata se bhaav bhar
Shukrana mein joad le apne kar.

Srishti ke swami, Guruji antaryami
Dekh sakte Hain teri aana-kaani
Saavdhaan hokar kaam kar
Guruji ke hukm par dhyan dhar.

Srishti ke swami, Guruji antaryami
Sanvaar rahe Hain teri zindagaani
Bulaakar tujhe Ve Apne dar par
Unke path par ho tu agrasar.

Srishti ke swami, Guruji antaryami
Unhonei sweekaari teri har khaami
Tujhe dikha rahe Hain Ve sahi dagar
Tu apni oar se bhi koshish kar.

Srishti ke swami, Guruji antaryami
Sarvshaktimaan sarvagyani
Ve awashya pahunchaayenge tujhe manzil par
Shraddha aur saboori se tu intazaar kar.

🌹🌹🌹🌹🌹🌹🌹

Jai Guruji 🙏🙏
Dhirja

Srishti Ke Swami, Guruji Antaryami (06/24/2025)

June 23, 2025

Om Namaha Shivaya
Aaj Ka Suvichaar 🙏🏻🙏🏻

#2682

  Ruhaani Raahon Ne

Ruhaani raahon ne
Apni baahon mein
Liya musaafir ko
Kho gaya thaa jo.

Ruhaani raahon ko
Guruji se hukm thaa mila
Ki Ve musaafir kee rooh ko
Apne poshan se dein khila.

Guruji ke hukm ka paalan kar
Ruhaani raahein bani musaafir kee humsafar
Poshit kiya unhonei musaafir kee rooh ko
Dekar prerna, utsah, aur jaagriti apni dagar par.

Raahon ne mamta ke komal phool bichhaaye
Jo unhonei Guruji se thei paaye
Musaafir ke liye khaas
Dene usey mamta ka ehsaas.

Ruhaani raahon ne
Usey lekar apni baahon mein
Aagey badhaaya
Usey sooraj dikhaaya.

Sooraj jaagriti ka
Sanket nayi aakriti ka
Aakriti, bheetar kee
Dein, Guruji ke dar kee.

Kabhi bataa kar, kabhi bin kuch kahe
Guruji musaafir ke angg sangg rahe
Usey karne agrasar
Ruhaani raahon par.

Sooraj kee dhoop musaafir ko le chali udhar
Jahaan thaa ooncha ruhaani shikhar
Guruji ke divya dar par
Jahaan musaafir ne kar joad kar
Kiya Guruji ko naman
Choom kar Unke charan.

Guruji ke aalingan se musaafir tarr gaya
Uske bheetar ka khalipan bhar gaya
Guruji ke Guru prasad se
Unke ashirwaad se.

Safal hua musaafir ka jeevan
Paakar Guruji se aisa dhan
Musaafir ka naseeb khil gaya
Usey Guru mein Bhagwaan mil gaya.

🌹🌹🌹🌹🌹🌹🌹

Jai Guruji 🙏🙏
Dhirja

Ruhaani Raahon Ne (06/23/2025)

June 22, 2025

Om Namaha Shivaya
Aaj Ka Suvichaar 🙏🏻🙏🏻

#2681

      Shehenshahon Ke Shehenshah

Shehenshahon ke shehenshah
Sambhaalein jis bhakt kee raah
Usey phir kaisa bhayy?
Usey kaisa sanshay?

Shehenshahon ke aise shehenshah Hain Guruji Maharaj
Jo pehnaate Hain Apne har bhakt ko Apne ashirwaad ka aisa taj
Jo kisee shakti ke giraane se gir sakta nahin
Jo bhakt kee laaj rakhte kabhi thakta nahin.

Har bhakt hai sadasya Guruji ke parivaar ka
Har bhakt hai praaptkarta Unke pyaar ka
Phir chaahe vo meet bannkar rahe ya das
Guruji ke liye toh Unka har bhakt hai khaas.

Ve dekhein sabhi ko ek nazar se
Par sabke alag hain karam
Phir bhi shehenshah Apni rehmat se
Sanvaarein sabka janam maran.

Hum bhi Apne shehenshah kee khidmat karein
Ve angg sangg Hain phir hum kyun darein
Hamaare shehenshah Hain sarvsampann
Unkee kripa se Unhee mein laagi rahe lagan.

🌹🌹🌹🌹🌹🌹🌹

Jai Guruji 🙏🙏
Dhirja

Shehenshahon Ke Shehenshah (06/22/2025)

June 21, 2025

Om Namaha Shivaya
Aaj Ka Suvichaar 🙏🏻🙏🏻

#2680

Guruji Ke Aanchal Kee Chhaaon Mein

Guruji ke aanchal kee chhaaon mein
Guruji ke kamal roopi paaon mein
Beet raha hai jeevan
Dhanya huey hain hum.

Kya kya ho raha hai sansaar mein
Yug parivartan ke dauran
Na jaane kitnee museebaton se
Guruji ne bachaayi hui hai hamaari jaan.

Milee Guruji kee meher-e-nazar
Milee Guruji kee daya bhari nadar
Varna ho rahe hotey dar-badar
Jeete jeete rahe hotey mar.

Guruji kee sharan mein ho jo surakshit
Uska toh nishchit hai hona hitt
Swayam ko is satya ke sangg rakhna har pal
Khaaskar jabb mushkil ka na mil raha ho hal.

Is satya mein hai dilaasa aur santvana
Ye satya darshaata hai Guruji ka pyaar ghanaa
Aisee hai Guruji sangg rishte kee gehraayee
Ki khud hee rusva ho jaati hai har rusvaayee.

Anmol hai Guruji ke aanchal kee chhaaon kee sheetalta
Anmol hai Guruji ke kamal roopi paaon kee nirmalta
Anmol hai Guruji dwaara sikhaayee hui bhakti kee saralta
Anmol hai Guruji se milne wali mamta kee komalta.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ke Aanchal Kee Chhaaon Mein (06/21/2025)