Chaloon Guruji Ke Darbar (06/11/2025)

June 11, 2025

Om Namaha Shivaya
Aaj Ka Suvichaar 🙏🏻🙏🏻

#2670

Chaloon Guruji Ke Darbar

Chaloon Guruji ke darbar
Karne Unka shukrana baarambaar
Unkee kripaayein hain itnee beshumaar
Ki mai kar na paaoon unka poora izhaar.

Mere buss mein toh hai nahin shukrana bhi karna yaad
Isliye Guruji se karti rehti hoon fariyaad
Ki kabhi bhooloon na karna Unka shukrana
Chaahe jaisa bhi chal raha ho jeevan ka fasaana.

Kabhi likhne bhi lagoon zindagi ka afsaana
Toh bhi karti rahoon shukrana
Har khatti meethi kahaani ka
Saari kee saari zindagaani ka.

Jo kasht mere liye thei andekhe anjaane
Ve bhi Guruji ne jaane
Unn kashton ko karte Hain Ve kumm
Kumm karte Hain mere saare gumm.

Jin mushkilon kee mujhe hai khabar
Unpar bhi hoti rehti hai Guruji kee yakeenan nadar
Har khushi mere jeevan kee
Guruji ke ashish kee vajeh se hai
Har tripti mere jeevan kee
Guruji kee bakhshish kee vajeh se hai.

Jo Paramatama dete Hain har sukh
Jo har lete Hain har dukh
Unka shukrana karte karte ye jaan bhi chali jaaye
Toh bhi sochoongi ki mere sabhi shwaas achche se kaam aaye.

Jo mere parde dhakte Hain
Mujhe surakshit rakhte Hain
Unka har pal shukrana anantam
Unke charnon mein har kshan mera vandan.

🌹🌹🌹🌹🌹🌹🌹

Jai Guruji 🙏🙏
Dhirja

Chaloon Guruji Ke Darbar (06/11/2025)