Month: June 2025

June 10, 2025

Om Namaha Shivaya
Aaj Ka Suvichaar 🙏🏻🙏🏻

#2669

Aap Hee Ka Sahaara Hai

Saari sangat ko bakhshne wale Guru sarkar
Aap hee ka sahaara hai, priya bakhshanhaar
Aapke siwa sunaani nahin hai kisee aur ko apni pukaar
Kyunki kaheen aur jaana nahin chod kar Aapka dwaar.

Zindagi kee bahaaron aur tufaanon ka shukrana
Unhonei jod kar rakha hua hai Aapse, Guruvar
Bahaaron mein khush rehna hota hai aasaan
Lekin haunsla todne kee taakat rakhte hain tufaan.

Shukr hai Aapke saath ka
Varna abb takk toot jaati
Ye toh Aap Hain jo chalaate Hain
Varna meri himmat mujhse rooth jaati.

Bataa kar toh nahin aaye jeevan ke koi bhi tufaan
Lekin shukr hai ki Aapko hota hai inka gyan
Aap sarvgyani jaante Hain sab
Aaj bhi Aap jaante Hain aur Aap hee jaante thei tabb.

Aap hee jaanein kal ke baare mein
Mai toh buss khadi hoon Aapke dwaare mein
Maangne bakhshishein Aap bakhshanhaar se
Bakhshe bina na lautaana mujhe Apne dwaar se.

Aap Hain jyot ruhaani
Aapke sahaare hai ye zindagaani
Hoti rahegi jo Aapki meharbaani
Toh sambhali rahegi ye nimaani deewani.

🌹🌹🌹🌹🌹🌹🌹

Jai Guruji 🙏🙏
Dhirja

Aap Hee Ka Sahaara Hai (06/10/2025)

June 9, 2025

Om Namaha Shivaya
Aaj Ka Suvichaar 🙏🏻🙏🏻

#2668

         Ik Raat Ko Jabb Mai Soyi…

Ik raat ko jabb mai soyi
Ek divya swapn mein khoyi
Pahunchi mai ik upvan mein
Anandit si hui mann hee mann mein.

Sainkdon kaliyan aur phool thei vahaan
Jhuk kar choom raha tha jinhe aasmaan
Har phool kee har pankhudi par
Likha hua thaa ‘Guruji’ anokhe ruhaani rangg se
Hawaa bhi gaa rahi thi Guruji ke geet
Uskee shokhi mein thi Guruji ke liye preet.

Har patte mein rangg haraa
Guruji kee prerna se thaa bharaa
Ped paudhe khel rahe thei dhoop chhaaon ka khel
Bahut suhaana lagg raha thaa Unka taal-mel.

Ik taruvar ke neeche dikha mujhe ik chabutaraa
Jiske paas ek bahut sundar purush thaa khada
Virat sa thaa, pehney huey chola rangeen
Lagg raha thaa sooraj aur chand se bhi zyada haseen.

Unhonei mujhe haath ke ishaare se bulaaya
Mera toh mann harshaaya
Mai daud kar gayi Unke paas
Mujhe hua ruhaani khushboo ka ehsaas.

Mai jabb le rahi thi anand khushboo ka
Toh jaise Unhonei nireekshan kiya meri rooh ka
Aisee thi prakampan
Ki Unkee oar aakarshit hua mera mann.

Yakeen honei lagaa ki Ve nahin Hain purush saadhaaran
Unke tej aur Unkee chhavi mein dikh rahe thei Bhagwan
Unke charnon mein jhuk kar mainey kiya naman
Mujhe lagaa ki honei lagaa mere antas ka pavitrikaran.

Mai ‘Guruji’, Unhonei kaha swayam
Mainey namaste kiya jhuka kar tann aur mann
Sir uthaaya toh Ve thei jaa chukey
Mere paaon toh kuch kshan vaheen rahe rukey.

Mai neend se jaagi
Guruji ke swaroop kee oar bhaagi
Mai phooli nahin samaayee
Guruji ko dekh kar muskuraayee
Kiya mainey kripalu Guruji ko dhanyawaad
Ki Unhonei dee swapn darshan kee saugat.

🌹🌹🌹🌹🌹🌹🌹

Jai Guruji 🙏🙏
Dhirja

Ik Raat Ko Jabb Mai Soyi… (06/09/2025)

June 8, 2025

Om Namaha Shivaya
Aaj Ka Suvichaar 🙏🏻🙏🏻

#2667

Pichhle Karmon Ka Bhaar

Pichhle karmon ka bhaar
Bhavishya kee chinta ka bhaar
Inhe dho kar thakta hai tu baar baar
Lekin abb tujhe Guruji ne bulaaya hai Apne dwaar
Ve karenge tera uddhaar
Isliye himmat na haar.

Pichhle karam tu sakta nahin badal
Aur bhugatna bhi padega phal
Par Guruji kee sharan mein ye jaayenge tal
Ve bhaar halka karenge aur denge tujhe manobal.

Tere buss ka hai hee nahin ye bhaar uthaana
Guruji ne tujhse pehle ye satya hai jaana
Lete huey Guruji ka naam
Unpar bharosa rakhna hai tera kaam
Jinhonei itnon ko sambhaala hai, Ve tujhe bhi sambhaalenge
Tujhe kashton ke har jaal se nikaalenge.

Guruji kee leela hai bahut mahaan
Dariya se gehra hai Unkee daya ka daan
Tu jaanta hai ki Unkee daya se tujh mein hain praan
Unka shukrana kar aur kar praanon ka sammaan.

Guruji Maharaj ne bakhsha hai tujhe aaj
Ve sanvaar rahe Hain tere kaaj
Niyati ko badalne kee kshamta rakhte Hain sartaj
Har tufaan ka saamna karne mein saksham hai Unke naam ka jahaaz.

Guruji kee kripa se is jahaaz par hua hai tu savaar
Shraddha aur saboori rakh, bharose se kar intazaar
Chinta chod kar Guruji ka chintan kar baarambaar
Guruji sada surakshit rakhenge tera ghar parivaar.

🌹🌹🌹🌹🌹🌹🌹

Jai Guruji 🙏🙏
Dhirja

Pichhle Karmon Ka Bhaar (06/08/2025)

June 7, 2025

Om Namaha Shivaya
Aaj Ka Suvichaar 🙏🏻🙏🏻

#2666

Vibhooti Aapke Dham Kee

Param poojya Guruji Maharaj,

Vibhooti Aapke dham kee
Anubhooti Aapke naam kee
Prerna Aapke paigaam kee
Daat subah aur shaam kee
Ye Aapki aseem daya hai mujh par
Shukr hai ki Aapne bakhsha hai ye safar.

Kaamna Aapke deedar kee
Bhavna Aapse pyaar kee
Lau Aapki leela aparampaar kee
Pratibha Aap paalanhaar kee
Sabb hai Aapki nadar ka asar
Shukr hai ki Aapne bakhsha hai ye safar.

Suraksha Aapke kamal charan kee
Saugat Aapki sukhad sharan kee
Ichcha Aapke manan kee
Yogyata Aapke simran kee
Ye hain kyunki hui hai Aapki meher-e-nazar
Shukr hai ki Aapne bakhsha hai ye safar.

Rangat Aapke rangg kee
Kashish Aapke satsang kee
Khushkismati Aapke ruhaani sangg kee
Chaahat bandagi ke har angg kee
Sab hoti hai Aapki kripa se safal
Shukr hai ki Aapne bakhsha hai ye safar.

🌹🌹🌹🌹🌹🌹🌹

Jai Guruji 🙏🙏
Dhirja

Vibhooti Aapke Dham Kee (06/07/2025)

June 6, 2025

Om Namaha Shivaya
Aaj Ka Suvichaar 🙏🏻🙏🏻

#2665

                  Sunehri Hakeekat

Har pal Guruji ka shukrana kar
Bin maange tu apni jholiyan bhar
Ye hai param poojya Guruji ka dar
Yahaan Unkee marzi se chalne de safar.

Badi nahin hai teri koi arzi
Sabse badi hai Unkee marzi
Kyunki Ve hee Hain sarvgyani
Isliye tu chod apni naadaani.

Agar sach mein karna hai janam safal
Tu buss Unke hukm par kar amal
Jaise Ve chalaayein, tu chalta chal
Safal hoga tera aaj aur aane wala kal.

Jo thaa ateet
Vo gaya beet
Aane wale kal ko sudhaar
Guruji ke bharose jeevan guzaar.

Guruji par bharosa kar aisa bharpoor
Ki tera har sanshay ho jaaye duur
Guruji Hain bahut meharbaan
Tujhe denge bharosa daan.

Tu rakhta chal nek neeyat
Tu karta chal ibadat
Vaddi hai Guruji kee inaayat
Yahee hai sunehri hakeekat.

🌹🌹🌹🌹🌹🌹🌹

Jai Guruji 🙏🙏
Dhirja

Sunehri Hakeekat (06/06/2025)

June 5, 2025

Om Namaha Shivaya
Aaj Ka Suvichaar 🙏🏻🙏🏻

#2664

                    Agley Pal Takk

Koi pal agley pal takk ruk na paaya kabhi
Karmon ka itihaas bante gaye pal sabhi
Kisee ka khaata lamba sa, kisee ka chhota
Lekin khaata toh sabhi ka nishchit hai hota.

Pichhle pal bhaagya baney hain aaj ka
Kintu kora kaagaz hai har aane wala pal
Kyun na usey shuddhi aur shubhta se sajaayein
Is se pehle ki vo bhi bann jaaye beeta hua kal.

Ye nahin hoga kisee dooje par ehsaan
Ye toh hai hamaara hee imtehaan
Guruji toh rehte Hain angg sangg
Ve hee denge imtehaan ke parche par ankk.

Ankk zyaada hongei ya kumm
Unse tayy hongei bhavishya ke hamaare khushi aur gumm
Guruji kee rehmatein hain kayi hazaar
Lekin thoda toh uthaana hee hoga apne karmon ka bhaar.

Guruji kee yaad mein rehkar denge ye imtehaan
Toh satark rahenge hum insaan
Varna achet karne ke liye nahin karna padta zyaada prayaas
Is kalyuga kee hai ye kala khaas.

Pal toh rukenge nahin, lekin ik din ruk jaayenge shwaas
Har pal ka sadupyog karna kaheen reh na jaaye ye khayaal bann kar buss ik aas
Isliye, sachche dil se Guruji se karein ardaas
Ki har pal ko shuddhi aur shubhta se sajaakar banaa lein hum khaas.

🌹🌹🌹🌹🌹🌹🌹

Jai Guruji 🙏🙏
Dhirja

Agley Pal Takk (06/05/2025)

June 4, 2025

Om Namaha Shivaya
Aaj Ka Suvichaar 🙏🏻🙏🏻

#2663

                     Bin Bhaav Ke…

Bin bhaav ke gyan rahe adhoora
Bin bhaav ke adhoori hai bhakti
Bhaav sakaraatmak ho toh de anukool shakti
Jo baney gyan aur bhakti kee yukti.

Bhaav, shraddha aur pyaar ka
Bhaav, aitbaar ka
Bhaav, sakaraatmak
Bhaav, adhyatmik.

Bhaav, nirantar chintan ka
Bhaav, sarvsamarpan ka
Bhaav, neevenpann ka
Bhaav, bholepann ka.

Bin Guruji ke ashish ke
Aise bhaav bhi na aayein bheetar
Jo aise bhaav aa jaayein
Phir bakhshishon se bharaa hai Guruji ka dar.

Param poojya Guruji, Aapse hai fariyaad
Mann mein basee rahe yoon Aapki yaad
Ki jo bhi bhaav karein Aapko prasann
Unhee se bhaavuk rahe ye mann har kshan.

Kyunki Aapko kar paaoon prasann
Toh chaahiye nahin aur kuch
Aapko prasann karne ke siwa
Baaki har tamanna hai bilkul tuchh.

🌹🌹🌹🌹🌹🌹🌹

Jai Guruji 🙏🙏
Dhirja

Bin Bhaav Ke… (06/04/2025)

June 3, 2025

Om Namaha Shivaya
Aaj Ka Suvichaar 🙏🏻🙏🏻

#2662

    Guruji Kirpadhaari

Guruji se duur karne lagey jo bhi prabhaav
Uss se duur rehne ka kar lo nirantar chaav
Guruji kee kripa se Unke prati badhaao prem ka aisa bhaav
Ki Unhee kee preet ke saagar mein rahe tumhaare jeevan kee naav.

Zaroori nahin ki ye kaam ho aasaan
Aise prabhaav bahut aakarshit karte hain
Ruhaani oonchaayee se gira dete hain
Mann ka chayyn bhi chheen lete hain.

Pataa bhi nahin chalta hai aur badh jaati hai Guru se duuri
Isliye satark rehna hai bahut hee zaroori
Manobal badhaao karte huey Guruji kee ‘ji huzoori’
Taaki mann ko pratikool prabhaav ke samaksh na ho majboori.

Safar mein aandhi tufaan toh aayenge
Naav ko kayi baar hilaayenge
Par naav ko Guruji rakhenge surakshit
Karte huey tumhaara hitt.

Guruji ke kareeb aate rehne ka karte rehna tum prayaas
Ve naav ke sanchaalak, tum bann kar rehna Unke das
Unkee yaad mein rehne se hota rahega Unse kareebi ka ehsaas
Unkee preet ke saagar kee har boond bujhaayegi mamta kee tumhaari pyaas.

Safar mehekega Guruji kee preet kee khushboo se
Taar judi rahegi Guruji kee tumhaari rooh se
Guruji ke kareeb aate rehne kee koshish rakhna jaari
Tumhe sada Apne aanchal mein sanjo kar rakhenge Guruji kirpadhaari.

🌹🌹🌹🌹🌹🌹🌹

Jai Guruji 🙏🙏
Dhirja

June 2, 2025

Om Namaha Shivaya
Aaj Ka Suvichaar 🙏🏻🙏🏻

#2661

           Rooh Kee Raahat Ke Liye

Paap bhi kiye hongei
Punya bhi kiye hongei koi
Toh mrityu lok mein aaye
Phir aur karam kamaaye.

Aasaan hai rakhna ye silsila jaari
Aane jaane kee aati rahegi phir baari
Dooja vikalp bhi hai jismein Guruji Hain madadgaar
Unke vachan maankar karvaayein apna uddhaar.

Jabb takk hota rahe janam maran
Tabb takk miltee rahe Guruji kee sharan
Toh kuch nahin ho sakta is se behtar
Kyunki sadgati nishchit hai idhar.

Bheetar se saaf karne ka kaam
Apne buss kee baat kahaan?
Shukr hai Guruji karte Hain ye
Koi na hai Unke jaisa meharbaan.

Guruji chala rahein Hain toh hum paa rahe hain chal
Guruji kasht kaat rahe Hain toh hee kasht rahe hain tal
Mrityu lok mein jeete huey milee hai shehenshah-e-srishti kee sharan
Sarvashreshth mauka hai ki sanvaar lein janam maran
Rooh kee chaahat ke liye
Rooh kee raahat ke liye.

🌹🌹🌹🌹🌹🌹🌹

Jai Guruji 🙏🙏
Dhirja

Rooh Kee Raahat Ke Liye (06/02/2025)

June 1, 2025

Om Namaha Shivaya
Aaj Ka Suvichaar 🙏🏻🙏🏻

#2660

       Khushnaseebon Ko Milta Hai

Zindagi beeti jaa rahi hai
Har ghadi yaad dila rahi hai
Ki faisle kee ghadi chalti jaa rahi hai
Aur maut nazdeek aa rahi hai.

Achcha thaa ya thaa bura
Samay laut kar nahin aayega
Har tareh se guzra hua samay
Koi na koi seekh dekar jaayega.

Samay ke is vyavhaar ko
Na mai badal sakti hoon na tum
Samay kee is raftaar mein
Buss, hona nahin hai gumm.

Guruji ke chintan mein rehte huey
Samay ke bahaav sangg behte huey
Nibhaane hongei apne farz
Utaarna hoga karmon ka karz…

…Jo Guruji kee kripa bin nahin mumkin
Beshak lagey rahein raat din
Kyunki Ve Hain karmadaata karunanidhaan
Karma katvaane wale pooran Guru mahaan.

Guruji kee dee hui prerna
Guruji kee dee hui chetna
Guruji kee dee samvedana
Kumm kar sakti hai har vedana.

Isliye samay kee na rukne wali gati ko rakhte huey maddenazar
Guruji se ruhaani taar jodkar bitaayein ye safar
Guruji kee mahima jaan lein
Unkee baatein maan lein
Guruji aaye karne sangat ka uddhaar
Khushnaseebon ko milta hai aise Guru ka pyaar.

🌹🌹🌹🌹🌹🌹🌹

Jai Guruji 🙏🙏
Dhirja

Khushnaseebon Ko Milta Hai (06/01/2025)