Raaston Se Poochha Deewane Ne (07/29/2025)

July 29, 2025

Om Namaha Shivaya
Aaj Ka Suvichaar 🙏🏻🙏🏻

#2718

    Raaston Se Poochha Deewane Ne

Raaston se poochha deewane ne
Ki manzil kitnee duur hai
Raaston ne kaha ki vahaan hai manzil
Jahaan Guruji ka noor hai.

Deewane ne raaston ko bataaya
Ki uske antas mein hai Guruji ka noor
Raaste hanse aur kehne lagey uss se
Ki phir manzil nahin hai kaheen duur.

Deewane ne Guruji se kee ardaas
Aur dhyan mein baitha Guruji ke paas
Toh Guruji usey le gaye uske bheetar
Jahaan divya noor thaa idhar udhar
Har taraf, har kann mein
Roshni karte huey uske antakaran mein
Uskee rooh ko prakashit karte huey
Uske bheetar aisee prakampan bharte huey
Ki har kona achhaadit hua Guruji ke prasad se
Aur deewana bheegta gaya Guruji ke ashirwaad se.

Ashirwaad ka amrit thaa sheetal
Deewane ko ehsaas hua itna nirmal
Ki usey mehsoos hua ki uska ye androoni safar
Safal ho raha hai pal pal.

Guruji ka thaa uspar pehra
Uska dhyan hota gaya gehra
Guruji ke jyotirmay roop ka hua usey darshan
Adbhut aur anmol thaa uske jeevan ka vo kshan.

Atmabodhswaroop darshan Guruji Maharaj ka
Banaa yathaarth uss deewane ke aaj ka
Buss, phir toh usne liya jaan aur maan
Ki Guruji kar rahe Hain uska kalyaan
Aur zaroorat nahin phir bhi de rahe Hain pramaan
Aise Hain Ve karunanidhaan.

Deewana shukrana mein yoon dooba
Ki usey aur kuch na soojha
Maan liya usne ki manzil nahin hoti duur
Jahaan hota hai Guruji ka saakshaat noor.

🌹🌹🌹🌹🌹🌹🌹

Jai Guruji 🙏🙏
Dhirja

Raaston Se Poochha Deewane Ne (07/29/2025)