Month: July 2025

July 11, 2025

Om Namaha Shivaya
Aaj Ka Suvichaar 🙏🏻🙏🏻

#2700

Bann Kar Guruji Ka Deewaana

Bade pyaar se Guruji mere
Likhte rehte Hain mera lekha dobara
Shukr hai Unkee marzi chalti hai
Varna mujhe kaise milega kinaara.

Mujh rooh ko, jo lekar is deh ka bhaar
Chal padi karne bhav saagar ko paar
Shukr hai Guruji ke haathon mein hai patvaar
Varna yakeenan reh jaaoongi kaheen beech majdhaar.

Abb toh is tathya mein hai satya poorna
Ki Guruji kalyaan karenge sampoorna
Unhe jaise jaise sahi lagega jabb jabb
Ve hee mere Guru Hain, aur Ve hee Hain Rabb.

Dharti par rehte huey
Rabb ko Guru ke roop mein paana
Ho hee nahin sakta
Is se uttam koi bhi khazaana.

Isliye kehti rehti hoon apne mann se
Ki vo chod de abb ghabraana
Aur zindagi ke din guzaar le
Bann kar Guruji ka deewaana.

🌹🌹🌹🌹🌹🌹🌹

Jai Guruji 🙏🙏
Dhirja

Bann Kar Guruji Ka Deewaana (07/11/2025)

July 10, 2025

Om Namaha Shivaya
Aaj Ka Suvichaar 🙏🏻🙏🏻

#2699

                   Guru Aur Shishya

Guru aur shishya ka naata itna pavitra
Guru sudhaarein shishya ka charitra
Dein Ve shishya ko adhyatmik gyan
Karein Ve shishya ka sampoorna kalyaan.

Har din shubh hai karne ke liye Guru ka dhanyawaad
Har din paawan hai paane ke liye Guru ka ashirwaad
Kintu Gurupurnima ka utsav iske mahatva ko karta hai aur bhi roshan
Ki kitna zaroori hai shishya ka Guru ke dwaara poshan
Aur anivaarya hai shishya ka apne Guru ke prati shraddha bhaav aur aadar satkaar
Isliye aaj ke din khaas taur par vyakt karein hum Guruji ka aabhaar.

Apni saari sangat ko andhere se prakash kee oar le jaane aaye Guruji
Anginat shishyon ke soye bhaagya jagaane aaye Guruji
Aaj takk bhi rahe Hain Apni sangat ko Ve taar
Aagey bhi karte rahenge Apne bachchon ka uddhaar.

Guruji Hain Guru ke roop mein Bhagwaan
Sangat hai Unkee shishya, sewak, aur santaan
Bin Guruji ke gati nahin
Unke bin sumati nahin
Ve Hain toh niraasha mein bhi hai asha
Unke bin poorna na ho oordhvagati kee abhilasha.

Sunvaate Hain Apne saanidhya mein Gurbani
Bakhshte Hain sewa aur sadh sangat ka sangg
Sangat ke kasht lete Hain Ve swayam par
Apne shishyon ka maargdarshan karte Hain jeevan bhar.

Vyasa Poornima ke mahaan naam se shuru hua ye utsav
Sabhi Guruon ka dhanyawaad karne ka hai ye avsar
Aaj ke khaas din par param poojya Guruji Maharaj ko shukrana anantam
Ki Unhonei mujhe sweekaar kar sanvaar diya hai mera jeevan.

🌹🌹🌹🌹🌹🌹🌹

Jai Guruji 🙏🙏
Dhirja

Guru Aur Shishya (07/10/2025)

July 9, 2025

Om Namaha Shivaya
Aaj Ka Suvichaar 🙏🏻🙏🏻

#2698

             Ye Rishta

Guruji sunte Hain rooh kee har awaaz
Guruji jaanein hamaari rooh ka har raaz
Aakhirkaar ye rishta hai hee ruhaani
Rooh se rooh ke judne kee hai ye kahaani.

Ho ya nahin hamein ye gyat
Kintu hai ye bilkul pakki baat
Ki hamaari rooh Paramatama se milne ke liye utsuk hai
Veh janam maran se mukt honei kee ichchuk hai.

Lekin maya, vikaar, aur karmon ka hai jo chakkar
Ismein reh kar hum ye bhool jaate hain aksar
Aur yathaarth se hokar bekhabar
Safal nahin kar paate ye safar.

Bina kisee vikarshan ke
Guruji ke simran aur chintan se
Judi rahe Guruji se jo seedhi ruhaani taar
Toh hoti rahengi Unse baatein do chaar.

Kabhi baatein hongi zyada, kabhi kumm
Dheere dheere is marham se upchaarit hotey rahenge hamaare gumm
Duvidhaaon se bhara hai ye jeevan
Kitnee sukhdaayi hoti hai aise mein Guruji kee sharan.

Ruhaani taar kamzor na padne paaye
Guruji se rahe ye ardaas
Unkee shakti toh hai aseem
Kintu hamaari kshamta hai ksheen
Isliye anivaarya hai Guruji kee hum par meharbaani
Taaki Unse ruhaani taar joad paayein hum praani.

Is ruhaani rishte par sada hai Guruji ka pehra
Unkee kripa se ye rishta hota rahe gehra
Koi rishta nahin is rishte se zyada anmol
Is rishte ko bayaan na kar paaye koi bhi duniyavi bol.

🌹🌹🌹🌹🌹🌹🌹

Jai Guruji 🙏🙏
Dhirja

Ye Rishta (07/09/2025)

July 8, 2025

Om Namaha Shivaya
Aaj Ka Suvichaar 🙏🏻🙏🏻

#2697

                    Zindagi Mein…

Zindagi mein aksar aate hain aise pal
Jabb din mein bhi sooraj jaata hai dhal
Mann ke gagan ka
Aisa hai kissa jeevan ka.

Aise mein lekar Guruji ka naam
Sunehri ho jaati hai bin sooraj ke bhi shaam
Kyunki sooraj se kaheen zyada roshan hai Guruji ka naam
Sooraj toh Guruji ko bhi karta hai pranaam.

Asha ka pal ho ya niraasha ka
Santosh ka pal ho ya ho abhilaasha ka
Shukrana ka pal ho ya shikayat ka
Ikraar ka pal ho ya ho ibadat ka
Guruji ke saanidhya mein beete har pal
Toh prerna se paripoorna hoga aaj aur kal.

Prerna, parwardigaar kee
Suraksha, taaranhaar kee
Preet, paalanhaar kee
Hukoomat, Guru sarkar kee.

Guruji ke hukm ka paalan karein
Unhee ke naam se har shwaas bharein
Unhee ke samarpan mein beete ye zindagi
Unke charnon mein miltee rahe Unkee bakhshindagi.

🌹🌹🌹🌹🌹🌹🌹

Jai Guruji 🙏🙏
Dhirja

Zindagi Mein… (07/08/2025)

July 7, 2025

Om Namaha Shivaya
Aaj Ka Suvichaar 🙏🏻🙏🏻

#2696

       Avatar Divas Hai Guruji Ka

Avatar Divas hai Guruji ka
Sabko lakh lakh hon badhaayiyan
Aao hum sab mil kar ke
Karein Guruji kee vadiyaayiyan.

Guruji ke mahima kee gaatha
Guruji ke sangg pyaar ka naata
Sabse pyaari saugat hai
Jis se banti har bigdi baat hai.

Har pal har sangat ke angg sangg
Hotey Hain Guruji Maharaj
Har sangat ke sir par hai
Unke ashirwaad ka taj.

Shiv avatari param poojya Guruji pyaare
Jinhonei anginat lamhe tapp mein guzaare
Swayam bulaate Hain bhakt ko Apne dwaare
Hain Ve saari sangat ke akhand sahaare.

Tithi Unke maanav janam kee
Bahut mainey rakhti hai saari sangat ke liye
Kitnon ke naseeb sanvaare
Jabb takk Ve maanav roop mein jeeye
Aur maanav roop ke pashchaat bhi Unka har swaroop
Aisa hai maano Unka saakshaat roop
Jiske dwaara sangat joad paati hai Unse ruhaani taar
Ye sab hai Guruji kee rehmat aparampaar.

Jyot Hain Ve divya aur akhand
Na aadi Unka aur na koi antt
Unke charnon mein hai sachkhand
Jahaan sukh hai anant.

Guruji ka avatar divas par chetna ko jagaayein
Guruji kee prerna se banda bann-ne kee poori koshish mein lagg jaayein
Nirantar baras rahi hai Guruji kee aisee anukampa aparampaar
Ki ek boond se hee ho sakta hai hamaara sampoorna uddhaar
Neevenpann se natmastak hokar Unke charan mein
Shukrana karein ki baandha hai Unhonei hamein is nirmal bandhan mein.

Guruji ka mahaatmya badhta rahe har din
Shwaas na aaye jaaye tann se Unkee yaad ke bin
Guruji kee sharan mein aane se pehle jeevan thaa kitna adhoora
Ye ehsaas hua tabb se jabb se mila pyaara Guruvar poora.

🌹🌹🌹🌹🌹🌹🌹

Jai Guruji 🙏🙏
Dhirja

Avatar Divas Hai Guruji (07/07/2025)

July 6, 2025

Om Namaha Shivaya
Aaj Ka Suvichaar 🙏🏻🙏🏻

#2695

Mere Guruji Sundar Sundar

Mere Guruji sundar sundar
Rutba aalishaan
Aaye bannkar maanav
Insaan ke roop mein Bhagwaan.

Mata ji aur Bapu ji ko mila avsar
Ki MahaShiv janmey Unke ghar
Nanha baalak Bhagwaan swayam
Khila mata ji Bapu ji ka ghar aur upvan.

Bachpan se hee Guruji kee leela
Thi insaani soch ke daayre ke paar
Jaise jaise bade huey Ve
Ye jaan-ne lagaa Unka ghar parivaar.

Yuvavastha se hee Guruji ne
Kitnon ka kalyaan kiya shuru
Unkee sangat badhne lagi
Kitnon ko apnaane lagey Ve pooran Guru.

Jalandhar aur Chandigarh ke baad
Delhi mein Guruji aaye
Kitne sheheron aur gaaon ke vaasiyon ke
Bhaagya Unhonei jagaaye.

Bhagwaanon ke Bhagwaan Guruji
Karte rahe sabka kalyaan
Kayion ne samjha Ve karte Hain chamatkaar
Chamatkaar ko honei lagaa namaskaar
Guruji aaye dene asal ruhaani gyan
Mitaane sangat ka agyan
Kuch toh seekhe, kuch thei naadaan
Isliye rahe asal cheez se anjaan.

Sewa, satsang, simran kee daat
Bakhshi sangat ko Guruji ne din raat
Bakhsh rahe Hain aaj takk bhi
Leela Unkee hai akath aur athak bhi.

Sangat ka shuddh bhakti bhaav
Buss, iska hai Guruji ko chaav
Dayalu mein sabse dayalu Hain Ve
Kripalu mein sabse kripalu Hain Ve.

Guruji kee drishti hai srishti ke paar
Sabse paawan hai Unka pyaar
Unkee mahima mahaan aur aparampaar
Sabko Unke avatar divas kee shubhkaamnaayein kayi hazaar.

🌹🌹🌹🌹🌹🌹🌹

Jai Guruji 🙏🙏
Dhirja

Mere Guruji Sundar Sundar (07/06/2025)

July 5, 2025

Om Namaha Shivaya
Aaj Ka Suvichaar 🙏🏻🙏🏻

#2694

                  Rabb Miley Hain

Guruji ke roop mein Rabb miley hain
Hum sangat ke toh naseeb khiley hain
Milee hai taaranhaar kee goad
Unke naam kee chunri odh
Chalte jaayein jeevan bhar
Unke hee nakshe kadam par
Toh jeevan ka safal hona nishchit hai
Kyunki Guruji ke har hukm mein bhakt ka hitt hai.

Hamaari soch hai chhoti
Neeyat aksar ho jaati hai khoti
Kamzor hai hamaari nazar
Deerghakaalik hai Guruji kee nadar.

Vo kehte hain na
Der sahi par andher nahin
Vaisa hee Guru dar par hai
Vilamb mein bhi hai kalyaan
Kyunki Guruji Hain karunanidhaan.

Dil thaam ke
Unka naam le
Chalte jaana hai vishwaas se
Is aas se
Ki miltee rahe Satguru kee sharan
Chaahe lene padein kitne bhi janam
Unke charnon mein hai sabse uttam sthaan
Hamaare Guruvar Hain Bhagwaanon ke bhi Bhagwaan.

🌹🌹🌹🌹🌹🌹🌹

Jai Guruji 🙏🙏
Dhirja

Rabb Miley Hain (07/05/2025)

July 4, 2025

Om Namaha Shivaya
Aaj Ka Suvichaar 🙏🏻🙏🏻

#2693

              Dekho, Bhor Ho Gayi

Dwaar mai Unke aayi
Mai toh dhanya ho gayi
Mai toh Guruji kee pyaari
Goad mein so gayi.
Aisa Unka noor
Aise Unke dastoor
Andhera hua duur
Dekho, bhor ho gayi.

Guruji ke pyaar se
Tarne lagi mai
Unkee bhakti se
Nikharne lagi mai
Unke mandir jaane ko dekho
Daud mai gayi
Andhera hua duur
Dekho, bhor ho gayi.

Guruji kee hee yaad mein
Jaagoon so-oon mai
Unke dhanyawaad mein
Hansoo ro-oon mai
Unke prem bhaav mein
Vibhor ho gayi
Andhera hua duur
Dekho, bhor ho gayi.

Guruji Shiv ka roop Hain
Jagat ke Hain Ve naath
Bade bhaag mere
Sada hotey Hain Ve saath
Unse judkar pakki meri
Doar ho gayi
Andhera hua duur
Dekho, bhor ho gayi.

🌹🌹🌹🌹🌹🌹🌹

Jai Guruji 🙏🙏
Dhirja

Dekho, Bhor Ho Gayi (07/04/2025)

July 3, 2025

Om Namaha Shivaya
Aaj Ka Suvichaar 🙏🏻🙏🏻

#2692

                 Sabb Sundar Hai…

Karunamayi jheel ka amrit hai behta
Vayu mein Guruji kee khushboo ka ehsaas hai rehta
Panchhiyon kee chulbuli si chehek
Phoolon kee khatti meethi mehek
Guruji kee baani goonje chintan mein
Guruji ka sparsh mehsoos ho manan mein
Guruji ke saanidhya mein har pal baithi rahoon
Kabhi Unkee sunoon, kabhi apni kahoon
Ya phir ruhaani chuppi mein beet jaaye samaa
Sabb sundar hai jabb se milee Guruji kee panaah.

Isey bhakti kahoon ya pyaar
Ya kahoon Unkee vadiyaayee ka ikraar
Jabb se Guruji ne kiya hai mujhe sweekaar
Ve bann gaye Hain mera sansaar.

Ve toh pehle se hee thei mere jeevan ka aadhaar
Kintu mai theheri agyani
Ve toh kab se baney huey Hain mere kirpadhaar
Aur mai Unkee bachchi nimaani.

Guruji kee daya kee drishti hai
Toh hee toh ye saari srishti hai
Mai hoon is rachna mein na ke baraabar
Meri boond kee si bhi aukat nahin, aur Guruji mahasaagar.

Jo bhi mai hoon, jaisi bhi hoon
Hoon mai rachna Unn nirmaata kee
Jis bhi haal mein hoon mai
Shukrguzaar hoon mai in daata kee.

Dheere dheere chod rahi hoon
Karna apne haal par Unse sawaal
Jabb Guruji swayam rahe Hain mujhe paal
Toh Unhee ke bharose hai haal aur chaal.

Unkee kripa banee rahe
Unse meri preeti ghani rahe
Maang chhoot jaaye, samarpan jeet jaaye
Guruji kee sharan mein ye safar beet jaaye.

🌹🌹🌹🌹🌹🌹🌹

Jai Guruji 🙏🙏
Dhirja

Sabb Sundar Hai… (07/03/2025)

July 2, 2025

Om Namaha Shivaya
Aaj Ka Suvichaar 🙏🏻🙏🏻

#2691

   Guruji Maharaj Aur Unkee Sangat

Guruji Maharaj aur Unkee sangat ka naata
Sangat santaan hai aur Guruji pita aur mata
Guruji meet bhi
Dein bhai aur mitr kee preet bhi
Jo hai das, Guruji Hain uske swami
Hain Ve Adiyogi aur antaryami
Jis roop mein jo bhakt chaahe
Vo Guruji se vaisa pyaar paaye.

Buss, iraada ho sachcha
Bhaav ho achcha
Guruji toh Hain Ashutosh
Maaf karein adhiktar dosh.

Ve hee Guru, Ve hee Parameshwar
Ve hee sangat ke vaidyanatheshwar
Aadarneeya sartajon ke sartaj
Aise prataapi Hain Guruji Maharaj.

Doobte ko tayrna sikhaate Hain Guruji
Usey saagar paar karaate Hain Guruji
Utsah-heen ko dete Hain utsah
Gumraah ko chalaate Hain sahi raah.

Riddhiyan siddhiyan toh maamuli sa khel hai Guruji ke liye
Jo kalyaan koi devi devta na kar paaye, Unhonei toh vo kalyaan Hain kiye
Unhe Apni sangat lagti hai bahut hee pyaari
Jaise ho vo Unkee bitiya rajdulaari.

Unke bashar chola chodne ke bhi baad
Kaayam Hain Unke diye ashirwaad
Judti jaa rahi Unse aur bhi sangat
Ye Hai Unkee kripa kee rangat.

Guruji kee karuna hoti rahe sabb par
Saari sangat vaari jaaye Unn Rabb par
Andhere se ujaale mein laane wale
Guruji Hain saari sangat ko chaahne wale.

Jinkee sharan mein hee hai sachkhand
Jinkee mahima ho aisee anant
Unn SadaShiv Guruji Maharaj ko namaskaar
Unhe dhanyawaad baarambaar.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Maharaj Aur Unkee Sangat (07/02/2025)