Month: August 2025

August 31, 2025

Om Namaha Shivaya
Aaj Ka Suvichaar 🙏🏻🙏🏻

#2751

     Tum Guruji Ka Deewana Bann…

Mishrit vyavhaar ke is sansaar mein
Duniya ke vyaapaar mein
Guruji sangg waqt bitaana ho jaata hai mushkil aksar
Lekin gavaana matt jabb miley iska avsar.

Beshak lagey majboori
Par karma katna bhi hai zaroori
Nibhaate nibhaate farz
Utar jaayega karmon ka karz.

Chalte phirte dincharya ke dauran
Yaad karo Guruji ko aur lo Unka naam
Mehsoos hoga tumhe Unka pyaar
Mann mein aayenge Guruji ke vichaar.

Anand Guruji mein magan rehne ka
Bhaav Unke pyaar mein behne ka
Hoga jitna saral aur sheetal
Roam roam hoga utna hee nirmal.

Guruji kee kripa jaayegi baras
Guruji ko zaroor tum par aayega taras
Kar denge Ve tumhe har maajre se beparwaah
Yoon bhar denge tumhaare bheetar Ve Apne liye chaah.

Buss, phir jaisi bhi hogi paristhiti
Guruji mein leen hogi mann kee sthiti
Tumhe Unka har hukm hoga sweekaar
Unkee har leela mein dekh paaoge tum Unka pyaar.

Guruji ka hee khayaal hoga tumhaare mann mein
Poornata hogi tumhaari oar se samarpan mein
Deewane honei lagoge Guruji ke tum isee janam mein
Ye deewanapan chalkega tumhaare har karam mein.

Agar sach mein hai ye aas
Toh karte raho prayaas
Bann kar raho Guruji ke das
Ve denge tumhe deewanepann ka ehsaas.

Tum Guruji ka deewana bann
Guruji mein rehte chaloge magan
Khila rahega tumhaara mann
Dhanya hoga tumhaara jeevan.

🌹🌹🌹🌹🌹🌹🌹

Jai Guruji 🙏🙏
Dhirja

Tum Guruji Ka Deewana Bann… (08/31/2025)

August 30, 2025

Om Namaha Shivaya
Aaj Ka Suvichaar 🙏🏻🙏🏻

#2750

     Satya Ka Savera

Guruji ke dhyan kee soch
Bheetar ek adbhut anand bhar deti hai
Aur jabb Guruji bakhshte Hain vo dhyan
Toh vo ghadi na jaane kitne dukh har leti hai.

Yahee toh hai yatra satya kee oar
Is raaste par toh chaalaakiyan chod
Varna na raasta tayy hoga na hee manzil milegi
Aur ye atma ek joni se doosri joni mein chalti chalegi.

Vaise hee atma shaayad thaki ho
Kyunki abb takk Parabrahm ko na paa saki vo
Apni deh ka rakhta hai tu itna khayaal
Apni atma ko bhi toh sambhaal
Guruji kee yaad se na ho juda
Ve Hain Guru, Parabrahm, Ishwar, Khuda
Mann se sab chod kar Unkee sharan mein aa
Idhar udhar na bhatak, dar dar thokar na khaa
Guruji Hain satya
Ve Hain tera lakshya
Guruji mein basta Rabb Hai
Unke kamal charnon mein sab hai
Satya kee oar teri yatra hee param uddeshya hai tera
Guruji kee yaad mein aagey badhte badhte mil jaayega is satya ka savera.

🌹🌹🌹🌹🌹🌹🌹

Jai Guruji 🙏🙏
Dhirja

Satya Ka Savera (08/30/2025)

August 29, 2025

Om Namaha Shivaya
Aaj Ka Suvichaar 🙏🏻🙏🏻

#2749

                     Har Jageh….

Har jageh tumhe Guruji aayein nazar
Har lamhe mehsoos ho tumhe Unkee kripa ka asar
Toh Unhee ke bharose chal raha hai tumhaara ye safar
Kuch beet gaya, baaki bhi jaayega guzar.

Beet jaayega jo pal Guruji kee yaad mein
Vo pal hoga safal
Na bujhne dena jyot jigyaasa kee
Na chodna chadhna seedhiyan abhilasha kee
Jigyaasa, atma saakshaatkaar kee
Abhilasha, Guruji se deedar kee.

Guruji ke roop mein Paramatama ne tumhe hai sweekaara
Khushkismati se milta hai pooran Guru ka sahaara
Jabb samajh jaaoge ki Guru praapti hai sabse shreshth dhan
Toh baaki har tamanna tyaag dega tumhaara mann.

Buss, phir uddeshya saaf aayega nazar
Guruji kee meher ka tumhaari koshish par hoga asar
Saarthak hoga tumhaara Guruji kee oar samarpan
Tumhe sanatan sukh degi Guruji kee sharan.

🌹🌹🌹🌹🌹🌹🌹

Jai Guruji 🙏🙏
Dhirja

Har Jageh…. (08/29/2025)

August 28, 2025

Om Namaha Shivaya
Aaj Ka Suvichaar 🙏🏻🙏🏻

#2748

            Raat Kitnee Hee Lambi…

Raat kitnee hee lambi kyun na ho
Subah zaroor aayegi
Vo raat ke parde ke peechhe chhipi hai
Waqt aane par apni chhavi dikhaayegi.

Andhere mein jeete huey
Sooraj dekhne kee tayaari karo
Andhere mein bhi Guruji angg sangg Hain
Isliye tum bilkul na daro.

Darasal toh maya hee hai andhera bhi
Asal cheez toh hai savera hee
Jo andhere mein bhi upasthit hai
Lekin tumhaara mann aisee avastha mein sthit hai
Ki usey andhera hee aata hai nazar
Ye hai maya aur karmon ke khel ka asar.

Gehra hai ye vichaar, kar lo ispar manan
Guruji kee bakshish dwaara kar lo Unka chintan
Har sawaal ka milega jawaab
Guruji kee leela sach mein hai lajawaab.

Parda chhatne par
Andhere ka ehsaas hatne par
Hoga gyanmayi anand ka ujaala tumhaare jeevan mein
Aur ruhaani spandan ka prakampan samaa jaayega tumhaare tann mann mein.

🌹🌹🌹🌹🌹🌹🌹

Jai Guruji 🙏🙏
Dhirja

Raat Kitnee Hee Lambi… (08/28/2025)

August 27, 2025

Om Namaha Shivaya
Aaj Ka Suvichaar 🙏🏻🙏🏻

#2747

          Kuch Bhi Na Aaye Samajh

Param poojya Guruvar,

Mujhe kuch bhi na aaye samajh
Uljhanein nahin rahi hain sulajh
Guruji, Aapke sahaare bin na le paaoon ek bhi shwaas
Ek Aap se hee hai mujhe aas
Kyunki jaanti hoon Aap kalyaan karta Hain
Mere liye toh ek Aap hee dukh harta Hain.

Jabb mai har din Aapke gunn gaaoon
Toh kyun koi aur darwaaza khatkhataoon
Jis dar par sab kuch paaoon
Usey chod kar kyun kaheen aur jaaoon?

Aap hee Hain mera sahaara
Aapke bin nahin mera guzaara
Jabb se mila hai mujhe Aapka dwaara
Mainey sukh dukh mein Aapko hee hai pukaara.

Bhavishya mein bhi Aapko hee pukaaroon
Jeevan bhar Aapki chhavi aur Aapki leela ko nihaaroon
Aisee khushkismati bakhshte rahiyega Aap
Aisee niyati bakhshte rahiyega Aap.

Aapki kripa se talti rahegi har qayamat
Mann jhuka rahe karne mein Aapki ibadat
Ardaas aur shukr karne kee dete rahiyega izaazat
Aapki inaayat bin mujhe na mil paaye koi bhi niyaamat.

🌹🌹🌹🌹🌹🌹🌹

Jai Guruji 🙏🙏
Dhirja

Kuch Bhi Na Aaye Samajh (08/27/2025)

August 26, 2025

Om Namaha Shivaya
Aaj Ka Suvichaar 🙏🏻🙏🏻

#2746

Apne Bheetar Kee Jyot Ko Sweekaar

Apne bheetar kee jyot ko sweekaar
Abb honei de uss se tu apna deedar
Guruji swayam Hain tere mahaan madadgaar
Ve aaj bhi sunn rahe Hain teri rooh kee pukaar.

Guruji Hain Vo jyot, ye hai tujhe gyat
Par bhool jaata hai tu ye baat
Is duniya ke mele mein rehkar
Bhautikvaad kee dhaara sangg behkar.

Bhautikvaad mein behna chod de
Guruji kee oar khud ko moad le
Unke bhaav mein behta chal
Unhe tu apni kehta chal.

Abb bhi samay hai, tu jaag
Bheed ke peechhe matt bhaag
Kar le sadh sangat ka sangg
Kyunki jaisa sangg, vaisa hoga rangg.

Jitna baithega tu Guruji ke saath
Jitnee karega Unse baat
Utna hoga tujhse tera saakshaatkaar
Buss, vaheen hoga uss divya jyot ka deedar
Jismein baste Hain Guruji swayam
Param poojya Paramatama Parabrahm.

Gehraayee mein le jaayega ye safar
Isliye na gavaa tu ye avsar
Maanav janam mila hai aur milee hai Guruji Maharaj kee sharan
Unse kareebi badhaakar sanvaar le tu apna janam maran.

🌹🌹🌹🌹🌹🌹🌹

Jai Guruji 🙏🙏
Dhirja

Apne Bheetar Kee Jyot Ko Sweekaar (08/26/2025)

August 25, 2025

Om Namaha Shivaya
Aaj Ka Suvichaar 🙏🏻🙏🏻

#2745

          Baithi Thi Mai Jheel Kinaare

Baithi thi mai jheel kinaare
Gagan mein timtima rahe thei taare
Jalaa kar kuch deeye
Ruhaani kaagaz haath mein liye
Guruji ko kar rahi thi mai yaad
Dil se nikal rahi thi Unke liye fariyaad
Guruji kee salaamati sanatan rahe
Mere Prabhu ke ashish ka amrit sada bahe
Unkee saari sangat par
Shuddh karey sabke parivaar aur ghar.

Jaise hee mann mein khayaal aaya
Mainey apna kalam uthaaya
Lagi jabb kaagaz par mai likhne
Toh kaagaz par mujhe Guruji lagey dikhne.

Guruji rahe thei muskuraa
Muskuraahat mandd aur itnee sundar
Mai ho gayi bhaav vibhor
Aur dekhti gayi Unkee chhavi manohar.

Phir leela rachi Guruji Maharaj ne
Aur likhaayee ho gayi bin mere likhe
Kaagaz par sundar alfaaz dikhe
Aur Guruji ka chehra hua ojhal
Is sab mein lagaa maano ek hee pal.

Yakayak tez hua deeyon ka ujaala
Mera mann honei lagaa matvaala
Guruji dwaara likhe alfaaz baney ik geet
Jisey gaate huey agley kayi pal gaye beet.

Guruji thei angg sangg
Unkee ruhaani khushboo thi vahaan
Itna manoram sa thaa vaatavaran
Jaise utsav manaa raha ho jahaan.

Guruji ne kiya maargdarshan
Khushboo Apne sangg liye Ve chal diye
Mai bhi ruhaani kaagaz aur kalam ke saath
Chal padi Unke madhur saath ke liye.

Chalte chalte na jaane kyun bhaagi mai
Usee samay neend se jaagi mai
Guruji ke swapn darshan ka hua ehsaas
Jo thei itne pyaare, itne khaas.

Karte huey Guruji ka shukrana
Unkee kripa se mainey din kiya shuru
Vadde bhaagya hain unn sabke
Jinhe miley Hain itne pyaare Guru.

🌹🌹🌹🌹🌹🌹🌹

Jai Guruji 🙏🙏
Dhirja

Baithi Thi Mai Jheel Kinaare (08/25/2025)

August 24, 2025

Om Namaha Shivaya
Aaj Ka Suvichaar 🙏🏻🙏🏻

#2744

     Ruhaani Unnati

Guruji ne itna prem hai deeya
Jabb se Unhonei Apne prem mein mujhe baandh liya
Tabb se azad hui mai itnee bandishon se
Tabb se ummeed prajvalit hui koshishon se
Kyunki Guruji kee maujoodagi mehsoos hoti hai angg sangg
Unkee kripa se jeevan ke chitr mein dikhne lagey hain anokhe rangg.

Shaayad ve rangg pehle se thei
Par Guruji ne dee dekhne wali nazar
Ya phir ve rangg Guruji ne bhare
Ye hai Unkee rehmat ka asar
Jo bhi hua aur jaise bhi
Guruji kee meher bin na thaa mumkin
Balki jeevan hee nahin chal sakta Unkee daya ke bin.

Jabb har daat hai Unkee hee rehmat
Toh phir har haalaat mein rehna sehmat
Hai mera farz
Taaki utar jaaye karmon ka karz
Varna na jaane kitne janam phiroongi maari maari
Isliye kyun na Guruji kee sharan mein karoon unnati kee tayyaari.

Guruji ke prem ne sanvaar dee hai meri rooh kee kismat
Unke ashirwaad se koshish karoon ki rooh hoti chale unnat
Khushnaseebi se milta hai aisa shubh avsar
Ki Sadashiv roopi Guru kee sharan mein hon agrasar
Isliye tann mann rooh se Unke charnon mein jhukaa kar sir
Unkee kripa se ruhaani unnati mein na chodoon koi kasar.

🌹🌹🌹🌹🌹🌹🌹

Jai Guruji 🙏🙏
Dhirja

Ruhaani Unnati (08/24/2025)

August 23, 2025

Om Namaha Shivaya
Aaj Ka Suvichaar 🙏🏻🙏🏻

#2743

          Gumm Kee Ghata….

Gumm kee ghata chhat jaayegi
Guruji kee meher rangg laayegi
Buss, thoda aur sabar tu kar
Guruji saath Hain, tu bilkul na darr.

Unhe chhoone se pehle tujhe koi chunauti chhoo sakti nahin
Aur Unke samaksh koi chunauti jeet sakti nahin
Kyunki Ve Hain param shaktimaan
Ve Hain Guruji Maharaj mahaan
Jo abb takk bhi karte aaye Hain tera kalyaan
Aur bhavishya mein bhi rahenge tere jeevan mein pradhaan.

Uthaate huey tere karmon ka adhiktar bhaar
Dete huey tujhe har pal itna pyaar aur dulaar
Guruji Maharaj rahe Hain tujhe taar
Karta chal tu Unpar aitbaar.

Kaafi raasta toone kar liya hai tayy
Guruji Maharaj dete rahenge aashray
Tu buss tyaagta chal apna bhay
Mann mein na aane de tu sanshay.

Guruji tere saath rahe Hain har imtehaan mein
Ve tere rakshak baney Hain jeevan ke har tufaan mein
Anant saamarthya hai Unn karunanidhaan mein
Tera uddhaar nishchit hai Unke amrit kee khan mein.

Dukh kaat kar sukh dene wale daata Hain Guruji
Bhaagya ke nirmal nirmaata Hain Guruji
Tere jeevan mein laa rahe Hain Ve sudhaar
Suhaila vela de raha hai tujhe pukaar
Shukrana karta chal tu baarambaar
Guruji se hee hai sanatan sukh ka sansaar.

🌹🌹🌹🌹🌹🌹🌹

Jai Guruji 🙏🙏
Dhirja

Gumm Kee Ghata…. (08/23/2025)

August 22, 2025

Om Namaha Shivaya
Aaj Ka Suvichaar 🙏🏻🙏🏻

#2742

              Baitha Thaa Saadhak

Baitha thaa saadhak maun mein
Sochte huey ki vo kaun hai
Guruji aaye uske samaksh
Aur dekhkar Unhe pratyaksh
Saadhak hua hairaan
Phir kehne lagey uss se Guruji mahaan
Ki Unka vo darshan hai ruhaani
Aur ruhaani hai Unkee maujoodagi
Saadhak ka mann jo hai darpan
Veh utna saaf hoga jitnee hogi uskee bandagi.

Guruji ne kaha saadhak se
Ki Ve Hain divya noor
Jo nahin Hain uss se duur
Isliye vo na sochey swayam ko majboor.

Saadhak ko apne bheetar se hee
Aa rahi thi Guruji kee awaaz
Is adhyaatmik vaartaalaap dwaara
Usey samajh aane lagaa raaz
Ki vo swayam bhi divya noor ka ansh hai
Kyunki har atma Paramatama ka hee vansh hai.

Guruji Hain Paramatama swayam
Aur saadhak ka shareer jabb hoga mrit
Toh atma hee reh jaayegi
Deh mitti mein mil jaayegi.

Saadhak ko hua gyan
Jiske daata thei Guruji mahaan
Ki vo atma hai, na ki shareer
Aur atma kee divya jyot nahin hai mehez ek tasveer
Vo divya jyot Paramatma kee hai
Kyunki vo Paramatma ka ansh hee hai
Usne apne bheetar kee divya jyot mein Guruji ko paaya
Guruji kee kripa se jaagrit hokar saadhak ka roam roam harshaaya.

Vo saadhak hai hum sab mein
Jo vishwaas rakhte Hain Rabb mein
Guruji kee kripa se aa jaaye jo jaagriti
Toh nikhar jaaye bheetar kee aakriti
Guruji kee divya jyot se bheetar ka andhera ho jaaye duur
Har taraf har kann kann mein chhaa jaaye Guruji ka noor.

🌹🌹🌹🌹🌹🌹🌹

Jai Guruji 🙏🙏
Dhirja

Baitha Thaa Saadhak (08/22/2025)