Month: September 2025

September 30, 2025

Om Namaha Shivaya
Aaj Ka Suvichaar 🙏🏻🙏🏻

#2781

      Haunsla Buland

Haunsla buland rakhte huey chal
Guruji kee kripa se tera praarabdh raha hai tal
Is se bada kalyaan nahin ho sakta, mere pyaare
Vo bhi khaaskar Guruji ke sahaare.

Kyunki Ve pooran Guru bhi Hain
Aur Hain Guru ke roop mein Rabb
Tere buss mein tere karma ke siwa kuch nahin
Lekin Guruji ke buss mein hai sabb.

Hai ek aur pyaara satya
Guruji Hain bhakton ke adheen
Isliye na mehsoos kar swayam ko ksheen
Tu dhanwaan hai, buss swabhaav rakh deen.

Kyunki Guruji Hain deendayal
Rakhte Hain tera khayaal
Ve jaanein tera haal
Aur tere mann ke sabhi sawaal.

Tujhe hai ye vishwaas
Ki Unkee kripa hai khaas
Leela Unkee hai niraali
Bhaagya nikhaarne wali.

Tu is vishwaas se chal
Guru bhakti mein reh atal
Guruji de rahe Hain tujhe bal
Tann, mann, aur atma ka
Tu shukr kar Unn Paramatma ka.

🌹🌹🌹🌹🌹🌹🌹

Jai Guruji 🙏🙏
Dhirja

Haunsla Buland (09/30/2025)

September 29, 2025

Om Namaha Shivaya
Aaj Ka Suvichaar 🙏🏻🙏🏻

#2780

Manzil Par Pahunchoge Tum

Tumhaare jeevan kee doar Guruji ke haath mein
Guruji swayam Hain sada tumhaare saath mein
Thaame Huey tumhaara haath Apne haath mein
Tumhe raasta dikhaate Huey din aur raat mein
Phir kyun tum ghabraate ho?
Kyun himmat haar jaate ho?

Guruji kee kripa se hota raha hai tumhaara kalyaan
Guruji ne sada tumhaare ghar parivaar ka bhi rakha hai dhyan
Pehle bhi ye hota raha hai nirantar
Abb Unkee kripa mein hai ye antar
Ki veh hai pehle se bhi adhik
Tum bann kar raho Guruji ke agyakari pathik
Guruji kee suraksha ka kavach hai tumhe surakshit rakhe huey
Guruji ne hamesha ke jaise tumhaare parde Hain dhake huey
Tum Unkee dhun mein raho
Kisee aur se kuch na kaho
Anand lo Unke ruhaani sparsh ka
Ehsaas rakho Unke saanidhya ke harsh ka
Ve le chalenge tumhe safar par is kadar
Ki har lamha Unke sangg jaayega guzar
Bina huey raaste mein gum
Manzil par pahunchoge tum.

🌹🌹🌹🌹🌹🌹🌹

Jai Guruji 🙏🙏
Dhirja

Manzil Par Pahunchoge Tum (09/29/2025)

September 28, 2025

Om Namaha Shivaya
Aaj Ka Suvichaar 🙏🏻🙏🏻

#2779

Duniyadari ke kaamkaaj
Na kal poore huey, na ho paayenge aaj
Kuch na kuch toh aksar reh jaata hai
Par soch vichaar yoon unmein beh jaata hai
Ki Guruji ke sangg baithna bhool jaate hain
Phir baad mein pachhtaate hain
Kyunki rooh ko milta nahin vo poshan
Jiske dwaara usey hona hota hai roshan.

Guruji swayam hee toh Hain Sarveshwar
Phir kyun dhoondhna hai koi aur dar
Guruji bheetar aur angg sangg Hain har pal
Isliye beshak duniyadari jaari rahe aaj aur kal
Kuch pal dincharya se nikaal kar
Guruji kee yaad mein jo lein guzaar
Toh khud ke liye hee hoga mangalkaari
Sanvaarne ke liye aagey kee niyati hamaari.

Guruji ke chintan mein har tareh se kalyaan hai
Guruji ke simran mein har mushkil ka samaadhan hai
Guruji bin toh gati nahin, ye satya sada yaad rahe
Guruji kee yaad se ye antas aur rooh sada aabaad rahe.

🌹🌹🌹🌹🌹🌹🌹

Jai Guruji 🙏🙏
Dhirja

Duniyadari ke Kaamkaaj (09/28/2025)

September 27, 2025

Om Namaha Shivaya
Aaj Ka Suvichaar 🙏🏻🙏🏻

#2778

Guruji Kee Mamta Ka Marham

Guruji kee mamta ka marham
Milta rehta hai Unkee sangat ko saara jeevan
Har satsang mein, aur gurbani dwaara
Guruji dete Hain bhakton ko Apna sahaara
Bhakton ko dekar sewa ka avsar
Guruji dhote Hain unke paap aksar.

Guruji kee leela hai anupam
Insaani soch se kaheen zyada oonchi hoti hai ye sada
Bhakt na samjhe Guruji kee leela
Par Guruji ko bhakt kee har soch ka hai pataa.

Isliye soch vichaar mein bhi hona hoga satark
Aur tyaagna hoga agar bhakti ke prati ho koi tark vitark
Guruji kee praapti ke liye
Ujjwal rakhne hongei vishwaas aur samarpan ke deeye.

Guruji kee mamta ka marham
Bhar dega har kasht ka zakhm
Guruji ka dulaar, Guruji ka rehem
Paakar dhanya huey hain hum.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Kee Mamta Ka Marham (09/27/2025)

September 26, 2025

Om Namaha Shivaya
Aaj Ka Suvichaar 🙏🏻🙏🏻

#2777

       Guruji Ke Hukm Mein Behna

Anukool paristhiti mein Guruji ka pyaar
Pratikool samay mein Guruji ka daya bhara dulaar
Guruji ke bhakton ko hota hai naseeb
Kyunki Guruji sada hotey Hain unke kareeb.

Guruji Apne bhakton ko kabhi akela nahin chodte
Bhakt beshak muh pher le Unse, Guruji kabhi bhakt se muh nahin modte
Ve toh Hain nath
Sada rehte Hain saath
Bhakt par rakhte huye Aoni nazar
Barsaate huey Apni meher.

Beshak bhakt Guruji kee leela na jaane
Par agar vo Guruji kee maane
Toh uska uddhaar nishchit hai
Kyunki Guruji kee agya mein hee bhakt ka hitt hai.

Ismein gunjaaish nahin hai kisee sanshay kee
Kyunki beshak aa jaaye ghadi pralay kee
Guruji nishchay hee karenge bhakt ka kalyaan
Ve Hain param pita Paramatma karunanidhaan.

Bhala hai Unhee par sab kuch chodne mein
Ve hee kaabil Hain bhakt ke praarabdh kee zanjeer todne mein
Aakhir hai hee kya buss mein apne
Guruji kee marzi bin toh aa bhi na paayein Unke sapne
Toh phir jaagrit avastha ka toh kya hee kehna
Bhakt ke liye toh mangalkaari hai Guruji ke hukm mein behna.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ke Hukm Mein Behna (09/26/2025)

September 25, 2025

Om Namaha Shivaya
Aaj Ka Suvichaar 🙏🏻🙏🏻

#2776

Abhi Poori Nahin Hui…

Abhi poori nahin hui tumhaari kahaani
Abhi jeeni hai ye zindagaani
Guruji ke sahaare jeete jaao
Unse tum ashishein paao.

Guruji kee sharan mein saump do swayam ko
Unkee yaad mein leen karo tum apne mann ko
Vahee Hain tumhaare sab kuch
Ye yaad rakho aur bhool jaao baaki sab tuchh.

Unhe basaa lo apne mann mein
Unkee yaad mein rehte huey sabb kuch karo jeevan mein
Guruji ne tumhe Apni sangat hai banaaya
Is se Unhonei tumhaara bhaagya hai chamkaaya.

Kyunki pooran Guru kee sharan mein praarabdh ko kaat paana
Ye sabko nahin hota naseeb
Aur praarabdh na katey toh dukh nahin mit-ta
Isliye sukh nahin aata kareeb.

Kahaani ko anjaam miley
Iske liye ye sab hona hee hoga
Is sabke dauran tum sthir raho
Isliye tumhe Guruji mein khona hee hoga.

Guruji ka ruhaani praakatya
Guruji ke vachanon dwaara Unka saanidhya
Guruji ke chintan dwaara Unse judey rehna
Nishchay kar lo ki inhee mein tumhaare bhaav ne hai behna.

Tumhaare angg sangg Hain Guruji ke roop mein Bhagwaan
Ve tumhaari kisee bhi duvidha ya chunauti se nahin Hain anjaan
Tumhaari koshish na hogi nakaam
Tumhaari kahaani ko milega sundar anjaam.

🌹🌹🌹🌹🌹🌹🌹

Jai Guruji 🙏🙏
Dhirja

Abhi Poori Nahin Hui… (09/25/2025)

September 24, 2025

Om Namaha Shivaya
Aaj Ka Suvichaar 🙏🏻🙏🏻

#2775

           Praarabdh Ka Swabhaav

Praarabdh ka swabhaav hai
Todna insaan ke ahankar ko
Isliye tum sab saump do
Guruji Parwardigaar ko…

Kyunki praarabdh par tumhaara koi zor nahin
Parantu Guruji chaahein toh kaat sakte Hain praarabdh tumhaara
Jo swayam Rabb vahaan na kar paaye, Ve Guru ke roop mein yahaan karte Hain
Isliye Guruji Hain tumhaara ek maatra sahaara.

Praarabdh se bachna mumkin nahin kisee ke liye
Praarabdh ko kumm karna mumkin hai Guruji ke liye
Tum karo bheetar Guruji kee talaash
Guruji tumhe rahe Hain taraash.

Guruji se tum judey raho
Unkee oar tum mudey raho
Vishwaas mein raho
Niyati sangg baho.

Guruji kee kripa se praarabdh katega
Praarabdh katne se hee dukh mitega
Guruji par sab kuch chod kar
Praarabdh ke zariye apna ahankar toad kar
Guruji ke bharose chalte jaao karte huey intazaar
Kismat ka phool khilega zaroor, tum na maano haar.

🌹🌹🌹🌹🌹🌹🌹

Jai Guruji 🙏🙏
Dhirja

Praarabdh Ka Swabhaav (09/24/2025)

September 23, 2025

Om Namaha Shivaya
Aaj Ka Suvichaar 🙏🏻🙏🏻

#2774

      Guruji Jaanein…

Guruji jaanein sach aur jhooth tumhaara
Guruji jaanein tumhaara sukh dukh
Har shwaas Guruji ke simran mein karo samarpan
Guruji kee oar karo mann ka rukh.

Na maun se, na ann tyaag se
Buss, antarmann se jaag ke
Dridh karo apna manobal
Varna vishayon ka dal dal
Mann ko phansaane mein maahir hai
Ye sabke jeevan mein zaahir hai.

Manobal se sudharenge tumhaare vichaar
Manobal badhaane se hoga uddhaar
Guruji kee meharbaani se
Unkee tum par nigraani se.

Ye jaan jaaoge tabb
Ki ek Guruji hee Hain sach
Kyunki Ve swayam Hain Rabb
Aur khokhla lagega tumhe baaki sabb.

Yahee hai hakeekat har pal kee
Jo badal degi tumhaari drishti aaj aur kal kee
Yakeen karo apni kabiliyat par
Jispar Guruji ka ho raha hai kripa bhara asar
Tum deen nahin tum ho dhanwaan
Tumhaare angg sangg Hain Guruji karunanidhaan.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Jaanein… (09/23/2025)

September 22, 2025

Om Namaha Shivaya
Aaj Ka Suvichaar 🙏🏻🙏🏻

#2773

                     Dhundh Thi Itnee

Dhundh thi itnee
Ki dikh na raha thaa kinaara
Agyanta thi itnee
Ki mehsoos na ho raha thaa sahaara
Jo bin dikhe bhi hota hai sada saath
Haan, Guruji ka ruhaani haath.

Kabhi haath ko thaame huey
Kabhi sir par, dete huey ashirwaad
Kabhi bann kar vo ruhaani khushboo
Jo kar deti hai antas ko aabaad.

Musaafir ne aankhein lee moond
Aur karne lagaa ardaas, ki-

“Aye Srishti ke Shehenshah
Mujhe banaa lo Aap Apna das.
Nahin jhel sakta mai jeevan is tareh
Mujhe ehsaas do ki Aap ho har jageh
Vo shraddha do ki mai kar paaoon Aap par vishwaas
Vo sumat do ki mai sirf Aapke liye hua karoon udaas.
Mere paapon ke parde dhakh do
Mujhe Apni sharan mein rakh lo
Banaa kar sewak Apna
Poora kar do ye sapna.
Apne aap hee theek ho jaayega baaki sabb
Saara kalyaan ho jaayega tabb
Aap swami ho, mere Rabb
Aap jaano kya sahi hai kabb.”

Ardaas karte karte beet gaya bahut samay
Mann kee har baat ko Guruji se kehkar mitne lagey sabhi sanshay
Dhundh hatne lagi, musaafir ko dikhne lagaa kinaara
Agyanta mitne lagi, usey yakeen hua ki Guruji Hain uska sampoorna sahaara.

Musaafir raasta karne lagaa tayy
Na abb sanshay thaa, na koi bhayy
Guruji kee yaad ke samudri jahaaz mein
Leen hokar Guru prem ke andaaz mein
Badhta chala vo kinaare kee oar
Guruji ke naam kee chaadar oadh.

Mehnat hui safal
Mukammal hua safar
Musaafir pahuncha kinaare par
Sab Guruji kee meher ka hee thaa asar.

🌹🌹🌹🌹🌹🌹🌹

Jai Guruji 🙏🙏
Dhirja

Dhundh Thi Itnee (09/22/2025)

September 21, 2025

Om Namaha Shivaya
Aaj Ka Suvichaar 🙏🏻🙏🏻

#2772

 Deedar Hua Seher Se

Gumsum baitha thaa raahi
Poori na hui vo baat jo usne chaahi
Jaanta thaa Guruji kalyaan hee rahein Hain kar
Par yoon baith nahin sakta thaa haath par haath dhar
Bina kiye koi agar magar
Baaki sab se hokar bekhabar
Rakhey Huey manzil par nazar
Raahi chalne lagaa apni dagar
Lete huey har kadam par Guruji ka naam
Guruji ko mann hee mann karte huey salaam.

Guruji se maangta chala saboori aur bharose ka daan
Kehta chala Unse ki usey nahin hai gyan ya pehchaan
Isliye Ve hee usey raasta dikhaayein
Iss raaste par Ve hee usey chalaayein.

Guruji toh jaante thei raahi kee har laachaari
Aur abb aa gayi thi uske kalyaan kee baari
Guruji mauj mein aaye
Raahi par Unhonei ashish barsaaye
Lekar chale usey safalta ke vimaan mein
Raahi mastt raha Guruji aur Unke naam mein
Kabb safar hua khatm, raahi ko na chala pataa
Is se pehle ki veh ye Guruji ko sakta bataa
Guruji ne rakha Apna haath raahi ke sir par
Bataaya usey ki safal hua uska safar
Raahi gir pada Guruji ke charan mein
Aisa pal na aaya thaa pehle kabhi bhi jeevan mein
Raahi ko raah bhi milee aur manzil bhi, Guruji kee meher se
Raat beshak lambi thi, par Guru kripa se deedar hua seher se.

🌹🌹🌹🌹🌹🌹🌹

Jai Guruji 🙏🙏
Dhirja

Deedar Hua Seher Se (09/21/2025)