Month: September 2025

September 20, 2025

Om Namaha Shivaya
Aaj Ka Suvichaar 🙏🏻🙏🏻

#2771

    Guruji Bulaate Hain Satsang Mein

Guruji bulaate Hain satsang mein
Hamein rangne Apne rangg mein
Hamaare sudhaar ke liye
Hamaare uddhaar ke liye.

Guruji se seedhi taar joadkar
Baaki har soch se muh moadkar
Sadh sangat baithey Guruji ke charan mein
Koi simran ya dhyan mein, koi Guruji ke chintan mein.

Gurbani sunvaate huey
Hamaare karma katvaate huey
Guruji hamaare praarabdh ka bojh kumm karte Hain
Hamaari jholiyan bakhshishon se bharte Hain.

Chai prasad aur langar prasad
Inse milta hai Guruji ka ashirwaad
Aur Unke satsang sunn-ne sunaane se
Unkee mahima ke gunn gaane se
Bhakt Guruji kee vadiyaayee mein khota jaata hai
Unke sangg aur bhi pyaar hota jaata hai.

Guruji kee karuna aur mamta ka
Hota jaata hai aur bhi gehra ehsaas
Guruji kee leela aur guruyaayee ka
Ehsaas hota hai aur bhi khaas.

Guruji ke dwaara mila satsang mein maun rehne ka aadesh
Agya lekar seedha ghar jaane ka seedha sandesh
Iska paalan karna hai sangat kee zimmedari
Guruji kee hee meher kee mohtaaj hain hum sangat saari.

Saari sangat par banee rahe Guruji kee meher
Haunsla na kumm kar paaye kalyuga roopi keher
Guruji kee vadiyaayee kee chhatra-chhaaya mein surakshit rahein sabb
Sangat Guruji kee santaan hai, Guruji hum sabke pita aur Rabb.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Bulaate Hain Satsang Mein (09/20/2025)

September 19, 2025

Om Namaha Shivaya
Aaj Ka Suvichaar 🙏🏻🙏🏻

#2770

             Mann Ke Shivalay Mein

Apne mann ke shivalay mein
Dhoondo toh sahi tum Guruji Maharaj ko
Unkee meharbaaniyon mein koi kamee nahin
Isliye shukrana karo Unn sartaj ko.

Kyunki kamee yakeenan Unn Prabhu mein nahin
Kamee hai hum naadaan insaanon mein
Guruji hee ek apne Hain
Anginat begaanon mein.

Jaanoge jitna baithoge Guruji ke chintan mein
Ki kitna anand hai Unke manan mein
Aur Unkee meharbaaniyon ka hota chalega ehsaas
Jaise jaise Guruji mein leen hotey jaayenge tumhaare shwaas.

Tumhe dikh jaayega vo Kailash
Jo basaa hai tumhaare bheetar
Tumhaare sabhi paap vaheen jhuk jaayenge
Mahadev Guruji ke dar par.

Pavitrikaran hota jaayega antakaran ka
Chaav badhta chalega Guruji ke manan ka
Shuddhikaran hota jaayega har karam ka
Safal honei lagega har pal janam ka.

Mann ke Shivalay mein goonjenge geet Guruji ke gungaan ke
Jalenge sainkdon deep Guruji ke sammaan mein
Guruji viraajmaan rehkar anginat ashirwaad denge kalyaan ke
Tum Unke agyakari sewak bannkar intazaar mein rahoge Unke farmaan ke.

🌹🌹🌹🌹🌹🌹🌹

Jai Guruji 🙏🙏
Dhirja

Mann Ke Shivalay Mein (09/19/2025)

September 18, 2025

Om Namaha Shivaya
Aaj Ka Suvichaar 🙏🏻🙏🏻

#2769

      Itne Dayavaan Hain Mere Sartaj

Guruji Maharaj SadaShiv mahaan
Rutba Unka hai alishaan
Har bhakt hai Unkee santaan
Aur Ve sabke pita karunanidhaan.

Chhipaaye na chhipe Guruji se bhakt ka koi karma ya vichaar
Saari sangat par har pal nazar rakhte Hain Parwardigaar
Bhakt ko milta rahe aaraam
Isliye Guruji kabhi nahin karte vishraam.

Ek pal bhi nahin sotey Hain Guru sarkar
Taaki sangat par Unkee nigraani rahe barkaraar
Bhakton ke kasht kaat-te huey nirantar karte Hain kalyaan
Yoon hee thode hee na sanvar rahi hai sabki dastaan.

Baithey hon Ve beshak kisee ek sthaan par
Ve sarvavyaapi Hain magar
Duniya ke kitne sthaanon par ek hee baar mein dekar darshan
Kar dete Hain Ve gadd gadd sangat ka mann.

Kalyaankaari kirpa dhaari
Mangalkaari paap haari
Leeladhari Hain Guruji Maharaj
Ve toh Hain sartaajon ke bhi sartaaj.

Sambhaali Hain Unhonei poori srishti
Dekar saari srishti ko Apni drishti
Phir bhi neeven aur nirmal
Kshamasheel aur komal.

Aise meharbaan maalik ko
Maatha jitna bhi tekoon vo kumm hai
Itne dayavaan Hain mere sartaj
Ki Unka jitna bhi gungaan karoon, vo kumm hai.

🌹🌹🌹🌹🌹🌹🌹

Jai Guruji 🙏🙏
Dhirja

Itne Dayavaan Hain Mere Sartaj (09/18/2025)

September 17, 2025

Om Namaha Shivaya
Aaj Ka Suvichaar 🙏🏻🙏🏻

#2768

            Ye Mishran

Vichitra sa hai ye baahari sansaar
Har kshan, anukool aur pratikool ka mishran
Isliye pavitra rakho bheetar ka sansaar
Taaki jaisi bhi ho baahari paristhiti
Anukool rahe bheetar kee sthiti.

Zaroor hogi Guruji kee rehmat
Par khud bhi karni padegi mehnat
Guruji ke kareeb aane ke liye
Varna jeeye toh kya jeeye.

Mann hai deewana
Aksar isey yoon prabhaavit karta hai zamaana
Apna hokar bhi ye ho jaata hai begaana
Aur ye shuru kar deta hai sataana.

Guruji ke kareeb aane kee koshish se
Mann honei lagega apne vash mein
Guruji ke chintan aur yaad se manobal badhega
Jo laabhdaayak hoga har sangharsh mein.

Mann ka bhatakna honei lagg jaayega kumm
Mann ko dagmagaa na paayenge vikarshan
Mann ko sthir aur shant rehne mein hogi aasaani
Usey kamzor karne wali baatein lagne lagg jaayengi begaani.

Sankat bhi bann jaayega avsar
Ruhaani unnati ka
Guruji raasta dikhaate rahenge
Sadgati ka.

Jeevan mein jaari rahega anukool aur pratikool ka mishran
Par Guruji ke prati hoga jitna prem bhaav aur deewaanapan
Utna balshaali hota jaayega mann
Aur ye mishran buss bann kar reh jaayega anubhav ka dhan.

🌹🌹🌹🌹🌹🌹🌹

Jai Guruji 🙏🙏
Dhirja

Ye Mishran (09/17/2025)

September 16, 2025

Om Namaha Shivaya
Aaj Ka Suvichaar 🙏🏻🙏🏻

#2767

Guruji Ne Chuna Hai Tumhe

Guruji ne chuna hai tumhe
Aur shaamil kiya hai Apni sangat mein
Tum bhaagyashaali ho ki mila mauka tumhe
Rangg jaane ka Unkee rangat mein.

Guruji Hain tumhaare angg sangg
Tum ho Unkee sangat ka angg
Jitna chadhega tum par Guruji ka rangg
Utna sanvar jaayega jeene ka bhi dhangg.

Guruji ke satsang
Unke naam kee umang
Inse miltee rahegi tumhe sakaaratmak oorja
Aur Unke saanidhya mein har pal bann jaayega pooja.

Jitna badhega tumhaara Guruji mein dhyan
Utna kumm honei lagoge pareshaan
Roz din kee baaton se
Duniyavi khayaalaaton se.

Guruji ko mann se matha toh teko
Unkee oar ik kadam badha kar toh dekho
Ve sainkdon kadam badhaayenge tumhaari oar
Sada thaame rahenge Ve tumhaare jeevan kee doar.

Tum samjho is rishte ka ruhaani raaz
Guruji tumhaare kalyaan ke liye de rahe Hain tumhe awaaz
Anokhi khushkismati se milte Hain aise gareebnawaaz
Na karo naadaani kar ke Unn Khuda kee awaaz ko nazarandaaz.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ne Chuna Hai Tumhe (09/16/2025)

September 15, 2025

Om Namaha Shivaya
Aaj Ka Suvichaar 🙏🏻🙏🏻

#2766

                 Guruji Kee Kripa Se

Guruji kee kripa se hai shwaas
Guruji kee kripa se hai Unpar vishwaas
Guruji kee kripa rahe sada, ye hai aas
Kyunki kewal Unkee kripa se mitey har traas.

Saari sangat par Guruji kee kripa banee rahe
Sabhi par Unke ashish ka amrit bahe
Saari sangat Guruji ke satsang suney aur kahe
Guruji kee meher se koi bhi na vanchit rahe.

Kisko kabb lena hai Apni sharan mein
Ye toh Guruji hee jaante Hain
Badi kismat wale hain ve sabb
Jo Guruji ko Rabb maante hain.

Aur jo jann Guruji kee sab maante hain
Unn bhakton ka toh kya hee kaha jaaye
Aisa bhakt toh Guruji ke hukm ke bin
Ek kadam bhi aagey na badhaaye.

Guruji ka hukm sir aankhon par rakh kar
Kyun na guzaar lein jeevan ka ye safar
Sada kalyaankaari hoga Unke hukm ka asar
Unkee maan-ne ka na ganvaayein koi bhi avsar.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Kee Kripa Se (09/15/2025)

September 14, 2025

Om Namaha Shivaya
Aaj Ka Suvichaar 🙏🏻🙏🏻

#2765

             Jeete Huey Ye Jeevan

Jeete huey ye jeevan
Malin hota gaya hai ye mann
Guruji mein jaaoon jo ramm
Toh malinta hoti jaayegi kumm.

Guruji karein mujh par taras
Guruji kee daya aisee jaaye baras
Ki Unke siwa mujhe soojhe na koi aur
Jeevan ke har daur mein mai Guruji par karoon gaur.

Guruji, Guruji, buss Guruji mein yoon leen rahein mere praan
Ki duniyavi maajaron mein rehte huey bhi unse anaasakt rahei mera dhyan
Antakaran mein yoon goonjta rahe Guruji ka gungaan
Ki har pratikool awaaz se mai rahoon anjaan.

Guruji mein hee mastt rahoon
Unhe khush rakhne mein hee vyast rahoon
Unkee sunoon, Unse kahoon
Unkee hee mai bann kar rahoon.

Guruji ke naam ke amrit se seenchoon apne mann kee maati ko
Guruji kee yaad se sajaaoon mann ke upvan ko
Guruji kee kripa se santulan aur sthirta miley mere mann ko
Guruji ke hukm ke vash mein mere mann ka kann kann ho.

🌹🌹🌹🌹🌹🌹🌹

Jai Guruji 🙏🙏
Dhirja

Jeete Huey Ye Jeevan (09/14/2025)

September 13, 2025

Om Namaha Shivaya
Aaj Ka Suvichaar 🙏🏻🙏🏻

#2764

               Baaki Har Agar-Magar

Beshak tujhe mehsoos nahin ho raha
Ki ho raha hai parivartan teri paristhiti mein
Phir bhi bharosa rakhta chal
Aur simran se sudhaar laa manosthiti mein.

Aksar pehle pehle dikhta nahin hai parivartan
Kyunki Guruji pehle bheetar se saaf karte Hain antas ka bartan
Manosthiti sakaaratmak rakhna hai anivaarya
Taaki anukool spandan se prabhavit ho tera har kaarya
Chalta jaa tu Guruji kee yaad ke sahaare
Sainkdon ne isee tareh se mushkil lamhe hain guzaare.

Tu bhi ye kar ke toh dekh
Aur mann se Guruji ko maatha tek
Ve karte aaye Hain teri dekh rekh
Aur sanvaarenge tera kaaraj pratyek.

Unkee nadar ka neer behta chalega tere ghar parivaar par
Unkee bakhshish kee barsaat mein bheegta rahega tera sir
Divyata ke alaukik dhan se bharpoor hai Guruji ka dar
Unhee ka ho jaa tu chod kar baaki har agar-magar.

🌹🌹🌹🌹🌹🌹🌹

Jai Guruji 🙏🙏
Dhirja

Baaki Har Agar-Magar (09/13/2025)

September 12, 2025

Om Namaha Shivaya
Aaj Ka Suvichaar 🙏🏻🙏🏻

#2763

    Guruji Kee Meharbaani Se Hee…

Guruji kee meharbaani se hee
Jud sakta hai kisee bhakt ka
Unke sangg sambandh
Jiskee hai sabse pavitra sugandh
Jo behti hai ruhaani taar se
Jodey huey bhakt ko Guru ke aise pyaar se
Jo hai anupam anokha
Kyunki Guruji kabhi na dein dhokha
Guruji toh Hain pita Paramatama Parmeshwar
Sarvgyani sarvashaktimaan Sarveshwar
Ve toh dein pyaar niswaarth
Kya tu Unhe de sakta hai vaisa pyaar, o Paarth?

Unkee sampoornata ko mehsoos kar
Unkee shunyata ko mehsoos kar
Unkee mahaanta hai teri soch ke bhi paar
Tu maan le ki Unse hee Hai tera sansaar
Yahaan bhi aur vahaan bhi
Har pal har jageh Hain Ve hee.

Tere yahaan ke apne bhi hain paraaye
Tera apna ghar bhi hai saraaye
O Paarth, Guruji kee yaad mein guzaar yahaan ke din
Taaki vahaan na rehna padey Unke bin
Jisey Unka saanidhya mil jaaye is paar aur uss paar
Uss shakhs ka toh bilkul nishchit hai sampoorna uddhaar.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Kee Meharbaani Se Hee… (09/12/2025)

September 11, 2025

Om Namaha Shivaya
Aaj Ka Suvichaar 🙏🏻🙏🏻

#2762

                Na Umr Kee Paabandi

Na umr kee paabandi
Na jaat paat kee
Jabb aayega waqt
Toh yahaan se hona hee hoga ravaana
Na jaane kab kiske liye vo pal aa jaaye
Isliye o bande, jamaa kar le Guruji ke naam ka khazaana.

Padaarth yaheen reh jaayenge tere jaane ke baad mein
Jitna ho sakey, samaa guzaar le Guruji kee yaad mein
Guruji ka simran aur chintan
Yahee hai vo dhan
Jo baad mein bhi aayega kaam
Jabb tu jaayega vahaan ke dham.

Duniyavi moh tyaagna aasaan nahin
Par kum se kum koshish toh kar
Guruji teri koshish ko dekh kar
Denge is se anaasakti ka var.

Jaana hai Guruji ke paas
Toh kewal Unke liye hua kar udaas
Unhee mein leen rakh apna pratyek shwaas
Bann kar reh buss Unka das.

Kyunki Guruji Hain swayam Rabb
Unse sada milega tujhe pyaar
Baaki duniyavi hai sab
Yahaan aksar chalta hai vyapaar.

Guruji ne tujhe kiya hai sweekaar
Kar tu swayam ko yoon tayyaar
Ki jabb tu bhavsaagar se paar ho jaaye
Tabb Guruji mein hee teri rooh samaaye.

🌹🌹🌹🌹🌹🌹🌹

Jai Guruji 🙏🙏
Dhirja

Na Umr Kee Paabandi (09/11/2025)