Month: October 2025

October 21, 2025

Om Namaha Shivaya
Aaj Ka Suvichaar 🙏🏻🙏🏻

#2802

Guzarte Huey Guruji Ke Naam Kee Gali Se

Guzarte huey Guruji ke naam kee gali se
Musaafir ne poochha ik kali se
Tum kiskee dhun mein ho muskuraa rahi
Kiske naam ka geet ho gaa rahi?

Kali ne bin hichkichaaye
Aur bin ghabraaye
Musaafir ko bataaya Guruji ka naam
Aur karne lagi veh Guruji ka gungaan.

Kali ne bataaya musaafir ko
Ki Guruji jaisa prataapi koi nahin
Jis Rabb ko sabb dhoondhte hain
Guruji Hain Rabb vahee.

Musaafir ne kali se suna
Ki Guruji ne usey chuna
Jaise Ve chunte Hain Apni har sangat
Aur chadhaate Hain sab par Apni rangat.

Kali ne kaha musaafir se
Ki Guruji ka sapna hakeekat se parey nahin
Aur jabb koi aisa sapna aaye
Toh vo kabhi darey nahin
Kali ne musaafir ko sunaaye anekon satsang
Bataaya usey kaise Guruji rehte Hain bhakton ke angg-sangg
Kali jabb Guruji kee mahima ka kar rahi thi bakhaan
Toh naman mein jhuk gaya aasmaan
Guruji kee mahima sunkar musaafir hua hairaan
Maana usne ki zameen par aaye Guruji ke roop mein Bhagwaan.

Guruji kee baatein kehte sunte
Ho gayi subah se raat
Kali so gayi, musaafir aagey chala
Yaad karte huey kali kee kahi har baat.

Thakk kar phir kuch der ke baad
Vo ik taruvar ke taley so gaya
Guruji aaye khwaab mein uske aur pyaar kiya usko
Musaafir uss khwaab mein yoon kho gaya
Ki jabb jaaga toh usey lagaa ki vo khwaab nahin, thi hakeekat
Is ehsaas se adbhut si hui uskee tabeeyat
Usey kali ka kehna yaad aaya
Aur phir uska mann harshaaya.

Guruji kee yaad ko mann mein basaaye
Musaafir ne apne lamhe bitaaye
Guru kripa se pahuncha Guruji ke mandir
Uskee khushi kee seema na thi phir.

Pahunchkar Guruji ke dar par
Usey darshan huey manohar
Guruji kee sangat bannkar
Anugrahit hua uska safar.

🌹🌹🌹🌹🌹🌹🌹

Jai Guruji 🙏🙏
Dhirja

Guzarte Huey Guruji Ke Naam Kee Gali Se (10/21/2025)

October 20, 2025

Om Namaha Shivaya
Aaj Ka Suvichaar 🙏🏻🙏🏻

#2801

          Shukrana Mein Jeeti Chalo

Patharon se chot sehte sehte
Nadiya behte behte
Rukti nahin
Thakti nahin.

Tum bhi na thakna
Tum bhi na rukna
Guruji kee yaad mein rehna
Unke liye bhole bhaav mein behna.

Tum bhi ik nirmal nadiya ho
Behti chalo, tum behti chalo
Guruji ke diye praan hain tum mein
Tum Unkee yaad mein rehti chalo.

Jo bhi khayaal aayein tumhaare mann mein
Tum Guruji se unke baare mein kehti chalo
Jo bhi peeda ho rahi hai tumhe
Tum behte behte sehti chalo.

Guruji ne tumhe bakhshi hai sehensheelta
Guruji ne tum par nawazi hai sadasheelta
Ye bhool na jaana behte behte
Tum behna Guruji ka shukrana kehte.

Guruji kee kripa se barkaraar hai tumhaara noor
Ye noor hai ruhaani
Is noor ko nahin chheen sakti
Koi bhi paristhiti tufaani.

Atma-vishwaas hai tumhaare paas
Ye bhi daat hai badi hee khaas
Guruji ke naam mein hai aisee paawan mithaas
Ki vo tumhe na honei degi udaas.

Vo jo tumhe nayi disha mein bahaav ka sanket hai dikha
Vo tumhaara lekha Guruji ne dobaara hai likha
Behti chalo, tum masti mein
Bin itraaye apni hasti mein.

Jaise jaise tum badhogi Guruji kee gehraayee ke mahasaagar kee oar
Shant hota chalega tumhaare mann mein machaa hai jo shor
Arey, tum par hai Guruji kee nirantar nigraani
Shukrana mein jeeti chalo tum apni zindagaani.

🌹🌹🌹🌹🌹🌹🌹

Jai Guruji 🙏🙏
Dhirja

Shukrana Mein Jeeti Chalo (10/20/2025)

October 19, 2025

Om Namaha Shivaya
Aaj Ka Suvichaar 🙏🏻🙏🏻

#2800

                       Ujjwal Disha

Yuddh yoddha ko chunta hai
Yoddha yuddh ko nahin
Prakriti ka khel ho ya ho niyati kee kahi
Karmon ke nazariye se shaayad har yuddh aur khel hai sahi.

Aur jo hum Guruji Maharaj kee sharan mein hain
Toh jo Guruji nirdhaarit karte Hain, sahi hai buss vahee
Toh jis praarabdh ka Guruji bhog chaahte Hain karaana
Unse bachne ka nahin chalta koi bhi bahaana.

Guruji se behtar koi sakta nahin jaan
Ki bhakt ke liye kya sahi hai kab aur kahaan
Beshak pichhle karma hotey hain is janam mein bezubaan
Lekin praarabdh bannkar ve kar dete hain behad pareshaan.

Kintu Guruji Maharaj bannkar meharbaan
Praarabdh katvaate huey dete Hain sahaara
Apni marzi se aksar lekha likhte Hain dobaara
Niyati kee kahi ko aksar badal kar dikhaate Hain naya kinaara.

Aise Guru kee sharan mein yoddha hain hum
Har adhyatmik yuddh hota rahega saarthak
Guruji Hain aise mahaan dayavaan
Jo bhakton kee madad karte Hain athak.

Guruji Maharaj ke charnon mein baarambaar naman
Unkee kripa se nikharte rahein rooh aur tann mann
Unke ashish ke aanchal mein rooh palti rahe
Unke maargdarshan se adhyatma ko ujjwal disha miltee rahe.

🌹🌹🌹🌹🌹🌹🌹

Jai Guruji 🙏🙏
Dhirja

Ujjwal Disha (10/19/2025)

October 18, 2025

Om Namaha Shivaya
Aaj Ka Suvichaar 🙏🏻🙏🏻

#2799

    Mann Kee Soch Se Kaheen Aagey

Mann kee soch se kaheen aagey
Shabdon kee seema ke paar
Hai leela Guruji Sarkar kee
Kalyaankarta karunamayi kartar kee.

Mai hoon maamuli si
Seekh rahi hoon insaaniyat nibhaana
Ruhaaniyat ko khojte huey apne bheetar aur aaspaas
Dhoondh rahi thi apna thikaana.

Shukr hai Guruji ne liya Apni sharan mein
Mujhe liya sambhaal
Unkee leela ke bin toh
Ho jaata na jaane kya haal.

Praarabdh kaatna bilkul nahin aasaan
Lekin Guruji ne jo diya Apne charnon mein sthaan
Toh Ve le chale aise safar par
Jo chal raha hai buss Unke hukum par.

Kaunsa karma katt raha hai kis raftaar se
Mere buss mein nahin uska andaaza bhi lagaana
Jaise jaise badh rahi hoon is safar mein
Sab Guruji par chodna hai, ye hai jaana.

Swayam kee swatantra ichcha ke alaawa
Kuch nahin apne niyantran mein
Buss, Guruji kee yaad anivaarya hai
Har pal apne mann mein.

Guruji kee yaad, Guruji ka shukar
Guruji kee dee bakhshish, Guruji ka diya sabar
In sabka ho raha hai antas aur rooh par aisa asar
Ki Guruji ka naam lete huey beet raha hai ye safar.

Ye ashirwaad hai
Guruji ka diya prasad hai
Jeevan aabaad hai
Guruji ka dhanyawaad hai.

🌹🌹🌹🌹🌹🌹🌹

Jai Guruji 🙏🙏
Dhirja

Mann Kee Soch Se Kaheen Aagey (10/18/2025)

October 17, 2025

Om Namaha Shivaya
Aaj Ka Suvichaar 🙏🏻🙏🏻

#2798

                 Mubarak Aur Pyaar

Dheeraj bhara ho prayaas
Guruji se judey rehne kee ho aas
Phir ho koi bhi din, saptaah ya maas
Toh Guruji ke liye vo prayaas hoga khaas.

Har vehem se, andhvishwaas se
Guruji karte Hain duur
Rooh ko nikhaarte Hain Guruji
Taaki vo na mehsoos karey majboor.

Guruji ke liye har bhakt hai ek samaan
Guruji har bhakt par hotey aaye Hain meharbaan
Aagey bhi karte rahenge Ve saari sangat ka kalyaan
Kitne khushnaseeb hain hum insaan.

Ek Ve hee sada hotey Hain angg sangg
Nikhaarte huye hamaare jeevan ke rangg
Jeena aur marna ho Unke kamal charan mein
Toh kitna santosh hoga janam maran mein.

Guruji ke sangg baantein sukh dukh
Unhee ke sangg manaayein har tyohaar
Diwali ke din shuru ho rahe hain
Sabhi ko bahut bahut mubarak aur pyaar.

🌹🌹🌹🌹🌹🌹🌹

Jai Guruji 🙏🙏
Dhirja

Mubarak Aur Pyaar (10/17/2025)

October 16, 2025

Om Namaha Shivaya
Aaj Ka Suvichaar 🙏🏻🙏🏻

#2797

Shukr Kar Is Intazaar Ka

Guruji kee bhakti mein dol kar
Unhe pyaar ke bol bol kar
Safal hotey rahein shwaas
Chhoote na ye prayaas.

Balki badhta jaaye iska abhyaas
Jaise jaise safar ka antt ho paas
Taaki antim vele mein na hon udaas
Ki poori na hui ye aas.

Bhakti mein ho pyaar
Pyaar mein ho bhakti
Toh miltee rahegi
Jeevan jeene kee shakti.

Mishran bhakti aur pyaar ka
Iraada Guruji ke deedar ka
Inse milta rahega utsah
Chalne ke liye jeevan kee raah.

Guruji kee kripa se dikhtee rahegi
Chalne kee disha
Guruji kee daya se kat-ti rahegi
Niraasha kee nisha.

Guruji ke liye bhakti aur pyaar
Unkee meher se karaayega paar
Bhavsaagar sansaar ka
Shukr kar is intazaar ka.

🌹🌹🌹🌹🌹🌹🌹

Jai Guruji 🙏🙏
Dhirja

Shukr Kar Is Intazaar Ka (10/16/2025)

October 15, 2025

Om Namaha Shivaya
Aaj Ka Suvichaar 🙏🏻🙏🏻

#2796

      Abb Nahin Rukna

Abb nahin rukna
Aagey hoga badhna
Dheere hee sahi beshak
Par hoga ruhaani seedhi chadhna.

Kyunki Guruji se judkar shuru hua hai jo safar
Uss se himmat milegi pahunchne ke liye manzil par
Beshak maang ya zaroorat ya chaahat se shuru hua ho safar
Lekin in sabse oopar aur aagey daalni hogi apni aantarik nazar.

Varna jo Guruji chaahte Hain hamein dena
Hum vo asal dhan kaise paayenge
Aantarik nazar ko jo na sudhaara
Toh pehle se zyada kamzor ho jaayenge.

Isliye maang aur zaroorat
Mann aur chaahat
Badhna hoga inse aagey
Toad kar moh maya ke dhaage.

Guruji kee kripa bin ye nahin mumkin
Beshak mehnat kar lein raat din
Mehnat bhakt kee, rehmat Guruji kee
Tabhi aagey badhti hai zindagi.

Guruji Maharaj karein sabhi ka kalyaan
Ve jaanein kisko dena hai kabb kya vardaan
Ve jaanein har bhakt kee dastaan
Unkee nazron mein toh hai saara jahaan.

🌹🌹🌹🌹🌹🌹🌹

Jai Guruji 🙏🙏
Dhirja

Abb Nahin Rukna (10/15/2025)

October 14, 2025

Om Namaha Shivaya
Aaj Ka Suvichaar 🙏🏻🙏🏻

#2795

                 Praarabdh Ka Pralay

Teri swatantrata ko baandhe huey hai
Teri niyati kee doar
Tu laachaari mein
Na dhoondh kaheen aur
Guruji ka dhyan abhi bhi
Yakeenan hai teri oar
Tu buss apne bheetar
Kar Guruji par gaur.

Praarabdh kaatna nahin aasaan
Par tere angg sangg Hain Bhagwaan
Unhonei Guruji ke roop mein tujhe sambhaala hai
Aur ye Guru bahut paraakram wala hai.

Tu hai Guruji ke charnon ke taley kee dhool
Ho hee nahin sakta tere sangg kuch pratikool
Tujh se Guruji karva rahe Hain bhog har karam ka
Ye upaay hai tere ahankar ke patan ka.

Vishwaas ke vajr ko chodna matt
Sweekaarna Guruji de rahe Hain jo sumat
Shraddha ka shankh bajaate huey
Guruji ka gungaan gaate huey
Tujhe hoga chalte jaana
Bin banaaye koi bahaana
Rukta nahin hai samay
Khatm hoga praarabdh ka pralay.

🌹🌹🌹🌹🌹🌹🌹

Jai Guruji 🙏🙏
Dhirja

Praarabdh Ka Pralay (10/14/2025)

October 13, 2025

Om Namaha Shivaya
Aaj Ka Suvichaar 🙏🏻🙏🏻

#2794

          Guruji Ke Darshan Kee Pyaasi

Guruji ke darshan kee pyaasi
Guruji se milne chali ik daasi
Vo phooli na samaayi
Ki uskee bhi baari aayi.

Pahunchi vo Guruji ke darbar
Jahaan par khade thei sewadaar
Unhonei usey raasta dikhaaya
Daasi ne swayam ko Guruji ke samaksh paaya.

Kalpana mein na dekh paayi thi kabhi
Dekhi usne aisee anokhi divya chhavi
Rabb ko aasan par baithe dekh kar
Usey lagaa ye hai sachkhand ka safar.

Uske nayyn jhuk gaye dekhkar Guruji ka noor
Phir mann kee aankhon se dekhti rahi
Bhool hee gayi ki kya kehna thaa Unse
Phir bhi mann hee mann kuch kehti rahi.

Guruji toh jaante Hain sabb
Ve daasi kee har ankahi baat bhi gaye samajh
Daasi ko uske har ankahe sawaal ka diya Unhonei jawaab
Rabb Hain Ve, har bhakt Unke liye hai khuli kitaab.

Daasi kee aankhon mein aansoo aaye
Par uske labb khushi se muskuraaye
Usey apne bhaav hee samajh mein na aaye
Aur is se pehle ki vo kuch keh paaye
Guruji ne vo keh diya
Jis se jal gaya daasi ke antas ka deeya.

Guruji ne usey diya ashirwaad
Aur keh diya usey ki Ve uske Guru hongei uske har janam mein
Daasi ye mangal ashish paakar
Gir padi Guruji ke kamal charan mein.

Mila thaa daasi ko ashirwaad itna anmol
Jisne uske bhaagya ke kivaad diye thei khol
Guruji ke charnon mein daasi ko mila saara jahaan
Vaheen mila swarg, vaheen sukh, vaheen nirvaan.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ke Darshan Kee Pyaasi (10/13/2025)

October 12, 2025

Om Namaha Shivaya
Aaj Ka Suvichaar 🙏🏻🙏🏻

#2793

Panchhi Ne Udaan Bhari Hai

Panchhi ne udaan bhari hai
Gagan khush hai aur dharti hari bhari hai
Guruji kee meher suraksha bann kar khadi hai
Guruji kee kripa se zindagi aagey badhi hai.

Umda hogi ye udaan
Sangg Hain Guruji mahaan
Ve Hain karunanidhaan
Kar rahe Hain panchhi ka kalyaan.

Panchhi ka dukh kaatkar
Usey udaan ke kaabil banaakar
Guruji ne hai usey bakhsha
Karte Hain Ve uskee raksha.

Shukr hai panchhi hai Guruji kee sharan mein
Usey pooran Guru kee kripa milee dukh haran mein
Tabhi toh udaan bharna hua mumkin
Na ho sakta thaa ye Guruji kee karuna ke bin.

Aagey bhi Guruji hee panchhi ko sambhaalenge
Aagey bhi Ve hee usey taarenge
Uskee udaan sanvaarenge
Uska jeevan sudhaarenge.

🌹🌹🌹🌹🌹🌹🌹

Jai Guruji 🙏🙏
Dhirja

Panchhi Ne Udaan Bhari Hai (10/12/2025)