October 1, 2025
Om Namaha Shivaya
Aaj Ka Suvichaar 🙏🏻🙏🏻
#2782
Hai Savera Sundar
Hai savera sundar
Tere apne bheetar
Kyunki Guruji ka vaas hai vahaan
Aur tu dhoondhta hai na jaane kahaan kahaan.
Baahar na dhoondh
Buss, aankhein le moond
Kar Guruji ka chintan
Unse jod apna antakaran
Andhere ka parda aakhirkar hatega
Ujaala tujhe dikhega
Beshak vo bhi hoga parde ke roop mein
Parda, prakash ka
Soochak uss sakaash ka
Jis se andhera sada ke liye hoga duur
Kyunki bheetar roshan hoga Guruji ke naam ka noor
Shabd ke swaroop mein
Naad Brahmroop mein
Is kadar hogi Guruji kee nadar
Ki dhanya ho jaayega tera safar.
Goonjegi yoon dhvani naam kee
Ki atmasaat hogi maujoodagi Unn Bhagwaan kee
Jo Guruji ke roop mein aaye dharti par
Karne hum praaniyon par vo meher
Jo lekhe mein bhi nahin thi hamaare
Par likhee gayi Guruji ke dwaare
Swayam Guruji dwaara
Jo Hain hamaara sampoorna sahaara.
Har savera hai sundar
Jabb Guruji Hain bheetar
Unhee kee yaad se hai savera
Phir vo chaahe jeevan tera ho ya mera.
🌹🌹🌹🌹🌹🌹🌹
Jai Guruji 🙏🙏
Dhirja
Hai Savera Sundar (10/01/2025)
Aaj Ka Suvichaar 