Month: November 2025

November 30, 2025

Om Namaha Shivaya
Aaj Ka Suvichaar 🙏🏻🙏🏻

#2842

               Chitt Kee Chunariya

Guruji ke naam ke rangg mein
Rangti rahe mere chitt kee chunariya
Guruji kee nirmal nazar se
Noorani hota jaaye mera nazariya
Guruji kee roshni ke prataap se
Ruhaani hota jaaye mera ravaiya
Toh Guruji ke dulaar se
Divyata se paripoorna hogi dil kee dagariya.

Kaantein hongei bhi toh saath mein hongei phool komal
Vivashtaayein hongi bhi toh raaste mein hongi tarangein taral
Kalyuga ke karkash shor ke beech gungunaa paaoongi mai sureeli gazal
Satyuga ka spandan bheetar hoga toh jeena honei lagega saral.

Guruji kee hoti rahegi meher
Toh Unke naam se rangi hui chunariya ko odh kar
Chalti rahoongi jeevan kee dagar par
Tayy hota jaayega ye safar.

Guruji ka haath rahega jo mere sir par
Toh Unke ashirwaad ka hota rahega asar
Guruji kee bakhshish se rakh paaoongi sabar
Dagariya par chalte huey karti rahoongi Guruji ka shukar.

Naam se rangi chitt kee chunariya ke liye Guruji ka dhanyawaad
Dhanyawaad, ki Unhe chet kar Unse hai mera chitt aabaad
Ye chunariya rangti rahe nirantar Guruji ke naam se
Jahaan bhi rahoon, jis bhi haal mein rahoon, judi rahoon Guruji se aur Unke dhaam se.

🌹🌹🌹🌹🌹🌹🌹

Jai Guruji 🙏🙏
Dhirja

Chitt Kee Chunariya (11/30/2025)

November 29, 2025

Om Namaha Shivaya
Aaj Ka Suvichaar 🙏🏻🙏🏻

#2841

Abb Na Kar Aur Naadaani

Abb na kar aur naadaani
Mann suljha re, aye praani
Varna khud se karega beimaani
Isliye abb toh sudhaar le zindagaani.

Guruji bulaa rahe Hain
Ye bulaava hai mangalkaari
Shraddha se yahaan matha tek
Mann suljhaane kee kar tayyaari.

Guruji ke darbar mein
Gurbani ke amrit mein doob kar
Mann saaf honei lagega
Dekhna, tu jaayega tarr.

Guruji ke darbar mein
Mann jod lena vandan mein
Sadh sangat ke beechon beech
Anand lena ruhaani spandan mein.

Vikarshan hon toh unpar na dena dhyan
Guruji se judne mein lagaana apne praan
Guruji aasan par hongei virajmaan
Unkee maujoodagi ko dena tu poora sammaan.

Guruji ke chai prasad aur langar prasad ko
Grahan karna shuddh mann se
Mann aur bhi saaf hota chalega
Prasad ke har kann se.

Saaf hotey hotey sulajhta jaayega mann
Simran se duur honei lagegi har duvidha, har uljhan
Mann ke sulajhne se swasth honei lagega tann
Tu paata jaayega santosh aur shanti ka dhan.

Tera bhaav lagega sanvarne
Zindagaani lagegi sudharne
Is se pehle ki anmol pal lagein guzarne
Tu shuru kar apne vichaar badalne.

Sakaratmak vichardhaara par de zor
Shukrana karte rehne par kar gaur
Mann ko modta chal Guruji kee oar
Guruji ko saump de apne jeevan ka har daur.

🌹🌹🌹🌹🌹🌹🌹

Jai Guruji 🙏🙏
Dhirja

Abb Na Kar Aur Naadaani (11/29/2025)

November 28, 2025

Om Namaha Shivaya
Aaj Ka Suvichaar 🙏🏻🙏🏻

#2840

          Koi Prem Nahin Hai Aisa…

Koi prem nahin hai aisa
Jaisa Guruji dete Hain Apni sangat ko
Ye sundar ehsaas ho jaata hai
Dekhkar sangat kee rangat ko.

Anginat kee taadaad mein
Guruji kee yaad mein
Sangat Unke bulaane par aati hai Unke mandir
Ek baar aakar aati hai phir phir.

Aisa hai Guruji ka paawan prataap
Ki mit-te hain bhakton ke aise dukh santaap
Jinka kaheen aur na ho paaya upaay
Par dayalu Guruji Hain sabke liye sahaay.

Waqt hai Guruji ke haath mein
Aur Guruji Hain bhakton ke saath mein
Jiska Ve dilaate Hain swayam hee bhakt ko ehsaas
Bhakt jaan aur maan jaata hai ki Guruji Hain bheetar aur aaspaas.

Niswaarth prem hai Guruji ka saari sangat ke liye
Ve toh aaye jalaane kalyugi andhere mein ruhaaniyat ke deeye
Har bhatke huey ko raasta dikhaane
Saralta se satyugi sanskaar sikhaane.

Guruji ka Apni sangat ke liye prem hai jo
Vo hai anokha aur anoop
Unhonei toh Apni mahima se seench diya hai
Apna har chhota aur bada swaroop.

Guruji ke har swaroop mein
Hai Guruji kee maujoodagi pyaari
Isliye har swaroop ka aadar karna
Hai hum sangat kee zimmedari.

Guruji Apne swaroop ke dwaara
Bhakton ko ashish Hain dete
Kitnon ke toh kasht Guruji
Swaroop dwaara swayam par Hain lete.

Aisee atulneeya hai mahima Guruji meharbaan kee
Unhe har pal fikr rehti hai Apni har santaan kee
Sangat khushnaseeb hai paakar sharan Guruji karunanidhaan kee
Ye divya sharan swayam manzil hai sangat ke sampoorna kalyaan kee.

🌹🌹🌹🌹🌹🌹🌹

Jai Guruji 🙏🙏
Dhirja

Koi Prem Nahin Hai Aisa… (11/28/2025)

November 26, 2025

Om Namaha Shivaya
Aaj Ka Suvichaar 🙏🏻🙏🏻

#2838

      Guru Sahib Kee Sharan Jo Milee

Guru Sahib kee sharan jo milee
Toh kismat ne lee khushnaseebi kee karvat
Kismat jo khilee
Toh safar kee raftaar ho gayi behad.

Guruji Maharaj ne karma bhog karvaana liya jo Apne haath mein
Toh Ve khud hee ho liye mere saath mein
Aur jiske saath ho Srishti ka shehenshah
Usey aaj nahin toh kal mil hee jaayegi raah.

Sahi waqt Guruji jaanein
Sahi vidhi bhi Ve pehchaanein
Apne haath mein toh karma ke siwa kuch nahin
Aur Guruji jaisa chaahein aur karein vo hee hai sahi.

Unhee ke hukm par chalti jaaoon
Abb dooji nahin koi raah
Unke aanchal mein palti jaaoon
Abb dooji nahin koi chaah.

Maa Hain Guruji Maharaj
Unke aanchal mein hoon mai surakshit
Pita Hain mere sartaj
Unke charnon mein sada hoga mera hitt.

Murshid bhi Hain Guruji mahaan
Apne tareeke se dete Hain itna gehra gyan
Mujh nimaani mureed ko
Sweekaar kar meri preet ko.

Meet bhi aur bhraata bhi bannkar
Dete Hain Ve Apna saath
Duniya idhar se udhar bhi ho jaaye
Toh bhi Ve na chodenge mera haath.

Aisa vishwaas Guruji ne hai bakhsha
Ki karte rahenge Ve hee raksha
Toh phir raaste mein beshak aa jaayein pathar
Mai toh odh kar Guruji ke naam kee chaadar
Leti chaloon aagey kee oar har kadam
Unkee yaad mein guzaarte huey ye jeevan.

🌹🌹🌹🌹🌹🌹🌹

Jai Guruji 🙏🙏
Dhirja

Guru Sahib Kee Sharan Jo Milee (11/26/2025)

November 25, 2025

Om Namaha Shivaya
Aaj Ka Suvichaar 🙏🏻🙏🏻

#2837

        Guruji Dekh Rahe Hain Tumhe

Guruji dekh rahe Hain tumhe, chinta na karo
Guruji angg sangg Hain tumhaare, isliye tum na daro
Himmat na haaro
Ibadat kar ke har pal ko sanvaaro.

Gumm na karna jo na bhi laage dhyan
Koshish karte raho, bade hee anmol hain praan
Guruji ke saanidhya mein baith kar dekho
Mann se Unhe bhaavpoorna maatha teko.

Guruji tumhe dekh kar Apni ichcha se lenge joad Apne sangg
Anokhi hai Unkee leela, adbhut hain Unke dhangg
Dekhte dekhte kab jaaoge tarr, tum jaan bhi na paaoge
Guru kripa se mushkilon ke paar pahunch jaaoge.

Alag andekhe hotey hain aksar Guruji ke tareeke kalyaan ke
Tum toh charnon mein ho Guruji ke roop mein Bhagwaan ke
Jo hoga achcha tumhaare liye, Guruji karenge vahi
Tum vaise bhi kya jaano ki tumhaare liye kya hai sahi.

Tumhaari soch aur nazar jaa nahin sakti vahaan takk
Guruji kee soch aur nazar jaati hai jahaan takk
Tabhi Unke ashirwaad hotey hain sarvopari aur akath
Vahaan takk sochne ke kaabil nahin hai tumhaari matt.

Isliye Unkee sharan mein zaroori hai samarpan
Isliye chinta ke bajaaye zaroori hai Unka chintan
Sthiti aur paristhiti jaisi bhi ho, chal toh jaayega jeevan
Par Guruji ko sab saump kar jeevan kee disha aisee jaayegi bann
Ki Guruji ke haath mein hogi tumhaari naiya kee patvaar
Aur Guruji swayam lekar chalenge tumhe bhavsaagar ke paar.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Dekh Rahe Hain Tumhe (11/25/2025)

November 24, 2025

Om Namaha Shivaya
Aaj Ka Suvichaar 🙏🏻🙏🏻

#2836

        Na Ho Tamanna, Na Zaroorat

Jaan na paaoon mahasaagar kee gehraayee
Toh kaise jaan paaoon vadiyaayee uske nirmaata kee
Unn daata kee
Jo maalik Hain srishti ke
Hum ichhuk rehte hain Jinkee drishti ke.

Guruji kee vadiyaayee hai sabse vaddi
Is par hai mujhe vishwaas khaas
Yoon hee thode hee na jeevan kee gati hui anokhi
Aane par Guruji ke paas.

Guruji ne Apni sharan mein bulaaya
Toh karma bhog mein milne lagaa Unka sahaara
Varna chal hee na paata guzaara
Kuch aur hee hota zindagi ka nazaara.

Guruji ne jageh dee Apne charan mein
Har pal kee zimmedari lee kasht haran mein
Koi toh achcha karma kiya hoga is ya pichhle kisee janam mein
Jo pahunch paayi Guruji kee saumya sharan mein.

Apni khushkismati ko saraahoon tabhi toh
Guruji ne apnaaya jinhe, unn sabhi ko
Zaroor ho naaz apni kismat par
Ki ve pahunch paaye Guruji ke dar.

Jis jisne kahaa ye vo kaha bilkul sahi
Ki is dar jaisa koi aur dar nahin
Jiskee bhakti mein bhavna ho Guru mein SadaShiv ko paane kee
Usey na ho tamanna na zaroorat, yahaan se kaheen bhi aur jaane kee.

🌹🌹🌹🌹🌹🌹🌹

Jai Guruji 🙏🙏
Dhirja

Na Ho Tamanna, Na Zaroorat (11/24/2025)

November 23, 2025

Om Namaha Shivaya
Aaj Ka Suvichaar 🙏🏻🙏🏻

#2835

                         Judaav…

Param poojya Guruji Maharaj,

Ruhaani pyaar kee baatein Aapse
Divya deedar kee baatein Aapse
Aapse hee hoti rahe guftagoo
Aap mein hee rami rahe meri rooh.

Aapke sangg hee baantoon dil ka haal
Aaye jo mann mein toh Aapse hee poochhoon sawaal
Ya phir ruhaani taar se hee sawaal jawaab ka silsila chalta rahe
Aapke saanidhya mein har din ka sooraj uday ho aur dhalta rahe.

Bheetar hota rahe har pal Aapki maujoodagi ka aisa ehsaas
Ki baahari duniya ke liye kabhi na hoon udaas
Duniya mein rahoon par judoon Aapse kewal
Isee judaav par mai ekaagr rahoon har pal.

Is judaav se hee hai abb mera jeevan
Is judaav mein hee ramta rahe mera mann
Is judaav kee oar badhta rahe mera aakarashan
Is judaav se sanvar jaaye mere janam ka har kshan.

🌹🌹🌹🌹🌹🌹🌹

Jai Guruji 🙏🙏
Dhirja

Judaav… (11/23/2025)

November 22, 2025

Om Namaha Shivaya
Aaj Ka Suvichaar 🙏🏻🙏🏻

#2834

               Aakhiri Saans Takk…

Guruji Maharaj, Deenanath mere
Aapka Shukrana karoon mai shaam savere
Na miltee Aapki sharan
Toh kaise sanvarta mera ye janam
Rulti rehti dar dar
Aapne bulaaya na hota agar
Aapne thaami jo baah
Dee Apne charnon mein thaa(n)
Meri khaamiyon ke sangg mujhe sweekaara
Diya mujh nimaani nacheez ko sahaara
Shukrana se seench kar apna har shwaas
Yaad rakhoon ki mujhe milee hain niyamatein
khaas.

Koi pal aisa nahin mere jeevan mein
Jismein mehsoos na ho mujhe Aapka ashirwaad
Koi kona nahin mere antarmann mein
Jo Aapke spandan se nahin aabaad.

Har pal ka shukrana karte karte
Beet jaaye har pal
Shukrana karte karte
Beet jaaye aaj aur kal
Beete kal mein jo Shukrana na kar paayi
Uske liye mai pachhtaayi.

Guruji, deejiyega mujhe aisee sumat
Ki na ho abb mujhse kabhi aisee gaflat
Na jhel paaoongi mai is gaflat kee sharmindagi
Shukrana bin adhoori reh jaayegi bandagi.

Shukrana shukrana shukrana mere sundar swami
Shukrana shukrana shukrana mere antaryami
Har janam mein tann, mann, aur rooh samarpit rahein Aapki sharan mein
Aakhiri saans takk karti rahoon shukrana Aapka apne har janam mein.

🌹🌹🌹🌹🌹🌹🌹

Jai Guruji 🙏🙏
Dhirja

Aakhiri Saans Takk… (11/22/2025)

November 21, 2025

Om Namaha Shivaya
Aaj Ka Suvichaar 🙏🏻🙏🏻

#2833

            Aseemit Aur Sampoorna

Teri har mushkil aaj kee
Iske samaadhan kee zimmedari hai Guru sartaj kee
Aane waale kal ka tera har sankat
Vo bhi Guru kripa se jaayega katt
Isliye beshak aayein kasht
Tu ghabraana matt
Guruji bade mahaan Hain
Guruji karunanidhaan Hain.

Teri beeti hui zindagi bhi
Guruji ne sambhaali thi
Tujhe gyat na ho ye hai mumkin
Tu vaise bhi Unkee rehmatein nahin sakta gin.

Tu unn anginat bhakton mein se hai
Jinhe Guruji ne sweekaar liya
Aur phir Unhonei Apna pyaar diya
Bin jataaye sabke liye sab kuch kiya.

Guruji ko Apne sabhi bhakt lagein pyaare
Aur Unke pyaare Hain Unkee aankhon ke taare
Guruji Hain Apne bhakton ke aise sampoorna sahaare
Ki Unkee hee rehmat har bhakt ko taare.

Unkee rehmat tujhe bhi taar rahi hai
Tere bhi kaaj sanvaar rahi hai
Tasalli rakh, Shukrana kar
Guruji kee nadar kee kar kadar.

Tujhe ho ya nahin, Guruji ko hai khabar
Ve tere kalyaan mein na chodenge koi kasar
Pooran Guru Hain Guruji, samay kee seema ke paar
Aseemit aur sampoorna hota hai Unka kiya paropkaar.

🌹🌹🌹🌹🌹🌹🌹

Jai Guruji 🙏🙏
Dhirja

Aseemit Aur Sampoorna (11/21/2025)