Month: December 2025

December 31, 2025

Om Namaha Shivaya
Aaj Ka Suvichaar 🙏🏻🙏🏻

#2873

Kabhi Socha Bhi Na Thaa

Kabhi socha bhi na thaa
Ki kismat aisa lamha degi dikha
Jo hoga sabse shubh
Jo hoga aisa shuddh
Ki pooran Guru swayam bulaayenge
Apne dar par mujhe Ve laayenge.

Guruji Maharaj, Aapne kee aisee meher
Ki mere jeevan mein aaya vo peher
Jabb Aapne bulaaya mujhe Apne dwaar par
Karne mujh nimaani par nadar.

Kya hogi khushkismati is se badi
Ki mai Aapke satsang mein thi khadi
Sunte huey Aapki leela ka gungaan
Sunte huey Aapki mahima ka bakhaan.

Aapne sharan mein liya hai mujhe jabb se
Aap bulaate Hain Apne satsang mein tabb se
Chhakaate Hain Aap chai aur langar prasad
Dete Hain har tareh se Apna ashirwaad.

Bulaakar Apne mandir ke dwaar
Karvaaya Aapne Apna divya deedar
Aapki divya khushboo se kritaarth hui meri rooh
Shuddhi ke spandan ne mere roam roam ko liya chhoo.

Meri anginat khaamiyon se mai abb bhi hoon anjaan
Kintu Aap karaa rahe Hain dhyan dwaara mujhe meri kamzoriyon kee pehchaan
Pavitrikaran dwaara kar rahe Hain kalyaan
Kar rahe Hain mujh par asankhya ehsaan
Mujhe koi sanshay hee nahin ki Aap hee Hain Bhagwaan
Jo swayam dharti par aaye bannkar Guruji karunanidhaan.

🌹🌹🌹🌹🌹🌹🌹

Jai Guruji 🙏🙏
Dhirja

Kabhi Socha Bhi Na Thaa (12/31/2025)

December 30, 2025

Om Namaha Shivaya
Aaj Ka Suvichaar 🙏🏻🙏🏻

#2872

        Deh, Desh, Aur Kaal Ke Paar

Deh, desh, aur kaal ke paar
Hain mere Guruji sarkar
Ve Hain Shivatva ka saar aur vistaar
Swayam SadaShiv Hain Ve paalanhaar.

Mayapati Hain par uss se prabhavit na hotey kabhi
Unkee rachi maya ke adheen hain bhakt jann sabhi
Maya kee dhundh se saaf nahin dikhta saaf jann ko
Maya pareshaan karti hai mann ko.

Guruji ke simran aur dhyan mein hai Unkee bakhshi hui shakti
Jiske dwaara gyan se prajvalit hoti hai bhakti
Vairaagya ka bhaav bhi jaagne lagta hai safar ke dauran
Honei lagti hai swayam kee behtar pehchaan.

Atma-nireekshan, atma-saakshaatkaar
Inse dikhne lagta hai maya ke paar
Par satark rehna padta hai har kadam par
Gaur karte rehna padta hai apne har vichaar aur karam par.

Guruji hee kar sakte Hain pradaan
Vo sadasheelta, vo viveksheelta, aur vo gyan
Jiske dwaara is safar mein ho paayein hum agrasar
Aur kumm hota jaaye maya ka hum par asar.

Guruji se hee vandan
Ki aisa ho paaye Unka chintan
Ki bhed-buddhi na rahe
Har atma kee oar ek sa bhaav bahe
Ki uss ekta kee ho jaaye poorna pehchaan
Jis se hum Unkee kripa se advait ko jaayein jaan.

🌹🌹🌹🌹🌹🌹🌹

Jai Guruji 🙏🙏
Dhirja

Deh, Desh, Aur Kaal Ke Paar (12/30/2025)

December 29, 2025

Om Namaha Shivaya
Aaj Ka Suvichaar 🙏🏻🙏🏻

#2871

                   Baitho Pyaar Se…

Baitho pyaar se
Guruji ke paas
Guruji ke saath
Jodo rishta khaas.

Aakarshit karo Unhe
Apne bhole bhaav se
Pukaaro Unhe
Pyaar se paripoorna chaav se.

Janam diya duniyavi pita maat ne
Kintu Ve sada nahin rahenge saath mein
Guruji Hain Ve nath aur mata
Jinka saath bhakt sada hai paata.

Guruji ke liye har bhakt
Hai Unkee santaan
Sabke liye Guruji ka pyaar
Hota hai ek samaan.

Kintu kis bhakt mein paatrataa kitnee hai
Ismein hota hai antar
Aur kiske karma aur vichaar hain kaise
Ismein fark hota hai aksar.

Swayam ko yogya paatra banaao
Koshish karte karte thakk matt jaao
Jaari rakho Guruji ko prasann karte rehne ka prayaas
Milega sukoon itna khaas
Ki yahee karte rehne ko jee chaahega tumhaara
Is prayaas dwaara Guruji kee kripa se tumhe milega Unka sahaara.

Juda hai ye rishta
Guruji kee meher se
Tum vintee karo
Har peher se
Ki vo tumhaare sangg sajda karey Guruji ke samaksh
Beshak tumhe Guruji na dikhein pratyaksh
Tumhe Unkee maujoodagi ke sanket milenge zaroor
Tumhe na dekhna padega kaheen duur
Mann kee aankhon mein Ve samaayenge
Hriday mein nazar Ve aayenge
Rooh ko chhoo Ve jaayenge
Tumhe apna Ve banaayenge.

🌹🌹🌹🌹🌹🌹🌹

Jai Guruji 🙏🙏
Dhirja

Baitho Pyaar Se… (12/29/2025)

December 28, 2025

Om Namaha Shivaya
Aaj Ka Suvichaar 🙏🏻🙏🏻

#2870

        Paramatma Kee Divya Jyot

Paramatama kee divya jyot Hain mere Guruji
Hain Ve mere har shwaas ka aadhaar
Shukr hai Unhonei mujhe joda Apne se
Varna kaise hota mera beda paar.

Abb ummeed hee nahin
Balki vishwaas hai mera
Ki jo bhi ho jaaye jeevan mein
Mera Guru mere angg sangg hai khada.

Kitnee tasalli hai mujhe is satya se
Mai lafzon mein kar nahin sakti bayaan
Lekin Guruji Maharaj toh antaryami Hain
Jaanti hoon ki Unhonei liya hai ye bhi jaan.

Meetha lagta rahe mujhe Unka bhaana
Sada karoon Unka shukrana
Unke sangg hoti rahe mukh se aur mann se baat
Mera roam roam karey Unkee divya jyot ko yoon atmasaat
Ki har bhinnata ho jaaye duur
Reh jaaye toh buss divya noor.

Ve chalaate chalein mujhe uss disha mein
Jahaan aisa parivartan ho meri dasha mein
Aisa ho sakta hai agar Guruji chaahein
Mai toh khadi hoon pasaar kar apni baahein.

🌹🌹🌹🌹🌹🌹🌹

Jai Guruji 🙏🙏
Dhirja

Paramatma Kee Divya Jyot (12/28/2025)

December 27, 2025

Om Namaha Shivaya
Aaj Ka Suvichaar 🙏🏻🙏🏻

#2869

                      Vo Azad Akash 

Sab lagte hain begaane se
Mehfilon ke saaz lagte hain veeraane se
Dil kee ragg ragg toot-ti jaa rahi hai
Lagg raha hai moh maya sabb chhoot-ti jaa rahi hai
Guruji kee kripa hai ye sabb
Unhe gyat thaa ki ye hoga kabb
Mai hee thi anjaan hakeekat se
Abb jaan rahi hoon Guruji kee inaayat se.

Wafa ko milee bewafaai
Tabb asaliyat samajh mein aayi
Shukr hai Guruji Maharaj ka
Unhonei himmat dekar sachchaayee samjhaayee.

Moh ke bin pyaar karna nahin hai aasaan
Aur ye hai ek bahut mushkil imtehaan
Maya ka paldaa sada padd jaata hai bhaari
Mann par vijay paa lete hain vichaar vikaari.

Moh mein pyaar ke sangg hoti hai jodey rakhne kee statvaatmakta
Jo banti hai kaaran peeda aur bhayy ka aksar
Rishtey lagne lagte hain bhaari kabhi kabhi
Aur is bojh se malin honei lagte hain sabhi.

Yoon hee toh nahin moh ko vikaar hain kehte
Phir bhi anginat insaan moh mein hain behte
Sakshi bann-ne ke bajaaye bhram mein padd jaate hain
Apni atma ko nuksaan pahunchaate hain.

Guruji, Aap Prabhu Hain mere, sikhaayiye mujhe rakhna samta
Aapki bakhshish se simran aur dhyan kar paaoon, deejiye mujhe kshamta
Aapke judaav mein Aapke gungaan kee galiyon se guzarkar
Vikaaron ka aakraman na kar paaye mere mann par pratikool asar.

Galiyon se guzarte huey dagdh hotey rahein mere paap
Mitt jaaye vo peeda jis se tadpaate hain dukh santaap
Aapki dhun mein rahoon matvaali, mastt magan
Aur beshak mujh par mandaraaye duniyadari ka gagan
Mai dekh paaoon uske paar vo azad akash
Jisey ujjwal rakhta hai Aapka divya prakash.

🌹🌹🌹🌹🌹🌹🌹

Jai Guruji 🙏🙏
Dhirja

Vo Azad Akash (12/27/2025)

December 26, 2025

Om Namaha Shivaya
Aaj Ka Suvichaar 🙏🏻🙏🏻

#2868

          Meri Khushkismati Hai Apaar

Param poojya Guruji Maharaj,

Nawaaz kar Aapne Apne pyaare pyaar se
Kiya hai mujhpar atulya nitya ehsaan
Kaise na poojoon Aapko
Kaise na maanoon Aapko Apna Bhagwaan?

Mujhe toh soojhe na kisee aur kee sharan
Sukh mein, dukh mein, mujhe panaah dein Aapke charan
Aapke bharose jeeti jaa rahi hoon ye jeevan
Aapki kripa se Aapki yaad se aabaad rehta hai mann.

Aapki ek nazar kar deti hai mujh nimaani par aseem meher
Aapke noor se ujjwal rehte hain mere shaam-o-seher
Bhool jaaoon Aapko, zindagi mein na ho aisa koi pal ya peher
Aapke saanidhya mein anubhav hoti rahe har anubhav kee leher.

Aapki sharan mein hoon, ye soch kar hee miltee hai aseem prasannata aur tripti
Aapke maargdarshan par chalti rahi toh na chahiye uddhaar kee mujhe koi aur yukti
Kyunki Aap Hain sarvsampann, sarvgyani, sarvashaktimaan
Meri khushkismati hai apaar kyunki mai bhi hoon Aapki ek santaan.

🌹🌹🌹🌹🌹🌹🌹

Jai Guruji 🙏🙏
Dhirja

Meri Khushkismati Hai Apaar (12/26/2025)

December 25, 2025

Om Namaha Shivaya
Aaj Ka Suvichaar 🙏🏻🙏🏻

#2867

                Har Din Mubarak Ho

Zindagi beet rahi hai
Guruji kee soumya sharan mein
Soch kar bhi nahin jaan sakte hum
Ki kitna kalyaan ho raha hai hamaare jeevan mein.

Guruji kee mahima anant hai
Anant hain Unke liye kalyaan
Bhakt ginte ginte thakk jaaye beshak
Kalyaan karte Huey na thakein kabhi bhi Guru karunanidhaan.

Har din jo beete Guruji ke kamal charan mein
Vo mubarak din hai hota
Har vo pal hee bada mubarak hai
Jabb bhakt Guruji ke chintan mein hai khota.

Har vo ghadi mubarak
Jo Guruji ke satsang mein jaaye guzar
Har samaa hai mubarak
Jabb Guruji kee sharan mein beet raha ho safar.

Kya kehna uss khushi, uss utsah ka
Kya kehna uss mehek bhari raah ka
Jo Guruji kee daya se sangat paati hai
Aur baar baar Guruji ke dar par aa paati hai.

Guruji Hain Khuda ka noor, aur swayam hee Khuda
Uss divya jyot se hum bhi nahin hain juda
Zaroorat hai toh uss aatmabodh kee, uss ehsaas kee
Ki Guruji kee kripa hai kaaran hamaare har shwaas kee.

Shwaas shwaas mein Guruji ka simran
Shwaas shwaas mein Guruji se ardaas
Ki saari sangat ke liye har din mubarak ho
Aur har naya saal ho khaas.

🌹🌹🌹🌹🌹🌹🌹

Jai Guruji 🙏🙏
Dhirja

Har Din Mubarak Ho (12/25/2025)

December 24, 2025

Om Namaha Shivaya
Aaj Ka Suvichaar 🙏🏻🙏🏻

#2866

                  Rahnuma Mere….

Param poojya Guru Sahib,

Rahnuma mere
Aap le chalenge jidhar
Aankhein bandd bhi hon
Toh mai chal padoongi udhar
Kyunki Aap hee Hain vo chirag ruhaani
Jis se noorani hai meri zindagani.

Na mausam ka bharosa raah par
Na bharosa zamaane kee chaah par
Bharosa hai sirf Aapki rehmat par
Karoon kuch tabb hee Aap uss-se hon sehmat agar.

Varna khwaab mein na aaye vo khayaal
Jispar Aapko ho shak ya sawaal
Aapki ji huzoori mein beete mera pal pal
Na maanoon agar Aapki, toh mai na paaoon chal.

Aap swayam Hain sultan
Banaa leejiye mujhe Apna gulam
Aapki gulami mein miltee rahe mujhe Aapki panaah
Qurbaan jaaoon mai Aap par, mere Jahanpanah.

🌹🌹🌹🌹🌹🌹🌹

Jai Guruji 🙏🙏
Dhirja

Rahnuma Mere…. (12/24/2025)

December 23, 2025

Om Namaha Shivaya
Aaj Ka Suvichaar 🙏🏻🙏🏻

#2865

         Sada Unke Charnon Mein…

Guruji Hain param poojya aadarneeya pyaare
Apni nadar se dikhaate Hain Ve aise nazaare
Jo aksar hotey hain akalpaneeya aur alaukik
Jinse kalyaan hota hai shaareerik, maansik, aur adhyatmik.

Guruji par mai jaaoon balihaari
Unhonei meri zindagi hai sanvaari
Mujhe bulaakar Apni sharan mein
Dekar jageh Apne kamal charan mein
Jahaan sukh hai sachkhand ka
Anubhav hota hai anand akhand ka.

Har din, har peher
Zindagi ke khushi gumm kee har leher
Guruji kee daya ke mahasaagar mein samaati rahe
Mere jeevan kee naiya Guruji ke charnon mein kinaara paati rahe.

Guruji ke charnon mein hai ardaas
Ki vaheen par arpit rahe mera vishwaas
Vaheen samarpit karoon apna har shwaas
Sada Unke charnon mein rehne kee hai abb aas.

🌹🌹🌹🌹🌹🌹🌹

Jai Guruji 🙏🙏
Dhirja

Sada Unke Charnon Mein… (12/23/2025)

December 22, 2025

Om Namaha Shivaya
Aaj Ka Suvichaar 🙏🏻🙏🏻

#2864

  Jeevan Kee Tasveer

Ruhaaniyat mein tark vitark ka nahin koi sthaan
Aur hamaare Guru toh Hain Guruji mahaan
Ve hum ruhaani praaniyon ko sikhaayein bann-na insaan
Taaki hum aagey badhein dekar ve imtehaan
Jo Guruji lete Hain jeevan bhar
Rakhey Huey Apna haath hamaare sir par.

Har tark har vitark se badhta hai sanshay
Sanshay mein panapne lagta hai vyarth ka bhayy
Guruji ke khayaalon mein rehne ke bajaaye
Is sanshay aur bhayy se mehsoos hota hai asahaaye.

Jodey rakhni hogi Guruji se seedhi taar
Agar jaana hai sanshay aur bhayy ke paar
Tabhi uss kripa ko kar paayenge hum sweekaar
Jo dene baithey Hain Guruji paalanhaar.

Varna yatra adhoori reh jaayegi
Oordhvagati kee oar na beh paayegi
Rooh sharmindagi kaise seh paayegi
Agar Guruji ke kareeb na pahunch paayegi.

Isliye tark vitark se muh moad kar
Sanshay aur bhayy ko peechhe chod kar
Hoga aagey badhte jaana
Bin dhoondhe koi bhi bahaana.

Rehte huey insaan ke shareer mein
Guruji kee kripa se nikhaar laayein ruhaani taqdeer mein
Pavitrata kee chamak laayein zameer mein
Toh noorani rangg bhar paayenge jeevan kee tasveer mein.

🌹🌹🌹🌹🌹🌹🌹

Jai Guruji 🙏🙏
Dhirja

Jeevan Kee Tasveer (12/22/2025)