Month: December 2025

December 11, 2025

Om Namaha Shivaya
Aaj Ka Suvichaar 🙏🏻🙏🏻

#2853

                           Sambandh

Shraddha aur prem ke bhaav se ankurit honei dein apna sambandh
Param poojya Guruji Maharaj ke sangg
Kyunki Guruji hee Hain Jinhonei
Bhare Hain hamaare jeevan mein anokhe rangg.

Guruji se judne se pehle
Yakeenan aisee na thi zindagi
Jabb se ehsaas hua is judaav ka
Tabb se Unkee kripa se nikhar gayi bandagi.

Kitna nirmal anand hota hai na mehsoos
Guruji ko dekhkar Unke har swaroop mein
Aur kitnee prasannata hoti hai unhe
Jinhe Guruji dikhte Hain swapn roop mein.

Kyunki Guruji ke swapn darshan
Guruji kee marzi se hee hain ho sakte
Aur Guruji anya tareekon se bhi
Uddhaar karte nahin Hain thakte.

Guruji ke tareeke hain anokhe aur anginat
Jinse Ve karte Hain bhakton ka kalyaan
Ve hee bakhshte Hain sewa, satsang, aur sumat
Ve hee Apni kripa se karaate Hain Apna simran aur dhyan.

Koi sambandh aisa nahin, jaisa hai Guruji ke sangg
Is sambandh kee pavitrata kabhi na honei paaye bhangg
Guruji kee kripa se nikharta jaaye hamaari insaaniyat aur ruhaaniyat ka rangg
Mann sada Unkee yaad mein rahe malang.

Guruji ko paane ke liye bhaav hota jaaye pehle se zyada prabal
Antakaran Guruji kee daya se hota jaaye pehle se zyada nirmal
Guruji ke charnon mein samarpit ho jaaye rafl aur akal
Toh janam maran ka safar yakeenan ho jaayega safal.

🌹🌹🌹🌹🌹🌹🌹

Jai Guruji 🙏🙏
Dhirja

Sambandh (12/11/2025)

December 10, 2025

Om Namaha Shivaya
Aaj Ka Suvichaar 🙏🏻🙏🏻

#2852

               Bandagi Ka Bandhan

Himmat dene wale Guruji
Taakat dene wale Guruji
Guruji se hee miley bakhshish
Guruji se hee miley ashish
Bakhshte Hain Ve vishwaas
Poshit karte Hain ehsaas
Apne sangg aise apnepann ka
Ki badh jaata hai bal mann ka.

Guruji ka saanidhya, Unka chintan
Unse baatein, Unse bandhan
Utsah badhaane ke liye chahiye nahin kuch aur
Is satya par kiya nahin toh abb zaroor kar lo gaur.

Guruji angg sangg hon toh chaal nahin rukegi
Guruji angg sangg hon toh kismat nahin jhukegi
Kisee aur ke samaksh
Kyunki Guruji denge tumhe bakhsh.

Kab aur kaise, ye Guruji ko hee gyat
Tum bhoolo nahin ki Ve Hain tumhaare saath
Guruji ke saanidhya mein milta rahega dilaasa
Unke chintan se duur hoti rahegi niraasha.

Guruji se baatein kar ke halka hoga mann
Badhta jaayega mann ka sanyam
Sukh dukh kee leheron mein vo sthir rehna seekhega har kshan
Sehej sa swaroop lene lagega tumhaara jeevan.

Guruji ke tareeke samajhna mushkil hai, aye jann
Par Unkee leela yakeenan sanvaarti hai bhakt ka janam maran
Unkee sharan milee hai, ye hai sabse anmol dhan
Bahut adbhut hai Guruji sangg bandagi ka bandhan.

🌹🌹🌹🌹🌹🌹🌹

Jai Guruji 🙏🙏
Dhirja

Bandagi Ka Bandhan (12/10/2025)

December 9, 2025

Om Namaha Shivaya
Aaj Ka Suvichaar 🙏🏻🙏🏻

#2851

         Sada Sada…

Param poojya Guruji Maharaj,

Aapke charnon mein rehmatein hain beshumaar
Jitna shukrana karoon kumm hai, chaahe karoon baar baar
Har kasht mein bhi hota hai Aapka mangal vidhaan
Kyunki Aap Hain pooran karunanidhaan.

Mera mann samarpit ho jaaye Aapke charan mein
Toh meri har chaahat bhi hogi samarpit kyunki chaahat ka vaas toh hai mann mein
Jo Aap denge swayam
Vo hoga deerghkaalik dhan
Jo mai maangoongi
Vo bolega mera ksheen mann.

Shaayad mujhe pehle hota iska gyan
Toh alag hee hotey mere armaan
Par suna hai ‘der aaye durust aaye’
Aur abb Aapne liya bulaaye
Toh Aap ko saump kar sab kuch
Na pesh karoon ichchaayein tuchh
Sadbuddhi deejiyega
Manobal bakhshiyega
Apni sharan mein rakhiyega
Sada sada, aye mere Khuda.

🌹🌹🌹🌹🌹🌹🌹

Jai Guruji 🙏🙏
Dhirja

Sada Sada… (12/09/2025)

December 8, 2025

Om Namaha Shivaya
Aaj Ka Suvichaar 🙏🏻🙏🏻

#2850

Tum Divyata Ka Roop Ho

Atma, tum divyata ka roop ho
Tum satchittanand swaroop ho
Paramatama ko ho tum ansh
Chetan hai tumhaara vansh.

Janmon se kar rahi ho safar
Manzil kee intazaar mein
Guruji ko tum par taras aa gaya
Toh pahunchi tum Unke darbar mein.

Khud ko ashuddh honei na dena
Chaitanya ko sonei na dena
Beshak ye hai mrityulok
Tum matt karo shok
Na dukh na roag
Buss kewal gyan yog
Guruji kee tumhaare shareer roopi aavaran par nahin
Guruji kee tumpar hai nazar
Apna shaashvat swaroop dhaaran kar
Tum aavaran sangg safal honei do safar
Aur Guru kripa se aagey jaao badh.

Hissa ho tum divya chetna ka
Laabh uthaao Guruji kee dee prerna ka
Tum Shivmayi ho
Tum Gurumayi ho
Is asal roop ko nikhaaro
Apni yatra ko sudhaaro
Hoti jaao har janam mein pehle se zyada Guruji ke kareeb
Guruji kee karuna se sanvaarti chalo apna naseeb.

Aayega vo pal
Guruji mein samaa jaaogi tum jabb
Janmon se shuru hua ye safar
Mukammal hoga tabb
Tum beshak na jaano
Aisa hoga kabb
Par Guruji sab jaante Hain
Ve Hain Rabb.

🌹🌹🌹🌹🌹🌹🌹

Jai Guruji 🙏🙏
Dhirja

Tum Divyata Ka Roop Ho (12/08/2025)

December 7, 2025

Om Namaha Shivaya
Aaj Ka Suvichaar 🙏🏻🙏🏻

#2849

  Buss, Guruji Kee Sunn

Buss, Guruji kee sunn
Tu o matvaale mann
Jaise jaise Ve tujhe
Duniyadari se duur kar rahe Hain
Vaise vaise Ve tujh mein
Apna noor bhar rahe Hain.

Honei de is noor ka asar
Kar le is noor kee kadar
Guruji se nibha wafa
Ve kabhi na hongei bewafaa.

Guruji hee Hain iklauta satya
Unkee guruyaayee hee hai tathya
Tattvagyan aur ruhaaniyat ka saar aur vistaar
Guru ke roop mein swayam Parwardigaar.

Duniyadaari ko nibha tu farz samajhkar
Kintu na reh jaa tu ismein ulajh kar
Duniyadaari toh hai kshanbhanghur bahaar
Ismein rehte huey na ulajh ismein baar baar
Tu koshish karne mein matt himmat haar
Tujhe Guruji ne khushkismati bakhshi hai bulaakar Apne dwaar
Guruji kee kripa se hoga tera uddhaar
Unkee sharan mein tu ye janam le sanvaar.

🌹🌹🌹🌹🌹🌹🌹

Jai Guruji 🙏🙏
Dhirja

Buss, Guruji Kee Sunn (12/07/2025)

December 6, 2025

Om Namaha Shivaya
Aaj Ka Suvichaar 🙏🏻🙏🏻

#2848

Anant Anand Ke Desh Mein…

Anant anand ke desh mein karoon pravesh
Kyunki vaheen hai swadesh
Vaheen toh virajmaan Hain Guruji sarvesh
Phir kyun dhoondhoon mai koi aur desh?

Suna hai ye desh hai adbhut
Suna hai ye desh hai achyut
Maanti hoon ki is desh mein hota hai vaas satya ka
Guruji ke honei se is desh mein spandan hai divya saundarya ka.

Guruji hee sangat ko lekar chalte Hain
Anant anand ke desh mein
Simran aur dhyan bakhshkar
Prerit karte Hain Apne seedhe sandesh mein.

Mehnat karni hogi swayam par
Pahunchne ke liye is dar par
Guruji kee daya kee mohtaaj hoon iskee koshish mein
Arzi hai ki Ve karaayein jo bhi zaroori hai iskee kashish mein.

Jitnee koshish karoongi Guruji se jude rehne kee
Jitnee nishchit rahoongi Unkee yaad mein behne kee
Aur Unse hee apni har baat kehne kee
Pahunchti chaloongi is desh ke utne hee kareeb
Apna kar Guruji se seedhe judey rehne kee tarkeeb.

Anant anand ke is desh mein jaane ko har pal chaahe rooh
Taaki ye asthaayi sukh dukh bhara sansaar na sakey chhoo
Sansaar mein rehte huey hee aisa hona hai mumkin
Guruji kripa karein ki is disha mein mehnat kar paaoon mai raat din.

🌹🌹🌹🌹🌹🌹🌹

Jai Guruji 🙏🙏
Dhirja

Anant Anand Ke Desh Mein… (12/06/2025)

December 5, 2025

Om Namaha Shivaya
Aaj Ka Suvichaar 🙏🏻🙏🏻

#2847

Raat Ke Andhere Se…

Raat ke andhere se na hona pareshaan
Raat mein aaye savere se na hona hairaan
Sab leela hai Guruji maharaj kee
Jinhonei zimmedari lee hai tumhaare aane wale kal aur aaj kee.

Beete huey kal mein jo hua so hua
Yakeenan ek ek karma ne tumhaare naseeb ko chhua
Aur abb tum ho Guruji kee sharan mein
Aisa nahin ki kasht aayenge nahin jeevan mein
Parantu Guruji rahenge angg sangg tumhaare
Bannkar tumhaare akhand sahaare.

Unke charnon mein hai abb tumhaara basera
Unkee leela se honei do andhera aur savera
Kyunki Unkee leela sada hoti hai kalyaankaari
Toh buss bann kar raho Unke das agyakaari.

Unkee mauj se andhera kshanbhar mein mit sakta hai
Unkee leela se hee sooraj uday hota aur phir dhalta hai
Unkee meher se hee Unka har bhakt mushkil mein bhi chalta hai
Unke aanchal mein Unka har bachcha palta hai.

Beshak Guruji ke bachche hain anek
Par tum bhi toh ho Unmein se ek
Unkee leela se ho raha hai aur hoga tumhaara bhi mangal
Tum buss Unkee yaad mein raho har pal.

🌹🌹🌹🌹🌹🌹🌹

Jai Guruji 🙏🙏
Dhirja

Raat Ke Andhere Se… (12/05/2025)

December 4, 2025

Om Namaha Shivaya
Aaj Ka Suvichaar 🙏🏻🙏🏻

#2846

            Mere Karmon Kee Khaayi

Gehri hai mere karmon kee khaayi
Isey akele paar kar mai aagey kaise jaaoon
Guruji, Aap angg sangg hee Hain har pal
Is satya se mai haunsla paaoon
Aapki kripa se hee ye khaayi kar paaoongi paar
Aap par hee hai mujhe poora aitbaar.

Agar Aapko lagta hai ki zaroori hai
Karmon ke liye jurmaana bharna
Toh khaayi paar karne ke liye
Manzoor hai mujhe girna
Kyunki Aap hee jaanein tareeka sabse uttam
Jiske dwaara mera praarabdh hoga khatam.

Yoon toh Aap girne se bachaane mein poori tareh se Hain samarth
Par shaayad girne se hee samajh aana ho mujhe uss rahasya ka arth
Jiske liye Aapne bakhsha hai ye janam
Jiske liye Aapne mujhe bulaaya Apni sharan.

Jaanti hoon ki Aap meri raksha karte aaye Hain aur karte rahenge
Aur karmon ke bhugtaan ke safar mein jabb jabb mere aansoo bahenge
Aap ponchhenge unhe Apni mamta ke divya jal se
Aur mujhe girne na denge Aap Apne aanchal se
Taaki karmon kee khaayi gehri
Bigaad na paaye meri aane wali subah sunehri
Aur raat bhi katt jaaye
Mere bin ghabraaye.

Mila hai Aapke haath ka sahaara
Mila hai Aapke saath ka aasara
Hota rahega mera uddhaar Aapke dwaara
Isliye khaayi mein girna bhi hai gavaara.

Nahin badi mujh nimaani kee mehnat ya chaah
Nahin badi hai vo khaayi jo rokti hai raah
Sabse badi hai Aapki Khudaayee
Jo mujhe Aapke charnon mein le aayi.

Aapse behtar koi na jaane is khaayi kee gehraayee
Aapse vaddi nahin hai kisee aur kee vadiyaayee
Anmol, adbhut, aur anupam hai Aapki guruyaayee
Khushkismat hoon mai ki mujhe milee hai Aapki rahnumaayee.

🌹🌹🌹🌹🌹🌹🌹

Jai Guruji 🙏🙏
Dhirja

Mere Karmon Kee Khaayi (12/02/2025)

December 3, 2025

Om Namaha Shivaya
Aaj Ka Suvichaar 🙏🏻🙏🏻

#2845

Guruji Ke Pyaare Darbar Mein

Guruji ke pyaare darbar mein
Sachkhand ke is sundar sansaar mein
Bheed kee zaroorat nahin
Zaroorat hai bhole bhakti bhaav kee
Chaalaaki aur dikhaawe kee koi jageh nahin
Jageh hai yahaan chaarul chaav kee.

Yahaan Guruji Maharaj ka hota hai stavan
Unhee se hoti hai arzi mann hee mann
Yahaan miltee hai bakhshish
Yahaan milta hai ashish
Bhakt kee kalpana se bhi behtar
Kyunki ye hai bakhshanhaar ka dar.

Guruji Maharaj ke darbar mein
Doob kar Unke paawan pyaar mein
Bhakt paa paaye Guruji mein sab kuch
Samajh paaye ki baaki sab hai tuchh
Besharte Guruji kee kripa ho bhakt par
Kyunki ye hai kirpadhaar ka ghar.

Yahaan Guruji jaanein sab, bina bhakt ke boley
Yahaan jo aaye, vo Guruji ka hee ho le
Duniyavi apne bhi hotey hain hamaare jin kashton se bekhabar
Guruji ko hoti hai unn sabki bhi khabar
Guruji toh antaryami Hain
Ve sansaar ke swami Hain.

Sabse nirmal hai ye nagariya
Yahaan behta hai daya ka dariya
Beshak is yug mein anekon bhakt hain pareshaan
Sabhi bhakt hain Guruji kee santaan
Bhakton ka hota hai is darbar mein kalyaan
Bhakton ko yahaan milta hai karuna ka daan
Guruji Maharaj toh Hain karunanidhaan
Guruji toh Hain Bhagwaanon ke Bhagwaan.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ke Pyaare Darbar Mein (12/03/2025)

December 2, 2025

Om Namaha Shivaya
Aaj Ka Suvichaar 🙏🏻🙏🏻

#2844

         Jabb Aapne Bulaaya Thaa…

Param poojya Guruji Maharaj,

Jabb Aapne bulaaya thaa
Tabb thi mai begaani
Aapki sharan mein aakar
Ho gayi Aapki deewaani
Tabb bhi thi aur abb bhi hoon nimaani
Na jaane kar jaati hoon kitnee baar naadaani.

Mai nahin bakhshishon ke bhi kaabil
Lekin Aapka hai atyant udaar dil
Bakhshte rehte Hain Aap
Harte Hain mere dukh santaap
Roti hoon toh Aap chup karaate Hain
Mujh par Apni mamta barsaate Hain.

Dil chaahta hai ki Aapko sada rakhoon prasann
Aap kripa karein toh poori ho ye chaahat
Yaad rakhoon ki Aap angg sangg Hain
Toh mujh takk nahin pahunch sakti pareshaani kee aahat.

Jo paristhiti mujhe lagti bhi hai agar pareshaani
Vo toh hai is zindagaani kee kahaani
Jo likhee mere hee karmon ne majboor hokar
Aur pareshaani chali jaayegi mujhe sirf chhookar
Ya phir ho sakta hai ki chhuye bin hee chali jaaye
Jo Aapki kripa chali aaye.

Kal takk bhi shukraguzaar thi Aapki aur shukraguzaar hoon aaj
Itnee niyaamaton se Aapne nawaaza hai, Maharaj
Itnee, ki andaaza lagaana bhi hai namumkin
Daave se keh sakti hoon ki koi ashish nahin hai Aapki daya ke bin.

Kal bhi suhaani bahaar ho ya ho bhayankar tufaan
Chal raha ho jeevan mein kaisa bhi imtehaan
Aisee sumat bakhshiyega mujhe, mere Bhagwaan
Ki Aapka shukrana karti rahe Aapki ye santaan.

🌹🌹🌹🌹🌹🌹🌹

Jai Guruji 🙏🙏
Dhirja

Jabb Aapne Bulaaya Thaa… (12/02/2025)