Author: dhirjabhat

March 19, 2026

Om Namaha Shivaya
Aaj Ka Suvichaar 🙏🏻🙏🏻

#2951

Maa Aur Mamta Ka Spandan

Jabb jabb aati hai mujhe maa kee yaad
Guruji dete Hain Apna ashirwaad
Jabb yaad aaye maa ka banaaya bhojan swad
Guruji chhaka dete Hain langar prasad
Jabb jee chahta hai maa ke saari ke pallu se ponchhoon aansoo
Toh aksar Guruji ke phool ya chola lete hain kaheen par mujhe chhoo.

Ye nahin hai itefaaq kaheen se
Ye chamatkaar nahin gagan ya zameen se
Ye hai Guruji ka pyaar
Jo barasta hai aparampaar
Ye hai Unkee mamta
Jiskee mahaan hai kshamta
Aur jismein hai aisee samtaa
Ki har bhakt hai ismein ramta.

Guruji kee dariyadilee
Na jaane mujhe kabb se hai milee
Jabb Unkee marzi hui
Tabb dilaaya Unhonei uska ehsaas
Unhee ko gyat mai kis anubhav ke liye hoon tayyaar
Mera toh andaaza bhi lagaana hai bekaar.

Mai toh Unhe mata aur pita maanoon
Unkee rehmat ke aanchal ko maa kee goad jaanoon
Ve hee Hain mere janmadaata
Ve hee Hain sukhdaata
Itna nirmal hai Unke sangg naata
Jismein maa aur mamta ka spandan hai samaata.

🌹🌹🌹🌹🌹🌹🌹

Jai Guruji 🙏🙏
Dhirja

Ma Aur Mamta Ka Spandan (03/19/2026)

March 18, 2026

Om Namaha Shivaya
Aaj Ka Suvichaar 🙏🏻🙏🏻

#2950

        Aapki Goad Mein Rahoongi…

Apne dwaara rachi maya se
Aapne dhakh liya swayam ko
Usee maya ke khel se
Aap chalaate Hain mere jeevan ko.

Ye hai mere param saubhagya
Ki Aap baney mere Aaraadhya
Har uss divya shakti aur prataap ka dhanyawaad
Jinse jud kar mainey aakhirkaar paaya Aapka ashirwaad.

Abb yahaan se mujhe kaheen nahin jaana
Apne charnon mein rehne deejiyega mera ashiyaana
Aapke charnon mein mila hai jo alaukik khazaana
Uss se mujhe kabhi na keejiyega begaana.

Doobti rahoon mai Aapki vadiyaayee kee gehraayee mein
Sudhaar loon apna jeevan Aapki guruyaayee mein
Na samjhoon Aapka ishaara, toh kripa kar Aap samjhaa deejiyega
Na sunn paaoon Aapki ruhaani awaaz, toh daya kar Aap sunvaa deejiyega.

Gaflat kee gathri hoon mai deen
Bann kar rehna chaahti hoon Aap prataapi mahasaagar mein ik meen
Aapke aanchal mein hee ho mera jeena marna
Aapki goad mein rahoongi toh phir kyun aur kaisa darna?

🌹🌹🌹🌹🌹🌹🌹

Jai Guruji 🙏🙏
Dhirja

Aapki Goad Mein Rahoongi… (03/18/2026)

March 17, 2026

Om Namaha Shivaya
Aaj Ka Suvichaar 🙏🏻🙏🏻

#2949

       Zara Sochiye…

Ye Guruji Maharaj ka dar hai
Yahaan sabhi ka vyaktigat sa safar hai
Param poojya Guruji kee sabhi par nazar hai
Aaj ya kal ho jaati sabhi par Unkee nadar hai.

Kataare lagi hain sainkdon kee yahaan
Sachcha bhagat koi virla hai
Maangne aate hain kayi hazaar yahaan
Asal cheez maangta koi virla hai.

Koi yahaan beemari ke bahaane aata hai
Aur nirogi hokar yahaan se jaata hai
Koi khoye ko paane aata hai
Aur paakar chala jaata hai.

Koi aata hai darshan karne
Koi apni jholi bharne
Koi yoon hee hota hai pareshaan
Kisee ne suna hota hai yahaan ka gungaan.

Par ye toh hai nishchit
Ki yahaan hota hai hitt
Aur koi nahin aa sakta yahaan Guruji kee agya bin
Chaahe vo minnatein kar le raat aur din.

Hai toh sabb apne karmon ka heir pher
Aksar andhera leta hai gher
Par beshak lagey yahaan kabhi kabhi der
Kintu andher mein bhi ho jaati hai saver.

Kaaran hota hai Guruji kee oar se vilamb ka
Kabhi kabhi hota hai vo sanket naye aarambh ka
Kabhi Unkee marzi se karmon ka poora bhog karna hota hai zaroori
Ve maalik, hum nimaane, ye hai hamaari majboori.

Phir bhi aksar swayam par hamaare karmon ka bhaar lete huey
Guruji dete Hain taar
Ek baar nahin, balki baar baar
Varna hamaara jeena hota dushvaar.

Guruji Maharaj toh Hain sabse dayalu naath
Saari sangat hee maan leti ye sachchi baat
Guruji Hain parampita karunanidhaan
Par kya hum bann paaye honhaar santaan?

…Zara sochiye…

🌹🌹🌹🌹🌹🌹🌹

Jai Guruji 🙏🙏
Dhirja

Zara Sochiye… (03/17/2026)

March 16, 2026

Om Namaha Shivaya
Aaj Ka Suvichaar 🙏🏻🙏🏻

#2948

          Parmeshwar Roopi Sahaara

Tumhaare karmon ke hisaab mein
Tumhaare jeevan kee kitaab mein
Ik naya adhyaaya honei jaa raha hai shuru
Ye kripa bhi kar rahe Hain tumhaare Guru
Beshak tum nahin is se avagat
Kintu Guru Sahib ko hai gyat
Kyunki tumhaari kabb kabb kaisi hoti hai haalat
Guruji jaante Hain tumhaare haalaat.

Tumne maanga hai Guruji ka sanatan saath
Jo Guruji nibha rahe Hain din raat
Jo beet gaya so beet gaya
Abb ye adhyaaya hai naya
Guruji kee yaad mein rehkar aagey badho
Apna farz nibhaate huey bilkul na daro
Tumhaari mehnat aur Guruji kee rehmat rangg laayengi
Guruji kee daya se tumhe ye unnati ke path par le jaayengi.

Sadmon se mukt karo mann ko
Maaf kar do har uss jann ko
Jisne koi bhi droh kiya tumhaare sangg
Beeti baaton se na kupit karo bhavishya ka rangg.

Guruji se maang lo apne har gunah kee maafi
Vo bhi jabb jaane anjaane mein tumne kee ho kisee se na-insaafi
Mushkilein kya kumm aayin is ek janam mein?
Kya tum phansna chaahoge phir se janam maran mein?

Guruji chaahein toh lekha likhenge swayam tumhaara
Unkee meher se jeevan ka ye adhyaaya hoga sunehra
Pooran Guru kee praapti ka mauka nahin milta dobara dobara
Pooran Guru hotey Hain Parmeshwar roopi sahaara.

🌹🌹🌹🌹🌹🌹🌹

Jai Guruji 🙏🙏
Dhirja

Parmeshwar Roopi Sahaara (03/16/2026)

March 15, 2026

Om Namaha Shivaya
Aaj Ka Suvichaar 🙏🏻🙏🏻

#2947

                   Swabhaav Saral

Swabhaav saral
Aur leela gehri hai Guruji kee
Har vachan vishad aur nirmal
Aur mamta nyaari hai Guruji kee.

Har rangg hai Unka diya hua
Isliye har rangg laagey mujhe pyaara
Par jo mai Unke rangg mein rangg jaaoon
Toh vo hai mere liye jashne bahaara.

Guruji kee daya hui mujhpar toh mai Unse judi
Unkee kripa hui toh Unkee oar meri surt mudi
Unkee karuna se har din ho mere liye tyohaar
Unkee meher se har rangg mein dikhey noorani nikhaar.

Guruji ke saanidhya ko paakar hui hoon mai dhanya
Unke sangg baithne ka har avsar hota hai bhavya
Ye bhakti hai ya pyaar, mai na jaanoon
Mai toh isey sunehra mauka maanoon
Jismein yakeenan basta hai Unka dulaar
Jo hai Unkee meharbaani aparampaar.

Badalte rahenge jeevan ke rangg
Kuch aisa hee hai jeevan ka dhangg
Guruji ke rangg mein rangi rahoon mai sada
‘Shukrana Guruji’ kahoon mai sada.

🌹🌹🌹🌹🌹🌹🌹

Jai Guruji 🙏🙏
Dhirja

Swabhaav Saral (03/15/2026)

March 14, 2026

Om Namaha Shivaya
Aaj Ka Suvichaar 🙏🏻🙏🏻

#2946

           Sabse Anmol Ashirwaad

Karmon ka khel chalta rahega
Maya ka paash bhi bandha rahega
Guruji mein mastt hokar jee lo
Guruji kee yaad mein vyast hokar jee lo.

Tumhe Guruji ne sweekaara hai
Ye hai khush rehne ka sabse bada kaaran
Paashon se miltee rahegi azaadi
Karmon ka hota rahega nivaaran
Guruji kee prerna aur meher se
Isliye khush raho har peher mein.

Na beete samay ke liye hokar malaal
Na bhavishya kee fikr mein chintit kar ke haal
Aaj mein jee lo sakaraatmak vichardhaara sangg
Jeevan hai toh dekhne padenge iske anekon rangg.

Jeevan ke rangon mein rehte huey
Dil kee baat Guruji se kehte huey
Baho prerna ke pravaah mein
Guruji kee dikhaayee raah mein.

Jeevan hai, mann kabhi khush hoga, kabhi hoga pareshaan
Kabhi jeevan sukhad hoga kabhi aayenge imtehaan
Milegi wafa aur bewafaai
Milega dard dukhdaayee
Milegi preet sukhdaayee
Milegi bheed aur tanhaayee.

Khud se bhi hogi shaayad gaflat aksar ya kabhi kabhi
Seekhna hoga galatiyon se bhi
Jo kehta hai usne kabhi galati nahin kee
Usne shaayad zindagi hee nahin jee.

Na chodna Guruji kee ibadat
Guruji parakhte Hain neeyat
Ve tumhaara har prayaas sakte Hain dekh
Ve chaahein toh badal dete Hain lekh
Mila hai mauka tumhe aane ka Unkee sharan mein
Ye sabse anmol ashirwaad hai tumhaare is jeevan mein.

🌹🌹🌹🌹🌹🌹🌹

Jai Guruji 🙏🙏
Dhirja

Sabse Anmol Ashirwaad (03/14/2026)

March 13, 2026

Om Namaha Shivaya
Aaj Ka Suvichaar 🙏🏻🙏🏻

#2945

                 Sabhi Ke Mangal Kee

Guruji Maharaj, Aapki sharan ka hee sahaara hai
Vipatti mein sada Parameshwar ne hee toh taara hai
Aapki hai sabhi par nazar
Tarr jaaye jisey miley Aapki nadar.

Duniya mein kitna kuch ho raha hai
Kitnon ka imaan so raha hai
Behte behte prithvi ka rakt beh jaayega
Dharma kab takk ek taang par jeena seh paayega
Bekusoor maare jaa rahe hain sansaar mein
Bebasi hai inn bekusooron kee pukaar mein
Gunah garaj rahe hain gumaan se
Begunah ho gaye hain itne pareshaan se
Badh rahe hain shareerik, maansik, adhyatmik ghaav
Kumm ho raha hai saamanjasya ka bhaav
Aap hee Samrat Hain
Aap Vaidyanath Hain
Aap hee karunanidhaan
Aap mridd, Aap meharbaan.

Kripa hai Aapki ki sadasheelta ka bhi ho raha hai vistaar
Insaaniyat nibha rahe hain nar-nariyan kayi hazaar
Bhakti aur ruhaani gyan ka bhi ho raha hai prachaar
Duniyavi gyan badhne kee bhi hai tez raftaar.

Sachchaayee prafullit hoti jaaye
Jhooth ke jhamele mein na khoti jaaye
Parde dhakiye
Sumat bakhshiye.

Aapse kuch bhi chhipa nahin
Aap hee jaanein is samay mein bhi kya hai sahi
Aapki rachna hai ye srishti
Aapke hukm se hee ye chalti
Aapke aanchal mein ye palti
Aapke ishaare se hee ye dhalti.

Ye jo hai yug parivartan kee bela
Har koi itnee bheed mein bhi hai akela
Har taraf imtehaan khada hai
Aapke saanidhya ka hee aasara hai
Mai bhi putli hoon chhal aur mal kee
Kaamna karti hoon aaj se behtar kal kee
Ek Aapko hee khabar hai sabke pal pal kee
Aapse dua hai sabhi ke mangal kee.

🌹🌹🌹🌹🌹🌹🌹

Jai Guruji 🙏🙏
Dhirja

Sabhi Ke Mangal Kee (03/13/2026)

March 12, 2026

Om Namaha Shivaya
Aaj Ka Suvichaar 🙏🏻🙏🏻

#2944

        Shukr Hai Guruji Maharaj Ka

Guruji ka aanchal hai itna vishal
Jo saari sangat ko leta hai sambhaal
Guruji ke haath hain itne balvaan
Jo saari sangat ke haathon ko lete hain thaam
Guruji kee drishti hai kitnee sundar
Jo saari sangat par rakhti hai nazar
Guruji ka noor hai kitna prabal
Jo saari srishti ko karta hai ujjwal.

Saadhaaran nahin hain ye tathya
Maamuli nahin hai inka satya
Guruji Hain SadaShiv swayam akhirkaar
Unke liye khel hai ye maya roopi sansaar.

Hamaari koi aukat nahin
Sivaaye keede makodon kee ya unse bhi tuchh
Par ye baat hai bilkul sahi
Ki Guruji Hain hamaare liye sab kuch.

Guruji ke bin nahin gati
Guruji Hain Pashupati
Hum anekon paash mein bandhe huey praani
Hamaari toh shaayad jaat hee hai nimaani.

Kintu Guruji Hain dayavaan
Banaaya Unhonei hamein Apni santaan
Varna ummeed nahin thi uddhaar kee
Prerna nahin mil rahi thi atma-sudhaar kee.

Yug parivartan ke is samay mein
Bhavneeya ( expected ) pralay mein
Guruji ke kamal charan hain ati-sukhdaayi
Shukr hai Guruji Maharaj ka, Jinhonei hum jaison sangg preet hai nibhaayee.

🌹🌹🌹🌹🌹🌹🌹

Jai Guruji 🙏🙏
Dhirja

Shukr Hai Guruji Maharaj Ka (03/12/2026)

March 11, 2026

Om Namaha Shivaya
Aaj Ka Suvichaar 🙏🏻🙏🏻

#2943

            Kehti Hoon Bin Sanshay…

Kehti hoon bin sanshay
Har vele har samay
Kaheen na kaheen
Mai na jaanoon kaise
Guruji mujhe sambhaalte Hain
Chalne ka raasta dikhaate Hain
Uspar chalna sikhaate Hain
Gir jaaoon toh mujhe uthaate Hain
Mere ashru ponchhne bhi aate Hain
Mere mukh par muskaan Ve laate Hain
Beshak imtehaan Ve lete Hain
Mujhe vilamb sehne kee shakti dete Hain
Mere uljhe maajron ko suljhaate Hain
Kitnee baatein samjhaate Hain.

Ve hee jaanein sahi hai kaunsa samaa
Mere har kadam ke liye
Unhee kee daya kee badaulat
Mainey aaj takk ke din hain jeeye
Aagey bhi milta rahe Unka sahaara
Unke bin mera ek pal bhi na hai guzaara.

Unkee chhuppi ka bhi arth hai
Mai samjhoon na, vo meri naadaani
Ve sada haath thaamte Hain
Mai na thaamoon, toh vo meri beimaani
Par Ve phir bhi wafa nibhaate Hain
Aur wafa kee adaa sikhaate Hain.

Bahut shukrana ki barasti hai Guruji kee meharbaani
Varna mai reh jaati anekon bodh se anjaani
Zindagi kee pehchaan hui hai ruhaani
Guruji kee kripa se chalti hai zindagaani
Ye nahin safar kewal bhautik chamatkaar ka
Ye safar hai har pal Guruji ko parivyaapak namaskaar ka.

🌹🌹🌹🌹🌹🌹🌹

Jai Guruji 🙏🙏
Dhirja

March 10, 2026

Om Namaha Shivaya
Aaj Ka Suvichaar 🙏🏻🙏🏻

#2942

Guruji Kee Goad Mein

Makaan ho apna ya kiraaye ka
Ohda hai iska mehez ik saraaye ka
Par rehte chaloonga ismein jeevan bhar
Ye samajhne kee naadaani kar
Musaafir ekatrit karta gaya saamaan
Saath mein badhta chala uska lobh, moh, jhooth, aur abhimaan.

Maya mein itna mastt hua
Vikaaron ka das bann-ne mein vyast hua
Vishay bhog se grast hua
Phir samay ke chakra kee nemi ne usey chhua.

Kuch aise baney haalaat
Ki naubat aa gayi makaan chodne kee
Tabb apni naadaani par hui usey glaani
Socha kya zaroorat thi itna saamaan jodne kee.

Makaan toh chodna hee pada
Abb thaa veh sadak par khada
Bhavishya ka na kuch socha thaa tabb takk
Abb pachhtaava ho raha thaa athak.

Uss musaafir ka kya hua, mai hoon is se anjaan
Par yaad aaya ki kaise samajh kar is shareer ko sthir makaan
Hum mein se kitne is musaafir kee tareh jeevan dete hain guzaar
Bhool jaate hain ki sanatan ghar nahin hai ye sansaar.

Isey chod kar sabhi ko hai jaana
Yahaan se hona hee hoga ravaana
Na rahega shwaas, na rahega shareer
Aisee hee hai har shareer kee taqdeer.

Karte huey shareer ka satkaar aur poshan
Kyun na karein rooh ko roshan
Guruji ke naam ke noor se
Yoon prerit rahein Guruji kee yaad ke suroor se
Ki shareer ka tiraskaar na karein
Par shareer mein lagan lagaakar moh se mann na bharein
Taaki jabb shareer chodne ka aaye samaa
Toh Guruji kee meher se rooh ko miley Unkee panaah
Na saamaan ka aur na makaan ka ho gumm
Guruji kee goad mein rooh yoon jaaye ramm.

🌹🌹🌹🌹🌹🌹

Jai Guruji 🙏🙏
Dhirja