Author: dhirjabhat

October 27, 2025

Om Namaha Shivaya
Aaj Ka Suvichaar 🙏🏻🙏🏻

#2808

         Jeevan Ke Bhinn Bhinn Pehlu

Anubhav ko na dekar sukh dukh ka naam
Jeevan ke bhinn bhinn pehlu agar lein maan
Toh shaayad jeene mein ho jaaye thodi aasaani
Kyunki inse toh paripoorna rehti hee hai zindagaani.

Sabb hai apne pichhle karmon ka parinaam
Aur saath hee hotey hain karma kriyamaan
Aur vaise bhi jabb Guruji Hain angg sangg
Toh sukh dukh dono buss hain jaise hon do rangg
Jo Guruji kee leela se sanvaarenge hamaara chitr
Jaise jaise Guruji kee kripa se hamaara antas hota jaayega pavitra.

Koi nahin hai Guruji se zyada nipun chitrakaar
Ye swayam ko yaad dilaana zaroori hai baar baar
Mudda hai ye is safar ka
Ki hota jaaye bheetar ka pavitrikaran
Isliye kyun na Guruji se judey rehkar
Sanvaarein hum apna ye janam.

Guruji ka bakhsha simran
Saaf karta chalega mann
Guruji kee yaad
Karegi antas ko aabaad
Guruji kee bataayi Gurbani
Karegi poshan ruhaani.

Guruji ke satsang mein jaa kar
Guruji ka chai aur langar prasad khaa kar
Milta rahega Guruji ka ashirwaad
Buss, kuch aur chahiye hee nahin iske baad.

Guruji kee kripa se shanti aur sthirta hogi mann mein
Sukh dukh mehez pehlu bannkar saath rahenge jeevan mein
Beshak ye pehlu dhoop chhaaon banenge zindagi ke gagan mein
Phir bhi anokha santosh milta rahega Guruji kee sharan mein.

🌹🌹🌹🌹🌹🌹🌹

Jai Guruji 🙏🙏
Dhirja

Jeevan Ke Bhinn Bhinn Pehlu (10/27/2025)

October 26, 2025

Om Namaha Shivaya
Aaj Ka Suvichaar 🙏🏻🙏🏻

#2807

           Ho Bemausam Kee Barsaat

Ho bemausam kee barsaat
Ya ho andheri tufaani raat
Guruji sada Hain tumhaare saath
Sambhaalne tumhaare haalaat.

Beshak lamba lagey andher
Sabb hai karmon ka her-pher
Beshak lagg rahi ho der
Zaroor hogi saver.

Guruji ke tum ho bachche
Aur jo tum ho neeyat ke sachche
Tum ho jaao befikr
Vaise bhi tum na bhi karo zikr
Toh bhi Guruji ne tumhaari har baat jaani hai
Tumhaara Guru sarvgyaani hai.

Tum toh phir bhi so lete ho
Par Guruji na soyein ek bhi pal
Unhee kee nirantar kripa se
Tumhaare andekhe kasht bhi rahe hain tal.

Shaayad unn kashton ko jaan paane kee bhi nahin hai tumhaari kshamta
Ya phir unka saamna karne kee nahin hai himmat ya sehensheelta
Isliye shukrana karo Guruji Maharaj ka
Jinhonei khayaal rakha hai tumhaare har kaaj ka
Aur aagey bhi rakhte rahenge
Tumhaare parde dhakte rahenge
Beshak tumhe na thi Guruji kee pehchaan
Par Ve toh sada karte aaye Hain kalyaan
Koi aur na hai, na hoga Unke jaisa meharbaan
Shukr hai tumne is satya ko liya hai jaan aur maan.

🌹🌹🌹🌹🌹🌹🌹

Jai Guruji 🙏🙏
Dhirja

Ho Bemausam Kee Barsaat (10/26/2025)

October 25, 2025

Om Namaha Shivaya
Aaj Ka Suvichaar 🙏🏻🙏🏻

#2806

                     Meri Kahaani

Guruji kee kripa bin nahin mera guzaara
Guruji kee daya hai mera ekmaatra sahaara
Jiske dwaara mujhe milega vo kinaara
Jahaan pahunchne ke liye mera janam hota raha hai dobara dobara.

Is kinaare ko paane mein lagenge kitne janam
Ye mai na jaanoon
Lekin jabb takk Guruji kee sharan mein hoon
Vaheen hai mere santosh kee yukti aur meri mukti
Isliye Guruji se hai ye guzaarish
Ki Ve poori kar dein meri ye khwaahish
Ki jabb takk lagaa rahe yahaan par mera aana jaana
Tabb takk rahe mera Unke charnon mein thikaana
Aur meri atma ne aakhir mein Unn Paramatma mein hai samaana
Jabb mukammal hoga uss atma ke safar ka afsaana.

Kaisa hoga vo pal
Kabb aayega vo kal
Ye jaanti nahin hoon mai nimaani
Magar itna toh jaanoon aur maanoon
Ki tabb poori ho jaayegi kayi janmon se chal rahi meri kahaani.

🌹🌹🌹🌹🌹🌹🌹

Jai Guruji 🙏🙏
Dhirja

Meri Kahaani (10/25/2025)

October 24, 2025

Om Namaha Shivaya
Aaj Ka Suvichaar 🙏🏻🙏🏻

#2805

                  Guruji Ka Pyaar

Har chamatkaar ke bhi paar
Hai Guruji kee leela ka saar
Unka aseem anmol pyaar
Deta hai sangat ko taar.

Guruji ke pyaar mein aisee shakti hai
Jo bhakt ko rukne nahin deti rukaavat ke baavajood
Guruji ke pyaar mein vo protsaahan hai
Jo bhakt mein zinda rakhta hai utsah ka wajood.

Apni sangat ko sabar aur bharosa
Guruji ke pyaar ne sada hai bakhsha
Sangat karma bhog ke dauran jis bhi haal mein ho
Guruji ka pyaar karta hai uskee raksha.

Guruji ka pyaar hai zakhmon ke liye marham
Guruji ka pyaar hai rehem
Guruji ke pyaar mein shaamil hai kshama daan
Guruji ka pyaar sabhi bhakton ke liye hai ek samaan
Baaki toh hum bhakton par nirbhar hai
Aakhirkaar karma bhoomi par hamaara vartmaan ka ghar hai.

Ruhaani unnati ke liye karma bhog hai majboori
Guruji ke pyaaron ke liye karma bhog hai zaroori
Guruji ke pyaar mein hai karma bhog karaane kee sampoorna kshamta
Guruji ke pyaar mein hai nirmal nyaay aur samta.

Guruji ke pyaar mein niyamnishthataa bhi hai
Guruji ke pyaar mein komal mamta bhi hai
Guruji ka pyaar duniya mein anginat praaniyon par raha hai baras
Na jaane kitne jann Guruji ke satsang mein aane ko jaate hain taras.

Guruji ka pyaar milta hai khushnaseebi se
Guruji ka pyaar duur kar deta hai gareebi se
Kyunki Jin Guru ke gulam hain sabhi praani, aur aasmaan, aur zameen
Uss bhakt ko phir kyun ho zindagi mein koi bhi kamee?

Dekar khoobsoorat khazaana Apne pyaar ka
Guruji sanvaarte Hain roop bhakt ke ghar parivaar ka
Is yug mein vartmaan se bahut dukhad haal hota sansaar ka
Agar duniya ke koney koney mein na hota paatr Guruji ke pyaar ka.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ka Pyaar (10/24/2025)

October 23, 2025

Om Namaha Shivaya
Aaj Ka Suvichaar 🙏🏻🙏🏻

#2804

       Har Ek Aansoo…

Har ek aansoo
Har muskuraahat
Har karam
Har chintan
Har chaahat
Har fikr se raahat
Har fikr
Har zikr
Guruji ko arpit kar
Jeevan jaayega sanvar.

Vaise bhi kya hai tere buss mein
Kuch bhi toh nahin…buss teri swatantra ichcha
Isliye kyun na Guruji ko har soch aur karma kar ke arpit
Unhe chetne mein lagaa apna chitt.

Guruji mein mann kee lagan lagaa le
Unke liye bhole bhaav ke jazbaat jagaa le
Ye jazbaat hain tere bheetar hee par hain khoye se
Unhe jagaayega nahin toh ve reh jaayenge soye se.

Guruji ka hee ansh hai teri atma
Kyunki Ve Hain Paramatama
Toone Unhee mein hai samaana aakhirkaar
Unhe sarvsamarpan karne mein hai tera hee uddhaar.

Safar toh chalta rahega jaise taise
Lekin agar tu jee lega Guruji chaahein jaise
Toh tere mann ka paatr Unka anugrah achche se grahan kar paayega
Tu kalpana bhi nahin kar sakta jitnee, tu uss se bhi kaheen zyada tarr jaayega.

🌹🌹🌹🌹🌹🌹🌹

Jai Guruji 🙏🙏
Dhirja

Har Ek Aansoo… (10/23/2025)

October 22, 2025

Om Namaha Shivaya
Aaj Ka Suvichaar 🙏🏻🙏🏻

#2803

          Nutanvarsh Ka Abhinandan

Kar lo nutanvarsh ka abhinandan
Kar ke Guruji Maharaj ka simran
Safal kar lo apna jeevan
Shuddh kar ke mann ka upvan.

Guruji ka ruhaani sparsh ho
Toh har varsh mein harsh ho
Thakk gaye ho karmon ka bojh dho
Abb Guruji se liv jod Unmein jaao kho.

Is varsh ko jee lo pichhle varsh se behtar
Rooh nikhaar kar nikhaar lo apna safar
Guruji kee kripa hui hai, bhakti bhaav mein baho
Ye bhaav bakhsha hai Jinhonei, Unn Guruji Maharaj ka shukrana kaho.

Har din naya, har varsh nutan
Har pal hota rahe Guruji ka chintan
Har anubhav mein samaaye ruhaani spandan
Kyunki angg sangg hotey Hain Bhagwan.

🌹🌹🌹🌹🌹🌹🌹

Jai Guruji 🙏🙏
Dhirja

Nutanvarsh Ka Abhinandan (10/22/2025)

October 21, 2025

Om Namaha Shivaya
Aaj Ka Suvichaar 🙏🏻🙏🏻

#2802

Guzarte Huey Guruji Ke Naam Kee Gali Se

Guzarte huey Guruji ke naam kee gali se
Musaafir ne poochha ik kali se
Tum kiskee dhun mein ho muskuraa rahi
Kiske naam ka geet ho gaa rahi?

Kali ne bin hichkichaaye
Aur bin ghabraaye
Musaafir ko bataaya Guruji ka naam
Aur karne lagi veh Guruji ka gungaan.

Kali ne bataaya musaafir ko
Ki Guruji jaisa prataapi koi nahin
Jis Rabb ko sabb dhoondhte hain
Guruji Hain Rabb vahee.

Musaafir ne kali se suna
Ki Guruji ne usey chuna
Jaise Ve chunte Hain Apni har sangat
Aur chadhaate Hain sab par Apni rangat.

Kali ne kaha musaafir se
Ki Guruji ka sapna hakeekat se parey nahin
Aur jabb koi aisa sapna aaye
Toh vo kabhi darey nahin
Kali ne musaafir ko sunaaye anekon satsang
Bataaya usey kaise Guruji rehte Hain bhakton ke angg-sangg
Kali jabb Guruji kee mahima ka kar rahi thi bakhaan
Toh naman mein jhuk gaya aasmaan
Guruji kee mahima sunkar musaafir hua hairaan
Maana usne ki zameen par aaye Guruji ke roop mein Bhagwaan.

Guruji kee baatein kehte sunte
Ho gayi subah se raat
Kali so gayi, musaafir aagey chala
Yaad karte huey kali kee kahi har baat.

Thakk kar phir kuch der ke baad
Vo ik taruvar ke taley so gaya
Guruji aaye khwaab mein uske aur pyaar kiya usko
Musaafir uss khwaab mein yoon kho gaya
Ki jabb jaaga toh usey lagaa ki vo khwaab nahin, thi hakeekat
Is ehsaas se adbhut si hui uskee tabeeyat
Usey kali ka kehna yaad aaya
Aur phir uska mann harshaaya.

Guruji kee yaad ko mann mein basaaye
Musaafir ne apne lamhe bitaaye
Guru kripa se pahuncha Guruji ke mandir
Uskee khushi kee seema na thi phir.

Pahunchkar Guruji ke dar par
Usey darshan huey manohar
Guruji kee sangat bannkar
Anugrahit hua uska safar.

🌹🌹🌹🌹🌹🌹🌹

Jai Guruji 🙏🙏
Dhirja

Guzarte Huey Guruji Ke Naam Kee Gali Se (10/21/2025)

October 20, 2025

Om Namaha Shivaya
Aaj Ka Suvichaar 🙏🏻🙏🏻

#2801

          Shukrana Mein Jeeti Chalo

Patharon se chot sehte sehte
Nadiya behte behte
Rukti nahin
Thakti nahin.

Tum bhi na thakna
Tum bhi na rukna
Guruji kee yaad mein rehna
Unke liye bhole bhaav mein behna.

Tum bhi ik nirmal nadiya ho
Behti chalo, tum behti chalo
Guruji ke diye praan hain tum mein
Tum Unkee yaad mein rehti chalo.

Jo bhi khayaal aayein tumhaare mann mein
Tum Guruji se unke baare mein kehti chalo
Jo bhi peeda ho rahi hai tumhe
Tum behte behte sehti chalo.

Guruji ne tumhe bakhshi hai sehensheelta
Guruji ne tum par nawazi hai sadasheelta
Ye bhool na jaana behte behte
Tum behna Guruji ka shukrana kehte.

Guruji kee kripa se barkaraar hai tumhaara noor
Ye noor hai ruhaani
Is noor ko nahin chheen sakti
Koi bhi paristhiti tufaani.

Atma-vishwaas hai tumhaare paas
Ye bhi daat hai badi hee khaas
Guruji ke naam mein hai aisee paawan mithaas
Ki vo tumhe na honei degi udaas.

Vo jo tumhe nayi disha mein bahaav ka sanket hai dikha
Vo tumhaara lekha Guruji ne dobaara hai likha
Behti chalo, tum masti mein
Bin itraaye apni hasti mein.

Jaise jaise tum badhogi Guruji kee gehraayee ke mahasaagar kee oar
Shant hota chalega tumhaare mann mein machaa hai jo shor
Arey, tum par hai Guruji kee nirantar nigraani
Shukrana mein jeeti chalo tum apni zindagaani.

🌹🌹🌹🌹🌹🌹🌹

Jai Guruji 🙏🙏
Dhirja

Shukrana Mein Jeeti Chalo (10/20/2025)

October 19, 2025

Om Namaha Shivaya
Aaj Ka Suvichaar 🙏🏻🙏🏻

#2800

                       Ujjwal Disha

Yuddh yoddha ko chunta hai
Yoddha yuddh ko nahin
Prakriti ka khel ho ya ho niyati kee kahi
Karmon ke nazariye se shaayad har yuddh aur khel hai sahi.

Aur jo hum Guruji Maharaj kee sharan mein hain
Toh jo Guruji nirdhaarit karte Hain, sahi hai buss vahee
Toh jis praarabdh ka Guruji bhog chaahte Hain karaana
Unse bachne ka nahin chalta koi bhi bahaana.

Guruji se behtar koi sakta nahin jaan
Ki bhakt ke liye kya sahi hai kab aur kahaan
Beshak pichhle karma hotey hain is janam mein bezubaan
Lekin praarabdh bannkar ve kar dete hain behad pareshaan.

Kintu Guruji Maharaj bannkar meharbaan
Praarabdh katvaate huey dete Hain sahaara
Apni marzi se aksar lekha likhte Hain dobaara
Niyati kee kahi ko aksar badal kar dikhaate Hain naya kinaara.

Aise Guru kee sharan mein yoddha hain hum
Har adhyatmik yuddh hota rahega saarthak
Guruji Hain aise mahaan dayavaan
Jo bhakton kee madad karte Hain athak.

Guruji Maharaj ke charnon mein baarambaar naman
Unkee kripa se nikharte rahein rooh aur tann mann
Unke ashish ke aanchal mein rooh palti rahe
Unke maargdarshan se adhyatma ko ujjwal disha miltee rahe.

🌹🌹🌹🌹🌹🌹🌹

Jai Guruji 🙏🙏
Dhirja

Ujjwal Disha (10/19/2025)

October 18, 2025

Om Namaha Shivaya
Aaj Ka Suvichaar 🙏🏻🙏🏻

#2799

    Mann Kee Soch Se Kaheen Aagey

Mann kee soch se kaheen aagey
Shabdon kee seema ke paar
Hai leela Guruji Sarkar kee
Kalyaankarta karunamayi kartar kee.

Mai hoon maamuli si
Seekh rahi hoon insaaniyat nibhaana
Ruhaaniyat ko khojte huey apne bheetar aur aaspaas
Dhoondh rahi thi apna thikaana.

Shukr hai Guruji ne liya Apni sharan mein
Mujhe liya sambhaal
Unkee leela ke bin toh
Ho jaata na jaane kya haal.

Praarabdh kaatna bilkul nahin aasaan
Lekin Guruji ne jo diya Apne charnon mein sthaan
Toh Ve le chale aise safar par
Jo chal raha hai buss Unke hukum par.

Kaunsa karma katt raha hai kis raftaar se
Mere buss mein nahin uska andaaza bhi lagaana
Jaise jaise badh rahi hoon is safar mein
Sab Guruji par chodna hai, ye hai jaana.

Swayam kee swatantra ichcha ke alaawa
Kuch nahin apne niyantran mein
Buss, Guruji kee yaad anivaarya hai
Har pal apne mann mein.

Guruji kee yaad, Guruji ka shukar
Guruji kee dee bakhshish, Guruji ka diya sabar
In sabka ho raha hai antas aur rooh par aisa asar
Ki Guruji ka naam lete huey beet raha hai ye safar.

Ye ashirwaad hai
Guruji ka diya prasad hai
Jeevan aabaad hai
Guruji ka dhanyawaad hai.

🌹🌹🌹🌹🌹🌹🌹

Jai Guruji 🙏🙏
Dhirja

Mann Kee Soch Se Kaheen Aagey (10/18/2025)