Author: dhirjabhat

November 16, 2020

Om Namaha Shivaya
Aaj Ka Suvichaar 🙏🏻🙏🏻 # 1002

          Safar Ka Lutf Uthaayiye

Jo raaste par chalna shuru kiya hai aapne,
Toh bilkul nishchit hai pahunchna manzil par,
Isliye safar ka lutf uthaayiye,
Aur dhyan deejiye har manzar par.

Safar ke har moad par, har mukaam par,
Kuch na kuch seekhne ka milega avsar,
Kuch anubhav hongei meethe, kuch khatte,
Na karne deejiyega unhe apni akhandataa par bura asar.

Agar raaste mein sataane lagein shool,
Unn shoolon kee chubhan kee vajeh se ruk na jaana,
Chaahe duur duur takk na dikhein koi bhi phool,
Phir bhi haarkar jhuk na jaana.

Mann ke mandir mein khilaaiyega suman vishwaas ke,
Unkee prem bhari khushboo se mehekne lagenge lamhe aapke prayaas ke,
Is prayaas ko rakhiyega jaari,
Aapke kalyaan kee bhi aayegi baari.

Guruji se seedhi taar jo aap jodenge,
Unse duur karne waali har zanjeer ko jo aap todenge,
Toh aap Unkee bhakti ka var paayenge,
Aur aaj nahin toh kal aap zaroor tarr jaayenge.

Yeh safar shaayad anek janmon takk chale,
Ya thode hee janmon mein ho jaaye tayy,
Aap rahiyega beparwaah, lekin laaparwaah nahin,
Chalte rahiyega bina kisee sanshay.

Yeh kewal dilaasa ya arzoo ya abhilaasha nahin,
Is baat mein sampoorna sachchaayee hai,
Guruji kee sharan mein safar ke antt mein mukti zaroor milegi,
Ye Devon ke Dev dayasindhu Guruji kee vadiyaayee hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 15, 2020

Om Namaha Shivaya
Aaj Ka Suvichaar 🙏🏻🙏🏻 1001

  Saarthak Sandesh

Jaise jaise bujhte gaye Diwali ke diye,
Jo jalaaye thei bhakt ne apne ghar ke dwaar par,
Usey aur bhi yakeen honei lagaa Guruji ke pyaar par,
Aur usey bahut khushi hui apne aitbaar par.

Kyunki in diyon ke bujhne ke saath saath,
Jal kar raakh hua uss bhakt ka ahankaar,
Aur jo roshni diyon ne phailaayee thi,
Veh divya noor bannkar apne sangg laayee ummeedein aparampaar.

Ummeed Guruji ke deedar kee,
Ummeed Unse pyaar ke izhaar kee,
Ummeed Guruji ke ikraar kee,
Ummeed jaane uss paar kee.

Ummeed saamanjasya poorna sansaar kee,
Jahaan paraajay ho jaaye har vikaar kee,
Jahaan bahaar ho niswaarth pyaar kee,
Jahaan Guru naam se shuruaat ho har vaar kee.

Aur Guru naam se hee ho har din ka antt,
Taaki har kisee ke mann mein basey rahein Bhagwant,
Ye aur aisee maasoom tamannayein liye,
Usne dekhe apne dwaar ke bujhte huey diye.

Diyon ko kiya bhakt ne Shukrana baarambaar,
Kyunki unke prakash se jaagrit huey uske mann mein shubh vichaar,
Jaise jaise bhakt ne har diya uthaaya,
Unke saarthak sandesh ko antar-mann mein basaaya.

Tithi ke hisaab se chaahe khatm hua diwali ka tyohaar,
Lekin bhakt ko mil gaya itna ruhaani uphaar,
Guruji ka naam japte huey baar baar,
Uske mann mein jal gaye sadaa ke liye diye kayee hazaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 14, 2020

Om Namaha Shivaya
Aaj Ka Suvichaar 🙏🏻🙏🏻 # 1000

     Diwali Ke Diye

Guruji kee aseem kripa se,
Diwali ka paawan parv hai aaya,
Akash kee garima anokhi hai,
Aur divya prakash hai chhaaya.

Guruji ne kaha thaa ki maada waqt aayega,
Aaj dekh hee liya insaan ne,
Abb sudhaar hum sab par nirbhar hai,
Hamein yaad dilaaya hai Bhagwaan ne.

Aayiye manaayein Diwali ka tyohaar,
Ruhaani diyon se hum sajaayein sansaar.
Aayiye prateekaatmak diye jalaayein,
Aur vishwa mein parivartan laayein.

Diya jalaayein pyaar ka,
Jis se upchaar ho sadaachaar ka,
Is diye kee lau mein ho samvedana ka aisa spandan,
Jiskee mehek ke aagey pheeka pad jaaye chandan.

Diya jalaayein ekta kee bhavna ka,
Ek dooje ko surakshit rakhne kee kaamna ka,
Har ek ke swaasthya ka dhyan rahe,
Har ek ke manobhaav ka dhyan rahe.

Diya jalaayein himmat aur sahaanubhuti ka,
Maan rakhein unke praanon kee aahuti ka,
Jinhonei bekusoor hotey huey bhi tyaag diye apne praan,
Jinkee mahamaari kee vajeh se na bach paayi jaan.

Diya jalaayein sarv-samarpan, simran aur dhyan ka,
Taaki prachaar ho har oar divya gyan ka,
Is gyan se agyan ka timir duur ho jaaye,
Aur hum insaanon ka ahem chuur ho jaaye.

Diya jalaayein niswaarth sewa ke sanskaar ka,
Jis se kalyaan ho har ghar pariwaar ka,
Is sewa se har oar prassannata aaye,
Aur har jann ke mann mein sampannata aaye.

Diya jalaayein aisa jo bujh na paaye kabhi,
Kshamaa maang lein aur kshamaa dein bhi,
Diye ke ujaale se jaagrit rahe shraddha aur saboori,
Jo prem aur vishwaas ke sangg kar de bhakti ko poori.

Diya jalaayein neevenpann aur sachchaayee ka,
Jiske jalne se prachaar ho achchaayee ka,
Diya jalaayein neevenpann ke jazbaat ka,
Aur diya jalaayein Guruji ke prati dhanyawaad ka.

Dekhte hee dekhte ujjwal ho jaayega sansaar,
Jabb aise diyon se susajjit hoga har ghar ka dwaar,
Sirf Laxmi nahin, balki har Devi Dev ka mann mein vaas hoga,
Aur chaaron oar harsh aur ullaas hoga.

Kyun na koshish karein aisa karne kee,
Taaki har roz hee Diwali ho,
Dharti par itnee raunak ho,
Ki veh jannat kee tarehn niraali ho.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 13, 2020

Om Namaha Shivaya
Aaj Ka Suvichaar 🙏🏻🙏🏻 # 999

          Dhanteras Ke Avsar Par

Sabko Dhanteras ke avsar par,
Bahut bahut badhaayi,
Dhanvantari, Kuber, aur Laxmi Maa ke sangg,
Yamraj kee bhi pooja kee tithi hai aayi.

Paise aur ratna aur heere jawaaharaat,
Yeh dhan toh hai vaashpsheel aur asthaayi,
Veh tripti kabhi santoshjanak na hoti,
Jo aise dhan se hai aayi.

Hum bahut khushnaseeb hain,
Paakar Guruji ke naam simran ke dhan,
Is dhan se apni poonji badhaayein,
Taaki anandit rahe ye mann.

Batorein achche vichaaron ka dhan,
Jinse aabaad rakhein apna mann,
Guruji kee kripa se tann mann kee sehat achchi ho,
Aur poori koshish karein, ki neeyat hamaari
sachchi ho.

Achche sanskaaron se nirmaanit ho changaa charitra,
Aur achche charitra se ho atma pavitra,
Dhan ekatrit karein karmon kee shuddhi ka,
Dhan ekatrit karein subuddhi ka.

Ek dooje ko dein hum tohfa pyaar ka,
Taaki kalyaan ho poore sansaar ka,
Ismein yogdaan zaroori hai har jann ka,
Taaki har koi hakdaar ho prem ke dhan ka.

Isliye dhan batorein santosh aur tripti ka,
Taaki veh raasta dikhaaye mukti ka,
Neeyat mein punya ho, paap nahin,
Taaki karmic vaseeyat mein sukh ho, dukh aur santaap nahin.

Simran se aur bhi badhta jaayega adhyatmik dhan,
Aur atma hoti jaayegi shantiswaroop aur sampann,
Shanti aur sampannataa ke ruhaani dhan se,
Nakaratmakta jaati rahegi mann se.

Guruji ka noor is dhan par aisa chhaayega,
Ki is dhan par divya khoobsoorati laayega.
Mann ka mandir is divyataa se jagmagaayega,
Aur aamodit atma ko nirmal anand aayega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 12, 2020

Om Namaha Shivaya
Aaj Ka Suvichaar 🙏🏻🙏🏻 # 998

                 Suramya Gulaab

Ye yug bhi ajab chunautiyaan lekar aaya hai,
Lekin kya hum insaanon ne uddhaar kee oar kadam badhaaya hai?
Ekatrit karte hain hum saamaan,
Lekin kya hum Paramatma ko de rahein hain sammaan?

Aaj loag pareshaan hain ki baahar nahin jaa sakte zyada,
Lekin kya bheetar jaane ka pakka kiya hai hum ne iraada?
Baatein karte hain hum kitaabi gyan aur Bhagwaan kee,
Lekin kya poori poori koshish kar rahein hain hum simran aur dhyan kee?

Achchi achchi baatein kar ke doojon ko updesh hum dete hain,
Lekin kya inn baaton se swayam achchi seekh hum lete hain?
Sochte hain hum ki khoobsoorat bannkar hum shobha badhaate hain darpan kee,
Lekin kya hum ne safaai kee hai apne antar-mann kee?

Zara sochiye, in sab prashnon ke uttar,
Aur swayam ko hee deejiye jawaab,
Abb bhi mauka hai pavitrikaran ka,
Sudhaar lein jo aadatein hain kharaab.

Guruji ne baagbaan bannkar hamaari parvarish kee hai,
Toh aayiye hum sab mehekein bann kar unke suramya gulab,
Dua karein ki saari sarbat ka bhalaa hota rahey,
Aur sabke jeevan ko roshan karey Guruji ka noore-aftaab.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhirja Bhat M. D.: November 11, 2020

Om Namaha Shivaya
Aaj Ka Suvichaar 🙏🏻🙏🏻 # 997

Apni Zindagaani Kee Kahaani

Karam bhoomi hai yeh sansaar,
Ye nahin hai tera asli ghar,
Lagta hai tu thakk gaya hai,
Aaja abb tu Guruji ke dar.

Yahaan milega niswaarth pyaar,
Kyunki Guruji Hain bahut udaar,
Naam simran ka Ve denge uphaar,
Is uphaar se hee hoga tera beda paar.

Isliye na karne de tu paristhitiyon ko
Apne atma-vishwaas par vaar,
Kyunki nahin toh tujhe kaise raas aayega
Guruji ka deedar?
Kyunki atmataras ke andhere mein
Tu kho jaayega,
Aur tera utsaah haar kar
Gehri neend so jaayega.

Is neend se jagaa tu apne utsaah ko,
Guru naam se ujjwal kar tu apni raah ko,
Samarpan kar Guruji ko, lekin karta chal apne karam,
Ve sab sambhaalenge, lekin tujhe nibhaana hai apna dharam.

Dharam imaandaari aur insaaniyat ka,
Dharam raaste ka aur ruhaaniyat ka.
In sabka hai ek dooje se naata,
Is naate ke racheta Hain karam phal ke daata.

Guruji hee Hain Ve racheta aur daata,
Aur hamaare har karam ke gyaata.
Insaaniyat se ruhaaniyat ka naata Unhe hai bhaata,
Kyunki uss se maanav jeevan sahi disha mein hai jaata.

Kyun asmanjas mein hai phir tu,
Kya soch raha hai tu praani,
Aaj ya kal ye baat sabb ne hai jaani,
Ki ye laukik duniya hai bilkul begaani.
Is mayamay jagat kee leela,
Kewal Shivji ne hai jaani,
Isliye tu abb MahaShiv Guruji ko,
Saump de apni zindagaani kee kahaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 10, 2020

Om Namaha Shivaya
Aaj Ka Suvichaar 🙏🏻🙏🏻 # 996

Aisa Guru Sach Mein Aur Kaheen Nahin Milega

Jo Apni mamta ke marham se tere ghaav silega,
Aisa Guru sach mein aur kaheen nahin milega.
Jo tere dukh mein Apni aankhon se aansoon bahaayega,
Aisa matvaala meet tujhe dhoondhne se bhi na mil paayega.
Jo tujhe mata pita ka pyaar dekar Apni goad mein sambhaalega,
Aise niswaarth Guru ko paakar tera dil saari kaayinaat kee khushiyaan paa lega.

Isliye,
Na karne de apne aansuon ko tu apne haunsle par vaar,
Keh de unse ki tere saath Hain tere taaranhaar.

Na karne de paristhitiyon ko apne santulan par aakramann,
Samjhaa de unhe ki teri raksha kar rahei Hain tere Bhagwan.

Na aane de aanch apni akhandataa par,
Tujhe prerna de rahein Hain tere Guruvar.

Na chhaane dena tu apne par maayusi ko akelepann mein,
Tu apna dhyan lagaaye rakhna Neelkanth Niranjan mein.

Na karna tu buraayee chaahe ve buraayee karein ek ya har baar,
Unhe bhi dekh rahey Hain MahaShiv kirpadhaar.

Duniya kee bheed ko na chheen lene dena tu apna utsaah,
Kyunki Guruji ko har pal hoti hai teri parvaah.

Ateet ko na churaane dena tu khushi vartmaan kee,
Tere saath prem bhari mitrataa hai Guruji ke roop mein Bhagwaan kee.

Kalyuga ke keechad se na honei dena malin apni atma ke kamal kee khoobsoorati,
Teri pavitrataa ko poora sahaara de rahei Hain Trilokinath Pashupati.

Isliye,
Shukrana kar ke mastak jhukaa tu Guruji ke naman mein,
Har chunauti ko sweekar kar tu magn ho Guruji ke manan mein,
Aisee koi uljhan nahin hai jo nahin suljhegi Unki sharan mein,
Tera bura waqt yakeenan haar maanega Unke kamal charan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 9, 2020

Om Namaha Shivaya
Aaj Ka Suvichaar 🙏🏻🙏🏻 # 995

  Tum Guruji Ke Paas Chale Aana

Zindagi toh hai ek imtehaan,
Karte huey Khudaayee ko salaam,
Tum salaamat rakho apni muskaan,
Aur Guruji kee baat lo tum maan.

Guruji milenge simran aur dhyan mein,
Na ki kitaabi gyan mein.
Ve milenge sewa mein zarooratamand kee,
Na ki chaaploosi mein ghamandi aur ghamand kee.
Guruji dikhenge maasumiyat bhari muskaan mein,
Na ki chhal-kapat kee aan aur shaan mein,
Ve milenge vinamrataa ke saaz mein,
Ve na milenge oonchi abhimaan wali awaaz mein.

Guruji na basenge jhoothe dikhaawe mein,
Balki hameshaan rahenge saadagi ke daawe mein,
Ve na milenge vehem aur andh-vishwaas mein,
Balki Ve toh basein Hain ruhaani azaadi ke shwaas mein.
Guruji na milenge maanav ke manovikaar mein,
Balki milenge vikaar rahit niswaarth pyaar mein,
Ve na milenge vyarth vaadon ke vaaste par,
Balki praapt hongei hamaare kartavya ke raaste par.

Guruji kabhi na milein heen bhavna mein,
Ve milte Hain saadagi aur sadbhavna mein.
Ve na milein tark-vitark aur vaad-vivaad mein,
Ve milein shraddhaalu bhakt ke jazbaat mein.
Ve nahin baste Hain dharam kee deewar mein,
Ve toh baste Hain Om aur Ek Onkar mein.

Isliye chaahe jo bhi kahe ye zamaana,
Apne pyaar ko tum banaakar nazraana,
Apni ibadat mein piroh kar shukrana,
Tum Guruji ke paas chale aana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 8, 2020

Om Namaha Shivaya
Aaj Ka Suvichaar 🙏🏻🙏🏻 # 994

     Mere Param Poojya Bhagwaan

Pyaare Guruji,

Aapse hai niswaarthtaa ka nagma, aur Aapse hai sneh ka saaz,
Aapse kuch bhi boloon na, toh bhi Aap sunein meri awaaz,
Aapki maujoodagi ka anubhav hai itna khoobsoorat aur khaas,
Aapki hee kripa aur karuna se hua hai is sachchaayee ka ehsaas.

Subah ka sooraj kahoon Aapko,
Ya phir kahoon mai raat ka chaand,
Aapse hee hai sooraj aur Aapse hai ye chaand,
Aapse hai yeh sampoorna brahmaand.

Ekaant mein divya saathi Hain Aap,
Aur akelepann mein Hain madhur meet,
Allah kahoon Aapko, yaa kahoon phir MahaShiv,
Jis roop mein bhi dekhoon, Aapse hee laagi hai preet.

Vikaaron ke vishaal vann mein nakaraatmakta kee nadiya hai behti,
Mere Guruji mera uddhaar keejiye, meri har dhadkan Aapse hai kehti,
Kalyaan bhi Aapse hai, aur Aapse hee nirmaan,
Bilkul agyaani hee sahi mai, lekin is satya se mai nahin anjaan.

Duniya kee bheed ke paraayepann mein Aap Hain mere apne,
Aapke protsaahan se aagey badhti hoon jabb mera utsaah lagta hai thakne,
Saahas bhi Aapse milta hai, aur Aapse hee miltee hai muskaan,
Bheed mein mujhe gumne na dena, mere param poojya Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 7, 2020

Om Namaha Shivaya
Aaj Ka Suvichaar 🙏🏻🙏🏻 # 993

          Ismein Koi Shak Nahin

Chiraag jalaa kar roshni har koi kar le apne aaspaas,
Lekin khud ke bheetar prakash kaise aaye?
Jo mann mein divya gyan kee jyot jal jaaye,
Toh bheetar bhi ujaala ho jaaye.

Ek taraf sainkdon chiraag hon haath mein,
Dooji taraf ho mann mein Guruji ka naam,
Toh boojho zaraa ki zyada kahaan roshni hogi,
Aur kahaan dikhegaa ujjwal dham?

Guruji ke naam mein hai sundartaa aisee,
Jo bhakti ko deti hai nikhaar,
Aur naam kee shakti se honei lagta hai,
Prakaashit poora ghar sansaar.

Isliye apne mann ke mandir mein,
Guruji ke naam kee jyot jalaakar,
Shraddha, bhakti, aur prem se,
Guruji ko shudh bhaav se bulaakar,
Is mandir mein asthaa ke aasan par,
Viraajmaan honei ka karo Unse nivedan,
Aur Unke paawan kamal charnon mein,
Tum sir rakh kar, kar do sarvsamarpan.

Guruji ke ashirwaad ke prasad se,
Tumhe naam ka milega jo vardaan,
Uss vandaneeya vardaan se,
Ujjwal rahega tumhaara jahaan.

Jitnee hogi shraddha, saadagi, aur bhakti,
Utnee praapt hogi divyataa aur shakti,
Mann mein akhand jyot jalegi phir divya gyan kee,
Aur madhur dhwani goonjegi Guruji ke naam kee.

Is dhwani se goonj uthega tumhaara vartmaan,
Is se sadaa ke liye mitt jaayenge pichhle dukh dard ke nishaan,
Aur jabb bhavishya ka swaagat karoge tum Guruji ke naam ke saath,
Toh ismein koi shak nahin, ki bann jaayegi har bigdi baat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja