Author: dhirjabhat

October 27, 2020

Om Namaha Shivaya
Aaj Ka Suvichaar 🙏🏻🙏🏻 # 982

Ruhaaniyat Kee Khushboo

Baazaar se itar khareed kar laaye,
Bade chaav se shareer par liyo lagaaye,
Lekin anand kahaan se aaye,
Agar tere vichaaron se durgandh aaye?

Baazaar jaane ke bajaay,
Jo tu apne bheetar jaaye,
Apne vichaaron ko suljhaaye,
Toh shaayad baat bann paaye.

Jab tera dil leen hoga swayam ke sudhaar mein,
Toh dekhna, khushboo aane lagegi har vichaar mein,
Phir jo ruhaaniyat kee khushboo aayegi,
Uske aagey sabse behtareen itar kee sugandh bhi sharmaayegi.

Tabhi toh Guruji kehte Hain,
Ki tu bann jaa changaa banda,
Sewa, simran, aur satsang kar,
Aur chod de be-imaani ka dhandha.

Khushiyaan phaylaa ghar sansaar mein,
Na kho apne ko oopari dikhaawe ke baazaar mein,
Aatmasaat kar le khushboo ruhaaniyat kee,
Kadar kar ke tu imaan aur insaaniyat kee.

Phir kisee itar kee padegi nahin zaroorat,
Khushboo ke liye nahin dhoondhna padega mauka ya mahoorat,
Kyunki ruhaaniyat kee khushboo tere tann mann mein samaa jaayegi,
Aur teri atma bhi punya ka dhan kamaa paayegi.

Itar kee mehek toh kumm hoti hai samay ke saath,
Lekin ruhaani khushboo mein nahin hai aisee baat.
Ye toh waqt ke saath saath aur bhi zyada mehsoos hoti hai,
Aur apni surbhi aur nirmaltaa kabhi nahin khoti hai.

Ruhaani khushboo laayegi kitnee shuddhi,
Aur vaatavaran mein hogi sakaratmakta kee umangg,
Isliye na malin honei de kalyuga se apni buddhi,
Guruji kee sharan mein jee le shuddh vichaaron ke sangg.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 26, 2020

Om Namaha Shivaya
Aaj Ka Suvichaar 🙏🏻🙏🏻 # 981

                  Chadhdi Kala

Aaj bhi mujhe yaad hai veh din,
Jabb tumhaara har sukh chayyn gaya thaa chhin,
Aankhon mein meri bhi aaya thaa paani,
Sunn kar tumhaari aap beeti kee kahaani.

Tum chup rahe jab poochha gaya ki sab kaise hua,
Aur mere dil se niklee tumhaare liye dua,
Tum ne buss ye kaha ki dil toot gaya,
Kyunki har sangi-saathi chhoot gaya.

Guruji se dosti kar lo, ek awaaz ne tumse kahaa,
Tumne sir hilaakar kahaa abb dosti mein kuch na raha,
Lekin shukr hai tumne baat maan lee,
Aur Guruji kee dosti pehchaan lee.

Tumhe nashaa honei lagaa Guruji ke naam ka,
Tumne Guruji ke charnon mein paaya anand teerath dham ka,
Vaheen chod diya tumne apna ahankaar,
Aur dil mein basaa liya Guruji ke liye pyaar.

Baaki har tammanaa tumne chod dee,
Guruji ke simran kee oar apni chaahat moad lee,
Guruji ke simran mein beetne lagey tumhaare din aur raat,
Tumne chod dee Guruji ke alaawa karni aur koi bhi baat.

Guruji hee basne lagey tumhaare mann mein,
Tumne chaav kho diya baaki har laukik dhan mein,
Zindagi kee mithya tumhe samajh aane lagee,
Tumhaari har uljhan isee satya se sulajh jaane lagee.

Tumhaara dil aisa juda Guruji ke sangg,
Ki badal gaya tumhaare jeene ka dhangg,
Tumhaara aadhyatmikta mein badhta gaya dhyan,
Aur tumhaare spandan par sajne lagaa ruhaani gyan.

Jis Guruji ke noor se roshan ho gaya tumhaara chehra,
Uss noor par thaa swayam Guruji ka paawan pehra,
Tumhaara har pal pichhle pal se behtar hota gaya,
Tumhaara astitva Guruji kee divyataa mein khota gaya,
Guruji ne kar diya tumhaara bhalaa,
Aur Unhonei tumhe baksh dee chadhdi kalaa.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 25, 2020

Om Namaha Shivaya
Aaj Ka Suvichaar 🙏🏻🙏🏻 # 980

         Oonchee Udaan

Jo abb tu is meethe sach ko jaan gaya hai,
Ki tu jud gaya hai Guruji ke sangg,
Toh is rishte ka le tu nirmal anand,
Aur swayam par chadhne de Guru Bhakti ka rangg.

Is rangg ke jaisa koi aur rangg nahin,
Aisa koi pal nahin jabb Guruji tere sangg nahin.
Chaahe saara jagg jaa raha ho aur kaheen,
Jidhar tere Guruji le jaayein tu chalte jaana vaheen.

Kyunki jidhar Guruji le jaayein,
Vahee dagar sabse suhaani hai,
Tere har shwaas ka hoga kalyaan,
Kyunki uss dagar kee hawaa ruhaani hai.

Ruhaaniyat se mehekta shwaas,
Tere hriday mein jabb karega vaas,
Toh safar ka har lamha tujhe aayega raas,
Aur tu kabhi na hoga udaas.

Zaroori nahin ki aasaan hogi dagar,
Tu har pal shraddha rakhna magar,
Kyunki teri shraddha aur vishwaas bhari bhakti,
Degi tujhe kasht jhelne kee shakti.

Tere raaste mein phool na bhi aayein pehle pehle,
Toh bhi Guruji kee divya khushboo se tera raasta mehekega,
Yeh duniya beshaq jhamelon ka jaal hai,
Tu ismein azaad parinde kee bhanti chehekega.

Kyunki tere Guruji tujhe tere bheetar le jaayenge,
Apna simran karaane ke dwaara,
Aur tere mann mandir mein rehkar Ve swayam ko banaayenge,
Teri niswaarth bhakti ka sahaara.

Ruhaaniyat basegi tere har angg mein,
Veh dikhegi tere jeene ke dhangg mein.
Jaise jaise Guruji tere mann mein divya sanskaar bharenge,
Oonchee udaan ke liye tujhe ve tayyaar karenge.

Apni mamta ke sukoon bhare aanchal mein,
Tujh parinde ka ghonsalaa swayam Guruji banaayenge,
Aur Guruji kee bhakti ke rangg mein rangg kar,
Teri ruhaaniyat ke pankh tujhe sach khand takk udaa kar le jaayenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 24, 2020

Om Namaha Shivaya
Aaj Ka Suvichaar 🙏🏻🙏🏻 # 979

Tu Guruji Ka Naam Lekar Chalte Jaana

Tufaan jo aaye jeevan mein,
Tu rakhna vishwaas aur dheeraj,
Aaspaas agar nakaraatmakta ho,
Toh bhi tu bann kar rehna sakaraatmakta ka neeraj,
Duniya chaahe behte paani ke sangg bahey,
Lekin tu maree hui machhlee na bann jaana,
Sachchaayee aur sadachari ke raaste par,
Tu Guruji ka naam lekar chalte jaana.

Raasta jo ho kathin aur pathreela,
Toh apne vishwaas ko karna aur bhi gehra,
Na darna tu kisee bhi moad par,
Kyunki Guruji ka hoga har pal har jageh par pehra,
Andhere se bilkul na ghabraana,
Guruji ke naam ka deepak tu jalaana,
Apne uddeshya se mann kee nazar ko na hataana,
Tu Guruji ka naam lekar chalte jaana.

Har chunauti ko samajh lena ek aur mauka,
Guruji ke aur bhi kareeb aane ka,
Na rona, na karna afsos,
Saathiyon ka peechhe chhoot jaane ka,
Sabka raasta alagg hai, apne mann ko tu samjhaana,
Duniya ek mela hai, isliye vaastavik hai logon ka aana jaana,
Apni taraf se saral taral komal aur nirmal hokar har rishta tu nibhaana,
Tu Guruji ka naam lekar chalte jaana.

Vikaaron ke asur aayenge raaste mein,
Toh Unka datt kar tu karna saamna,
Unn par vijay paakar tu poori karna,
Swayam ko ekaagrachitt rakhne kee kaamna,
Vyaakulta aur vikarshan se bhatak matt jaana,
Guruji ke simran mein tu mann lagaana,
Sadhna aur dhyan se apni chetna badhaana,
Tu Guruji ka naam lekar chalte jaana.

Tufaan thamne lagenge, andhera khatm ho jaayega,
Chalte chalte raasta bhi tayy ho jaayega,
Har chunauti teri himmat ke aagey kamzor padd jaayegi,
Vikaaron par tu vijayee ho paayega,
Tu Guruji ke charnon mein sadaa sir jhukaana,
Unke kisee bhi ehsaan ko kabhi bhi na bhulaana,
Unka karte rehna tu dil-o-jaan se har pal shukrana,
Buss, tu Guruji ka naam lekar chalte jaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 23, 2020

Om Namaha Shivaya
Aaj Ka Suvichaar 🙏🏻🙏🏻 # 978

         Chod De Jhooth Tu Kehna

Chod de, tu chod de,
Chod de jhooth tu kehna,
Ek jhooth kee vajeh se tujhe,
Kitne aur jhooth ka bhaar padega sehna.

Jhooth kehna chod dega,
Toh koi dikhaawa nahin padega karna,
Jo bheetar hai vahee roop baahar hoga,
Toh saral hoga pichhle karmon ka jurmaana bharna.

Aagey ke liye karmon ka bojh bhi kumm hoga,
Aur teri har baat mein sachchaayee ka dumm hoga,
Toh mann bhi honei lagega saaf,
Aur tu khud ko bhi kar sakega maaf.

Tujhe kisee ka saamna karne mein hichakichaahat na hogi,
Aur tera kahaa sadaa sachcha hoga toh tujhe ghabraahat na hogi.
Tu mann ghadant kisse banaane mein na vyast rahega,
Toh yakeenan Guruji ke dhyan mein aur bhi mast rahega.

Guruji bhi dekhenge teri neeyat ko sudharte huey,
Dekhenge tujhe jhooth kee seedhi se utarte huey,
Toh Ve tujhe aadhyatmikta kee seedhi par aur bhi jald chadhaayenge,
Aur Ve swayam tujhe sunehri manzil takk lekar jaayenge.

Guruji hongei kitne prasann,
Ki badh raha hai tera sadachari ka dhan.
Jabb Ve dekhenge tere jeevan kee kahaani kee kitaab,
Toh Ve denge uss kitaab ko sachchi honei ka khitaab.

Jabb jhooth kee deewar tootegi,
Toh rishton mein bhi madhurta aayegi,
Aur vaatavaran mein saamanjasya ke honei se,
Kitnee sakaratmakta chaa jaayegi.

Jo bachcha jhooth na boley kabhi,
Jaise uss bachche ke mata pita garv se phoolein na samaayein,
Vaise hee tu jhooth kee aadat chod de,
Toh yeh sach hai ki Guruji kitne khush ho jaayein.

Abb bhi mauka hai tere paas,
Jhooth mein na vyarth ganvaa apne shwaas,
Tyaag de jhooth kehne kee aadat,
Guruji denge tujhe maansik taakat.

Guruji kee sadhna se pichhle daag mitt jaayenge,
Sachchaayee ke safar mein karam achche ho paayenge,
Guruji khushi se is safar ko Apne ashirwaad se sajaayenge,
Aur is shringaar se tere mann ke moar mukti ka geet gaayenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 22, 2020

Om Namaha Shivaya
Aaj Ka Suvichaar 🙏🏻🙏🏻 # 977

         Param Poojya Paalanhaar

Guruji ne na diye koi pravachan, na hee kiya prachaar,
Sudhaarne aaye Ve hum sabke jeevan ka aakaar,
Sadaa diya hai Unhonei sabko niswaarth pyaar,
Har pal har bhakt ke liye khula hai Guruji ka dwaar.

Guruji Hain hamaari har saans ka aadhaar,
Guruji gira dete Hain niraasha kee deewar,
Ve waqt aane par karte Hain har kalyanmayee sapne ko saakaar,
Aur hamaare bin boley hee kar dete Hain hamaara uddhaar.

Guruji jaante Hain hamaara har vichaar,
Ve sudhaarna chaahte Hain hum sabka vyavhaar,
Unhe sarvsamarpan karne mein hai hamaara upkaar,
Jabb hum Unkee sharan mein hain toh aur kaheen jaana hai bilkul bekaar.

Jeevan mein hum apnaa lein achche sanskaar,
Apne mann ko banaa lein shuddhi ka vihaar,
Guruji par apne vishwaas ko rakhein har pal barkaraar,
Na karne dein kisee bhi sanshay ko is vishwaas par prahaar.

Guruji kee kripa se duur hota hai andhkaar,
Unhee kee karuna se chuur hota hai ahankaar,
Guruji kee mahima hee taar sakti hai sansaar,
Aur kar sakti hai har bhakt jann ka beda paar.

Jab se Guruji huey niraakaar,
Unkee leela ho gayi pehle se bhi zyada aparampaar,
Har pal badh raha hai Unka paropkaar,
Srishti ko sanvaar rahe Hain Ve is prakaar.

Guruji yakeenan Hain MahaShiv ka avataar,
Ve Bhagwan Hain, yeh dikhaaya hai Unhonei baar baar,
Unhee mein samaaya hai poori divyata ka saar,
Unn param poojya paalanhaar ko baarambaar namaskaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 21, 2020

Om Namaha Shivaya
Aaj Ka Suvichaar 🙏🏻🙏🏻 # 976

Jinke Haath Mein Hai Trishul

Jinke haath mein hai trishul,
Aur jinka dil komal hai jaise phool,
Unn aadaraneeya Guruji ko naman,
Bahut kalyaankaari hai Unka manan.

Jinke darbar mein sab hain ek samaan,
Jo sabke mann kee baat lete Hain jaan,
Unn antaryaami Khuda ko salaam,
Unka har hunar hai itna mahaan.

Jinse sangat seekhti hai jeene ka saleeqa,
Jinke samjhaane se raas aata hai har taral tareeka,
Unn maan-neeya murshid ko namaskaar,
Unkee shiksha se tarr jaata hai saara sansaar.

Jinke saath naath aur meet ka hai naata,
Jinke pyaar mein bhakt bhai ka sehyog hai paata,
Unn priya Parwardigaar ko dhanyawaad,
Jinke aanchal mein bhakton kee duniya hai aabaad.

Jinke maathe par teesra divya nayn hai,
Jinkee sharan mein sukh aur chayyn hai,
Unn shashvat Shiv ko baarambaar pranaam,
Unke charnon mein hain saare teerath dham.

Jinkee divyata kee sangat deewani hai,
Jinkee leela itnee anokhi aur ruhaani hai,
Unn Devon ke Dev ka haardik abhinandan,
Kitna sukhdaayee hai Unka vandan.

Jinkee mehar se yeh din aur raat hai,
Jinkee rehmat se hee banti har bigdee baat hai,
Unn Trilokinath ko dil se dhanyawaad,
Kitna sunehra hai Unse judne ka jazbaat.

Jinkee kripa mein samaaya hai har ashirwaad,
Jinkee meharbaani hai sabse uttam prasad,
Unn Shambhunaath ka pal pal shukrana,
Sabse khoobsoorat hai Unkee karuna ka khazaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 20, 2020

Om Namaha Shivaya
Aaj Ka Suvichaar 🙏🏻🙏🏻 # 975

    Chulbuli Chidiya Se Seekhein

Ek chulbuli chidiya thi ghoom rahi,
Guruji kee dhun mein jhoom rahi,
Phoolon ke sundar chaman mein,
Vyast hokar Guruji ke manan mein.

Chidiya ka satrangi rangg,
Uska hona Guruji mein malang,
Yeh dekh chaman ka maali muskuraaya,
Lekin chidiya ko raaz na samajh mein aaya.

Chidiya dhoondh rahi thi uss phool ko,
Jis se pyaari khushboo thi aa rahi,
Aur MahaShiv Guruji kee leela se,
Chidiya ko paheli samajh na thi aa rahi.

Guruji hee chaman ke maali ke roop mein,
Chidiya par veh mehek thei barsaa rahe,
Apni maujoodagi ka ehsaas dila rahe thei,
Chidiya se bina kuch bhi kahe.

Chidiya Guruji ke diye sanket se,
Uss khushboo ke peechhe mandraati rahi,
Atoot bharosa thaa usey khushboo ke divya prataap par,
Aur veh apna kalyaan karaati rahi.

Hum bhi is chidiya kee bhaanti,
Bin tark vitark ke Guruji kee baat maanein,
Guruji ke divya pyaar mein bandh kar,
Azaadi se udkar ruhaaniyat ke akash ko pehchaanein.

Chulbuli chidiya se seekhein hum,
Guruji par karna atoot vishwaas,
Chulbuli chidiya kee bhanti hum bhi,
Mehsoos karein agochar Guruji ka ehsaas.

Jabb poorna vishwaas aur samarpan hoga,
Tabb nishchit hai hamaara bhi kalyaan,
Guruji toh Guru aur baagbaan ke roop mein,
Nissandeh Hain Bholenath Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 19, 2020

Om Namaha Shivaya
Aaj Ka Suvichaar 🙏🏻🙏🏻 # 974

          Pyaar Kee Pyaari Adaa

Pyaar kee kitnee pyaari hai adaa,
Ye badhtaa hee rehta hai sadaa.
Jitna kisee ko dein, ye utna hee zyada hota hai,
Aur pyaar dene waala pyaar dekar bhi usey nahin khota hai.

Kyunki pyaar ko mila vardaan hai,
Ki veh nahin hota kabhi bhi kumm,
Isliye pyaar aushadhi ka kaam karta hai,
Aur mitaa deta hai sabke gumm.

Guruji kitne yugon se Apne bhakton ko pyaar de rahey Hain,
Unhonei Apne bachchon ke liye kitne kasht khud hee sahey Hain,
Dete dete badhta gaya hai Unka pyaar,
Unka pyaar phailaa hai is paar se uss paar.

Beshaq Guruji ke pyaar ke anginat chamatkaar hain,
Lekin Guruji nahin Hain jaadugar,
Ve toh adhyaatmikta ka bhandaar Hain,
Aur niswaarth pyaar ka divya aadhaar Hain.

Guruji ke pyaar ke rangg kayee hazaar hain,
Unke pyaar ke andaaz beshumaar hain,
Rotey huey ko hansaa sakta hai Guruji ka pyaar,
Marte huey ko jeevit kar sakta hai Unka pyaar.

Guruji ka pyaar kab se manzil kee talaash karte huey musaafir ko,
Safalta dekar khatm kar sakta hai uske barson ka intazaar,
Aur yahee pyaar kisee niraash bhakt ke jeevan mein laata hai aisee bahaar,
Ki is bahaar ke aane se asha se bhar jaata hai uska ghar sansaar.

Guruji ka pyaar har bachche ke liye hai,
Unka pyaar jhoothe aur sachche ke liye hai,
Yeh pyaar hai paawan aur itna anokha,
Ki Guruji ko koi na de sakta hai dhokha.

Guruji ka pyaar na bhooley kabhi karmon ka katvaana,
Guruji ka pyaar sadaa yaad rakhey khush-haali phailaana,
Guruji ka pyaar zaroor nyaaya dilaata hai,
Guruji ka pyaar guroor ka pathhar bhi hilaata hai.

Is pyaar mein Guruji ka anushaasan bhi hai,
Is pyaar mein Unka aashwaasan bhi hai.
Yahee pyaar bichde huon ko mila deta hai,
Yahee pyaar veeraane mein phool khila deta hai.

Guruji ka pyaar Unkee khushboo aur darshan mein hai,
Guruji ka pyaar hamaare jeevan ke har kshan mein hai,
Guruji ka pyaar prakriti ke har hisse mein hai,
Guruji ka pyaar hamaari kahaani ke har kisse mein hai.

Dhoondhne kee zaroorat hee nahin hai,
Kyunki Guruji ka pyaar zarre zarre mein hai,
Behta rahega yeh pyaar hamaari hasti mein basskar,
Kyunki Guruji ka pyaar hamaare khoon ke katre katre mein hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 17, 2020

Om Namaha Shivaya
Aaj Ka Suvichaar 🙏🏻🙏🏻 # 972

       Poochha Mainey Saagar Se

Poochha mainey saagar se,
Tu itna aseem hai kaise,
Saagar ne muskuraate huey kahaa,
Mujhe Guruji ne banaaya hai aise.

Phir veh karne lagaa Guruji kee vadiyaayee,
Uskee har leher mein taareef thi samaayee,
Taareef pyaare paalanhaar kee,
Taareef taral taaranhaar kee.

Saagar ne kaha Guruji bade dayaalu Hain,
Dayaalu honei ke saath Ve bade kripalu Hain,
Ve har leher mein bharte Hain umangg,
Aur usmein sanjote Hain taralta aur tarang.

Jis sooraj ke prakash se mujh mein basaa hua paani chamakta hai,
Uss balshaali sooraj par hai Guruji ka hee niyantran,
Aur jis chaand kee aakarshan shakti se uchh aur nimn jwaar-bhaata hota hai,
Vo chaand bhi karta hai Guruji ka hee vandan.

Guruji kee kripa se hee badhta hai mera utsaah,
Unhee ke maargdarshan se dikhtee hai meri leheron ko raah,
Duniya mujhe bahut hee mahaan samajhti hai,
Lekin meri toh har leher Guruji ko salaam karti hai.

Guruji ka naam lete huey jab har leher ret takk aati hai,
Toh Guruji kee leela se veh mayl ko vaheen chod jaati hai,
Simran ke saath nirantar chalta rehta hai yeh silsila,
Paani saaf hota rehta hai bin kiye mitti se shikva ya gila.

Mera angg angg Guruji kee dein hai,
Mera rangg aur dhangg bhi Guruji kee dein hai,
Meri gehraayi jitnee bhi ho, Guruji kee vadiyaayee se yakeenan kumm hai,
Guruji kee mehar-e-nazar se hee meri lehron mein dumm hai.

Mujh mein yeh kaabiliyat hee nahin,
Ki mai apna astitva sambhaal sakoon,
Tabhi toh Guruji kee kripa ke liye,
Mai Unka shukrana karte huey kabhi na thakoon.

Meri har leher kee her boond,
Guruji kee kripa kee mohtaaj hai,
Kal bhi Guruji ka mujh par raj thaa,
Aur Guruji ka hee aaj bhi raj hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja