Author: dhirjabhat

April 13, 2020

Om Namaha Shivaya
Aaj Ka Suvichaar 🙏🏻🙏🏻 # 785

     Baisakhi Ka Tyohaar

Guru Gobind Singh ke maargdarshan se
1699 mein banaa Khalsa panth
Upjee hui fasal ekatrit karne ka aaya samaa
Baisakhi par hua pichhle varsh ka antt

Baisakhi ka tyohaar apne sangg hai laaya
Nayi asha aur naya varsh
Kasht aur roag ke duur honei kee ummeed se
Har oar chhaaya hai harsh

Guruji sansaar par aayi mushkil par
Lagaa rahein Hain Apni divyataa ka marham
Taaki vishwa ka sankat duur ho
Aur chayn kee saans le sakein hum

Saath hee saath hum bhi
Apna kartavya nibhaayein
Insaaniyat kee khaatir apna sehyog dein
Aur Guruji ko rijhaayein

Guruji ke naam mein hum khoyein
Achche karmon ke beej hum boyein
Niswaarth sewa aur simran karein
Guruji ko sab samarpan karein

Beej changey honei se
Fasal changee hogi antt mein
Har tyohaar uphaar hoga
Jab Guruji ka naam hoga dil aur kanth mein

Kisaanon ke khet jaise hotey hain harey bharey
Kuch vaisa hee hoga atma kee jot bhumi ka ruhaani rangg
Guruji toh dene ke liye tayyaar baithey Hain
Buss, hamein hee badalna hai hamaare jeene ka dhangg

Kyun na vikaar rikt karma aur vichaar rakhein
Jaisa hamaare poojya Guru kahein
Aur aaj Baisakhi ke shubh avsar par
Aglee Baisakhi kee tayyaari shuru karein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 12, 2020

Om Namaha Shivaya
Aaj Ka Suvichaar 🙏🏻🙏🏻 # 784

   Na Ghabraa Tu Andheri Raat Se

Na ghabraa tu andheri raat se
Sukh kee sehar abb nahin hai duur
Na darr tu kisee bhi baat se
Guruji kee mehar raksha karegi zaroor

Ye mehar toh yugon se barasti aa rahi hai
Guruji ne tujhse ye baat kayee baar kahi hai
Shaayad toone pehle nahin samjhaa isliye abb samajh le
Shaayad tu pehle thaa bahut uljhaa lekin abb sulajh le

Taqleef aayi hai jaane ke liye
Aur tujhe yaad dilaane ke liye
Ki tu mehez ek insaan hai
Aur tujh se shreshth tera Bhagwaan Hai

Guruji toh Maalik Hain is srishti ke
Hum sab mohtaaj hain Unkee drishti ke
Apne vash mein jo bhi hai hum kewal vahee kar sakte hain, kuch aur nahin
Guruji kee soch aur Unke tareeke divya hain, aur hameshaan hotei hain sahi

Unhee ke kehne par sooraj aur chand aayein
Unhee ke hukm se baarish aaye aur chalein hawaayein
Guruji toh abb bhi madad karna chaahein
Isliye thaamne de tu Unhe apni baahein

Unkee kripa se aayegi suraksha kee sunehri sehar
Kar le tu Unka sachche dil se dhyan har pehar
Tera jeevan sach mein safal ho jaayega
Guruji kee sharan mein tu jannat ko paayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 11, 2020

Om Namaha Shivaya
Aaj Ka Suvichaar 🙏🏻🙏🏻 # 783

              Nidravastha Se Jaag

Naadaani ke anant andhere mein
Tu kabb takk khota rahega?
Agyaan kee chaadar odhe
Tu kabb takk sotaa rahega?

Is nidra se nahin milega tujhe aaraam
Jabb takk tu na paayega Guruji se gyan
Isliye abb tu is nidravastha se jaag
Agyaan kee chaadar ko tu tyaag

Kalyuga ke is kohare mein
Kabb takk beimaani ka saath tu deta rahega?
Agar tu na jaaga, toh tu hee hai abhaagaa
Kyunki tu mayle paani mein apni gaagar bhigotaa rahega

Guruji ke sangg swaarth ka rishta kar ke
Kabb takk maang maang kar Unse leta rahega?
Maango nahin, manno, Guruji ne sikhaaya hai hameshaan
Kabb takk is hukm ka ullanghan kar ke swayam ko dhokha deta rahega?

Guruji toh kshamaasheel Hain
Unse maang le maafi
Unhe sarvsamarpan kar de
Tere uddhaar ke liye yahee hai kaafi

Kyunki tera saara zimma Guruji Apne par le lenge
Aur tujhe tere haq se kaheen zyada khushiyaan Ve de denge
Yoon hee toh nahin ye saari sangat Unkee deewaani
Unhonei sanvaari hai sabki hee zindagaani

Beemaaron ke roag kiye Guruji ne duur
Ghamandiyon ka ahem kiya Unhonei choor
Har oar chhaaya hua hai Unka noor
Tu bhi pukaarega toh Ve aayenge zaroor

Khuli kitaab hai tera jeevan Unke saamne
Tujhe sweekar kar aayenge tujhe thaamne
Toone toh buss pyaar aur shradha se sir ko jhukaana hai
Aur apne mann ko mai se khali kar Unhe mann mein bithaana hai

Na kar abb tu is shubh kaam mein vilambh
Kar le apne ruhaani jeevan ka shubh aarambh
Jahaan Guruji ke sangg judee ho teri atma
kee taar
Aur tere dil se Unke liye Shukrana nikle baarambaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 10, 2020

Om Namaha Shivaya
Aaj Ka Suvichaar 🙏🏻🙏🏻 # 782

           Jeevan Diya Hai Aapne

Pyaare Guruji,

Aapke divya prem kee badaulat hum jaanein fark dharam aur adharam mein
Aapki dee hui chetna se shreshthta laa paayein hum apne karam mein
Aap hee kar sakte Hain upkaar
Taaki badkismati na aaye hamaare dwaar

Aapki aradhana se badhkar kuch bhi nahin
Aapki mehare nazar se har kaaj ho sahi
Aap hee mitra Hain, Aap hee Hain bhraata
Aap hee Hain naath, Aap hee Hain mata

Kripa keejiye ki Aapke ashish ke amrit se
Pavitra ho jaaye hamaara mann
Rehmat aisee keejiye ki Aapki upaasna se
Shudh ho jaaye hamaara jeevan

Har pal karein hum Aapka chintan
Shradha se karein hum Aapka vandan
Dayaalu kripaalu Guruvar, safal keejiye hamaari upaasna
Karte hain hum dil se Aapse kshamaa yachna

Aapke dikhaaye huey raaste par chalein
Aapse na darein aur burey kaam na karein
Baaghbaan Aap Hain, lekin karam toh hain hamaare
Sansaar behtareen ho jaaye agar har koi yeh vichaare

Apne se jodey rakhna hamein, isee mein hai hamaari suraksha
Kyunki kewal Aap hee kar sakte Hain har kasht se hamaari raksha
Uddhaar kiya hai Aapne, paalanhaar Hain Aap
Jeevan diya hai Aapne, praanon ka aadhaar Hain Aap

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 9, 2020

Om Namaha Shivaya
Aaj Ka Suvichaar 🙏🏻🙏🏻 # 781

            Sunn Le Unkee

Guruji kee kripa se khatm hoga kashton ka toofan
Sunn le Unkee, kyunki Ve Hain Ishaan
Guruji sab sambhaalenge chaahe toofan ho bhayankar
Sunn le Unkee, Ve Hain Shiv Shankar

Guruji kahein, tu reh saavdhaan
Sunn le Unkee, Ve Hain Bhagwaan
Guruji kahein, tu bilkul na darr
Sunn le Unkee, Ve Hain Ishwar

Guruji kahein, tu karta chal niswaarth sewa
Sunn le Unkee, Ve Hain Devadhideva
Guruji kahein, Unko tu sarvsamarpan kar
Sunn le Unkee, Ve Hain Parmeshwar

Guruji kahein, Unhonei thaama hai tera haath
Sunn le Unkee, Ve Hain Trilokinath
Guruji kahein, na kar tu kisee prakaar ka sanshay
Sunn le Unkee, Ve Hain Mrityunjay

Guruji kahein, langar hai teri dawaai
Sunn le Unkee, Ve Hain poojya Sai
Guruji kahein, Unke naam mein ho jaa madhosh
Sunn le Unkee, Ve Hain Ashutosh

Guruji kahein, jod le tu Unse nirmal nata
Sunn le Unkee, Ve Hain Guru ke roop mein Mata
Guruji kahein, har mushkil ka hoga antt
Sunn le Unkee, Ve Hain Neelkanth

Guruji kahein, der se hee sahi, simran kar le shuru
Sunn le Unkee, Ve hee Hain Wahe Guru
Guruji kahein, na kho tu apni hansee
Sunn le Unkee, Ve Hain Isa Masih

Guruji kahein, Unka dwaar bhakton ke liye sadaa hai khula
Sun le Unkee, Ve Hain Maula
Guruji kahein, Ve denge tujhe bhakti ka var
Sun le Unkee, Ve Hain Gangadhar

Guruji kahein, tera koi nahin hai Unke siva
Sunn le Unkee, Ve Hain Mahaan MahaShiva
Guruji kahein, apni antaratma mein karne de Unhe pravesh
Sunn le Unkee, Vahee Hain Brahma, Vishnu, aur Mahesh

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 8, 2020

Om Namaha Shivaya
Aaj Ka Suvichaar 🙏🏻🙏🏻 # 780

      Pal Pal Kal Kee Fikr Na Kar

Guruji tere saath Hain har kadam par
Tu chalta chal, buss chalta chal
Apna uttardayitva zaroor sambhaal tu
Aur waqt ke saanche mein dhalta chal
Mushkilon ka baar baar zikr na kar
Pal pal kal kee fikr na kar

Waqt ka saancha bhi Guruji ke niyantran mein hai
Isliye har ghadi, har lamha hai Unkee nigraani mein
Tere har karam ko Ve parakh rahei Hain
Ye baat tu rakh yaad zindagaani mein
Unse pyaar kar, Unse bilkul bhi na darr
Pal pal kal kee fikr na kar

Guruji sab sambhaal rahein Hain
Toone akele koi kasht kahaan sahei Hain
Maanav jeevan mein karmon ka karz toh chukaana hoga
Insaan ko Bhagwaan ke saamne sir toh jhukaana hoga
Guruji tere liye tere dukh lenge har
Pal pal kal kee fikr na kar

Tere bin boley hee Unhe tere sankat kee hai jaankaari
Chaahe veh ho dhan se judee museebat ya phir koi beemaari
Phir bhi kehne ka mann hai toh tu Unse keh daal
Har haal mein Ve tere kasht denge taal
Isliye jeete jee tu na mar
Pal pal kal kee fikr na kar

Unn jaisa dayaalu aur koi nahin
Unn jaisa kripaalu aur koi nahin
Ve bakshanhaar Hain, Ve paalanhaar Hain
Ve murshid Hain, Ve taaranhaar Hain
Kal, aaj, aur kal ka Unhe shukr kar
Pal pal kal kee fikr na kar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 7, 2020

Om Namaha Shivaya
Aaj Ka Suvichaar 🙏🏻🙏🏻 # 779

     Aapke Naam Ke Bina

Pyaare naath, jagat ke pyaare swaami
Hey Parampita Guruji, poojya antaryaami
Aisee kripa keejiye ki hamaare mann ka bhakti bhaav kabhi na ho khandit
Aisee mehar barsaayiye ki Aapke prem se na hon hum kabhi bhi vanchit

Jab raasta bhi Aap Hain aur manzil bhi Hain Aap
Toh phir ghabraane kee koi baat nahin
Aapne haath thaama hai hamaara
Is se suhaana aur sukhdaayee koi saath nahin

Isliye sadaa hamein Apna deewaana bann kar jeene dena
Apni rehmat ka amrit sadaa hamein peene dena
Maya ke khinchaav se phatt gayi hai hamaare mann kee chaadar
Aap hamein Apne prem ke dhaagon se isey seene dena

Har saans Aapki mohtaaj hai aur rahey, aisa hee karna prabandh
Aapke sangg ho jaaye hamaara har janam ka sambandh
Uddhaar ho jaayega jo is tarehn se jaayenge Aapke saath hum bandh
Aur hamaare safar ke har moad ko mehkaayegi Aapki divyataa kee sugandh

Chaahe hon khushi ke lamhe, chaahe hon gumm ke kshan
Har pal dena daata Aap Apne naam ka dhan
Kalyuga kee Lanka ho ya ho satyuga ka Vrindavan
Abb toh kaheen bhi Aapke naam ke bina lagta nahin hai mann

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 6, 2020

Om Namaha Shivaya
Aaj Ka Suvichaar 🙏🏻🙏🏻# 778

            Jidhar Dekhoon Mai

Pyaare Guruji,

Koi ghazal mein karey Aapki taareef
Koi geet mein Aapke gunn gaaye
Aap Hain Apne har bhakt ke kareeb
Har pal mann mein Aapke simran kee dhun chhaaye

Koi kavitaaon mein Aapki mahima bayaan karey
Koi apni shaayari ke gulistaan mein Aapkee prashansa ke phool bharey
Kisee gaayak ke bhakti sangeet mein Aap samaaye
Toh koi apne nritya dwaara Aapke Shiv avataari roop ke baare mein bataaye

Phoolon kee khoobsoorati mein Aapki chhavi basee hai
Har bhakt ke chehre par Aapki hee dee hui hansee hai
Jabb se Aap dil mein basein Hain, akelapan ho gaya hai duur
Abb toh har waqt har oar chhaaya hua hai Aapki divyataa ka noor

Jo bhi jud jaaye Aapse, Aap uss bhakt ke dil ko lete Hain jeet
Itna ruhaani rishta hai Aapse aur itnee pyaari hai Aapki preet
Bhakton ke bin kahey hee Aap dil kee baat lete Hain jaan
Insaan ke roop mein aaye Aap, par Hain Aap saakshaat Bhagwaan

Lafzon mein kahein, ya geet gungunaayein
Aap dil mein karein vaas aur aankhon kee namee mein samaayein
Aapke hukm se hee rukh badlein ye hawaayein
Jidhar dekhoon mai, mujhe toh buss Aap hee Aap nazar aayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 5, 2020

Om Namaha Shivaya
Aaj Ka Suvichaar 🙏🏻🙏🏻 # 777

       Simran Ke Beej Se

Guruji ke shradhapoorna simran se
Kumm ho jaaye gunehgaar kee sazaa
Aaj nahin toh kal zaroor uss bhakt ka uddhaar ho jaaye
Jo bhakt maanta chale Guruji kee razaa

Guruji ke naam ke simran ne toh
Mrityu takk hai rukvaayee
Guruji ke naam ka simran karo
Guru naam kee hai vaddi vadiyaayee

Simran ke beej se jo aadarshwadi ankur le janam
Veh sach mein sanvaar de bhakt ke karam
Jaagriti, neevenpann, aur sachchaayee kee kaliyaan karein naman
Sadaachaari aur nipuntaa ke khil jaayein suman

Simran kee shakti se apraadhi ka dand maaf ho jaaye
Simran kee mahima se simarne waale ka dil saaf ho jaaye
Jitna simran karenge hum, hamaare liye achchaa hai
Kyunki chaahe baaki sab jhooth ho, Guru ka naam toh sachchaa hai

Na aawashyakta phursat kee, na chaahiye koi shubh mahurat
Simran karna toh hai har insaan kee zaroorat
Simran se yakeenan hamaara uddhaar hoga
Simran se hee jeevan mein sudhaar hoga

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 4, 2020

Om Namaha Shivaya
Aaj Ka Suvichaar 🙏🏻🙏🏻 # 776

                   Kabb Takk

Kabb takk tu karega ‘mai’ aur ‘mera’
Abb toh maan le ki ye sabb nahin tera
Jabb na ye atma teri, na hee tera astitva tera
Toh tera nahin hai ye ‘mai’ aur ‘mera’

Maati ka putla hee toh hai tu
Mitti se aaya hai aur mitti mein hee mil jaayega
Oopar waale ke haath mein teri saanson kee doar hai
Uske bina toh tu bilkul bhi na hil paayega

Ye ‘mai’ toh sach mein mahaamaari hai
Bahut hee gambhir ye beemari hai
Jis bhi insaan kee atma-shakti is beemari ke aagey haari hai
Ye bann gayee uss shaqs kee sabse badi laachaari hai

Tabhi toh Guruji kehte Hain
Is ‘mai’ ko tu bilkul chod de
Achchi sangati ke sangg raha kar
Vikaaron se tu muh moad le

Kabb takk imaan ko jokhim mein daal kar
Ahankaar bhara jeevan tu jeeta rahega
Abb toh prakriti ne bhi apni mahima dikhaayee phirse
Abb bhi kya ahem ka ghoont peeta rahega?

Maan le abb toh Guruji kee baat
Aur na kar nainsaafi apne saath
Sabke shareer mitti mein mil jaayenge
Ye paap aur ye karam hee saath jaayenge

Paramatama ne bheja atma ko dharti par
Dekar kshanbhangur libaas nashwar insaan ka
Aur insaan apni ‘mai’ mein yoon kho gaya
Ki bhool hee gaya ye ehsaan Bhagwaan ka!!

Ye saansein, ye tann, mann, dhan, kuch bhi toh nahin hai apna
Phir kyun dekhta rehta hai tu adhkhuli aankhon se mithya ka sapna
Agar sach mein safal karna hai ye jeevan
Toh ho lene de tu Parmatama se atma ka punar milan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja