Author: dhirjabhat

August 9, 2018

Om Namaha Shivaya
Aaj Ka Suvichaar 🙏🏻🙏🏻 # 172

        Hamaare Trinetri Trilokinath

Maathe par hai divya tripund
Hamaare Trinetri Trilokinath ke
Dushton ka sanhaar karey jo
Veh Trishul hai haath mein

Inhee Shivji ke avataar mein
Guruji dharti par aaye
Devi devtaaon ne bhi Unpar
Bhakti ke phool barsaaye

Sabse prem karein Guruji
Ve humse bhi yahee chaahein
Bhakton ke raaste kee mushkil ko
Veh Apni shakti se hataayein

Achche karam hon hamaare
Guruji yahee hain kehte
Har shishya par nazar hai Unkee
Har bhakt ke dil mein rehte

Baahar nahin dhoondhiye Unko
Veh Aapke bheetar basein hain
Duniye ke jhameley ko chodein
Kyun sab inmein phasein hain

Guruji ka har kshan dhyan keejiye
Prem se Guruji ko pukaariye
Unhee kee karuna aur leela se
Apna jeevan sanvaariye

Guruji, kripa kar prem aur subudhhi
Deejiye hamein saugaat mein
Aur ashirwaad deejiye ki hum
Rahein sadaa apni aukat mein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 9, 2019

Om Namaha Shivaya
Aaj Ka Suvichaar 🙏🏻🙏🏻 # 537

      Kaheen Khushi Kaheen Gumm

Kaheen khushi, kaheen gumm
Kaheen zyada, kaheen kumm
Guruji mein jab poori tarehn se jaayenge rumm
Toh har haalaat mein tript reh paayenge hum

Duniya ka mela toh chalta rahega
Har subah ka sooraj shaam ko dhalta rahega
Jo shaqs nakaaratamaktaa mein jalta rahega
Veh aakhir mein apne haath maltaa rahega

Isliye sakaaratamaktaa apnaa lein har vichaar mein
Aur prem se jee lein is sansaar mein
Ek din toh maati mein mil hee jaana hai
Tabb na chalna koi bhi bahaana hai

Baaton ka kya hai, ve toh aiseee vaisee hoti rahengi
Saagar kee lehron kee tarehn idhar udhar bahengi
Zamaane kee zubaan kee ve toh hain mohtaaj
Jab takk yahaan hai kalyuga ka raaj

Guruji kehte hain ki hum Unse jud jaayein
Duniya kee laukiktaa se hum mud jaayein
Achchaa sochein aur achchaa karein
Sachchaayee se na kabhi darein

Karam nibhaayein is chetna ke sangg
Ki kuch bhi yahaan nahin hai apna
Oopar waale ke vash mein hain hum
Hum sab toh hain katputliyaan

Sab nibhaayein agar insaaniyat ka dharam
Phir burey na hongei kisee ke bhi karam
Sharam na aayegi phir Guruji ke darbar mein
Jab doob jaayenge hum niswaarth pyaar mein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 8, 2018

Om Namaha Shivaya
Aaj Ka Suvichaar 🙏🏻🙏🏻 # 171

Guruji Kee Razaa Mein Raazi Rahein

Detey hain har pal haunsla
Sadaa bantey hain sahara
Bharosa Unpe atoot ho jiska
Usko Guruji ne sach mein tara

Guruji ke darbar mein
Na koi dhanee hai na koi gareeb
Jo bhi simran karey pyaar se
Guruji hain uske kareeb

Jaat ka bhed bhaav nahin hai
Har kisee ko pyaar karein Guruji
Jo bhi dar pe aaye Unke
Uski jholi bharein Guruji

Guruji kee razaa mein raazi rahein
Har pal hum karein shukrana
Ek haseen safar bann jaayega
Hamaari zindagi ka afsaana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 8, 2019

Om Namaha Shivaya
Aaj Ka Suvichaar 🙏🏻🙏🏻 # 536

     Koi Bhi Lamha Aisa Nahin Hai

Yeh karmon se banee deewaar hai pyare
Eenthon se yeh nahin hai banee
Keval Guruji kee sadhna karne se tootegi
Kyunki hai is mein ateet kee dhvani

Beetey huey kal ke karam tere
Le rahein hain ab bhi tere jeevan mein phere
Buss sabke badal jaate hain kirdaar
Lekin atmaayein vahee aati hain baar baar

Kisee kisee ke sangg toh
Pyaar se sab nibh jaayega
Lekin kisee kisee ke saath
Rishta karvaahat le aayega

Isliye bheed se tu prabhaavit na hona
Sab pal doh pal ke mehmaan hain
Kaun tere pichhle kis karmic khaate se hai
Is sach se tu bilkul anjaan hai

Yeh sab itna uljhaa sa silsila hai
Tu soch bhi nahin sakta
Dhokha tabhi samajh aata hai
Jab jhatkaa dil ko hai lagta

Bahut kuch seekhne ko milta hai inse
Aise loag zindagi mein zaroori hain
Kya karein, aakhir insaan hain hum sab
Isliye karam bhogna toh majboori hai

Har seekh ka tu prayog kar
Apni adhyaatmik pragati ke liye
Keval Guruji ke kareeb aane kee cheshtaa kar
Tu apni atma kee unnati ke liye

Buss, dhyan rakh is baat ka
Ki Guruji tujhe dekh rahein hain har pal
Chaturaayee se apna aaj sanvaarne ke chakkar mein
Kaheen bigaad na dena apna kal

Har kisee ke sangg adhyaatmik bandhan se mukt hokar
Pyaar se laukik bandhan nibhaane kee koshish kar
Apne aaj ke karmon kee poonji
Tu apni koshish se achchaayee se bhar

Jab tera dil bilkul saaf hai
Toh ghabraane kee koi baat nahin
Koi bhi lamha aisa nahin hai
Jab pyaare Guruji tere saath nahin

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 7, 2018

Om Namaha Shivaya
Aaj Ka Suvichaar 🙏🏻🙏🏻 # 170

    Guruji Hain Hamaare Param Pita

Hamaare mann kee baat ko jaanein
Hain Guruji sach mein antaryaami
Har pal rahey Unhe dhyan hamaara
Vahee hain Param Pita aur swami

Hum toh raat mein so bhi jaayein
Parantu Guruji nahin hain sotey
Hamaari zindagi mein chamatkaar
Unhee kee kripa se hain hotey

Hum bhakton ke kashton ka bhaar
Guruji ne hee hai sambhaala
Isliye bina kisee sanshay ke japo
Unke naam roopi moti kee mala

Kehte hain Guruji apne bachchon se
Aur koi moti kee mala na japna
Ghamand na aa jaaye dil mein
Aur dil hee na rahei phir apna

Jaap karte rahein hum
Unke divya naam ka
Ekaagrchitt hona zaroori hai
Varna veh nahin kisee kaam ka

Ahankaar aur aql ko baahar chod kar
Guruji ke dwaar par hai jaana
Uska udhdhaar nishchit hai
Jisne kehna Guruji ka maana

Vilambh na karein hum ek bhi pal ka
Sheesh navaa lein Guruji ke charan mein
Achche aur sachche insaan banei hum
Aur jagah paayein Unkee sharan mein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 7, 2019

Om Namaha Shivaya
Aaj Ka Suvichaar 🙏🏻🙏🏻 # 535

Aap Hee Hain Murshid, Aap hee Khuda

Pyaare Guruji,

Yoon toh kayee janmon se hamaara rishta hai Aapke saath
Lekin ab hee jaana ki Aapne thaama hua hai hamaara haath
Na bhed-bhaav, na oonch-neech, na koi jaat-paat
Aapki sharan mein na hai koi bhi pakshpaat

Jispar ho jaaye Aapki inaayat
Uspar toh chaahe aa jaaye kayaamat
Uss bhakt ka kuch bhi nahin bigdega
Aapka saath usey sadaa himmat dega

Jo niyati ne dee hai veh taqdeer hai
Jo antar-atma ne diya hai veh zameer hai
Ab jo mann mandir mein Aapki tasveer hai
Toh Aapka har bhakt itna ameer hai

Aapki karuna se taqdeer sanvar jaayegi
Aapki prerna se antar-atma jaag jaayegi
Aapke pyaar se paapi bhi tarr jaayega
Aapke ashish se bhakt ka utsaah badh jaayega

Guruji, Aap hee hain murshid, Aap hee hain khuda
Kabhi nahin hotey hain Aap Apne bhakton se judaa
Buss, hum sab apnaayein satya aur wafaa kee adaa
Aur sadaa rahey hum sab par Aapki rehmatey nigaah

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 6, 2018

Om Namaha Shivaya
Aaj Ka Suvichaar 🙏🏻🙏🏻 # 169

Har Satsang Mein Aatey Hain Guruji

Har satsang mein aatey hain Guruji
Hain Ve sab bhakton ko pyaare
Har dil mein bastey hain Guruji
Unke roop hain itne nyaare

Kabhi Shivji ke avataar mein
Dikhein Nandiji ke sangg
Kabhi bansi bajaate huey Shyam
Zindagi mein bhar dein rangg

Baba Nanak ke divya roop mein
Kisee bhakt ko nazar aayein
Kabhi Shirdi ke Sai Baba bannkar
Shishyon ko daras dikhaayein

Om dikhey kisee satsangi ko
Kisee ko dikhta Omkaar
Kisee ko dikh jaaye Mata Rani
Dushton ka karti hui sanhaar

Kisee bhakt ko dikhte hain Guruji jaise
Baahubali sankatmochak Hanuman
Koi dekhe Unmein poojya Ganpati
Toh koi dekhe Ayodhya Naresh Ram

Roop anek hain hamaare Guruji ke
Aur leela hai Unkee aparampaar
Jis bhi roop mein poojein Unhein hum
Vahee lagaayein hamaara beda paar

Unhee kee tu kar upaasana
Unhee mein leen tu hoja
Baaki sab sirf mithya hai
Tu buss Guruji mein khoja

Unhee mein yoon khokar tu
Apne aap mein Unhei paayega
Vahee denge moksh tujhe
Aur jeevan dhanya ho jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 6, 2019

Om Namaha Shivaya
Aaj Ka Suvichaar 🙏🏻🙏🏻 # 534

            Unhee Se Milan Kee Aas

Dil jab bilkul toot gaya
Har rishta jagg ka jab chhoot gaya
Khud ka naseeb hee jab rooth gaya
Guruji ne bulaaya Apne paas

Aansoon se aankh jabb ho numm gayee
Zindagi mein ho gaye jab gumm kayee
Udaasi mein waqt kee ghadi jab thamm gayee
Toh Guruji ne dilaaya Apna ehsaas

Jab aankh khuli asliyaat jaan-ne ke baad
Jab Ishwar ko kiya dil se yaad
Jab kee apne uddhaar ke liye fariyaad
Tabb Guruji ne dil mein buss kar kiya usey aabaad

Jab din kee bela mein bhi mehsoos hui andheri raat
Jab jaani duniya waalon kee aur apni aukat
Jab kehne aur sun-ne ke liye rahi na koi baat
Tabb Guruji ne dee Apni bhakti kee saugat

Jab lagg nahin raha thaa beda paar
Jab samajh nahin aa raha thaa jeevan ka saar
Jab dil gaya thaa sab kuch haar
Tabb Guruji ne diya beintehaa pyaar

Kyun itna samay kar diya pehle zaaya
Shaayad tabb hakeekat jaan-ne ka waqt nahin thaa aaya
Ab toh aalam aisa hai chhaaya
Ki bekaar lagne lagi hai yeh maya

Ab toh Guruji se hee hai har shwaas
Unhee par tikaa hai ab vishwaas
Aur kuch bhi nahin aata hai raas
Kyunki Unhee se milan kee hai ab aas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 5, 2018

Om Namaha Shivaya
Aaj Ka Suvichaar 🙏🏻🙏🏻 # 168

                Jeevan Kee Manzil 

Guruji raksha karte hain hamaari
Aur jeene kee raah dikhaate hain
Kaise chalna hai uss raah par
Veh bhi Guruji sikhaate hain

Ahankaar na karein hum, kahein Guruji
Vehmon se ksheen na karein atma
Guruji ko basaa lein mann mandir mein
Vahee hain hamaare dayaalu Paramatma

Paristhiti bhi agar ho pratikool
Phir bhi fikr na karein hum
Haalaat jaise bhi hon zindagi mein
Har pal Guruji ka shukr karein hum

Yoon hee shukrana karte karte
Dekhna haalaat sudhar jaayenge
Guruji kee karunamayee leela se
Sukh ke haseen pal zaroor aayenge

Unhee ko maan le apne jeevan kee manzil
Teri dhadkan, tera shvaas banenge Guruji
Zindagi ka geet gaaye jaa Unke bharose
Tere har nagme ka saaz banenge Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 5, 2019

Om Namaha Shivaya
Aaj Ka Suvichaar 🙏🏻🙏🏻 # 533

         Guruji Ke Charnon Mein

Guruji ke charnon mein hota hai sabka kalyaan
Saari srishti jaantee hai ki Guruji hain kitne mahaan
Apni sangat kee khaatir Guruji dete hain anginat balidaan
Kyunki Guruji ke liye har bhakt hai Unkee santaan

Guruji ke charnon mein aane se kasht kalesh mitt jaata hai
Unka har shishya Unke dil mein jageh paata hai
Bhakton kee taqdeer ka har pehlu sanvar jaata hai
Ruhaani safar mein chalte chalte drishtikoan badal jaata hai

Guruji ke charnon mein sthaan mil jaana baat hai bade naseeb kee
Unhe prassann karne ke liye zaroorat nahin hai kisee khaas tarkeeb kee
Guruji toh sabki pukaar suntei hain chaahe ameer kee ho ya ho gareeb kee
Hum sabse Unkee pehchaan hai bahut hee kareeb kee

Guruji ke charnon mein jo sukh hai veh na milta kaheen oar
Unhee ke prem se surakshit hai hamaari saanson kee doar
Unke ashirwaad se sadaa jhoomey hamaare mann ka moar
Guruji ke deedar se hee toh hai ruhaani jeevan mein bhor

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 4, 2018

Om Namaha Shivaya
Aaj Ka Suvichaar 🙏🏻🙏🏻 # 167

       Guruji Tujhe Sweekaar Lenge

Waqt hai sookhi ret kee tarehn
Muthhi se nikal jaayega
Abb bhi sudhar ja praani
Swaarth se tu kya paayega

Guruji sab kuch dekh rahei hain
Kuch nahin chhupa hai Unse
Kya kahoge tum Guruji se
Jab Veh jawab maangenge tumse

Hamaari har soch ka pataa hai Unko
Manobhaav Veh jaante hain har ek ka
Hamaare har karam par nazar hai Unkee
Vichaar bhi maalum hai Unhe pratyek ka

Maafi maang le Guruji se tu
Apne burey karmon kee
Paap kee gathri halki kar le
Dho le mayl tu janmon kee

Apne aane waale kal ko tu
Unkee kripa se sundar banaa le
Neevey hokar vishwaas aur shradha se
Guruji ko tu pyaar se manaa le

Guruji tujhe sweekaar lenge
Aa jaa Guruji ke charan kamal mein
Saari chinta chod de Unpar
Mauj manaa le Unkee sharan mein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 4, 2019

Om Namaha Shivaya
Aaj Ka Suvichaar 🙏🏻🙏🏻 # 532

          Guruji Kaaj Sanvaarenge

Guruji par hum agar poorna vishwaas karenge
Toh kyun phir kabhi bhi hum shikaayat karenge
Guruji sab kuch khud hee samajh jaayenge
Unkee kripa se samay ke saath saath sankat sulajh jaayenge

Jab bhaktjann Guruji ko pukaarenge
Guruji Unke kaaj sanvaarenge
Guruji mein ramm jab ve jaayenge
Toh ruhaani safar ka anand paayenge

Hamaare raaste mein kaunsi mushkilein aayengi
Yeh hamaari buddhi na jaan paayegi
Lekin Guruji hamein poorna saamarthya denge
Aur Unkee kripa se hum raasta tayy kar lenge

Sabse aasaan raasta dhoondhne kee hum koshish na karenge
Raaste mein aane waale aashcharyajanak moad se na darenge
Guruji ke bharose har sankat ka saamna karenge
Jahaan Ve le chalein buss vaheen chal padenge

Kyun na har anubhav ko maan lein Guruji kee manzoori
Phir kabhi bhi na hogi gumm kee numaaish zaroori
Guruji kee kripa se shaant rahega mann
Shukrana mein beet jaayega yeh jeevan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 3, 2018

Om Namaha Shivaya
Aaj Ka Suvichaar 🙏🏻🙏🏻 # 166

      Peechhe Na Hataana Kadam

Jo tu ek kadam Guruji kee oar chalega
Guruji sau kadam teri oar badhaayenge
Peechhe na hataana kadam abb tu bilkul
Prabhu se milan ke lamhe zaroor aayenge

Har pal sangg hain Guruji tere
Phir darr hai tujhko kaisa
Guruji toh MahaShiv hain
Na hai koi Unke jaisa

Saare Brahmaand mein Unka raaj hai
Devi Devta karein Unka charan sparsh
Tu bhi leen hokar Unki saadhana mein
Bitaa dey har kshan, din, aur har varsh

Dukh ke samay bhi Unka shukrana karna
Maangna nahin kyunki tu naadaan hai
Kathin ghadiyon mein bhi Unpar bharosa rakh
Yahee toh teri shradha ka imtehaan hai

Sukh kee subah awashya aayegi
Gum ke timir ka zaroor antt hoga
Jo rakhega apni shradha ko kaayam
Vahee sachchaa santt hoga

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 3, 2019

Om Namaha Shivaya
Aaj Ka Suvichaar 🙏🏻🙏🏻 # 531

                 Guruji Ke Charan

Guruji ne jo dee hai
Apne charnon mein jageh
Mil gayee hai hamein
Jeene kee vajeh

Unke charan hee hain hamaara dar
Unke charan mein hum jaayenge tarr
Unke charan mein na hai ab kissee ka darr
Unke charan mein buss jeevan jaaye guzar

Unke charnon mein jo hum girey rahenge
Toh Unkee pyaar bhari suraksha se ghirey rahenge
Unke charnon mein hee rehkar jab dukh sahenge
Unke amrit mein samaa jaayenge jo aansoon hamaare bahenge

Unke charnon ke amrit se sheetaltaa milegi hamein
Unke charnon kee shakti se hamaare paaon mein shakti milegi hamein
Unke charnon ko chhoo lene se adbhut anokhi shanti milegi hamein
Unke charnon kee urja se jaagriti bhi
bhali bhanti milegi hamein

Unke charnon mein mil jaata hai saara sansaar
Unke charnon mein hota hai beda paar
Unke charnon mein hain toh na hai zaroorat ki hum maanein koi mannat
Unke charnon mein toh bin maangey hee mil jaati hai jannat

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 2, 2018

Om Namaha Shivaya
Aaj Ka Suvichaar 🙏🏻🙏🏻 # 165

    Aapka Ho Hriday Mein Baseraa

Guruji, Aapki divya leela ka
Charchaa hai chaaron oar
Aapne hee sambhaali hai
Bhakton ke jeevan kee dor

Sangat ke prati Aapka sneh
Aseem itna, jaise anant akash
Jahaan bhi Aapka zikr ho sachche dil se
Vahaan phail jaaye gyanmayee prakash

Simran karein hum Aapka, Aap yeh hain sikhaatey
Jahaan bhi satsang ho Aapka, Aap zaroor hain aatey
Sewa karein hum niswaarth bhaav se, Aap hamein hain kehte
Jo samarpan karde, Aap sadaiv uske dil mein rehte

Aapke satsang mein dhyan lagaayein hum
Aapke simran mein yeh jeevan vyateet ho
Sewa bhaav ho mann aur karam mein
Aapse har janam mein paawan preet ho

Aapse hee hai har raat chandni
Aapse hee sunehra har savera
Aapki kripa se yeh ‘mai’ mitt jaaye
Sirf Aapka ho abb hriday mein basera

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 2, 2019

Om Namaha Shivaya
Aaj Ka Suvichaar 🙏🏻🙏🏻 # 530

 Guruji Bhi Toh Yahee Chaahte Hain Na

Vafaa kee khushboo se mehekey hamaari upaasana
Vishwaas ke itar se sugandhit ho hamaari atma
Prem ka ras chalke hamaari bhakti mein
Dhairya samaa jaaye hamaari sehenshakti mein

Doob na jaayein maya ke suroor mein
Guruji ko bhool na jaayein mai ke guroor mein
Naam aur yash ke liye sach ka saath na chodein kabhi
Kisee ka faayda uthaakar kisee ka dil na todein kabhi

Saahas ho hum mein jhooth se duur rehne ka
Atma-vishwaas ho hum mein burey haalaat sehne ka
Har paristhiti mein himmat se jeeyein
Saaf dil aur izzat se jeeyein

Saadaapan laayein apne jeevan mein
Saral aur saaf soch basaayein mann mein
Andhvishwaas aur vehem ko na hum badhaava dein
Guruji ko apne paak prem ka chadhaava dein

Har pal neeven rehne ka prayatna karein
Har pal khush rehne ka yatna karein
Hamaari khushi bayaan karegi shukrana hamaara
Jis-se aur bhi sukhi hoga jeevan hamaara

Aur koi dekhe ya na dekhe aur koi jaane ya na jaane
Guruji sab dekhtey aur jaante hain
Duniya se chaahe chhup jaaye hakeekat
Guruji toh sabki asliyat pehchaante hain

Isliye aisa koi kaam na karein
Ki Guruji ka dil hamaari vajeh se dukhi ho
Aakhir Guruji bhi toh yahee chaahte Hain na
Ki Unka har bhakt nekneeyat aur sukhi ho

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 1, 2018

Om Namaha Shivaya
Aaj Ka Suvichaar 🙏🏻🙏🏻 # 164

                    Tu Yakeen Kar

Guruji tere Ram hain, Guruji tere Shyam
Guruji tere Bhagwaan Hain, tu yakeen kar

Tujhe sukh denge, tere dukh harenge,
Insaaf Veh karenge, tu yakeen kar

Raah dikhaayenge tujhe, uspar chalaayenge tujhe
Jeena sikhaayenge tujhe, tu yakeen kar

Veh muskuraayenge, tujhe galey lagaayenge
Tujhe aish karaayenge, tu yakeen kar

Jholi teri bharenge, arzi teri sunenge
Sapne sach karenge, tu yakeen kar

Unka darbar hai pyaara, Unka dwaar hai nyaara
Vahee Hain tera sahaara, tu yakeen kar

Vahee Hain paalanhaar, Vahee Hain bakshanhaar
Ho Unka tu shukrguzaar, tu yakeen kar

Tere saare kasht taalenge, Vahee tujhe taarenge
Guruji sab sambhaalenge, tu yakeen kar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 1, 2019

Om Namaha Shivaya
Aaj Ka Suvichaar 🙏🏻🙏🏻 # 529

              Karmon Kee Kahaani

Yeh kahaani hai karmon kee
Yeh kahaani hai rishton kee
Karmon ke hisaab se rishton ko todne ya nibhaane kee
Aur phir rishton ke anusaar karmon ko badhaane ya kumm kar paane kee

Karmon ka ganit aasaan nahin
Isliye baahar hai samajh se hamaari
Karmon ke dwara hee karte hain
Hum aagey kee niyati kee tayaari

Guruji har kadam par madad karte hain hamaari
Aakhir Unhee kee aulaad hain hum sab
Ek din toh aakhiri saans hum sab lenge
Maalum nahin kahaan aur kab

Phir abhi se sambhal jaane mein hee bhalaayee hai
Kyunki karmon ka bhugtaan toh ek sachchaayee hai
Jhooth ka saath dena bhi jhooth se kumm nahin
Guruji ke bina niyati se hum ladd sakein, aisa hamaare mein dum nahin

Kyun na abhi se hee sach ka saath dena shuru karein
Vaisa hee karein jaisa hamaare Guru kahein
Hamaare bhaley kee baat hee karenge Guruji, Vidhaata hain Ve hamaare
Unke charnon kee dhool kee aukat bhi nahin rakhte hum saare

Hum sabko bhogna hai karmon ka phal
Chaahe aaj bhogein ya phir kal
Kyun na yeh uttardaayitva sambhaal lein hum
Aur swayam ko shudh saanche mein dhaal lein hum

Jitnee jaldi Guruji hamein maaf karenge
Aur hamaara karmic khaata saaf karenge
Utnee jaldi rangg laayegi Guruji kee shakti
Aur hamein mil jaayegi janam maran se mukti

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 31, 2018

Om Namaha Shivaya
Aaj Ka Suvichaar 🙏🏻🙏🏻 # 163

                  Guruji Kahein...

Jabb takk praani apni ‘mai’ mein phasey
Uske dil mein uska Guru kaise basey
Guruji kahein is ‘mai’ ko tyaago
Aham kee jalti aag se duur bhaago

Jalaa degi yeh aag tujhe bhi ek din
Nahin jee sakega tu Guruji ke bin
Jaise jaise samay raha hai beet
Tu Guruji se lagaa le pavitra preet

Bande, ‘mai’ ko chod kar dekh toh sahi
Prabhu milan kee raah tera intazaar kar rahi
Isee raah par mitenge dukh aur santaap
Aur tera Guruji se hoga sundar milaap

Milaap kee uss ghadi ko galey se tu lagaa
Apni divya antaraatma ko tu le abb jagaa
Jalaa le tu dil mein bhakti kee jyot akhand
Guruji mil gaye, toh kabhi toh mil jaayega sachkhand

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 31, 2019

Om Namaha Shivaya
Aaj Ka Suvichaar 🙏🏻🙏🏻 # 528

          Zindagaani Ka Afsaana 

Zindagi mein udaasi aur khushi ke bahaane milenge kayee
Lekin zindagi ke lamhon ke liye shukrana karna seekh lein
Is tarehn se apna drishtikoan sudhaarein
Shukrana kar apna jeevan sanvaarein

Maana ki shukriya karna kathin hai gumm mein
Kyunki niraasha aa jaati hai mann mein
Kintu Guruji kee sharan mein na hotei toh gumm hota aur bhi zyada
Guruji ne sadaa nibhaaya hai hamaari raksha karne ka vaada

Shukrana jo karenge hum udaasi aur dukh ke pal mein
Toh Guruji ko aur bhi garv hoga humpar
Aakhir hamaari har saans jo hai
Veh chalti hai Guruji kee kripa ke dum par

Guruji ka shukrana karenge jitna
Guruji karam kaat-te chalenge utna
Mushkilein hal hoti hui nazar aayengi
Udaas ghadiyan jald hee guzar jaayengi

Shukrana ka ehsaas sach mein itna hai khaas
Isliye swayam ko samjhaayein aur na hon hum udaas
Har pal Guruji ka hum karein shukrana
Shukrana mein guzaar lein zindagani ka afsaana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja