Author: dhirjabhat

April 2, 2018

Om Namaha Shivaya
Aaj Ka Suvichaar 🙏🏻🙏🏻 # 43

             Aaj Nahin Toh Kal

Guruji kee pehle kar lo pooja
Baad mein hee karo kaam dooja
Guruji mein hee hain Brahma Vishnu Mahesh
Vahee mitaate hain saare kasht aur kalesh

Unhee ke sahaare hum paayenge lok parlok ke sukh
Unke pyaar ke bina hamein milenge kewal dukh
Unke naam ki jyot jab jagmagaaye
Phir nahin yeh mann dagmagaaye

Vahee jagaayenge hum mein jeene ki chaah
Aur Vahee dikhaayenge hamein moksh ki raah
Is raah par raahi, tu chalta chal
Moksh milega zaroor, aaj nahin toh kal

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 2, 2019

Om Namaha Shivaya
Aaj Ka Suvichaar 🙏🏻🙏🏻 # 408

         Dikhaawa Karna Vyarth Hai

Jabb Guruji ko Bhagwaan hai maana
Jabb Unse mahaan kisi ko na jaana
Toh aao hum prem aur vishwaas ke sangg
Apnaa lein Guruji ke sikhaaye huey dhangg

Jeene ka saleeqa rakhein saral
Aapas mein vyavhaar rakhein taral
Guruji ke dhyan mein rahein vyast
Unkee hee dhun mein rahein mastt

Saari duniya ko toh kar lenge prabhaavit
Kar ke Guruji kee bhakti ka dikhaawa
Lekin Guruji se nahin chhupega yeh raaz
Unhe nahin pasand dikhaawe ka jhootha chadhaava

Guruji chaahein bhakt ho bilkul sachchaa aur saral
Taaki rishtey kee buniyaad ho bilkul nishchhal aur nirmal
Sachchee shradha mein dikhaawe kee zaroorat nahin hai
Jo dil se niswaarth sewa karey, sachchaa bhakt vahee hai

Guruji chaahein ki hum karein
Gupt paath, gupt sewa, aur gupt daan
Jisme swaarth aur laalach na ho
Jisme hum na dhoondhein jhoothi shaan

Guruji kee har pal nazar hai hum par
Isliye dikhaawa karna vyarth hai
Guruji se sanchi preet kar lein
Vahee sachchee bhakti ka arth hai

Duniya mein naam kamaa kar kya karenge
Agar Guru naam na humne paaya
Dikhaawe par agar dhyan dharenge
Toh ek din rooth jaayega humse apna hee saaya

Jabb shudh hoga hamaara mann
Tabb Guruji hongei humse prasann
Guru naam ka karein niswaarth simran
Kyunki Guru naam hee hai aslee dhan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 1, 2018

Om Namaha Shivaya
Aaj Ka Suvichaar 🙏🏻🙏🏻 # 42

               Paani Ka Budbuda

Beetay huey kal ko peechhe chod kar
Aane waale kal ko galey lagaaiye
Ek dooje ke sangg prem se rehkar
Milkar har kadam badhhayiye

Zindagi paani ka budbuda hai
Achche karam karte jaayiye
Har pal Guruji ko yaad kar
Muskuraakar jeetay jaayiye

🌹🌹🌹🌹🌹🌹🌹

Jai Guruji 🙏🏻🙏🏻

Dhirja

April 1, 2019

Om Namaha Shivaya
Aaj Ka Suvichaar 🙏🏻🙏🏻 # 407

                   Mamta Ka Sur

Guruji hee hain teri himmat
Guruji hee hain teri dhaal
Guruji hee hain teri taakat
Vo jaanein tere dil ka haal

Tere jeevan ke har pal mein kya hona hai
Yeh sabb nirdhaarit karte hain Guruji
Teri zarooraton kee jholi mein kya tere liye uchit hai
Unhee saugaton se teri jholi bharte hain Guruji

Har kadam par chalne kee urja
Tujhe pradan karte hain Guruji
Teri raah mein aati hain jo museebatein
Unse tere liye ladte hain Guruji

Tu apna dhyan buss Guruji mein lagaa
Aur chinta mein samay ganvaana chod de
Unhee ko kar ke sarvasamarpan
Tu raah par dagmagaana chod de

Har kshan Ve tere saath hain
Kabhi na chodenge tera haath
Isliye tujhe ek bhi pal ke liye
Ghabraane kee nahin hai koi baat

Baaki sab kuch jaa tu bhool
Ye laukik rishtey hain udtee dhool
Apne dil ke upvan mein tu khila le
Guruji ke liye shradha ke phool

Tu girne lagega toh sambhaalenge Guruji
Tu asmanjas mein hoga toh maarg dikhaayenge Guruji
Tere raaste se mushkilein hataayenge Guruji
Kalyuga ke kolaahal mein mamta ka sur
sajaayenge Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 31, 2018

Om Namaha Shivaya
Aaj Ka Suvichaar 🙏🏻🙏🏻 # 41

               Sabse Anmol Saugat

Jab dil hota hai udaas
Aur koi nahin hota paas
Guruji kee divya khushbu aati hai
Unkee maujoodgi ka ehsaas dilaati hai

Jab zindagi kee bhaag daud mein
Paaun mere thakk jaate hain
Pyaar ka marham lekar
Guruji mere aa jaate hain

Jab kalyuga kee ghor ghataa
Jeevan mein andhera kar jaati hai
Guruji ke naam kee jyot jalaati hoon
Jis se har mushkil darr jaati hai

Aur yeh hai sabse badi baat
Ki chaahe din ho ya ho raat
Chaahe koi na ho mere saath
Guruji ne thaama hai mera haath

Bandhu Veh mere, Vahi mere nath
Yahi toh hai sabse anmol saugat

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 31, 2019

Om Namaha Shivaya
Aaj Ka Suvichaar 🙏🏻🙏🏻 # 406

          Guruji Mata Pita Hamaare

Dekho tum navjaat shishu ko
Jo goad mein apne maa baap kee
Nishchint hokar paata hai sukoon
Na fikr hoti hai usey kisi bhi baat kee

Shishu ko hai mata pita par vishwaas
Ki ve sambhaalenge uskee bhookh aur pyaas
Uskee har zaroorat ka Unhe hoga dhyan
Uskee abhilasha ka Unhe hoga gyan

Mata pita bhi jaanein ki vahee hain
Ekmatra sahara nanhe se baalak ka
Aise hee hain Guruji rakshak hum sabke
Aayiye shukrana karein apne maalik ka

Mata pita ke dil ko maalum hai
Bachche kee chhoti se chhoti baat
Bhakt ka koi bhi aisa raaz nahin
Jo Guruji ko nahin hai gyat

Nanhe baalak ko sulaane ke liye
Mata pita raat bhar hain jaag lete
Apne har bachche ke sukh chayn ke liye
Guruji apna sukh chayn hain tyaag dete

Bachche ko jabb chot hai lagti
Toh maa baap ko dard hai hota
Bhakt jann par jab dukh hai aata
Toh Guruji ka dil hai rota

Buntey hain bade prem se mata pita
Aulaad ke sangg mamta ke dhaage
Guru shishya ka bandhan bhi aisa
Jahaan vandan kee lagan hai laage

Is-se pyara rishta toh
Na koi hai srishti mein
Sab bachche anmol hain
Guruji kee drishti mein

Jis tarehn maa baap kee goad mein
Bachche ko neend aa jaati hai
Guruji ke ashirwaad ke aanchal mein
Bhakt kee atma chayn paati hai

Aao, is vishwaas ke bandhan mein
Hum nirmal anand paayein
Guruji ke pyaar aur dulaar se
Hum sadaa ke liye tarr jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 30, 2018

Om Namaha Shivaya
Aaj Ka Suvichaar 🙏🏻🙏🏻 # 40

         Guruji Kee Aisi Vadiaayi

Hamaare Guruji ki hai aisi vadiaayi
Ki hamein Gurmukhon se hain milva dete
Unki changee sangati ke prabhaav se
Hamaari naiya Veh paar lagaa dete

Jo bhi maarg Guruji dikhlaayein
Uspar chal kar jo insaan hain jiye
Vahee hain kismat waale kyunki
Guruji ko ve paa lete hain sadaa ke liye

Divya roop Unka kuch aisa hai chhaya
Ki aur kuch bhi hamein nazar na aaya
Ab jeena bhi hai Unki divya sharan mein
Aur marna bhi Unke kamal charan mein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 30, 2019

Om Namaha Shivaya
Aaj Ka Suvichaar 🙏🏻🙏🏻 # 405

                Karmon Kee Poonji

Phatey note ko gond se chipka ke
Saaf noton ke beech mila
Bade hunar se lein-dein mein
Vyaapaari leta hai note chala

Lekin koi bhi vyaapari Guruji se
Apni chaalaaki nahin chhupa sakta
Guruji toh swayam Bhagwaan hain
Unhe toh sab kuch hai dikhta

Isi tarehn se hamaare vichaar aur karam
Guruji bhali bhanti jaantei hain
Kyun na hum sab sudhar jaayein
Agar hum sach mein Guruji ko maante hain

Apni soch ko rakhein shudh
Aur karam hon hamaare achche
Beimaani se duur rahein hum
Aur dil ke hon hum sachche

Bachche jab hoanhaar hain hotey
Toh mata pita ka harshit hota hai mann
Toh kyun na hum sab Guruji ke bachche
Achche bannkar karein Unhe prasann?

Guruji hum sab kee ho nirmal neeyat
Taaki aman aur shanti se beetey zindagaani
Jitni pavitra hogi poonji hamaare karmon kee
Utnee hee moksh milne mein hogi aasaani

🌹🌹🌹🌹🌹🌹🌹

Jai Guruji 🙏🏻🙏🏻

Dhirja

March 29, 2018

Om Namaha Shivaya
Aaj Ka Suvichaar 🙏🏻🙏🏻 # 39

                 Har Pal Shukrana

Guruji kehnde ne, “kalyan kitta”
Bin mangyaa enna kuch ditta
Shukar manaa bande har saugat da
Har vele dhyan rakh apni aukat da

Neevan ho ke tu chala chal
Shukrana kitta kar tu har pal
Bakhshish Guruji kolon tu mangg
Sadaa rehnge Satguru tere sangg

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 29, 2019

Om Namaha Shivaya
Aaj Ka Suvichaar 🙏🏻🙏🏻 # 404

           Mushkilon Se Na Bhaag

Na bhaag apni mushkilon se duur
Kuch bhi haasil na ho paayega
In mushkilon se ladd kar hee tu
Andhere se roshni mein aayega

Guruji ne tere karmon aur kaabiliyat ko dekh kar
In kathinaayiyon ke roop mein ashirwaad hai diya
Ladne kee shakti aur buddhi bhi Vahee denge
Toone Unpar atoot vishwaas jo hai kiya

Zindagi ke safar mein zaroori hain aise bhi mukaam
Ek tarehn se yeh hai hamaari bhakti ka imtehaan
Adhyaatmik unnati ka bhi yeh raasta hai
Tujhe tere Guruji ke pyaar ka vaasta hai

Har paristhiti ko tu galey se lagaa le
Dil mein vishwaas kee jyot tu jalaa le
Guru kripa se har samasya ka hoga samaadhaan
Har anubhav se kuch toh seekhta hee hai insaan

Pareshaaniyon se jabb hoga tu udaas
Guruji kee zaroorat ka aur bhi hoga ehsaas
Mehsoos karega toh Unhe paayega Apne paas
Unka har bhakt ke saath rishta hai khaas

Guruji kee kripa se teri haar mein bhi hogi jeet
Buss Guruji se har pal nibhata chal tu preet
Teri shradha aur saboori zaroor rangg laayegi
Teri antaratma satchittanand ko paayegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 28, 2018

Om Namaha Shivaya
Aaj Ka Suvichaar 🙏🏻🙏🏻# 38

      Buss, Aaj Ka Yahee Hai Vichaar

Hain Veh Shivji ka avataar
Nahin karte koi prachaar
Leela hai Unki aprampaar
Teri kabhi na hogi haar

Suntey hain sabkee pukaar
Na chodenge beech majhdaar
Kashton ko denge nivaar
Kar denge beda paar

Dete hain jo pyaar dulaar
Kar lein Unhee Guruji ka deedar
Baaki sab kuch hai bekaar
Aaj yahee hai mann mein vichaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 28, 2019

Om Namaha Shivaya
Aaj Ka Suvichaar 🙏🏻🙏🏻 # 403

             Hamaara Aslee Ghar

Poochhein sabse ki ve kahaan rehte hain
Toh kayee jawaab mil jaate hain
Itnee aadhunik duniya mein bhi
Hum sahee uttar nahin de paate hain

Koi kehta hai
Veh jagg mein rehta hai
Koi sabse kahe
Veh ghar mein rahe

Yeh mayavee duniya nahin hai hamaara ghar
Na hee makaan jisme hain eenth aur pathar
Hamaara aslee niwaas nahin hai tann mein
Hakeekat mein hum rehte hain apne mann mein

Mann mein hee Devi Devta bastey
Mann mein hee Bhagwaan
Lekin jabb isme aaye ahem aur abhimaan
Toh yahee mann banta hai shaitaan

Mann mein hee shanti aur klesh
Mann mein hee raag dwesh
Mann mein hee sur aur geet
Mann hee dushman, mann hee meet

Mann mein hee hai vichaaron ka vaas
Mann mein hee basey shradha aur vishwaas
Mann mein hee asantosh aur santosh hain baste
Mann se hum hain rotey aur hastey

Mann jabb hota hai vash mein apne
Toh jeevan mein anand samaata hai
Lekin jo apne hee mann par kaabu na paaye
Veh toh mann ka daas kehlaata hai

Mann mein prem, mann mein shaanti
Mann mein dheeraj, mann mein kaanti
Mann par niyantran ho jiska sachchaa
Usey jeevan ka har pehlu laagey achchaa

Aao, is mann kee karein safaayee
Isee mein hai hamaari bhalaayee
Jab mann mein chamkenge sadgunn ke sitaare
Toh dekhna Guruji basenge mann mein hamaare

Kyun na Guruji kee dikhaayee raah par chalein
Aur maanein jo hamaare pyaare Guruji kehte hain
Taaki is dharti par reh kar hum keh sakein
Hum toh sawmya shaant swarg mein rehte hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 27, 2018

Om Namaha Shivaya
Aaj Ka Suvichaar 🙏🏻🙏🏻 # 37

         Guru Bhakt Kee Pehchaan

Guruji se pyaar karte hain
Toh maanein Unkee baat
Unhonei hameshaan sikhaaya hai
Ki hum karein gupt paath

Roag, bhookh, aur maut se
Bachaane ke liye doojon kee jaan
Auron kee madad karne ke liye
Karein hum gupt daan

Aksar theek kartein hain Guruji
Beemaari jo ho jaan lewa
Guruji kehte hain niswaarth hokar
Karein hum gupt sewa

Gupt sewa, Gupt paath, Gupt daan
Guruji ke bhakt kee hai pehchaan
Simran, Satsang, sewa nishkaam
Mein magan ho jaayein hum insaan

Hamein jeevan lagne lagega aasaan
Aur Guruji hongei hum par meharbaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 27, 2019

Om Namaha Shivaya
Aaj Ka Suvichaar 🙏🏻🙏🏻 # 402

                  Taral Talayiya

Guruji ko saadho har shwaas mein
Shradha ko gholo vishwaas mein
Guru naam ka amrit peelo bhakti se
Atma-bal badhaa lo Guruji kee shakti se

Dil kee mayli chaadar ke daag
Chhupa kar kab takk logey bhaag
Vikarmon ke raaste se apne ko hataa lo
Is mayli chaadar ke daag mitaa lo

Guruji kee paawan abha ka karo naman
Unhe sarvsamarpan kar ke chhoo lo Unke charan
Unkee gyanganga ke amrit se taar lo tum swayam ko
Unkee divya jyoti se ujjwal karo apni atma ke nayan ko

Gehree saans lekar Guru naam ko basaa lo jeevan mein
Unkee chhavi ko abb tum samaa lo apne mann mein
Unke sakaash aur spandan ko kar lo antargrehen
Taaki har peeda aur kasht ko kar paao sehen

Ekaagra kar ke chitt ko samjho Guruji ka ishaara
Dekhte hee dekhte uddhaar ho jaayega tumhara
Tripti aisi milegi kee Guru milan ke siwa koi ichchaa baaki na rahegi
Aur tumhaari zindagi ek tarang bhari taral talayiya kee bhanti bahegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 26, 2018

Om Namaha Shivaya
Aaj Ka Suvichaar 🙏🏻🙏🏻 # 36

   Mashhoor Huey Toh Kya Paaya

Mashhoor huey toh kya paaya
Jhoothe sukh mein samay ganvaaya
Maya ke janjaal mein phanskar
Yoon hi jeevan ho gaya zaaya

Hamaari zindagi ki khuli kitaab ke
Har panney par sach ka zikr ho
Phir humko karmon ke hisaab mein
Kyun kisi bhi baat ki fikr ho

Ab bhi samay hai, aao jaagein
Jhooth aur fareb se bhaagein
Apne chitt ko karein hum saafGuruji hamein kar dengey maaf

Unhi mein rakhein apni aastha
Phir Vahee dikhaayenge raasta

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 26, 2019

Om Namaha Shivaya
Aaj Ka Suvichaar 🙏🏻🙏🏻 # 401

       Noore- Naseeb Hain Guruji

Raat ke timir mein prakash hain Guruji
Hamaare dharti aur akash hain Guruji
Chaand kee sheetalta mein Guruji
Phoolon kee komaltaa mein Guruji

Sooraj aur agni kee urja mein Guruji
Har bhakt kee pooja mein Guruji
Hathon kee lakeeron mein Guruji
Raja mein aur fakeeron mein Guruji

Tapasvee ke tapp mein Guruji
Raagi ke japp mein Guruji
Bhakt kee bhakti mein Guruji
Atma kee shakti mein Guruji

Dil kee divya chaahat mein Guruji
Dukhiya mann kee raahat mein Guruji
Har praani ke pyaar mein Guruji
Nirbhao nirankaar mein Guruji

Udte panchhee kee azaadee mein Guruji
Jeevan ke aadi mein Guruji
Jeevan ke antt mein Guruji
Prarthana aur Bhagwant mein Guruji

Antar-mann kee chetna hain Guruji
Jeene kee prerna hain Guruji
Nadiya ke pravaah mein Guruji
Yaatree ke utsaah mein Guruji

Har jann kee muskaan mein Guruji
Khwaahish, sapne, aur armaan mein Guruji
Zindagi kee ruhaani daastaan mein Guruji
Dil ke har paigaam mein Guruji

Jitna hum Unse pyaar karein
Utne hee kareeb hain Guruji
Sahi mainey mein jaano tum toh
Sangat ka noore-naseeb hain Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 25, 2018

Om Namaha Shivaya
Aaj Ka Suvichaar 🙏🏻🙏🏻 # 35

      Nirmal Rishtey Ke Liye Shukriya

Bheetar se, phir baahar se
Aapne humko saaf kiya
Hamaari galatiyon ke liye
Aapne humko maaf kiya

Guruji Aap itne dayaalu hain
Apne har bhakt par kripaalu hain
Sadaa hum sabke saath Aap hain
MahaShiv aur Trilokinaath Aap hain

Koi kahei Aapko Bholenath
Koi khada hai jodei haath
Aapke abha mandal mein hai veh shakti
Jo har insaan mein jagaa deti hai bhakti

Shukriya, ki Aapne hamein thaam liya
Shukriya, ki humne Aapka naam liya
Ab chaahe yeh jagg saaraa roothey
Aapse yeh nirmal rishta na tootey

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 25, 2019

Om Namaha Shivaya
Aaj Ka Suvichaar 🙏🏻🙏🏻 # 400

              Guruji Ka Satsang

Guruji ka har satsang
Aap mein hee khaas tyohaar hai
Saath hee saath kayee prakaar se
Yeh bhakton ke liye uphaar hai

Sab bahut pyaar ke andaaz se
Shradha se darbar ko sajaate hain
Guruji ko aasan grehen karne ke liye
Prem aur bhakti se bulaate hain

Satsang mein har jann shaanti se
Chup hokar shabad par dhyan de sakta hai
Guruji se seedhi taar jodkar
Shiv Yog ka gyan le sakta hai

Sureele shabad ko sunnkar sangat
Mann hee mann mugdh ho jaati hai
Mantra jaap karte hain sabb
Aur kabhi kabhi arti kee jaati hai

Chai prasad mein Guruji ka
Ashirwaad samaata hai
Unkee leela se sangat ka
Karam kat-ta jaata hai

Halwa, jal, aur langar prasad ko
Guruji mamta se bhog lagaate hain
Apna pyaar aur ashish dekar
Har bhakt ka koi dukh mitaate hain

Guruji ke bhakt jann ek dooje ko
Apne divya anubhav sunaate hain
Kisi kisi ko unse sandesh hai milta
Aur kayee toh seekh bhi paate hain

Guruji kee ruhaani maujoodgee ke sangg
Anek roop mein hotei hain Unke darshan
Kabhi swaroop mein, kabhi amritvarsha
Kabhi phoolon kee mehek se gadd gadd hota hai mann

Jitnee shradha aur bhakti ho
Utna satsang ka anand aata hai
Guruji ka har shishya satsang se
Guruji ka ashirwaad paa kar jaata hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 24, 2018

Om Namaha Shivaya
Aaj Ka Suvichaar 🙏🏻🙏🏻 # 34

           Aapse Kar Loon Preet

Chaaron dishaaon mein hai kalyuga ka shor
Aapke siwaa, Guruji, hamaara hai na koi aur
Hamaare chanda bhi tum sooraj bhi tum
Tumhaare bin hum andhere mein gum

Yahaan har chehre par nakaab hai
Jhooth ka andaaz bhi laajawaab hai
Koi chaalaaki se dil todey
Aur koi achaanak se muh modey

Udaasi ke kshanon mein
Meri muskuraahat bhi aap
Sach kahoon mere Guruvar,
Mere jeene ki chaahat bhi aap

Jagg ke is tamaashe mein
Bass aapse kar loon preet
Apne ko sampoorna paaon
Chaahe ho aur na koi meet

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 24, 2019
Sun

Om Namaha Shivaya
Aaj Ka Suvichaar 🙏🏻🙏🏻 # 399

                 Dharti Par Swarg

Kitna dhyan rakhte hain hum
Jabb hamaare kapdon ka hota hai safed rangg
Phir kyun kaale honei dete hain
Apne taur-tareeke aur dhangg

Chaahe dekh sakey na koi
Atma par lagey huey daag
Guruji se kuch bhi chhupa nahin
Unse hum nahin sakte bhaag

Karmon ke maare hain hum sabb
Hum sab mein koi na koi vikaar hai
Guru kripa se ho sakta hai uddhaar hamaara
Varna yeh jeevan bekaar hai

Tyaag dein kaam aur krodh ko
Mitaa dein mann se lobh aur ahankaar
Moh aur irshya ko panapne na dein
Koshish karein shudh hon hamaare vichaar

Ho sakey toh auron kee madad karein
Kisi ko haani na pahunchaayein
Sadbhaav se rahein sabke saath
Prem kee jyot jalaayein

Koi kisi ka faayda na uthaaye
Fareb ka na le sahaara
Satya hee neev ho har rishte kee
Jhooth se kar lein hum kinaara

Yeh sabb mushkil ho sakta hai
Magar naamumakin hargiz nahin
Guruji madad karenge hamaari
Hum sudharne waale banein toh sahi!!

Aao, jaagrit karein swayam ko
Aur Guruji se maang lein kshamaa
Atma ko aur mayli honei se bachaayein
Taaki dekh sakein hum moksh ka samaa

Yeh yaatra lambee aur mushkil toh lagegi
Lekin hamein Guruji ka itna sahaara hai
Kalankit mann aur atma ko paak banaane ka
Uttardaayitva hamaara hai

Aao is koshish mein lagg jaayein
Guruji har kadam par saath hain hamaare
Guru kripa se is dharti par dekhein
Sundar swarg ke nirmal nazaare

🌹🌹🌹🌹🌹🌹🌹

Jai Guruji 🙏🏻🙏🏻
Dhirja