Author: dhirjabhat

Aye mannva tu pareshaan na hona
Tere Guruji tere saath mein hain
Kabhi bhi tu dheeraj na khona
Tera haath Guruji ke haath mein hai

Jab bhi tere saamne duvidha aayegi
Guruji dikhaayenge tujhe raasta
Isliye tu niraash na hona
Tujhe hai teri bhakti ka vaasta

Jab kabhi andhere se ghir jaayega tu
Guruji jalaayenge gyan ki roshni ke diye
Isliye tu udaas na hona
Guruji sab kuch karenge tere liye

Aye mannva tu pareshaan na hona
Tere Guruji ne tujhe apnaaya hai
Tere koi karam toh achche rahei hongei
Jo toone Guruji ko paaya hai

Agar tu karne lagega koi galat kaam
Guruji chetaavani denge tujhe
Tere uddhaar ke liye har janam mein
Guruji sharan mein lenge tujhe

Jab bhi tu Unhe yaad karega
Guruji daude chalein aayenge
Bannkar tera suraksha kavach
Teri mushkil ko duur bhagaayenge

Aye mannva tu pareshaan na hona
Jab Guruji neembu ke jaise nichod denge
Kyunki teri jaan bachaane ke liye
Ve Yamraj ki bhi baahein marod denge

Jab bhi tu bhatakne lagega
Guruji tujhe sewa simran satsang ki yaad dilaayenge
Tu kar dega Unhe poorna samarpan
Toh Guruji tujhe mamta ka amrit pilaayenge

Jab sataaye tujhe agley pal ki soch
Guruji chinta duur bhagaayenge
Isliye tu anand le zindagi ke safar ka
Guruji manzil takk pahunchaayenge

Aye mannva tu pareshaan na hona
Tere Guruji tere paalanhaar hain
Har saans mein kar shukrana Unka
Ve tere murshid aur parwardigaar hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aap sabko naye saal ki
Haardik shubhkaamnaayein
Guruji ki kripa se
Katein sabki balaayein

Guruji ke bhakt, har sheher, har gaaon mein
Surakshit hain Guruji ke pyaar ki chaaaon mein
Sabke oopar hai nazar Guruji ki
Bhakt karte hain kadar Guruji ki

Har pal har din har haftaa har saal
Guruji jaanein har insaan ka haal
Unki shakti hai sach mein bemisaal
Ve sabko lete hain sambhaal

Kal tak bhi Unhonei hee sambhaala thaa
Aaj aur aagey bhi Ve hee sambhaalenge
Jaisi bhi vipdaa har bhakt par aayegi
Ve yakeenan koi raasta nikaalenge

Aayiye har saal ki tarehn is saal ka bhi
Swaagat karein Guruji ka naam lekar
Kaamna hai ki yeh naya saal aaye
Sabke liye khushi ka paigaam lekar

Aayiye Guruji ke dikhaaye raaste par chalein hum
Guruji ke divya ashirwaad ke saath
Taaki saara zamaana dekh kar kahey
Waah, kya baat kya baat kya baat!!

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Raat ke andhere mein tujhe
Subah ka hai intazaar
Zindagi sangeen lagey
Phir bhi hai is se pyaar

Shanti ki talaash mein
Dil hai bekaraar
Guruji ko bula le prem se
Ve sunenge teri pukaar

Teri doobtee naiya ka
Ve lagaayenge beda paar
Guruji ka ashirwaad hai
Teri naiya ki patvaar

Chaahe aayein sainkdon mushkilein
Teri na hogi kabhi haar
Isliye tu ghabrana chod de
Tu aaya hai Guruji ke dwaar

Sunn tu Guruji ki awaaz ko
Ve keh rahein hain baar baar
Guruji ka kehna maan le
Aur apne zameer ko na maar

Zindagi ka kya bharosa
Chhoot jaayein sab rishteydaar
Kisi ka thikaana sthir nahin
Bichad jaatein hain jigri yaar

Tu kaheen bhi hoga
Is baat ke liye rehna taiyaar
Ki jab bhi tu yaad karega
Guruji aayenge har baar

Guruji sabke naath hain
Sabse karein Ve pyaar
Guru bin jeevan adhoora hai
Yahee hai jeevan ka saar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji ke liye jo bhaav hai
Usey dil mein kar le mehsoos
Guruji se sachchaa pyaar karega toh
Tera imaan rahega mehfooz

Logon se tu na darna
Koi galat kaam na karna
Sabne apne karmon ka karzaa
Kabhi toh hai adaa karna

Ghor kalyuga ki bela hai
Laukik aakarshanon ka mela hai
Isliye aur bhi hai zaroori
Ki mitt jaaye atma ki kamzori

Jitni karega tu saadhna
Guruji ke dhyan mein hokar leen
Utna hee shant aur sthir tu hoga
Tu kar le is baat ka yakeen

Guruji tujhe bheetar se saaf karenge
Tujhe galatiyon ke liye maaf karenge
Unkee baaton par tu amal karega
Teri jholi hadd se zyada bharenge

Shikaayat chod kar tu kar Unka shukrana
Unko kabhi kisi bhi haal mein na bisraana
Sotey jaagte tu Guruji ka dhyan lagaana
Tera jeevan bann jaayega sundar ruhaani afsaana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sampoornta ki talaash mein
Bhatakte hain hum loag
Jab tak hai jeevan tab tak
Chalta rahega karam bhog

Guruji hamaare chaahein ki
Hum apni ‘mai’ ko tyaag dein
Bahut so liye agyaan ki neend mein
Apne bhaley ke liye ab jaag lein

Shiv Yog mein leen hokar
Advait sthiti ka anubhav kar lein
Apni ‘mai’ ko saadhna dwara chodkar
Apne mein divyata ko bhar lein

Guruji ke dhyan mein apne ko khokar
Unki khushboo se mehkega hamaara har shwaas
Bheetar se shoonya honei se hee
Hamein hoga poorna honei ka ehsaas

Guruji ki dikhaayee raah par chalkar
Atma ko milega sakaaratmak sakaash
Guruji ko sarvsamarpan kar ke
Safal hogi sampoornta ki talaash

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Chhaya hai har taraf
Guruji ka pyaar is kadar
Ki Guruji ke chehre se
Hatt tee nahin nazar

Aankhein khuli hon ya bundd hon
Guruji hee nazar aatey hain
Divya abhamandal se susajjit
Prem se muskuraatey hain

Unkee awaaz sunaayee deti hai
Kaanon mein dheemi dheemi
Mere chehre par aa jaati hai
Ik muskaan bheeni bheeni

Unki bhakti mein ramm kar
Dil gungunaata hai kayee geet
Aksar bayaan karti hoon Unko
Unke liye dil mein basee preet

Kabhi kabhi sapne mein aatey hain
Koi sanket ya hukm lekar
Itna sukh pahunchaatey hain
Apne pyaare darshan dekar

Unka ashirwaad paakar
Mai phooli nahin samaatee
Ab ghabraane ki koi baat nahin
Mai swayam ko yeh samjhaatee

Guruji ko jo ab saump diya hai
Mainey apna jeevan
Pehle se kaheen zyada nishchint
Rehta hai ab yeh mann

Guruji ki sharan mein hoon
Toh jab bhi koi kasht aayega
Apni divya leela se mera Guru
Mujhe sankat se bachaayega

Jin mata pita ne mujhe janam diya
Unhe bhi Guruji ne sambhaala hai
Meri har uljhan ko suljhaakar Guruji ne
Mujhe duvidha se baahar nikaala hai

Guruji hee mere naath hain
Guruji hee mere madadgaar hain
Guruji hee maargdarshak hain mere
Aur Vahee mere parwardigaar hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kitne avgun hain hamaare mein
Guruji ne phir bhi hamein sweekaara hai
Is kalyuga ki bahuroopi bela mein
Guru naam ka hee sachchaa sahaara hai

Ek Guruji hee hain jo
Kar sakte hain udhdhaar hamaara
Tarnaa hamaara sambhav hai
Guruji ki divya shakti ke dwaara

Phir kyun logon ki baaton mein aakar
Hum anuchit raaste par jaayein
Kyun na apne dil ki sunein
Aur Guruji ke kareeb aayein

Sab kuch Guruji ka diya hua hai
Aur kya bhent karein Unhe hum
Apne paap aur apne karam ki poonji
Vahee toh de sakte hain hum

Agar Guruji se karein hum pyaar
Toh apne karmon par dhyan dein
Taaki Guruji hamein moksh ka
Sabse uttam vardaan dein

Aao jaagrit ho jaayein hum sab
Aur neki ka raasta apnaayein
Khud bhi hum khush rehna seekhein
Aur chaaron oar bhi khushi phailaayein

Phir satyuga jald hee aayega
Yeh jeevan sanvar jaayega
Guruji ki kripa se Unka ashirwaad
Ek nayi ruhaani roshni laayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Yeh jeevan hai jeene ke liye
Guru charan ka amrit peene ke liye
Yahaan pal doh pal hee rehna hai
Kuch sunn na hai, kuch kehna hai

Is jeevan mein kabhi aise moad milenge
Jahaan bahut hee sundar phool khilenge
Aur kabhi toh aise pal bhi dikhenge
Jab kashton ke shool milenge

Beintehaa shukrana hai Guruji ka
Ki Unhonei thaama hai haath hamaara
Is chaaon aur dhoop ke chakra mein
Unhonei diya hai Apna sahaara

Jeevan mein kasht toh aate rahenge
Lekin jo insaan dil se Jai Guruji kahenge
Unhe Guruji ke naam se milegi himmat
Aur ve datt kar mushkil ka saamna karenge

Sab kuch jo kar denge Guruji ke havaale
Ve bhakt nishchint ho jaayenge
Kashton ka pahaad lagega tinke jaisa
Aur Guruji ka ashish Ve paayenge

Guru naam ki divya shakti se
Hoga bhakton ka udhdhaar
Trishuldhaari hain Guruji hamaare
Hain Veh hum sabke paalanhaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kalyuga ki daldal mein phansne se
Guruji hee bachaa sakte hain
Lekin apni manmaani karne se
Hum dheeth loag kahaan rukte hain

Guruji ke vachan anmol hain
Guru chetna ka srot hai
Lekin jaagriti kaise ho
Agar neeyat mein hee khot hai ?

Pehle pehle toh furk nahin padega
Kyunki bada yash aur naam ho jaayega
Lekin samay ke saath saath
Apne naam mein hee banda kho jaayega

Phir aayegi gumm ki andheri raat
Aur akelapan chchaa jaayega
Tab Guruji ki aayegi yaad
Apni galati par rona aayega

Achchee neeyat se hee toh
Guruji khush hongei hum se
Phir kyun na hum sudhar jaayein
Aur duur rahein uss gumm se

Isliye niswaarth neeyat se
Karte chalein hum kaam
Sab kuch samarpan karein Guruji ko
Kyunki Vahee toh hain Bhagwaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jitne bhi janam hum le lein Guruji
Aapka shukrana karne ke liye kum hain
Aapko hee buss saump diye hain
Jitne bhi jeevan mein gumm hain

Aap toh hamein janam janmaantar se jaante hain
Hamaari kamiyaan Aap bhali bhanti pehchaante hain
Raaste bhi Aap hee dikhaate hain
Aap hee uss par chalaate hain

Phir bhi agar hum bhatak jaate hain
Toh Aap hamein samjhaate hain
Kabhi pyaar se toh kabhi daant kar
Hamein galati karne se bachaate Hain

Aagey ka nirnaya hamaare haath mein hai
Aapka ashirwaad hamaare saath mein hai
Apne karmon ko kaunsi disha dikhaayein hum
Jeevan ko ujlaa savera ya andheri raat banaayein hum

Jo bhi sanchit karam hain hamaare
Unka poora bhaar bhi hum nahin uthaate hain
Adhiktar karam toh Aap Apne par lekar
Hamaare sab karmon ka bhugtaan karaate hain

Hum itne khushkismat hain ki hamein
Mila Aap jaisa dayaalu bakshanhaar hai
Poore brahmaand mein hoti Aapki Jai jaikaar hai
Guruji, Aapko hamaara vinamr namaskar hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja