Paap bhi kiye hongei Punya bhi kiye hongei koi Toh mrityu lok mein aaye Phir aur karam kamaaye.
Aasaan hai rakhna ye silsila jaari Aane jaane kee aati rahegi phir baari Dooja vikalp bhi hai jismein Guruji Hain madadgaar Unke vachan maankar karvaayein apna uddhaar.
Jabb takk hota rahe janam maran Tabb takk miltee rahe Guruji kee sharan Toh kuch nahin ho sakta is se behtar Kyunki sadgati nishchit hai idhar.
Bheetar se saaf karne ka kaam Apne buss kee baat kahaan? Shukr hai Guruji karte Hain ye Koi na hai Unke jaisa meharbaan.
Guruji chala rahein Hain toh hum paa rahe hain chal Guruji kasht kaat rahe Hain toh hee kasht rahe hain tal Mrityu lok mein jeete huey milee hai shehenshah-e-srishti kee sharan Sarvashreshth mauka hai ki sanvaar lein janam maran Rooh kee chaahat ke liye Rooh kee raahat ke liye.
Zindagi beeti jaa rahi hai Har ghadi yaad dila rahi hai Ki faisle kee ghadi chalti jaa rahi hai Aur maut nazdeek aa rahi hai.
Achcha thaa ya thaa bura Samay laut kar nahin aayega Har tareh se guzra hua samay Koi na koi seekh dekar jaayega.
Samay ke is vyavhaar ko Na mai badal sakti hoon na tum Samay kee is raftaar mein Buss, hona nahin hai gumm.
Guruji ke chintan mein rehte huey Samay ke bahaav sangg behte huey Nibhaane hongei apne farz Utaarna hoga karmon ka karz…
…Jo Guruji kee kripa bin nahin mumkin Beshak lagey rahein raat din Kyunki Ve Hain karmadaata karunanidhaan Karma katvaane wale pooran Guru mahaan.
Guruji kee dee hui prerna Guruji kee dee hui chetna Guruji kee dee samvedana Kumm kar sakti hai har vedana.
Isliye samay kee na rukne wali gati ko rakhte huey maddenazar Guruji se ruhaani taar jodkar bitaayein ye safar Guruji kee mahima jaan lein Unkee baatein maan lein Guruji aaye karne sangat ka uddhaar Khushnaseebon ko milta hai aise Guru ka pyaar.
Kisee kee khushi kee vajeh bann sako toh achcha hai Gumm dene waalon kee kamee nahin is zamaane mein Heera vo dil hai jo sachcha hai Pathar dil kee kamee nahin is bheed se bhare veeraane mein.
Kisee kee madad kar sako toh sochna bhi nahin dobaara Bann jaana agar bann sako kisee ka sahaara Lekin badle mein na rakhna uss se ummeed koi, mere pyaare Aur anaasakti rakhte huey pyaar karna, taaki toota dil lekar na phiro maare maare.
Moh yakeenan vikaar hai Jismein phansa adhiktar sansaar hai Koi chaahte huey Koi anjaane mein.
Har karam Guruji ko kar ke arpan Guruji kee yaad mein rahe mann Toh jeena ho jaayega pehle se aasaan Guruji kee mahima hai aisee mahaan.
Guruji ke kahe par chalkar Nishchit hai uddhaar Ye koi saadhaaran si baat nahin hai Ye toh hai tumhaari rooh kee pukaar.
Ik din dhyan ke dauran aayi aisee khushboo Jisne maano chhoo lee fakir kee rooh Fakir ko hua Guruji kee maujoodagi ka ehsaas Tabhi usey pukaarte huey aayi ek awaaz.
Fakir ne aankhein kholi aur dekha Guruji ko samaksh apne Suna thaa usne pehle kuch logon se ki unhe aate thei Guruji ke sapne Usey bhi lagaa vo sapna thaa dekh raha Aur phir uskee aankh se aansoo baha.
Guruji ne Apne haath se usey ashirwaad diya Fakir ne bhi jhuk kar Unka charan sparsh kiya Usee pal Guruji ho gaye antardhan Dekhta hee reh gaya fakir vahaan.
Khushboo abhi bhi thi, phir hoti gayi kumm Lekin fakir ko nahin hua thoda sa bhi gumm Antas ke naynon mein Guruji kee chhavi basaaye Usne vaheen par nritya sangg geet gaaye Pashu pakshi bhi dekhkar muskuraaye Taruvar bhi phooley nahin samaaye.
Baahar aur bheetar mangal chhaaya Fakir ne Guruji ka sakshat darshan paaya Kehne ko jo thaa fakir, vo asal mein hua sabse ameer Guruji ka shukr kiya usne aur saraahi apni taqdeer.
Na koi shikva Aapse Na hee hai shikaayat, Guruji Shukriya Aapka har pal maalik Ki Aapne kee hai inaayat, Guruji.
Mai toh kaabil nahin uss pyaar ke Jo Aap mujh par barsaate Hain Khaamiyon kee khan mein gumee hoon mai Aap mujhe raasta dikhaate Hain.
Arzi lagaane se bhi lagta hai darr Kaheen maang na loon koi pratikool var Vahee shreshth hai jo Aap denge daan mein Uska shukrana karoon Aapke gungaan mein.
Aap hee jaanein mere pichhle aur aane wale janam ke baare mein Mai toh buss jaanoon ki vartmaan mein baithi hoon Aapke dwaare mein Yaheen par guzarti rahe zindagi Qubool hoti rahe meri kee hui bandagi Toh ye bhi hoga Aapka hee upkaar Mere pyaare Parwardigaar.
Aapke haath mein hai mere jeevan kee doar Jaise Aapki marzi, usey deejiyega moad Buss, kabhi bhi usey na dena chod Mera toh guzaara hee nahin kaheen aur.
Mere mann baavre Na dol abb idhar udhar Guruji bulaa rahe Hain Taaki tu abb jaaye sudhar.
Ve bula rahe Hain tujhe Apni sharan mein Jhuk jaa tu Unke kamal charan mein Shuru kar de Unse bolna Dekhna, tu chod dega idhar udhar dolna.
Beshak tu kehte huey gaya ho thakk Phir bhi kisee ne aaj takk Na suni hogi teri baat aise Guruji sunenge jaise.
Guruji jaante Hain tera har vichaar Ve jaante Hain kaisi hai teri bhavna Guruji pehchaante Hain tera aakaar Ve jaante Hain teri har kaamna.
Guruji tujhse zyada jaante Hain tujhe Chaahe tere utsah ke deeye hon jaley ya hon bujhe Isliye Unke samaksh teri koi chaalaaki na chalegi Aur Unhee kee kripa se teri har duvidha talegi.
Mere mann baavre, bahut ho chuka bhatakna Abb takk agar shuru nahin kiya Guruji ka naam japna Toh abb toh kar de shuru Swayam Rabb Hain tere Guru.
Guruji ko samajhne mein tu ho bhi jaaye naakaam Toh bhi tere Unhe yaad karne se Ve karenge tere kaam Lekin is silsile mein bhoolna na tu asal dhan kee arzoo karna Tu ye maang kar toh dekh, Guruji chaahte Hain teri jholi bharna.
Baavra rehna hai toh ho jaa baavra Guruji ke pyaar mein Is se zyada khushi kee baat ho nahin sakti sansaar mein Kyunki jabb tu har pal Guruji ka deewaana rahega, o mann Toh tujhe koi bhi dukh na sataa paayega kisee bhi kshan.
Deewaanagi kee hadd ko karega paar Toh tu bhi paayega Guruji ka poora pyaar Guruji mein leen rahega tera har vichaar Toh nishchit hee ho jaayega tujh mein sudhaar.
Gagan mein sooraj ke uday honei se Pheeke padd jaate hain chand aur taare Aise hee Guruji ke samaksh Naman mein jhuk jaate hain baaki devi devta saare Kyunki Guruji Hain SadaShiv ke roop Jinkee shakti hai anokhi aur anoop Guruji sab mein Hain aur Guruji mein sab Hain Guruji Guru aur nath Hain, Guruji Rabb Hain.
Guruji ke prataap kee upma karni Mushkil hee nahin, balki namumkin hai Guruji agar raat ko bhi kahein din Toh bhakt ke liye vo raat din hai.
Aisa hai Guruji ka har hukum aur vachan Atal aur sarvshaktimaan Yoon hee toh nahin Guruji kehlaate Hain Bhagwaanon ke bhi Bhagwaan.
Unka astitva akhand hai Unkee mahima anant hai Unkee karuna be-antt hai Unke har roop mein Bhagwant hai.
Aapke prataap ka prakash Aapke tapp ka tilmatra taras Aapki bakhshish jo jaati hai baras Usee kee badaulat beetey hain ye baras.
Aagey bhi rahegi Aapki meher Jiske aadhaar par hoti rahegi jeevan kee seher Aap aur Aapki meharbaani Inhee se chalti hai zindagaani.
Har tareh ke haalaat mein Aap jabb hongei saath mein Toh na bhaybheet karega kalyugi keher Antas mein rahegi utsah kee leher…
…Aapse judey rehne ka utsah Aapse dil kee baatein kehne ka utsah Kyunki Aap samajhte Hain dil ka haal Aap Hain saantvanaa aur suraksha kee dhaal.
Aap hee jaanein ki kya hona hai aane wale kal mein Aapki daya ke sahaare jee rahi hoon aaj is pal mein Aap maalik Hain, maharaj Hain, aur mai hoon kinkar Phir bhi Aap itna laad pyaar dete aaye Hain jeevan bhar Is se zyaada khushnaseebi ho nahin sakti Jindri Aapka shukrana karte nahin thakti.
Daan kee hai Aapne jo vel vishwaas kee Usey thaame rehne ka deejiyega mujhe bal Jitna vishwaas mujhe Aap par hai aaj Uss se bhi zyaada vishwaas ho jaaye kal.
Aap par mera vishwaas kabhi tootne na paaye Aapka daaman kabhi chhootne na paaye Dil Aapki yaad se sada aabaad rahe Har saans se niklee fariyaad ye kahe.
Is raaste par chalte huey Aksar lagne lagaa hai Ki hosh sambhaala mainey jabb se Aapse lagan lagne lagi tabb se.
Beshak roop alag thaa Kintu Aapse honei lagaa thaa pyaar Maya ka parda kuch aisa thaa Ki veh utha jabb mai pahunchi Aapke dwaar.
Jabb jabb Bhagwaan se hoti thi baat Tabb bhi Vo Aap thei jo sunte aur kehte thei Mandir jaati thi ya Gurudware jabb jabb Aap hee vahaan bhi ashish dete thei tabb tabb.
Ye bhi Aapki hee leela thi Ki mai Aapko pehchaan na paayi Tabb ki baat toh kya hai Mai toh abb bhi Aapko jaan na paayi.
Na hee kabhi paaoongi jaan Kyunki Aap Hain SadaShiv Bhagwaan Aur Bhagwaan kee mahima ko koi virla hee jaan paaya hoga poornataya Vo bhi jabb agar Aap Parameshwar kee ho daya.
Aap Hain Guruji Maharaj mahaan Mai naari naadaan Agyani anjaan Maangoon buss Aapse Aapki daya ka daan.
Usee mein hai mera kalyaan Jo Aapne socha hai mere liye, mere Bhagwaan Mere liye Aap hee Guru Nanak Ji, Aap hee Sai Mai ye maanti hoon ki meri har pooja Aap takk hai pahunch paayi.
Aap roop Hain Shiv Shakti ka Aap saadhya Hain meri bhakti ka Shukr har devi devta aur santt ka Jo mere liye baney Aap takk pahunchne ka zariya Jabb se mila Aapke dulaar ka dariya Aur mainey uss dulaar ke amrit mein snaan kiya Tabb se milee hai adbhut ruhaani raahat Tabb se badhti jaati hai is snaan kee chaahat Vishwaas hai mujhe ki Aapki kripa se mere paap dhul jaayenge Aur mere liye ve dwaar khul jaayenge Jo mujhe dikhaayenge raasta Aapse aise milan ka Kabhi na hogi phir judaayi jiske baad Mere pyaare Guruvar, mere Bhagwaan Mera har shwaas karey Aapka dhanyawaad.
Aaj Ka Suvichaar 