Author: dhirjabhat

March 4, 2025

Om Namaha Shivaya
Aaj Ka Suvichaar 🙏🏻🙏🏻

#2571

  O Guruji Ke Pyaare

O Guruji ke pyaare
O raahi thakey haare
Raasta raha hai katt
Manzil aa rahi hai nikat
Tu buss chalta chal
Na vyarth gavaa koi bhi pal.

Guruji ka naam lete huey
Apne mann ko tu sametey huey
Nishtha bhaav ka deep jalaaye
Chalta jaa bina ghabraaye.

Tu iklauta nahin jiske saath kismat ne khel kheley hain
Aksar aise raahi sochte hain ki ve akele hain
Parantu kismat ke khel ne anekon ko nahin choda hai
Aur kitnon ko is khel ne bhakti ke maarg se moda hai.

Imtehaan kathin hai yakeenan
Lekin isee ka naam hai jeevan
Shiv se jeev bankar aayegi jeev se Shiv bann-ne kee baari
Darasal isee ke liye Guruji karaa rahe Hain saari tayyaari.

Guruji rahe Hain tujhe taar
Tu himmat bilkul na haar
Tu manzil paane ke liye reh atal
Aaj ya kal, tu awashya hoga safal.

🌹🌹🌹🌹🌹🌹🌹

Jai Guruji 🙏🙏
Dhirja

O Guruji Ke Pyaare (03/04/2025)

March 3, 2025

Om Namaha Shivaya
Aaj Ka Suvichaar 🙏🏻🙏🏻

#2570

       Udaan Bharne Kee Intazaar

Kandhon par dho kar pahaad
Panchhi udd na paaye
Aise mein vo kaise
Apni manzil takk jaaye?

Hamaari haalat toh hai is se bhi zyaada kasht-daayak
Ek toh hum hain nahin udne ke laayak
Oopar se aasakti ksheen kar deti hai hamaari atma-shakti
Isliye bahut zaroori hai hamaare liye bhakti.

Bhakti mein bhi anivaarya hai bhaav
Aur swayam ko sudhaarne ka chaav
Aawashyak hai Guru dwaara maargdarshan
Taaki atmabodh hota rahe har kshan.

Buddhimaan hona mumkin hai
Lekin kya galat hai aur kya sahi
Ye toh vivek hee bataata hai
Isliye viveksheel hee asal gyaata hai.

Guruji Hain Guru pooran
Unkee shakti hai anant anupam
Maangein Unse aisee bhakti ka daan
Ki praapt ho hamein vivek aur asal gyan.

Guruji dwaara dikhaaya raasta ruhaaniyat ka
Guruji dwaara dikhaaya maarg insaaniyat ka
Bina ahem, vehem, aur andhvishwaas
Chaahiye toh kewal samarpan aur vishwaas
Jo nishtha se badhta jaaye
Jaise jaise bhakt prayaas karta jaaye.

Guruji se badhti jaaye lagan
Mann rahe Guruji mein yoon magan
Ki aur koi aasakti na rahe
Mann vikaaron ka aakraman na sahe
Beshak vikaar vaar karein baar baar
Ve vikaar har baar jaayein haar.

Sochiye, mann ko kitna halka mehsoos hoga kal
Jabb vikaaron ka aakraman na hoga safal
Jabb har duniyaavi aasakti ho jaayegi khatm
Viveksheelta dwaara mitt jaayega har bhram.

Aise mein kumm hota jaayega bhautikvaad ka bhaar
Hum ruhaani udaan ke liye hotey chalenge tayyaar
Badhega atmabodh, badhegi atmashakti
Guruji kee kripa se nikharti jaayegi bhakti.

Ruhaani pankh se mumkin ho jaayega udna
Isliye, bahut zaroori hai Guruji se judna
Guruji se seedhi taar jod kar karein toh hum prayatan
Dekhna, hamaari udaan bharne kee intazaar kar raha hai gagan.

🌹🌹🌹🌹🌹🌹🌹

Jai Guruji 🙏🙏
Dhirja

Udaan Bharne Kee Intazaar (03/03/2025)

March 2, 2025

Om Namaha Shivaya
Aaj Ka Suvichaar 🙏🏻🙏🏻

#2569

              Khushnuma Bhor

Beshak tumhe dikhtee nahin
Vo doar jis se Guruji ne tumhe thaama hai
Is doar mein hai Guruji kee shakti aparampaar
Tabhi toh itnee chunautiyon ke baavajood tum baithe ho Unke dwaar.

Ye doar hai bahut mazboot
Ye doar yakeenan hai ruhaani
Guruji kee pakad hai itnee prataapi
Ki Unhonei sambhaali hai tumhaari zindagaani.

Yahaan takk bhi Guruji laayein Hain tumhe
Ve hee tumhe aagey bhi lekar jaayenge
Tumhaare kamzor waqt par bhi tumhe thaame huey
Tumhe iske paar Ve pahunchaayenge.

Har anubhav, har sukh dukh kee har ghadi
Tumhe beshak lagey veh chhoti ya badi
Har veh ghadi hai anmol hissa tumhaari zindagaani ka
Tumhaare kalyaan kee kahaani ka.

Guruji Mata pita Hain tumhaare
Na chodenge tumhe bina sahaare
Murshid Hain Ve, de rahein Hain gyan aur maargdarshan
Tum lene wale bano, sudharta rahega tumhaara jeevan.

Guruji Hain tumhaare Ish roopi mitra
Jinke saanidhya mein chamkega tumhaara charitra
Ve hee Hain SadaShiv swayam
Unke vash mein hai tumhaara janam maran.

Unke haathon mein hai tumhaare uddhaar kee doar
Unhee par tum do sab kuch chod
Tum lo buss Unke naam kee chunariya odh
Tumhaare jeevan mein khud chal kar aayegi khushnuma bhor.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Khushnuma Bho (03/02/2025)

March 1, 2025

Om Namaha Shivaya
Aaj Ka Suvichaar 🙏🏻🙏🏻

#2568

                   Maya Ke Nayyn

Maya ke nayyn hain kayi hazaar
Na bach paaya iskee nazar se ye sansaar
Rochak lagta hai idhar udhar ka samaachaar
Maya agyani ko aakarshit karti hai baar baar.

Maya ke chanchal nayynon se
Bach na sakaa hai insaan
Paash hai ye hum pashuon ko baandhe huey
Pashupati Hain Guruji sarvshaktimaan.

Maya Unkee ek shakti hai
Jiske dwaara Ve lete Hain hamaara imtehaan
Ye hai is imtehaan ka uddeshya mahaan
Shiv se jeev bankar bann-na hai hamein jeev se Shiv Bhagwaan.

Yahee hai is safar ka saar
Isee mein lagg jaate hain aksar janam kayi hazaar
Ya phir is se bhi adhik
Aur chalta jaata hai pathik.

Anivaarya hai purusharth nibhaana
Agar raaste kee manzil ko hai paana
Guruji se judaav hota chale jitna
Har paash se azad hona mumkin hai utna
Maya ke chakravyuh mein phansey ko bhi Guruji bachaate Hain
Imtehaan lete Hain Ve aur Ve hee utteerna karaate Hain.

Guruji kee kripa bin koi paash na toote
Guruji kee meher bin buri aadat na chhoote
Jaan kar hamaari koshish aur neeyat
Ve karte Hain bharpoor inaayat.

Guruji ke saanidhya mein beeta shraddha ka har ik pal
Badhaata hai shraddhaalu ka manobal
Guruji le chalte Hain aisee azadi kee oar
Ki bhakt ko baandhti hai kewal Unke sangg rishte kee doar
Kyunki baaki sabb duniyavi hai
Baaki sabb mayavi hai
Guruji hee SadaShiv Hain
Guruji hee Hain satya
Ye kewal vishwaas nahin hai
Ye hai param tathya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Maya Ke Nayyn (03/01/2025)

February 28, 2025

Om Namaha Shivaya
Aaj Ka Suvichaar 🙏🏻🙏🏻

#2567

               Bheetar Ka Ujiyaara

Jabb bheetar chhaaya ho andhiyaara
Jabb jeevan kee naiya ko na dikhey kinaara
Toh Guruji par bharosa banta hai ekmaatra sahaara
Kyunki yahee naam dikhaata hai bheetar ka ujiyaara.

Baahar ka ujiyaara hai maya
Bheetar ka ujiyaara hai gyan
Vo gyan, jo Guruji ke kareeb laata hai
Vo gyan, jo baahar dhoondhne se nahin aata hai.

Baahar ka ujiyaara hai asthaayi aur seemit bhi
Kintu sthaayi aur anant hai ujiyaara bheetar ka
Phir bhi baahari ujiyaara yoon kheenchta hai apni oar
Ki hum bhool jaate hain karna apne bheetar gaur.

Hamein sachet rakhta hai Guruji ka chintan
Taaki asal ujiyaare kee oar dhyan de antakaran
Aur bheetar rahe yoon roshan
Ki ujiyaara hee ujiyaara ho har kshan
Phir baahar andhiyaara bhi ho toh bhakt rahe beparwaah
Bheetar ka ujiyaara roshan karey uskee raah.

Isee se miley asal gyan
Isee ke dwaara ho kalyaan
Guruji kee meher se
Guruji kee nadar se.

Varna toh kitne aaye aur chale gaye
Baahari ujiyaare se mohit hokar
Usee mein apna vivek khokar
Anek aur janam lene ka beej bokar.

Bharose ke bin sab vyarth hai
Bharose se hee is safar ka arth hai
Guruji par bharosa rakhne waalon ko Awashya dikhta hai bheetar ujiyaara
Der beshak ho dikhne mein
Parantu dikhta hai ujiyaara bahut hee nyaara.

Isliye bharosa rakhte chalo
Koshish tum karte chalo
Guruji ne sambhaalna hai baaki sabb
Tum ye jaan aur maan lo abb
Ujiyaara nahin hai tumse kaheen duur
Tumhe dikh bhi jaayega zaroor
Guruji par tum dhyan dharo
Dekho, abb aur vilamb tum na karo
Bahut hua maya main phansna
Bahut hua daldal mein dhansna
Abb aur nahin, abb mann ke nayn kholo
Pashchaataap ke aansuon se unhe dho lo
Duur honei lagega agyan saara
Dikhne lagega tumhe bheetar ka ujiyaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bheetar Ka Ujiyaara (02/28/2025)

February 27, 2025

Om Namaha Shivaya
Aaj Ka Suvichaar 🙏🏻🙏🏻

#2566

   Aapse Itnee Meethi Mamta Milee

Param poojya Guruji Maharaj,
Aap sartaajon ke sartaaj,

Aapse itnee meethi mamta milee
Ki mann kee murjhaayee kali khilee
Mila Aapse itna dulaar
Ki sambhal gaya mera ghar parivaar
Kyunki jisey Aap mata pita ke roop mein mil jaayein
Sulajh jaati hain Uske ghar parivaar kee saari duvidhaayein.

Kahaan se karoon shuru
Kahaan par karoon khatam
Karna Aapka shukrana, mere pita param
Mere Guruvar, murshid mere
Beshak lene padein janmon ke phere
Rakhna har janam mein mujhe Apni sharan mein
Taaki Aapki kripa miltee rahe har janam mein
Jitnee baar bhi aana jaana lagaa rahe janam aur maran mein
Jageh dete rahiyega Apne kamal charan mein.

Bakhshte rahiyega satsang kee ghadiyan
Ve hoti hai Shivmayi layy kee ladiyan
Jinse judti hain kadiyan
Ruhaani safar kee.

Bakhshte rahiyega sewa aur simran
Jinse sanvarta hai mere jeevan ka har kshan
Aap Bhagwaan, mujhe banaa deejiye aisa insaan
Ki mai sansaar ko behtar banaane mein de paaoon apna yogdaan.

Aapki rehmat hai toh sab kuch hai
Varna sab hotey huey bhi hoon gareeb
Changa rahega mera naseeb
Jo Aap rakhenge mujhe Apne kareeb.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapse Itnee Meethi Mamta Milee (02/27/2025)

February 26, 2025

Om Namaha Shivaya
Aaj Ka Suvichaar 🙏🏻🙏🏻

#2565

Aayi MahaDev Kee Raat

Aayi MahaDev kee raat
Kar lo MahaDev se baat
Ye raat hai Unkee dee saugat
Kar lo Unkee yaad ka paath.

Guruji MahaDev ka roop Hain pyaara
Guruji Hain sangat ka sahaara
Jisne Unkee yaad mein is raat ko guzaara
Vo haalaat se kyun kabhi haara?

Kaheen satsang Guruji ka raha hai ho
Sangat Unke prem ras mein rahi hai kho
Kaheen paath ho raha hai Shiv Puran ka
Kaheen suna jaa raha bakhaan Guruji ke gungaan ka.

Koi juda hua hai Guruji se Gurbani ke dwaara
Koi Shivji ke anekon naam mein dhoondhe sahaara
Ati paawan ye tyohaar hai
Shiv mahima se goonj raha sansaar hai.

Koi bhakt gaaye Shiv aur Guruji ke geet aur bhajan
Sabhi apne bhaav anusaar karein Guruji ka vandan
Guruji ke pyaar mein hon rahe hain nritya
Guruji hee Shiv Hain, Guruji hee Hain satya.

Andhere kee badli bhaag rahi hai
Bheetar kee chetna jaag rahi hai
Asha kee jyot ho rahi hai ujjwal
Nishchay hee behtar hoga aane wala kal.

Guruji kee kripa banee rahe sabhi par
Unkee agya se sangat aati rahe Unke dar par
Sabhi ko jaagriti aati rahe aur sabhi ka janam maran jaaye sudhar
Mahashivratri kee sabhi ko shubhkaamnaayein, sabhi par banee rahe Guruji kee nadar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 25, 2025

Om Namaha Shivaya
Aaj Ka Suvichaar 🙏🏻🙏🏻

2564

      Unke Naam Ke Jahaaz Mein

Guruji thei Guruji Hain
Guruji sada hee rahenge
Apne bhakton se unke bhale kee baat kahenge
Apni sangat ke liye Ve kasht sahenge.

Ye ruhaani naata hai
Yahaan bhakt sab kuch paata hai
Apne ko khokar
Paapon ko dhokar
Sarvsamarpan mein
Guruji kee sharan mein.

Guruji ke charnon mein vo amrit hai
Jismein dhul jaate hain saare vish
Guruji ke satsang mein veh shakti hai
Jo badhaati hai Unke kareeb aane kee kashish.

Guruji mahaprataapi Hain
Hain Ve saari sangat par meharbaan
Sangat ko taarne ke liye
Aksar lete Hain Ve imtehaan
Raasta bhi Ve khud hee banaate Hain
Sangat ko disha dikhaate Hain
Shubhchintak Hain Ve hamaare
Guruji Maharaj pyaare.

Guruji ko paane kee ho jo abhilaasha
Toh seekhni hogi prem bhaav kee bhaasha
Jis se oorjit hogi asha
Unhe paa paane kee
Unkee bhakti mein ramm jaane kee.

Ye hai aisa safar
Jo agar Unkee sharan mein jaayega guzar
Toh hota rahega Guruji ke ashirwaad ka asar
Guruji taarne mein na chodein koi kasar
Baaki bhakt par karey nirbhar.

Sangat khushnaseeb hai paakar Guruji ka pyaar
Jisey abhi takk mauka nahin mila, Ve usey bhi bulaayein Apne dwaar
Unkee kripa se tarr jaaye, sudhar jaaye saara sansaar
Unke naam ke jahaaz mein sab kar lein bhavsaagar ko paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unke Naam Ke Jahaaz Mein (02/25/2025)

February 24, 2025

Om Namaha Shivaya
Aaj Ka Suvichaar 🙏🏻🙏🏻

#2563

        Guruji Kee Yaad Mein Raho

Guruji kee yaad mein raho
Guruji kee baatein suno aur kaho
Na bhoolo ki Ve Hain angg sangg
Toh jeevan kee gati mein hoga aisa anokhapann
Ki shukrana mein aane lagega mann
Chaahe hon sukh ke ya dukh ke kshan.

Aur jitna shukrana karte rahoge
Guruji ke prem mein jitna bahoge
Shant aur sthir hota jaayega mann
Chaahe mushkilein bhi jhel raha ho jeevan.

Guruji kee baatein, Guruji ke geet
Guruji ka shukrana, Guruji se preet
Inse khilee rahegi raah
Toh laut aayega agar kho bhi gaya thaa utsaah
Jald ya dheere dheere ye ho
Guruji hee jaanein vo
Bhakti ka beej jisne diya bo
Toh vo beej yoon hee nahin jaayega kho
Vo upjega awashya
Aur sudhaarega bhavishya.

Guruji se prem hee bhakti hai
Bhakti mein bharpoor shakti hai
Jo dete Hain Guruji swayam
Aur Ve sudhaarte Hain karam.

Jaise jaise sudharte jaayenge karam
Behtar hota jaayega jeevan
Saubhagya se milee hai Guruji kee sharan
Sanvar jaayega janam maran.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Yaad Mein Raho (02/24/2025)

February 23, 2025

Om Namaha Shivaya
Aaj Ka Suvichaar 🙏🏻🙏🏻

#2562

    Nahin Bann-na Hai Kuch Khaas

Param poojya pita mere,
Mere pyaare Guruji Maharaj,

Nahin bann-na hai kuch khaas
Buss, bann kar rehna hai Aapka das
Aapke charnon ke taley mil jaaye chhoti si jageh
Vaheen ho mera ashiyaana, vaheen ho mera thikaana.

Mujh mein na hai aisee kaabiliyat
Buss, hai ye meri tamanna aur meri neeyat
Aap toh mere bheetar aur baahar kee jaante Hain
Aap jaanein meri raahon mein kahaan phool kahaan kaante hain.

Jaanti hoon mujhe apni taraf se chalna hai hokar sachet
Ye bhi jaanti hoon ki Aapki mujh par nazar hai
Isliye befikr bhi hoon, beparwaah si bhi
Kshama kar dena, Prabhu, galati ho jaaye jabb kabhi.

Mai beshak hoon gustaakhiyon ka bhandaar
Lekin Aap Hain dayaavaan kirpadhaar
Apni chaukhat par Aapne bulaaya hai
Aapki agya se mainey sir ko jhukaaya hai
Mujhe Apne charnon mein diya hai Aapne sthaan
Aapki karuna anant hai, mere maalik meharbaan.

Yahaan par aakar jo mila hai mujhe
Mai shabdon mein bayaan nahin kar sakti
Aapki prashansa, Aapki mahima ka gungaan
Mai din raat karte nahin thakti.

Arzi hai Aapse ki saari sangat ka karte rahein Aap kalyaan
Nayi bhor laaye naya ujaala sabke mann mein aur jeevan mein
Aap sarvavyaapi Hain, bheetar bhi, jal thal mein bhi, aur gagan mein
Mera sir sada Aapke charnon mein jhuka rahe vinamr vandan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Nahin Bann-na Hai Kuch Khaas (02/23/2025)