Author: dhirjabhat

June 23, 2025

Om Namaha Shivaya
Aaj Ka Suvichaar 🙏🏻🙏🏻

#2682

  Ruhaani Raahon Ne

Ruhaani raahon ne
Apni baahon mein
Liya musaafir ko
Kho gaya thaa jo.

Ruhaani raahon ko
Guruji se hukm thaa mila
Ki Ve musaafir kee rooh ko
Apne poshan se dein khila.

Guruji ke hukm ka paalan kar
Ruhaani raahein bani musaafir kee humsafar
Poshit kiya unhonei musaafir kee rooh ko
Dekar prerna, utsah, aur jaagriti apni dagar par.

Raahon ne mamta ke komal phool bichhaaye
Jo unhonei Guruji se thei paaye
Musaafir ke liye khaas
Dene usey mamta ka ehsaas.

Ruhaani raahon ne
Usey lekar apni baahon mein
Aagey badhaaya
Usey sooraj dikhaaya.

Sooraj jaagriti ka
Sanket nayi aakriti ka
Aakriti, bheetar kee
Dein, Guruji ke dar kee.

Kabhi bataa kar, kabhi bin kuch kahe
Guruji musaafir ke angg sangg rahe
Usey karne agrasar
Ruhaani raahon par.

Sooraj kee dhoop musaafir ko le chali udhar
Jahaan thaa ooncha ruhaani shikhar
Guruji ke divya dar par
Jahaan musaafir ne kar joad kar
Kiya Guruji ko naman
Choom kar Unke charan.

Guruji ke aalingan se musaafir tarr gaya
Uske bheetar ka khalipan bhar gaya
Guruji ke Guru prasad se
Unke ashirwaad se.

Safal hua musaafir ka jeevan
Paakar Guruji se aisa dhan
Musaafir ka naseeb khil gaya
Usey Guru mein Bhagwaan mil gaya.

🌹🌹🌹🌹🌹🌹🌹

Jai Guruji 🙏🙏
Dhirja

Ruhaani Raahon Ne (06/23/2025)

June 22, 2025

Om Namaha Shivaya
Aaj Ka Suvichaar 🙏🏻🙏🏻

#2681

      Shehenshahon Ke Shehenshah

Shehenshahon ke shehenshah
Sambhaalein jis bhakt kee raah
Usey phir kaisa bhayy?
Usey kaisa sanshay?

Shehenshahon ke aise shehenshah Hain Guruji Maharaj
Jo pehnaate Hain Apne har bhakt ko Apne ashirwaad ka aisa taj
Jo kisee shakti ke giraane se gir sakta nahin
Jo bhakt kee laaj rakhte kabhi thakta nahin.

Har bhakt hai sadasya Guruji ke parivaar ka
Har bhakt hai praaptkarta Unke pyaar ka
Phir chaahe vo meet bannkar rahe ya das
Guruji ke liye toh Unka har bhakt hai khaas.

Ve dekhein sabhi ko ek nazar se
Par sabke alag hain karam
Phir bhi shehenshah Apni rehmat se
Sanvaarein sabka janam maran.

Hum bhi Apne shehenshah kee khidmat karein
Ve angg sangg Hain phir hum kyun darein
Hamaare shehenshah Hain sarvsampann
Unkee kripa se Unhee mein laagi rahe lagan.

🌹🌹🌹🌹🌹🌹🌹

Jai Guruji 🙏🙏
Dhirja

Shehenshahon Ke Shehenshah (06/22/2025)

June 21, 2025

Om Namaha Shivaya
Aaj Ka Suvichaar 🙏🏻🙏🏻

#2680

Guruji Ke Aanchal Kee Chhaaon Mein

Guruji ke aanchal kee chhaaon mein
Guruji ke kamal roopi paaon mein
Beet raha hai jeevan
Dhanya huey hain hum.

Kya kya ho raha hai sansaar mein
Yug parivartan ke dauran
Na jaane kitnee museebaton se
Guruji ne bachaayi hui hai hamaari jaan.

Milee Guruji kee meher-e-nazar
Milee Guruji kee daya bhari nadar
Varna ho rahe hotey dar-badar
Jeete jeete rahe hotey mar.

Guruji kee sharan mein ho jo surakshit
Uska toh nishchit hai hona hitt
Swayam ko is satya ke sangg rakhna har pal
Khaaskar jabb mushkil ka na mil raha ho hal.

Is satya mein hai dilaasa aur santvana
Ye satya darshaata hai Guruji ka pyaar ghanaa
Aisee hai Guruji sangg rishte kee gehraayee
Ki khud hee rusva ho jaati hai har rusvaayee.

Anmol hai Guruji ke aanchal kee chhaaon kee sheetalta
Anmol hai Guruji ke kamal roopi paaon kee nirmalta
Anmol hai Guruji dwaara sikhaayee hui bhakti kee saralta
Anmol hai Guruji se milne wali mamta kee komalta.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ke Aanchal Kee Chhaaon Mein (06/21/2025)

June 20, 2025

Om Namaha Shivaya
Aaj Ka Suvichaar 🙏🏻🙏🏻

#2679

                          Beda Paar

Aati jaati rahegi koi na koi leher
Bhavsaagar mein is sansaar ke
Kabhi sukh ka, kabhi dukh ka peher
Jeevan ke mayavi bhandaar se.

Shiv se jeev baney
Hum Guruji ke hukum se
Abb jeev se Shiv ka safar hai jaari
Nirantar chalni hai is imtehaan kee tayyaari.

Har pal hai mahatvapoorna, har lamha hai anmol
Isliye samay na gavaa tu sukh dukh ko tol
Asal mool par de tu dhyan
Taaki achche se de paaye tu imtehaan.

Jo prabhaav Guruji se duur tujhe le jaaye
Uss se aaj, abhi ke abhi, duur tu ho jaa
Jo bhaav tera tere Guruji ko prasann karey
Uss bhaav mein leen ho Guruji mein tu kho jaa.

Duniya reh jaayegi yaheen
Yaheen reh jaayenge aasmaan aur zameen
Par teri rooh kee yatra chalti jaayegi
Jabb takk Guruji mein na veh samaayegi.

Sukh dukh toh buss hain jeevan ke moad
Jo maansik sthirta ko sakte hain aasaani se marod
Isliye sukh dukh se swayam ko aise na le tu joad
Ki ve tere manobal ko dein toad.

Guruji se jitna judega
Unke khayaalon kee oar jitna mudega
Rahega jitna Unkee yaad mein
Aur Unke dhanyawaad mein
Utna kumm pareshaan karegi tujhe har leher
Aur mann sthir rehne lagega har peher.

Guruji tujhe bhavsaagar se denge taar
Ve Hain karunanidhaan Parwardigaar
Tu Unse jodey rakh ruhaani taar
Ek Ve hee kar sakte Hain tera beda paar.

🌹🌹🌹🌹🌹🌹🌹

Jai Guruji 🙏🙏
Dhirja

Beda Paar (06/20/2025)

June 19, 2025

Om Namaha Shivaya
Aaj Ka Suvichaar 🙏🏻🙏🏻

#2678

Sada Anantam Shukrana Aapka

Guruji ke kiye kalyaan se
Chal rahi hai jeevan kee kahaani
Guruji ke shukrana mein
Beete ye zindagaani
Shukrana karna agar bhool gaya
Toh vo hogi badi naadaani
Guruji, Aap yaad dilaate rahiyega
Agar bhool jaaye ye nimaani.

Guruji ke kiye kalyaan bina
Na jaane kya hota haal
Guruji kee kripa ka suraksha kavach
Har haal mein banta hai dhaal.

Yug parivartan ke is samay mein
Kalyugi keher ke bhayy mein
Girebaan mein jhaank kar dekhne par keh uthta hai ye dil
Ki bin Guruji ke sahaare ke toh ho jaati badi mushkil.

Sukh mein Guruji, dukh mein Guruji
Rooh ke toh har rukh mein Guruji
Mukh par bhi Guruji ka naam
Antas mein Guruji ka dhaam.

Phir kaise aur kyun na karein shukrana
Guruji ke kamal charan mein
Jitna shukrana karein Unka vo kumm hai
Anugraha ka bhandar hai Jinkee sharan mein.

Samay raha hai tal
Rishte jaate hain badal
Chhoot jaate hain apne paraaye aaj ya kal
Ye deh bhi marne par jaati hai jal
Kintu Guruji kal bhi thei, aur Hain Ve aaj bhi
Kal bhi rahenge Ve hee
Swayam swayambhu aaye maanav bankar yahaan
Sudhaarne Apne bhakton ka jahaan.

Bhakton ko sweekaar kar Apne charnon mein
Aapne antt kiya kitnon ke dukh santaap ka
Shukrana shukrana shukrana Guruji
Sada anantam shukrana Aapka.

🌹🌹🌹🌹🌹🌹🌹

Jai Guruji 🙏🙏
Dhirja

Sada Anantam Shukrana Aapka (06/19/2025)

June 18, 2025

Om Namaha Shivaya
Aaj Ka Suvichaar 🙏🏻🙏🏻

#2677

   Na Karna Tu Shok

Na karna tu shok
Aansuon ko le rok
Guruji yaheen par Hain tere saath
Aaj bhi tere sir par hai Unka haath.

Tu jaanta hai ye hai sach
Ki tu itnee mushkilon se raha hai bach
Guruji kee rehmat se.
Vo likhi bhi thin teri kismat mein
Toh Guruji kismat dobara likh rahe Hain
Jiske prabhaav jeevan mein dikh rahe hain.

Ho sakta tu ho is hakeekat se anjaan
Guruji jaante Hain tu hai kitna naadaan
Mayavash ghanaa andher laata hai agyan
Shukr hai Guruji kee dekh rekh mein hai tu insaan.

Guruji kee shakti hai maya
Jo palat sakti hai tann mann jeevan kee kaaya
Unkee hee shakti aur meher se tu dekhega roshni gyan kee
Himmat rakh, aayegi bela teri umdaa udaan kee.

Pichhle din bhi nahin rahe, ye din bhi beet jaayenge
Sakaraatmakta se sochne kee koshish kar, tere kaaj sanvar jaayenge
Beeti hui badkismati ke lamhon se na dar
Apni oar se udaan kee tayyaari kar
Guruji Haina, Ve teri madad karte rahenge sada
Ve hee tujhe sikha denge umdaa udaan kee ada.

🌹🌹🌹🌹🌹🌹🌹

Jai Guruji 🙏🙏
Dhirja

Na Karna Tu Shok (06/18/2025)

June 17, 2025

Om Namaha Shivaya
Aaj Ka Suvichaar 🙏🏻🙏🏻

#2676

                 Jeevan Kee Doar

Shukr hai hamein milee hai Guruji kee bandagi
Beshak aksar chunautiyon kee chanchalta se alankrit ho jaati hai zindagi
Phir bhi bahuton se achche haal mein hain hum
Param poojya Guruji ke bachche hain hum.

Unkee sambhaal mein hai hamaara haal
Unke chalaane se hee hai hamaari chaal
Paaon bhi deeye Hain Unhonei hee
Unhee kee dein hai vo utsaah
Jiske sahaare hum dekh paate hain vo raah
Jo Guruji dikhaate Hain
Jispar Ve hamein chalaate Hain.

Miltee rahe Guruji se Unkee bakhshindagi
Dhulti rahe antakaran kee vikaari gandagi
Guruji kee kripa se ho sakta hai ye, apne buss mein nahin
Guruji sadbuddhi aur prerna dein taaki hamaara prayaas ho sahi.

Jeevan mein chal raha ho jaisa bhi daur
Guruji hee Guruji Hain har oar
Is satya par karte rahein hum gaur
Aur Unhee ko saumpe rahein jeevan kee doar.

🌹🌹🌹🌹🌹🌹🌹

Jai Guruji 🙏🙏
Dhirja

Jeevan Kee Doar (06/17/2025)

June 16, 2025

Om Namaha Shivaya
Aaj Ka Suvichaar 🙏🏻🙏🏻

#2675

Jeevan Kaise Badal Gaya

Jeevan kaise badal gaya
Guruji kee sharan mil jaane ke baad
Kaise aur kis kis ashish ka
Karoon Guruji se mai dhanyawaad.

Har subah aur shaam hai daat Unkee
Har lamha hai Unka ashirwaad
Ye dincharya, ye ghar parivaar
Sab Unkee rehmat se hai aabaad.

Aaye jo dukh aur kasht jeevan mein
Usmein bhi hai karma katne kee saugat
Har sukh aur har khushi mein basee hai
Unkee dee bakhshishon kee baaraat.

Badalaa nazariya, badhti sehenshakti
Dil mein anokhe se jazbaat
Ye sabb bhi Guruji kee kripa hai
Shukr hai mere sir par hai Unka haath.

Guruji ke dwaar par aane se pehle
Beantt lagti thi agyan kee raat
Unke charnon mein jageh milee toh
Aankhein khuli dekhne ke liye prabhaat.

Abb toh aisee hui hai zindagi
Ki namumkin hai ek pal bhi jeena bin Guruji kee yaad
Rooh muskuraane lagi hai
Guruji dwaara sweekaare jaane ke baad
Sochti hoon kitnee sukhi ho jaayegi rooh
Guruji mein sampoornata se samaane ke baad.

🌹🌹🌹🌹🌹🌹🌹

Jai Guruji 🙏🙏
Dhirja

Jeevan Kaise Badal Gaya (06/16/2025)

June 15, 2025

Om Namaha Shivaya
Aaj Ka Suvichaar 🙏🏻🙏🏻

#2674

                Ye Rishta Jo Hai…

Ye rishta jo hai Guruji ke sangg
Ye hai rooh ka Unn Param pita ke saath
Aur koi rakhe na rakhe
Pita sada sir par rakhte Hain haath.

Kalyaanmayi hai Guruji kee kanti
Baaki har roop kee bhanti
Guruji mata pita ke roop mein bhi
Saari sangat ka bante Hain sahaara
Ruhaani naynon se dekhne wali baat hai
Bhaavuk kar deta hai is rishte ka nazaara.

Ye hai ek ehsaas
Dil ke bahut hee paas
Ya phir yoon kahein ki khud ke bheetar kee gehraayee mein
Jiska strot hai Guruji kee hee vadiyaayee mein.

Kyunki isey dekh paa sakne wali aankhein nahin hain mere paas
Na hee dil mein bhaavukta kee vo shreshthta
Sabr aur shraddha bhi nahin hai utnee
Na hee hai mere charitra mein utnee pavitrata.

Guruji hee dilaate Hain ye ehsaas
Ki Ve pita roop mein bhi sada Hain mere paas
Sukh mein bhi aur dukh mein bhi
Mujhe toh nazar aate Hain ek Ve hee
Jinke saath sabb saanjhaa kar leti hoon
Baaki saari sangat ke jaise mai bhi Unkee beti hoon.

Satya hee hai ki saari sangat hai Guruji kee santaan
Aur Guruji Hain Parameshwar aur sangat ke pita meharbaan
Guruji ne hai sweekaara
Is se bada saubhagya ho sakta nahin
Iske liye mera dil toh
Unka shukrana karte huey thakta nahin.

🌹🌹🌹🌹🌹🌹🌹

Jai Guruji 🙏🙏
Dhirja

Ye Rishta Jo Hai… (06/15/2025)

June 14, 2025

Om Namaha Shivaya
Aaj Ka Suvichaar 🙏🏻🙏🏻

#2673

 Guruji Kee Yaad Bin

Saubhagya se mila hai maanav janam
Nibha lo insaaniyat ka dharam
Is se pehle ki ho jaaye maran
Kar lo is janam mein changey karam.

Tum ho bahut hee khushmismat
Ki Guruji kee sharan roopi jannat
Tumhe milee hai is janam mein
Achchaayee hogi tumhaare kisee pichhle janmon ke karam mein.

Aagey bhi jo hongei achche karam
Toh sanvarta rahega aagey ka bhi janam maran
Karmon ka ganit toh Guruji hee jaanein
Ve Apne har bhakt ko poori tareh se pehchaanein.

Unke samaksh tum ho benakaab
Ye satya hai na ki hai khwaab
Beshak chhupa lo Dharmaraj se
Na chhipa hai kuch Guruji Maharaj se.

Apna lo saubhagya apne maanav roop ka
Antas mein divya saundarya basaa lo Guruji ke swaroop ka
Beshak tumhaare sangg ho le saara jahaan
Guruji kee yaad bin roshni na hogi vahaan.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Kee Yaad Bin (06/14/2025)