Author: dhirjabhat

March 16, 2025

Om Namaha Shivaya
Aaj Ka Suvichaar 🙏🏻🙏🏻

#2583

 Sumangal Ka Vidhaan

Jaana aakar asaliyat ke kareeb
Ki mere jeevan kee naiya hai khushnaseeb
Is naiya ka kivaiya hai bada khoobsoorat
Vo toh khud hee hai Khuda kee moorat.

Guruji Hai Unka naam
Unke charnon mein hai param teerath dham
Jabb bhi koi Unhe pranaam karey
Vo har Guru ko namaskar karey.

Guruji ke bhakton ka antas hai Shivalay
Unka har satsang hai vidyaalay
Yahaan Gurbani ka paath sunaaya jaata hai
Yahaan Unkee agya se bhakt aa paata hai.

Sabhi vidyaarthiyon ko Guruji se milta hai anubhav gyan
Guruji hee bakhshte Hain simran aur dhyan
Unhe pasand ki bhakt karey gupt sewa, gupt paath, gupt daan
Guruji ke kamal charnon mein hai amrit kee khan.

Guruji hee Hain murshid, Ve hee pita aur mata
Tarr jaata hai jo koi bhi Unse hai jud jaata
Guruji kee sharan mein safar hai kalyaan ka
Unka dikhaaya raasta hai sumangal ke vidhaan ka.

🌹🌹🌹🌹🌹🌹🌹

Jai Guruji 🙏🙏
Dhirja

Sumangal Ka Vidhaan (03/16/2025)

March 15, 2025

Om Namaha Shivaya
Aaj Ka Suvichaar 🙏🏻🙏🏻

#2582

               Aapki Prerna Se…

Jaise bhi hon haalaat Guruji
Bakhshte rahiye daya kee daat Guruji
Bakhshte rahiye din raat Guruji
Aap hee pita, Aap hee maat Guruji.

Aap Hain Daata, mai Aapka kookar
Aap Shehenshah, mai hoon kinkar
Pyaasi hoon Aapki bakhshish kee
Daasi banee rahoon Aap Ish kee.

Aukat nahin ki bann sakoon Aapke charnon ke taley kee dhool
Phir bhi Aap ne mujhe banaaya Apne bagh ka ik phool
Aapki mamta ke poshan se khilee hoon, varna murjhaayee rehti
Na jaane Aapke bin kaise mai mausam kee chunautiyan sehti.

Har kalee ko le leejiye Apni sharan mein
Har murjhaaye phool ko jageh deejiye Apne charan mein
Aapki dee suraksha sabhi ko miley
Har kalee, har phool muskuraaye aur khiley.

Saare sansaar ka ho mangal
Jiska aaj nahin hua, uska ho jaaye kal
Badhaa deejiye sabhi ka manobal
Taaki ho sakey duvidhaaon ka hal
Aap Hain karunanidhaan, Aap komal
Aapki prerna se sabka jeevan ho ujjwal.

🌹🌹🌹🌹🌹🌹🌹

Jai Guruji 🙏🙏
Dhirja

Aapki Prerna Se… (03/15/2025)

March 14, 2025

Om Namaha Shivaya
Aaj Ka Suvichaar 🙏🏻🙏🏻

#2581

Jabb Guruji Hon Angg Sangg

Jabb Guruji Hon angg sangg
Ruhaani hai jeevan ka rangg
Jitna sudharega jeene ka dhangg
Ruhaaniyat mein ho jaaoge utne malang.

Honei do ik aisa havan
Jismein ho jaaye sabhi vikaaron ka dahan
Socho, kitna shuddh aur saaf ho jaayega mann
Aur kitna anandmayi hota chalega Guruji ka manan.

Saaf mann par jo chadhta chalega
Rangg Guruji ke naam ka
Toh bheetar hee ehsaas ho jaayega
Param Shivmayi dham ka.

Guruji ko jitna chetega chitt
Sakaaraatmakta hogi antakaran kee oar aakarshit
Pratikool khayaal jaayenge mitt
Bheetar kee vayu na rahegi dooshit.

Aaya hai holi ka tyohaar
Ruhaani rangon kee ho bauchhaar
Sabki zindagi mein aaye nikhaar
Sab par Guruji karein kripa aparampaar.

🌹🌹🌹🌹🌹🌹🌹

Jai Guruji 🙏🙏
Dhirja

Jabb Guruji Hon Angg Sangg (03/14/2025)

March 13, 2025

Om Namaha Shivaya
Aaj Ka Suvichaar 🙏🏻🙏🏻

#2580

   Unhee Kee Chhatr Chhaaya Mein

Guruji kee vireh mein udaas hokar
Guruji kee yaad mein khokar
Chaahti thi bahut kuch kehna
Lekin majboori ko padd raha thaa sehna.

Khaamoshiyon ne yoon baandh liya thaa zubaan ko
Ki pukaar na paa rahi thi Bhagwaan ko
Chuppi mein dekh rahi thi aasmaan ko
Dil mein basaa kar Guruji se milne ke armaan ko.

Guruji Hain mere Bhagwaan
Bin mere pukaare hee sunte Hain Ve karunanidhaan
Kuch pal ke liye ho gayi thi is tathya se anjaan
Jabb yaad aaya, toh jaan mein aayi jaan.

Meri khaamoshi ko sunaayee dee Guruji kee awaaz
Vo seedhi taar thi is sundar ehsaas ka raaz
Jo Guruji kee kripa se judi Unkee meri rooh
ke sangg
Udaas se mann mein uthi ullaas kee umang.

Tabhi aayi Guruji kee divya khushboo
Jisne mere roam roam ko liya chhoo
Guruji ne diye Apne virat saumya darshan
Pehle thaa udaas, abb toh itna prasann hua mann.

Prasann itna, ki meri khushi ka na thaa thikaana
Baanvri si hui, lekin Guruji se kyun thaa chhipaana
Mai nacheez hoon praani tuchh
Aur Ve Paramatama jo jaanein sab kuch.

Unhonei diya charan sparsh ka avsar
Unke charnon mein jhukta gaya mera sir
Mera mann, meri soch, mera zameer bhi
Muskuraane lagi meri taqdeer bhi.

Guruji ne ashirwaad diya
Mainey dhanyawaad kiya
Naynon ka baandh toot kar haara
Behne lagi ashruon kee dhaara.

Na jaane dhul gaye kitne janmon ke paap
Guruji ke samaksh mai khadi thi maano khuli kitaab
Na koi aavaran, na koi nakaab
Achaanak neend khuli, toh jaana ye thaa ik khwaab.

Guruji ne diye swapn darshan, Unka shukrana baarambaar
Unhee ke saanidhya mein beete har pal, har peher, har vaar
Unhee se aabaad rahe mann ka har vichaar
Unhee kee chhatr chhaaya mein har janam mai doon guzaar.

🌹🌹🌹🌹🌹🌹🌹

Jai Guruji 🙏🙏
Dhirja

Unhee Kee Chhatr Chhaaya Mein (03/13/2025)

March 12, 2025

Om Namaha Shivaya
Aaj Ka Suvichaar 🙏🏻🙏🏻

#2579

Srishti Ka Shehenshah

Guruvar daata deendayal
Aap toh jaanein mera haal
Phir kya bataaoon
Ya kya chhipaaoon
Par Aapko bin bataaye raha bhi na jaaye
Kyunki kewal Aap hee toh Hain sada sahaay.

Aur agar chhipaaya Aapse
Toh aur kisey sunaaoongi?
Apne kashton ke ghaav par
Aur kiske naam ka marham lagaaoongi?

Mere har ghaav kee ekmaatra aushadhi hai Aapka naam
Meri prerna hai Aapki yaad, meri manzil hai Aapka dham
In sabke bin nahin mil sakta meri rooh ko aaraam
Arz karoon dil kee ye baat karte huey Aapke charnon mein pranaam.

Aap shehenshah sampoorna srishti ke
Mere karam mohtaaj Aapki kripa drishti ke
Kaheen aur jaane kee zaroorat ya chaahat nahin
Kyunki Aapki sharan mein mere saath jo hoga, vo hoga sahi.

Aapke charnon mein jo rahega mera basera
Toh raat mein bhi rahega savera
Kya hua agar pareshaaniyon ne hai ghera
Srishti ka shehenshah swayam hai rakshak mera.

🌹🌹🌹🌹🌹🌹🌹

Jai Guruji 🙏🙏
Dhirja

Srishti Ka Shehenshah (03/12/2025)

March 11, 2025

Om Namaha Shivaya
Aaj Ka Suvichaar 🙏🏻🙏🏻

#2578

    Mera Pehla Aur Aakhiri Vishwaas

Param poojya Guruvar mere,

Aap Hain mera pehla aur aakhiri vishwaas
Aap dikhein ya nahin par jaanti hoon ki Aap Hain aas paas
Chalta hai mera har shwaas dekhkar mere bheetar Aapka vaas
Shukr hai Aapka ki Aapke sangg rishta hai itna khoobsoorat aur khaas.

Aapne Apni sharan mein mujhe sweekaara
Mujhe mil gaya Aap mein sabse shreshth sahaara
Jabb se Aapke charnon mein jeevan hai guzaara
Jaan gayi ki awashya milega meri naav ko kinaara.

Aapki drishti hai athak
Aapki mahima athaah aur akath
Aapke charnon mein hai meri manzil
Abb toh Aapke paas baithey rehne ka karta hai dil
Hansna, rona, paapon ka dhona
Sab hota rahe Aapki hee sharan mein
Mera Aapki yaad mein rehkar Aap mein khona
Ye hota rahe Aapke kamal charan mein.

Sunte Hain Aap sab kuch
Jaante Hain Aap sab kuch
Kuch kahiye ya na kahiye
Mujhe sambhaalte rahiye
Hamesha kee tareh
Har pal, har jageh.

🌹🌹🌹🌹🌹🌹🌹

Jai Guruji 🙏🙏
Dhirja

Mera Pehla Aur Aakhiri Vishwaas (03/11/2025)

March 10, 2025

Om Namaha Shivaya
Aaj Ka Suvichaar 🙏🏻🙏🏻

#2577

           Subah Ko Laane Wala Sooraj

Param poojya Guruji,

Subah ko laane wala sooraj karey Aapka dhanyawaad
Har peher chale paakar Aapka ashirwaad
Har raat taare Aapke sajde mein aakar karein shukrana
Raat beet jaaye toh phir agli raat bhi banaate hain sajde ka bahaana
Timtimaate hain ve chaav se
Karte huey sajda bhaav se.

Ve rehte hain goad mein aasmaan kee
Aasmaan toh khud hee hai goad mein Aap Bhagwaan kee
Aap Hain sabhi ke aadhaar
Aapse hee sabka sansaar.

Sooraj Aapki agya se ho uday
Aapki agya se aaye ya rukey pralay
Aap hee prakriti ke sanchaalak
Aap srishti ke pratipaalak.

Aapki khidamat mein beeta har pal
Aapki rehmat se ho jaata hai safal
Yug parivartan ka samaa Aapki sharan mein raha hai tal
Aapki kripa se badhta rahe hamaara manobal
Taaki hum de paayein sakaaraatmak yogdaan sansaar ko
Aur Aapki meher se sampoorna sansaar ka uddhaar ho.

🌹🌹🌹🌹🌹🌹🌹

Jai Guruji 🙏🙏
Dhirja

Subah Ko Laane Wala Sooraj (03/10/2025)

March 9, 2025

Om Namaha Shivaya
Aaj Ka Suvichaar 🙏🏻🙏🏻

#2576

                 Is Path Par Safal

Guruji Hain har bhakt ka sahaara
Behti rahe Unke prati bhakti bhaav kee dhaara
Kyunki isee disha mein hai sukh saara
Isee disha mein hai bhavsaagar ka kinaara.

Isee disha mein badhkar sudharegi dasha
Isliye bahut zaroori hai chadhna bhakti ka nasha
Guruji kee bhakti ka path
Beshak nahin hai aasaan
Jeevan toh hai hee ek imtehaan
Shukr hai ki angg sangg Hain Guruji mahaan.

Is path ke kadam kadam par
Hota rehta hai Guruji kee kripa ka asar
Jo kabhi toh aa jaata hai bhakt ko nazar
Lekin kabhi vo hota hai is kripa se bekhabar.

Beshak aise mein bhakt kee shikaayat rehti hai
Phir bhi kripa toh barasti rehti hai
Jabb kabhi bhakt ko aa jaati hai samajh
Toh uskee duvidhaayein jaati hain sulajh.

Ye safar nahin hai kewal shareer ke liye
Ye safar hai rooh kee taqdeer ke liye
Chaurasi lakh yuniyon ke baad mila hai mauka
Chodna hoga dena khud ko dhokha.

Guruji se ardaas ki Ve maaf karte chalein
Guruji ke sahaare mann saaf karte chalein
Na jaane har unn sab bhakton ke jeevan ke kitne sooraj dhale
Jabb ve bhakti ke path par chale
Lekin bheetar hua divya noor se ujjwal
Isliye anivaarya hai hona is path par safal.

🌹🌹🌹🌹🌹🌹🌹

Jai Guruji 🙏🙏
Dhirja

Is Path Par Safal (03/09/2025)

March 8, 2025

Om Namaha Shivaya
Aaj Ka Suvichaar 🙏🏻🙏🏻

#2575

Kahaani Ek Maanav Ke Jeevan Kee

Ye kahaani hai ek maanav ke jeevan kee
Guruji kee kripa se sadgati kee oar badhauti hui uske mann kee
Uskee kismat kee hui uske sangg ann-bann
Aa gaye ek din uske saamne uske praarabdh karam
Bach toh nahin thaa sakta
Unhe bhogte huey thaa vo thakta
Kisee punyamayi manushya ke dwaara
Mila usey Guruji ka divya dwaara
Phir toh aisa safar hua shuru
Jo karaa sakte Hain kewal ek pooran Guru.

Aisa nahin ki mushkilein gayi ruk
Lekin ve Guruji ke samaksh gayin jhuk
Isliye maanav ko sehni padi mushkilein apne bhaagya se kumm
Guruji ne sakaaraatmakta bakhshi aur usey kumm lagne lagey apne gumm.

Karmon ka khel hai sab, veh samajh gaya
Jitna uljha thaa pehle, utna hee abb sulajh gaya
Sabse badi baat thi usne Guruji kee maani
Buss, phir Guruji kee marzi se chali uskee zindagaani.

Paakar Guru sharan mein panaah
Hota chala vo beparwaah
Guruji se ho gaya uska aisa judaav
Ki khatm honei lagaa vyarth kee baaton se lagaav
Chhaayi uske bheetar Guruji ke naam kee aisee masti
Ki vo bhoolta gaya apni hee hasti
Uske bheetar banaa Guruji ke naam ka aisa dham
Ki mann se honei lagaa har teerath ko pranaam
Kyunki veh jaan gaya
Aur maan gaya
Ki sab mein Hain Guruji
Aur Guruji mein Hain sabb
Na raha usey koi sanshay abb
Ki Guruji swayam Hain Rabb.

Guruji kee meher se veh banda bann gaya
Har din Guruji mein aur bhi zyada ramm gaya
Uske niswaarth yogdaan se behtar hua sansaar
Guruji ke saanidhya mein usne bhavsaagar ko kiya paar.

🌹🌹🌹🌹🌹🌹🌹

Jai Guruji 🙏🙏
Dhirja

March 7, 2025

Om Namaha Shivaya
Aaj Ka Suvichaar 🙏🏻🙏🏻

#2574

        Pyaas Aapke Simran Kee

Param poojya Guruji Maharaj,

Pyaas Aapke simran kee
Aas Aapke darshan kee
Preet Aapke kamal charan kee
Hain ye prerna mere pal pal kee.

Aapki soch, Aapki yaad
Aapke sangg baat
Aapka saath
Hain ye pyaare vardaan Aap Guruvar ke.

Aapki sewa, Aapka satsang
Aapki bandagi ka rangg
Aapki sadh sangat ka sangg
Hain ye utsah strot mere har aaj aur kal ke.

Aapki awaaz
Aapka ruhaani raaz
Aapki maujoodagi ka ehsaas
Hain ye chetna strot mere jeevan ke.

Aapke vachan
Aapka hukum
Aapki sharan
Hain ye shaasak mere mann ke.

Aapki guruyaayee
Aapki vadiyaayee
Aapki roshni jo sab mein hai samaayee
Hain ye shikshak mere har kshan ke.

Aapki komalta aur saralta
Aapki gambheerta aur nirmalta
Aapki taralta
Hain ye stutya gunn mere Bhagwan ke.

Mere Bhagwan, Aap Guruvar
Mere mata, pita, murshid, mere Har
Kabhi na chodoon mai Aapka dar
Deejiyega aisee bhakti ka var.

🌹🌹🌹🌹🌹🌹🌹

Jai Guruji 🙏🙏
Dhirja

Pyaas Aapke Simran Kee (03/07/2025)