Author: dhirjabhat

February 24, 2025

Om Namaha Shivaya
Aaj Ka Suvichaar 🙏🏻🙏🏻

#2563

        Guruji Kee Yaad Mein Raho

Guruji kee yaad mein raho
Guruji kee baatein suno aur kaho
Na bhoolo ki Ve Hain angg sangg
Toh jeevan kee gati mein hoga aisa anokhapann
Ki shukrana mein aane lagega mann
Chaahe hon sukh ke ya dukh ke kshan.

Aur jitna shukrana karte rahoge
Guruji ke prem mein jitna bahoge
Shant aur sthir hota jaayega mann
Chaahe mushkilein bhi jhel raha ho jeevan.

Guruji kee baatein, Guruji ke geet
Guruji ka shukrana, Guruji se preet
Inse khilee rahegi raah
Toh laut aayega agar kho bhi gaya thaa utsaah
Jald ya dheere dheere ye ho
Guruji hee jaanein vo
Bhakti ka beej jisne diya bo
Toh vo beej yoon hee nahin jaayega kho
Vo upjega awashya
Aur sudhaarega bhavishya.

Guruji se prem hee bhakti hai
Bhakti mein bharpoor shakti hai
Jo dete Hain Guruji swayam
Aur Ve sudhaarte Hain karam.

Jaise jaise sudharte jaayenge karam
Behtar hota jaayega jeevan
Saubhagya se milee hai Guruji kee sharan
Sanvar jaayega janam maran.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Yaad Mein Raho (02/24/2025)

February 23, 2025

Om Namaha Shivaya
Aaj Ka Suvichaar 🙏🏻🙏🏻

#2562

    Nahin Bann-na Hai Kuch Khaas

Param poojya pita mere,
Mere pyaare Guruji Maharaj,

Nahin bann-na hai kuch khaas
Buss, bann kar rehna hai Aapka das
Aapke charnon ke taley mil jaaye chhoti si jageh
Vaheen ho mera ashiyaana, vaheen ho mera thikaana.

Mujh mein na hai aisee kaabiliyat
Buss, hai ye meri tamanna aur meri neeyat
Aap toh mere bheetar aur baahar kee jaante Hain
Aap jaanein meri raahon mein kahaan phool kahaan kaante hain.

Jaanti hoon mujhe apni taraf se chalna hai hokar sachet
Ye bhi jaanti hoon ki Aapki mujh par nazar hai
Isliye befikr bhi hoon, beparwaah si bhi
Kshama kar dena, Prabhu, galati ho jaaye jabb kabhi.

Mai beshak hoon gustaakhiyon ka bhandaar
Lekin Aap Hain dayaavaan kirpadhaar
Apni chaukhat par Aapne bulaaya hai
Aapki agya se mainey sir ko jhukaaya hai
Mujhe Apne charnon mein diya hai Aapne sthaan
Aapki karuna anant hai, mere maalik meharbaan.

Yahaan par aakar jo mila hai mujhe
Mai shabdon mein bayaan nahin kar sakti
Aapki prashansa, Aapki mahima ka gungaan
Mai din raat karte nahin thakti.

Arzi hai Aapse ki saari sangat ka karte rahein Aap kalyaan
Nayi bhor laaye naya ujaala sabke mann mein aur jeevan mein
Aap sarvavyaapi Hain, bheetar bhi, jal thal mein bhi, aur gagan mein
Mera sir sada Aapke charnon mein jhuka rahe vinamr vandan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Nahin Bann-na Hai Kuch Khaas (02/23/2025)

February 22, 2025

Om Namaha Shivaya
Aaj Ka Suvichaar 🙏🏻🙏🏻

#2561

Aapki Meher Se Mai Kabhi Na Bhooloon

Kaun nindak, kaun shubhchintak
Kya apmaan, kya sammaan
Jabb angg sangg hon Guruji meharbaan
Toh phir kyun aisee baaton se hona pareshaan?

Kya khushi, kya gumm
Kyun kabhi ho aankh numm
Jabb Guruji angg sangg hon har kshan
Phir kyun asthir ho mann?

Guruji se judkar bhi
Kyun hota hai aisa
Guruji jaisa chaahein
Shaayad bhakt kar nahin paata vaisa?

Guruji kee inaayat mein kamee ho nahin sakti
Ve toh param pita Paramatama Hain sansaar ke
Kamee bhakt aur bhakti mein hoti hai yakeenan
Isliye prayaas karte rehne hongei khud mein hee sudhaar ke.

Guruji, doojon ko toh mai kya kahoon
Mai toh apna hee keh sakti hoon
Galatiyon kee ik putli hoon mai
Jo Aapke bina nahin reh sakti hoon.

Maanti hoon ki meri bhakti mein hain khaamiyan anginat
Jaanti hoon ki Aap sada hee bakhshte Hain sumat
Par ye moh maya mein matvala mann rehta hai sataata
Lakh koshishein karti hoon par ye khali nahin ho paata.

Yakeenan meri bhakti mein nahin hai paryaapt kashish
Ya phir vishwaas mein hai kamee
Shaayad shraddha kumm padd jaati hai
Beshak hoti ho aankhon mein namee?

Beshak jeevan mein mushkilein aayi hain baar baar
Phir bhi badhta gaya hai har din Aapke liye pyaar
Ye hai Aapki daya aur Aapki vadiyaayee
Ye hai Aapke ashirwaad kee gehraayee
Varna mai toh gayi hoti himmat haar
Aur shukrana na kar paati aakar Aapke dwaar.

Lekin Aapne sada aisee mamta barsaayee hai
Hamesha aisee karuna dikhaayee hai
Har pal aisee nayi seekh sikhaayee hai
Ki ye nacheez Aapka shukr karti aayi hai.

Buss, karti rahoon Aapka shukrana
Aapke shukrane mein rahe mera har shwaas deewaana
Mujhe Aapka dar chodkar kaheen aur nahin hai jaana
Guruvar mere, Aapki meher se mai kabhi na bhooloon Aapse wafa nibhaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Meher Se Mai Kabhi Na Bhooloon (02/22/2025)

February 21, 2025

Om Namaha Shivaya
Aaj Ka Suvichaar 🙏🏻🙏🏻

#2560

         Nav-Nirmaan 

Parivartan toh hota aaya kabb se
Hukm paakar uss Rabb se
Jo Guruji ke roop mein aaye lekar Shivji ke avatar ka sthaan
Karne sangat ko tayyaar jabb pratyaksh ho nav-nirmaan.

Aa raha hai vela nav-nirmaan ka
Dhyan na chodna Bhagwaan ka
Bhakti mein apaar shakti hai
Yahee maansik santulan kee yukti hai.

Bhakti mein ooncha prem bhaav ka sthaan
Jis se prasann hon Guruji meharbaan
Unkee rehmat se mitey agyan
Jiske dwaara sehej ho paaye nav-nirmaan.

Jabb hona ho nav-nirmaan
Puraani imaarat ka khandan aksar zaroori ho jaata hai
Pooran Guru ke ashish se pade jabb neev nirmal gyan kee
Toh nishchay hee nayi imaarat ka wajood shuru ho jaata hai.

Guruji ka ashish barasta rahega
Toh imaarat ka wajood tufaan ko bhi sahega
Aur jabb thamm jaayega tufaan
Aur khatm ho jaayenge imtehaan
Toh naya mukaam laayega ye nav-nirmaan
Saamanjasya se paripoorna hoga bheetar aur baahar ka jahaan.

Zara sochiye, kitnee sakaaratmakta hogi bheetar aur aas-paas
Sabb chaynn se le paayenge gehra shwaas
Nav-nirmaan ka vela abb duur nahin, balki aata jaa raha hai paas
Kyun na uske aagaman ke liye badhaayein insaaniyat nibhaane ka prayaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Nav-Nirmaan (02/21/2025)

February 20, 2025

Om Namaha Shivaya
Aaj Ka Suvichaar 🙏🏻🙏🏻

#2559

                        Meri Pakad

Meri pakad kamzor Guruji
Meri pakad badi kamzor
Aap thaam leejiye mujhe yoon
Ki mera dhyan na jaaye kaheen aur.

Aapki pakad pakki badi
Mai Aapke sahaare hoon khadi
Baavajood har tufaan ke
Sabb sadke Aapke daya daan ke.

Aapki pakad mein rahoongi surakshit
Aapki pakad mein hai mera hitt
Aapki pakad mein Aapko yoon chete mera chitt
Ki Aapki pakad mein meri ‘mai’ jaaye mitt.

Aapki pakad mein aisee panaah paaoon
Ki Aapki pakad mein samaa jaaoon
Jaise saagar mein boond samaaye
Aur uska astitva hee khatm ho jaaye
Bannkar saagar ka hissa
Chale uss boond ke jeevan ka kissa
Saagar ke aanchal mein vo rehti rahe
Saagar kee leheron ke sangg vo behti rahe
Saagar ko Apna daata vo kehti rahe
Saagar kee suraksha mein tufaan ko bhi sehti rahe.

Saagar hee saagar ho har oar
Toh tufaan agar boond ko le bhi jaaye kaheen aur
Toh saagar ka atoot hissa vo banee rahegi
Beparvaah, khud ko kho kar
Apni mayl saagar mein dho kar.

Vaise bhi meri khud kee nahin hai koi aukat
Mera toh har shwaas hai Aapki dee hui saugat
Dete rahiyega mujhe sada ke liye
Apni prataapi pakad kee panaah
Mai apni ‘mai’ ko khokar
Aap mein samaaoon hokar beparvaah.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Meri Pakad (02/20/2025)

February 19, 2025

Om Namaha Shivaya
Aaj Ka Suvichaar 🙏🏻🙏🏻

#2558

        Guruji Ka Vaas

Tere bheetar hai Guruji ka vaas
Isliye tu bilkul bhi na ho udaas
Ve Hain tere itne paas
Ki jo tu ekaagr hokar karega prayaas
Toh Unhe mehsoos kar paayega tera har shwaas
Aur phir tu na rahega udaas.

Isliye karna hoga prayatn ekaagr rehne ka
Sab kuch aas paas hotey huey bhi Guruji ke bhaav mein behne ka
Guruji ne dee hai simran aur sewa kee bakhshish
Usey saadharan matt samajh lena
Sewa ke dauran bhi karna Guruji ka manan
Ve utne hee paas lagenge jitna hoga tere dwaara Unka chintan.

Rehna Guruji kee yaad mein tu har pal
Toh Unke saanidhya mein beetega tera aaj aur kal
Aur jaise jaise jhaankega tu apne girebaan mein
Vaise vaise jaanega apne dosh
Kayi se tu hai itna anjaan
Ki unhe jaan kar udd jaayenge tere hosh!
P
Lekin Guruji kee meher laayegi rangg
Kyunki Ve toh sada Hain angg sangg
Kshamaasheel Hain Ve, karenge tujhe maaf
Tera antas Unkee kripa aur teri koshish se hota jaayega saaf
Aur bhi anandmayi hota jaayega Guruji kee maujoodagi ka ehsaas
Tujhe bodh hoga ki Guruji sada hotey Hain tere bheetar aur aas paas.

Isliye tu bilkul udaas na ho
Buss, tu Guruji mein jaa kho
Jiske angg sangg hon Guruji swayam
Nishchay hee sanvarta hai uska jeevan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ka Vaas (02/19/2025)

February 18, 2025

Om Namaha Shivaya
Aaj Ka Suvichaar 🙏🏻🙏🏻

#2557

         Dho Le Mann Kee Aankhein

Dho le mann kee aankhein
Guruji kee kripa ke amrit se
Varna aankhon mein padi ahankar kee dhool
Tujhe duur rakhegi tere hitt se.

Ahankar kee dhool hai badi maheen
Lekin dekhne kee shakti ko kar deti hai ksheen
Na baahar kee asaliyat saaf dikhti hai na hee bheetar kee
Raahein lambi lagne lagti hain Guruji Maharaj ke dar kee.

Jabb takk aankhon mein padi hai ye dhool
Tabb takk aur bhi aasaan hai honi koi bhool
Kyunki yaad hee nahin rehta hai yathaarth ka mool
Praathamikta paane lagte hain mann mein vichaar fizool.

Jahaan ahankar ho, vahaan neevanpann nahin
Aur neevanpann nahin, toh ruhaani chadhaayi na hogi sahi
Ruhaani oonchaayee par pahunchne ke liye khud jhukna hai anivaarya
Jo ho nahin sakta agar ahankar se kiya jaayega kaarya.

Sewa, simran, satsang kee daat
Dete Hain Guruvar nath
Inke sarovar ka amrit hai Guruji kee kripa se paripoorna
Yatna kar le, honei de pavitrikaran, kalyaan honei de sampoorna.

Dhool hatt jaayegi toh sab saaf aayega nazar
Ahankar ka aakraman ruk jaayega toh pavitrikaran ka hoga behtar asar
Guruji toh aaye Hain karne kalyaan
Mann kee aankhon se keh de, na banein ve aur naadaan.

Pukaar raha hai tujhe swachh aasmaan
Ahankar kee dhool ko lene de vidaayi kee udaan
Guruji Maharaj Hain deendayal karunanidhaan
Tu koshish toh kar, Ve teri koshish ko denge safal anjaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dho Le Mann Kee Aankhein (02/18/2025)

February 17, 2025

Om Namaha Shivaya
Aaj Ka Suvichaar 🙏🏻🙏🏻

#2556

                       O Hakeekat

O hakeekat, tujhe kaun sakaa hai samajh
Kitne jann paheliyon mein jaate hain ulajh
Aur pehchaan nahin paate mithya se duur ka veh noor
Jismein basaa hai yathaarth aur gyan goodh.

Mithya ko satya lena maan
Aisee pravritti paal leta hai insaan
Aur asliyat ko nahin sakta jaan
Phir vo hota hai pareshaan.

Kaisi ajab hai ye vidambanaa
Ki paraaye ko vo leta hai apna banaa
Aur apne ko jaata hai bhool
Phir usey chubhta hai dhokhe ka shool.

Koi koi toh phir jaag jaata hai
Mithya kee gehri neend se
Koi sota reh jaata hai
Bheetar kee aankhein moond ke.

Guruji se judaav hai bada laabhkaari
Is se hoti rehti hai saath saath tayyaari
Asaliyat ko pehchaan paane kee
Bhog bhogte huey aagey badhte jaane kee.

Na koi vehem, na karmakand, na andhvishwaas
Guruji kee sharan mein Unke liye bhaav kee pyaas
Zaroorat nahin jaane kee idhar udhar kaheen aur
Buss, Guruji sangg apne seedhe rishte par dena hai zor
Swayam sudhaar par karna hai gaur
Badhte huey Guruji kee oar.

Bhakt ke ek kadam Unkee oar badhne par
Guruji bhakt kee oar badhaayein kadam anek
Bhakt apna bhoot bhavishya na jaane
Parantu Guruji sabb lete Hain dekh.

O hakeekat, ye tathya tera
Ki mere angg sangg hai Guru mera
Ye tathya karta hai mujhe aashwast har kshan
Aur Unkee suraksha mein beet jaata hai jeevan.

Tu jo bhi paheliyan laaye saamne
Guruji sada aate Hain mera haath thaamne
Teri galiyon mein se guzarte huey, o hakeekat
Mujh par barasti rehti hai Guruji kee inaayat
Ve prerna strot Hain mere har prayaas ka
Ve hee Hain sampoorna sahaara mere har shwaas ka.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

O Hakeekat (02/17/2025)

February 16, 2025

Om Namaha Shivaya
Aaj Ka Suvichaar 🙏🏻🙏🏻

#2555

    Sukh Dukh Ka Hai Kaisa Sapna 

Sukh dukh ka hai kaisa sapna
Na sukh, na hee dukh shaayad rahega apna
Pichhle punya aur paap ke hain ye parinaam
Guruji kripa karein ki inhe jhelna ho jaaye aasaan.

Kabhi ye hansaate kabhi ye rulaate
Ye toh rahenge yoon hee aate jaate
Jeevan ajab sa rangg manch hai
Yahaan maya ka prataapi prapanch hai.

Sthaayi nahin ye sabb
Sthaayi hai toh kewal Rabb
Guruji ke roop mein aaye Ve
Sangat ko itne bhaaye Ve
Ki sangat hui Unkee deewaani
Paakar Unkee meharbaani.

Bhautikvaad se kaheen zyada
Guruji kee meharbaani hai ruhaani
Kyunki bhautik padaarthon ke aadhaar par beet toh jaati hai zindagaani
Par uddhaar mumkin nahin hota hai bin ruhaani meharbaani.

Guruji maya pati hotey huey bhi maya se Hain alag
Leela hai ye Unkee ki maya se chalta hai ye jagg
Yahee insaan ka imtehaan hai
Ki veh kis hadd takk maya ka gulam hai.

Guruji kee kripa se he mil paaye safalta imtehaan mein
Varna toh bhakt raasta bhatak hee jaaye duniyavi tufaan mein
Is tufaan mein beshak mitt jaaye sabb
Kintu hamesha sthaayi rahenge Rabb.

Aur Guruji Hain Rabb swayam
Unhee ko arpit kar har karam
Beet jaaye jo ye janam
Toh kalyaan kee oar badhte rahenge kadam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sukh Dukh Ka Hai Kaisa Sapna (02/16/2025)

February 15, 2025

Om Namaha Shivaya
Aaj Ka Suvichaar 🙏🏻🙏🏻

#2554

         Mann Ka Koi Aakaar Nahin

Mann ka koi aakaar nahin
Na roka jaaye usey toh usey apni marzi lagti hai sahi
Manmaani mein hokar leen
Insaan hota jaata hai ksheen.

Mann hee meet, mann hee dushman
Mann se nark ya swarg baney jeevan
Mann mein vann hai, mann mein hee upvan
Mann mein upjein kaante, mann mein hee khilein suman.

Saari baat hai mann kee
Maansik avastha aur vandan kee
Gehraayee Guruji sangg bandhan kee
Bholi bhavna hai ya nahin mann kee.

Mann mein vikaar na karein vihaar
Mann mein shuddh vichaar aur sanskaar
Mann par anushaasan baarambaar
Toh mann ka sudharta rahe vyavhaar.

Jabb mann par Guruji kee chhavi chhaaye
Jabb mann poori tareh se Guruji mein leen ho jaaye
Mann nirantar gaaye ‘Om Namaha Shivaay’
Mann Guruji ke kareeb hota jaaye.

Na koi dikhaawa, na hee koi shor
Buss, har pal khichhaav Guruji kee oar
Mann mein aathon peher prem bhaav kee bhor
Chaahe chal raha ho jaisa bhi duniyaavi daur.

Guruji kee meher se mann mein nirantar simran
Guruji kee kripa se mann ne tyaag diya ho har bhram
Mann mein goonjte rahein Guruji ke vachan
Mann se hota rahe Guruji ka stavan.

Mann ka jo sudhar jaaye vyavhaar
Toh sanvar jaaye bheetar ka sansaar
Guruji ka ashirwaad sakta hai taar
Apni oar se koshish rahe har pal, har vaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mann Ka Koi Aakaar Nahin (02/15/2025)